| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৯. মানকামসুত্তৰণ্ণনা
9. Mānakāmasuttavaṇṇanā
৯. সেয্যাদিভেদং মানং অপ্পহায তং পগ্গয্হ ৰিচরন্তো কামেন্তো নাম হোতীতি আহ ‘‘মানং কামেন্তস্স ইচ্ছন্তস্সা’’তি। দমতি চিত্তং এতেনাতি দমো, সতিসম্বোজ্ঝঙ্গাদিকো সমাধিপক্খিকো দমো। মনচ্ছট্ঠানি ইন্দ্রিযানি দমেতীতি দমো, ইন্দ্রিযসংৰরো। কিলেসে দমেতি পজহতীতি দমো, পঞ্ঞা। উপৰসনৰসেন কাযকম্মাদিং দমেতীতি দমো, উপোসথকম্মং। কোধূপনাহমক্খমানাদিকে দমেতি ৰিনেতীতি দমো, অধিৰাসনখন্তি। তেনেৰাতি ‘‘দমো’’তি সমাধিপক্খিকধম্মানং এৰ অধিপ্পেতত্তা । ‘‘ন মোনং অত্থী’’তি চ পাঠো। অসমাহিতস্সাতি সমাধিপটিক্খেপো জোতিতো।
9. Seyyādibhedaṃ mānaṃ appahāya taṃ paggayha vicaranto kāmento nāma hotīti āha ‘‘mānaṃ kāmentassa icchantassā’’ti. Damati cittaṃ etenāti damo, satisambojjhaṅgādiko samādhipakkhiko damo. Manacchaṭṭhāni indriyāni dametīti damo, indriyasaṃvaro. Kilese dameti pajahatīti damo, paññā. Upavasanavasena kāyakammādiṃ dametīti damo, uposathakammaṃ. Kodhūpanāhamakkhamānādike dameti vinetīti damo, adhivāsanakhanti. Tenevāti ‘‘damo’’ti samādhipakkhikadhammānaṃ eva adhippetattā . ‘‘Na monaṃ atthī’’ti ca pāṭho. Asamāhitassāti samādhipaṭikkhepo jotito.
মচ্চুধেয্যস্স পারতরণস্স ৰুচ্চমানত্তা ‘‘মোনন্তি চতুমগ্গঞাণ’’ন্তি ৰুত্তং। ন হি ততো অঞ্ঞেন তং সম্ভৰতি। জানাতি অসম্মোহপটিৰেধৰসেন পটিৰিজ্ঝতীতি অত্থো। মচ্চু ধীযতি এত্থাতি মচ্চুধেয্যং, খন্ধপঞ্চকং মরণধম্মত্তা। তস্সেৰাতি মচ্চুধেয্যস্সেৰ। পারং পরতীরভূতং নিব্বানং। তরেয্যাতি এত্থ তরণং নাম অরিযমগ্গব্যাপারোতি আহ ‘‘পটিৰিজ্ঝেয্য পাপুণেয্যা’’তি। তথা হি ৰক্খতি ‘‘পটিৰেধতরণং নাম ৰুত্ত’’ন্তি। ‘‘ন তরেয্য ন পটিৰিজ্ঝেয্য ন পাপুণেয্য ৰা’’তি অযমেত্থ পাঠো যুত্তো। অঞ্ঞথা ‘‘ইদং ৰুত্তং হোতী’’তিআদিৰচনং ৰিরুজ্ঝেয্য। একো অরঞ্ঞে ৰিহরন্তোতি একাকী হুত্ৰা অরঞ্ঞে ৰিহরন্তোতি অত্থো।
Maccudheyyassa pārataraṇassa vuccamānattā ‘‘monanti catumaggañāṇa’’nti vuttaṃ. Na hi tato aññena taṃ sambhavati. Jānāti asammohapaṭivedhavasena paṭivijjhatīti attho. Maccu dhīyati etthāti maccudheyyaṃ, khandhapañcakaṃ maraṇadhammattā. Tassevāti maccudheyyasseva. Pāraṃ paratīrabhūtaṃ nibbānaṃ. Tareyyāti ettha taraṇaṃ nāma ariyamaggabyāpāroti āha ‘‘paṭivijjheyya pāpuṇeyyā’’ti. Tathā hi vakkhati ‘‘paṭivedhataraṇaṃ nāma vutta’’nti. ‘‘Na tareyya na paṭivijjheyya na pāpuṇeyya vā’’ti ayamettha pāṭho yutto. Aññathā ‘‘idaṃ vuttaṃ hotī’’tiādivacanaṃ virujjheyya. Eko araññe viharantoti ekākī hutvā araññe viharantoti attho.
কামং হেট্ঠিমমগ্গেহিপি একচ্চস্স মানস্স পহানং লব্ভতি। অগ্গমগ্গেনেৰ পন তস্স অনৰসেসতো পহানন্তি আহ – ‘‘অরহত্তমগ্গেন নৰৰিধমানং পজহিত্ৰা’’তি। উপচারসমাধিপুব্বকো অপ্পনাসমাধীতি ৰুত্তং ‘‘উপচারপ্পনাসমাধীহী’’তি, ন উপচারসমাধিমত্তেন সমাধিমত্তং সন্ধায পচ্চেকং ৰাক্যপরিসমাপনস্স অযুজ্জনতো। ন হি অপ্পনং অপ্পত্তং লোকুত্তরজ্ঝানং অত্থি। ‘‘সুচেতসো’’তি চিত্তস্স ঞাণসহিততায লক্খণৰচনন্তি আহ ‘‘ঞাণসম্পযুত্ততাযা’’তিআদি। তথা হি ৰক্খতি ‘‘সুচেতসোতি এত্থ চিত্তেন পঞ্ঞা দস্সিতা’’তি। ‘‘সব্বধি ৰিপ্পমুত্তো’’তি সব্বেসু ভৰাদীসু ৰিসংসট্ঠচিত্তো সব্বসো খন্ধাদীহি ৰিসংযুত্তো হোতীতি ৰুত্তং ‘‘সব্বেসু খন্ধাযতনাদীসু ৰিপ্পমুত্তো হুত্ৰা’’তি। পরিঞ্ঞাপটিৰেধো সচ্ছিকিরিযপটিৰেধেন ৰিনা নত্থীতি আহ ‘‘তেভূমক…পে॰… ৰুত্ত’’ন্তি।
Kāmaṃ heṭṭhimamaggehipi ekaccassa mānassa pahānaṃ labbhati. Aggamaggeneva pana tassa anavasesato pahānanti āha – ‘‘arahattamaggena navavidhamānaṃ pajahitvā’’ti. Upacārasamādhipubbako appanāsamādhīti vuttaṃ ‘‘upacārappanāsamādhīhī’’ti, na upacārasamādhimattena samādhimattaṃ sandhāya paccekaṃ vākyaparisamāpanassa ayujjanato. Na hi appanaṃ appattaṃ lokuttarajjhānaṃ atthi. ‘‘Sucetaso’’ti cittassa ñāṇasahitatāya lakkhaṇavacananti āha ‘‘ñāṇasampayuttatāyā’’tiādi. Tathā hi vakkhati ‘‘sucetasoti ettha cittena paññā dassitā’’ti. ‘‘Sabbadhi vippamutto’’ti sabbesu bhavādīsu visaṃsaṭṭhacitto sabbaso khandhādīhi visaṃyutto hotīti vuttaṃ ‘‘sabbesu khandhāyatanādīsu vippamutto hutvā’’ti. Pariññāpaṭivedho sacchikiriyapaṭivedhena vinā natthīti āha ‘‘tebhūmaka…pe… vutta’’nti.
মানং নিস্সায দুচ্চরিতচরণতো মানো নামাযং সীলভেদনো। তস্মাতি মানস্স সীলপটিপক্খভাৰতো। ইমিনা পটিপক্খপ্পহানকিত্তনেন। অধিচিত্তসিক্খা কথিতা সরূপতো এৰাতি অধিপ্পাযো। এত্থ চিত্তেনাতি সু-সদ্দেন ৰিসেসিতচিত্তেন। তস্মাতি পঞ্ঞায দস্সিতত্তা। ইমিনাতি ‘‘সুচেতসো’’তি ইমিনা পদেন। অধিসীলসিক্খা অধিচিত্তসিক্খা অধিপঞ্ঞাসিক্খাতি সীলাদীনিপি ৰিসেসেত্ৰা ৰুত্তানি। সম্ভৰে ব্যভিচারে চ ৰিসেসনৰিসেসিতব্বতাতি তং দস্সেন্তো ‘‘অধিসীলঞ্চ নাম সীলে সতি হোতী’’তিআদিং ৰত্ৰা তদুভযং ৰিভাগেন দস্সেতুং ‘‘তস্মা’’তিআদি ৰুত্তং। পঠমনযো সঙ্করৰসেন পৰত্তোতি অসঙ্করৰসেন দস্সেতুং ‘‘অপিচা’’তিআদিনা দুতিযনযো ৰুত্তো। ‘‘সমাপন্না’’তি এত্থাপি ‘‘নিব্বানং পত্থযন্তেনা’’তি আনেত্ৰা সম্বন্ধো। ৰিপস্সনায পাদকভাৰং অনুপগতাপি তদত্থং নিব্বত্তনাদিৰসেন সমাপন্নাতি অযমত্থো পুরিমনযতো ৰিসেসো। অধিপঞ্ঞায পনেত্থ পুরিমনযতো ৰিসেসো নত্থীতি সা অনুদ্ধটা। সমোধানেত্ৰাতি পরিযাযতো সরূপতো চ সঙ্গহেত্ৰা। সকলসাসনন্তি তিস্সন্নং কথিতত্তা এৰ সিক্খত্তযসঙ্গহং সকলসাসনং কথিতং হোতীতি।
Mānaṃ nissāya duccaritacaraṇato māno nāmāyaṃ sīlabhedano. Tasmāti mānassa sīlapaṭipakkhabhāvato. Iminā paṭipakkhappahānakittanena. Adhicittasikkhā kathitā sarūpato evāti adhippāyo. Ettha cittenāti su-saddena visesitacittena. Tasmāti paññāya dassitattā. Imināti ‘‘sucetaso’’ti iminā padena. Adhisīlasikkhā adhicittasikkhā adhipaññāsikkhāti sīlādīnipi visesetvā vuttāni. Sambhave byabhicāre ca visesanavisesitabbatāti taṃ dassento ‘‘adhisīlañca nāma sīle sati hotī’’tiādiṃ vatvā tadubhayaṃ vibhāgena dassetuṃ ‘‘tasmā’’tiādi vuttaṃ. Paṭhamanayo saṅkaravasena pavattoti asaṅkaravasena dassetuṃ ‘‘apicā’’tiādinā dutiyanayo vutto. ‘‘Samāpannā’’ti etthāpi ‘‘nibbānaṃ patthayantenā’’ti ānetvā sambandho. Vipassanāya pādakabhāvaṃ anupagatāpi tadatthaṃ nibbattanādivasena samāpannāti ayamattho purimanayato viseso. Adhipaññāya panettha purimanayato viseso natthīti sā anuddhaṭā. Samodhānetvāti pariyāyato sarūpato ca saṅgahetvā. Sakalasāsananti tissannaṃ kathitattā eva sikkhattayasaṅgahaṃ sakalasāsanaṃ kathitaṃ hotīti.
মানকামসুত্তৰণ্ণনা নিট্ঠিতা।
Mānakāmasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৯. মানকামসুত্তং • 9. Mānakāmasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. মানকামসুত্তৰণ্ণনা • 9. Mānakāmasuttavaṇṇanā
