| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. මානදින්‌නසුත්‌තං
10. Mānadinnasuttaṃ
396. තංයෙව නිදානං. තෙන ඛො පන සමයෙන මානදින්‌නො ගහපති ආබාධිකො හොති දුක්‌ඛිතො බාළ්‌හගිලානො. අථ ඛො මානදින්‌නො ගහපති අඤ්‌ඤතරං පුරිසං ආමන්‌තෙසි – ‘‘එහි ත්‌වං, අම්‌භො පුරිස…පෙ.… න මෙ, භන්‌තෙ, ඛමනීයං න යාපනීයං. බාළ්‌හා මෙ දුක්‌ඛා වෙදනා අභික්‌කමන්‌ති, නො පටික්‌කමන්‌ති; අභික්‌කමොසානං පඤ්‌ඤායති, නො පටික්‌කමොති. එවරූපාය චාහං, භන්‌තෙ, දුක්‌ඛාය වෙදනාය ඵුට්‌ඨො සමානො කායෙ කායානුපස්‌සී විහරාමි ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං; වෙදනාසු…පෙ.… චිත්‌තෙ…පෙ.… ධම්‌මෙසු ධම්‌මානුපස්‌සී විහරාමි ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං. යානි චිමානි, භන්‌තෙ, භගවතා පඤ්‌චොරම්‌භාගියානි සංයොජනානි දෙසිතානි, නාහං, භන්‌තෙ, තෙසං කිඤ්‌චි අත්‌තනි අප්‌පහීනං සමනුපස්‌සාමී’’ති. ‘‘ලාභා තෙ, ගහපති, සුලද්‌ධං තෙ, ගහපති! අනාගාමිඵලං තයා, ගහපති, බ්‍යාකත’’න්‌ති. දසමං.
396. Taṃyeva nidānaṃ. Tena kho pana samayena mānadinno gahapati ābādhiko hoti dukkhito bāḷhagilāno. Atha kho mānadinno gahapati aññataraṃ purisaṃ āmantesi – ‘‘ehi tvaṃ, ambho purisa…pe… na me, bhante, khamanīyaṃ na yāpanīyaṃ. Bāḷhā me dukkhā vedanā abhikkamanti, no paṭikkamanti; abhikkamosānaṃ paññāyati, no paṭikkamoti. Evarūpāya cāhaṃ, bhante, dukkhāya vedanāya phuṭṭho samāno kāye kāyānupassī viharāmi ātāpī sampajāno satimā, vineyya loke abhijjhādomanassaṃ; vedanāsu…pe… citte…pe… dhammesu dhammānupassī viharāmi ātāpī sampajāno satimā, vineyya loke abhijjhādomanassaṃ. Yāni cimāni, bhante, bhagavatā pañcorambhāgiyāni saṃyojanāni desitāni, nāhaṃ, bhante, tesaṃ kiñci attani appahīnaṃ samanupassāmī’’ti. ‘‘Lābhā te, gahapati, suladdhaṃ te, gahapati! Anāgāmiphalaṃ tayā, gahapati, byākata’’nti. Dasamaṃ.
සීලට්‌ඨිතිවග්‌ගො තතියො.
Sīlaṭṭhitivaggo tatiyo.
තස්‌සුද්‌දානං –
Tassuddānaṃ –
සීලං ඨිති පරිහානං, සුද්‌ධං බ්‍රාහ්‌මණපදෙසං;
Sīlaṃ ṭhiti parihānaṃ, suddhaṃ brāhmaṇapadesaṃ;
සමත්‌තං ලොකො සිරිවඩ්‌ඪො, මානදින්‌නෙන තෙ දසාති.
Samattaṃ loko sirivaḍḍho, mānadinnena te dasāti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 8-10. ලොකසුත්‌තාදිවණ්‌ණනා • 8-10. Lokasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 8-10. ලොකසුත්‌තාදිවණ්‌ණනා • 8-10. Lokasuttādivaṇṇanā
