| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၄. မာလုက္ယပုတ္တသုတ္တဝဏ္ဏနာ
4. Mālukyaputtasuttavaṇṇanā
၂၅၇. စတုတ္ထေ မာလုက္ယပုတ္တောတိ မာလုက္ယဗ္ရာဟ္မဏိယာ ပုတ္တော။ ဧတ္ထာတိ ဧတသ္မိံ တဝ ဩဝာဒယာစနေ။ ဣမိနာ ထေရံ အပသာဒေတိပိ ဥသ္သာဒေတိပိ။ ကထံ? အယံ ကိရ ဒဟရကာလေ ပစ္စယေသု လဂ္ဂော ဟုတ္ဝာ ပစ္ဆာ မဟလ္လကကာလေ အရညဝာသံ ပတ္ထေန္တော ကမ္မဋ္ဌာနံ ယာစတိ။ အထ ဘဂဝာ ‘‘ဧတ္ထ ဒဟရေ ကိံ ဝက္ခာမ, မာလုက္ယပုတ္တော ဝိယ တုမ္ဟေပိ တရုဏကာလေ ပစ္စယေသု လဂ္ဂိတ္ဝာ မဟလ္လကကာလေ အရညံ ပဝိသိတ္ဝာ သမဏဓမ္မံ ကရေယ္ယာထာ’’တိ ဣမိနာ အဓိပ္ပာယေန ဘဏန္တော ထေရံ အပသာဒေတိ နာမ။ ယသ္မာ ပန ထေရော မဟလ္လကကာလေဝ အရညံ ပဝိသိတ္ဝာ သမဏဓမ္မံ ကာတုကာမော, တသ္မာ ဘဂဝာ ‘‘ဧတ္ထ ဒဟရေ ကိံ ဝက္ခာမ, အယံ အမ္ဟာကံ မာလုက္ယပုတ္တော မဟလ္လကကာလေပိ အရညံ ပဝိသိတ္ဝာ သမဏဓမ္မံ ကာတုကာမော ကမ္မဋ္ဌာနံ ယာစတိ။ တုမ္ဟေ တာဝ တရုဏကာလေပိ ဝီရိယံ န ကရောထာ’’တိ ဣမိနာ အဓိပ္ပာယေန ဘဏန္တော ထေရံ ဥသ္သာဒေတိ နာမာတိ ယောဇနာ။
257. Catutthe mālukyaputtoti mālukyabrāhmaṇiyā putto. Etthāti etasmiṃ tava ovādayācane. Iminā theraṃ apasādetipi ussādetipi. Kathaṃ? Ayaṃ kira daharakāle paccayesu laggo hutvā pacchā mahallakakāle araññavāsaṃ patthento kammaṭṭhānaṃ yācati. Atha bhagavā ‘‘ettha dahare kiṃ vakkhāma, mālukyaputto viya tumhepi taruṇakāle paccayesu laggitvā mahallakakāle araññaṃ pavisitvā samaṇadhammaṃ kareyyāthā’’ti iminā adhippāyena bhaṇanto theraṃ apasādeti nāma. Yasmā pana thero mahallakakāleva araññaṃ pavisitvā samaṇadhammaṃ kātukāmo, tasmā bhagavā ‘‘ettha dahare kiṃ vakkhāma, ayaṃ amhākaṃ mālukyaputto mahallakakālepi araññaṃ pavisitvā samaṇadhammaṃ kātukāmo kammaṭṭhānaṃ yācati. Tumhe tāva taruṇakālepi vīriyaṃ na karothā’’ti iminā adhippāyena bhaṇanto theraṃ ussādeti nāmāti yojanā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၄. မာလုက္ယပုတ္တသုတ္တံ • 4. Mālukyaputtasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၄-၁၀. မာလုက္ယပုတ္တသုတ္တာဒိဝဏ္ဏနာ • 4-10. Mālukyaputtasuttādivaṇṇanā
