| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. মানদিন্নসুত্তং
10. Mānadinnasuttaṃ
৩৯৬. তংযেৰ নিদানং। তেন খো পন সমযেন মানদিন্নো গহপতি আবাধিকো হোতি দুক্খিতো বাল়্হগিলানো। অথ খো মানদিন্নো গহপতি অঞ্ঞতরং পুরিসং আমন্তেসি – ‘‘এহি ত্ৰং, অম্ভো পুরিস…পে॰… ন মে, ভন্তে, খমনীযং ন যাপনীযং। বাল়্হা মে দুক্খা ৰেদনা অভিক্কমন্তি, নো পটিক্কমন্তি; অভিক্কমোসানং পঞ্ঞাযতি, নো পটিক্কমোতি। এৰরূপায চাহং, ভন্তে, দুক্খায ৰেদনায ফুট্ঠো সমানো কাযে কাযানুপস্সী ৰিহরামি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং; ৰেদনাসু…পে॰… চিত্তে…পে॰… ধম্মেসু ধম্মানুপস্সী ৰিহরামি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং। যানি চিমানি, ভন্তে, ভগৰতা পঞ্চোরম্ভাগিযানি সংযোজনানি দেসিতানি, নাহং, ভন্তে, তেসং কিঞ্চি অত্তনি অপ্পহীনং সমনুপস্সামী’’তি। ‘‘লাভা তে, গহপতি, সুলদ্ধং তে, গহপতি! অনাগামিফলং তযা, গহপতি, ব্যাকত’’ন্তি। দসমং।
396. Taṃyeva nidānaṃ. Tena kho pana samayena mānadinno gahapati ābādhiko hoti dukkhito bāḷhagilāno. Atha kho mānadinno gahapati aññataraṃ purisaṃ āmantesi – ‘‘ehi tvaṃ, ambho purisa…pe… na me, bhante, khamanīyaṃ na yāpanīyaṃ. Bāḷhā me dukkhā vedanā abhikkamanti, no paṭikkamanti; abhikkamosānaṃ paññāyati, no paṭikkamoti. Evarūpāya cāhaṃ, bhante, dukkhāya vedanāya phuṭṭho samāno kāye kāyānupassī viharāmi ātāpī sampajāno satimā, vineyya loke abhijjhādomanassaṃ; vedanāsu…pe… citte…pe… dhammesu dhammānupassī viharāmi ātāpī sampajāno satimā, vineyya loke abhijjhādomanassaṃ. Yāni cimāni, bhante, bhagavatā pañcorambhāgiyāni saṃyojanāni desitāni, nāhaṃ, bhante, tesaṃ kiñci attani appahīnaṃ samanupassāmī’’ti. ‘‘Lābhā te, gahapati, suladdhaṃ te, gahapati! Anāgāmiphalaṃ tayā, gahapati, byākata’’nti. Dasamaṃ.
সীলট্ঠিতিৰগ্গো ততিযো।
Sīlaṭṭhitivaggo tatiyo.
তস্সুদ্দানং –
Tassuddānaṃ –
সীলং ঠিতি পরিহানং, সুদ্ধং ব্রাহ্মণপদেসং।
Sīlaṃ ṭhiti parihānaṃ, suddhaṃ brāhmaṇapadesaṃ;
সমত্তং লোকো সিরিৰড্ঢো, মানদিন্নেন তে দসাতি॥
Samattaṃ loko sirivaḍḍho, mānadinnena te dasāti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮-১০. লোকসুত্তাদিৰণ্ণনা • 8-10. Lokasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮-১০. লোকসুত্তাদিৰণ্ণনা • 8-10. Lokasuttādivaṇṇanā
