| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៤. មនាបទាយីសុត្តវណ្ណនា
4. Manāpadāyīsuttavaṇṇanā
៤៤. ចតុត្ថេ ឧគ្គោតិ គុណេហិ ឧគ្គតត្តា ឯវំលទ្ធនាមោ។ សាលបុប្ផកំ ខាទនីយន្តិ ចតុមធុរយោជិតេន សាលិបិដ្ឋេន កតំ សាលបុប្ផសទិសំ ខាទនីយំ។ តញ្ហិ បញ្ញាយមានវណ្ដបត្តកេសរំ កត្វា ជីរកាទិសម្ភារយុត្តេ សប្បិម្ហិ បចិត្វា សប្បិំ វិនិវត្តេត្វា កោលុម្ពេ បូរេត្វា គន្ធវាសំ គាហាបេត្វា បិទហិត្វា លញ្ឆេត្វា ឋបិតំ ហោតិ។ តំ សោ យាគុំ បិវិត្វា និសិន្នស្ស ភគវតោ អន្តរភត្តេ ទាតុកាមោ ឯវមាហ។ បដិគ្គហេសិ ភគវាតិ ទេសនាមត្តមេតំ, ឧបាសកោ បន តំ ភគវតោ ច បញ្ចន្នញ្ច ភិក្ខុសតានំ អទាសិ។ យថា ច តំ, ឯវំ សូករមំសាទីនិបិ។ តត្ថ សម្បន្នកោលកន្តិ សម្បន្នពទរំ។ សូករមំសន្តិ មធុររសេហិ ពទរេហិ សទ្ធិំ ជីរកាទិសម្ភារេហិ យោជេត្វា បក្កំ ឯកសំវច្ឆរិកសូករមំសំ។ និព្ពត្តតេលកន្តិ វិនិវត្តិតតេលំ។ នាលិយសាកន្តិ សាលិបិដ្ឋេន សទ្ធិំ មទ្ទិត្វា ជីរកាទិសំយុត្តេ សប្បិម្ហិ បចិត្វា ចតុមធុរេន យោជេត្វា វាសំ គាហាបេត្វា ឋបិតំ នាលិយសាកំ។ នេតំ ភគវតោ កប្បតីតិ ឯត្ថ អកប្បិយំ ឧបាទាយ កប្បិយម្បិ ន កប្បតីតិ វុត្តំ, សេដ្ឋិ បន សព្ពម្បិ តំ អាហរាបេត្វា រាសិំ កត្វា យំ យំ អកប្បិយំ, តំ តំ អន្តរាបណំ បហិណិត្វា កប្បិយំ ឧបភោគបរិភោគភណ្ឌំ អទាសិ។ ចន្ទនផលកំ នាតិមហន្តំ ទីឃតោ អឌ្ឍតេយ្យរតនំ, តិរិយំ ទិយឌ្ឍរតនំ, សារវរភណ្ឌត្តា បន មហគ្ឃំ អហោសិ។ ភគវា តំ បដិគ្គហេត្វា ខណ្ឌាខណ្ឌិកំ ឆេទាបេត្វា ភិក្ខូនំ អញ្ជនបិសនត្ថាយ ទាបេសិ។
44. Catutthe uggoti guṇehi uggatattā evaṃladdhanāmo. Sālapupphakaṃ khādanīyanti catumadhurayojitena sālipiṭṭhena kataṃ sālapupphasadisaṃ khādanīyaṃ. Tañhi paññāyamānavaṇṭapattakesaraṃ katvā jīrakādisambhārayutte sappimhi pacitvā sappiṃ vinivattetvā kolumbe pūretvā gandhavāsaṃ gāhāpetvā pidahitvā lañchetvā ṭhapitaṃ hoti. Taṃ so yāguṃ pivitvā nisinnassa bhagavato antarabhatte dātukāmo evamāha. Paṭiggahesi bhagavāti desanāmattametaṃ, upāsako pana taṃ bhagavato ca pañcannañca bhikkhusatānaṃ adāsi. Yathā ca taṃ, evaṃ sūkaramaṃsādīnipi. Tattha sampannakolakanti sampannabadaraṃ. Sūkaramaṃsanti madhurarasehi badarehi saddhiṃ jīrakādisambhārehi yojetvā pakkaṃ ekasaṃvaccharikasūkaramaṃsaṃ. Nibbattatelakanti vinivattitatelaṃ. Nāliyasākanti sālipiṭṭhena saddhiṃ madditvā jīrakādisaṃyutte sappimhi pacitvā catumadhurena yojetvā vāsaṃ gāhāpetvā ṭhapitaṃ nāliyasākaṃ. Netaṃ bhagavato kappatīti ettha akappiyaṃ upādāya kappiyampi na kappatīti vuttaṃ, seṭṭhi pana sabbampi taṃ āharāpetvā rāsiṃ katvā yaṃ yaṃ akappiyaṃ, taṃ taṃ antarāpaṇaṃ pahiṇitvā kappiyaṃ upabhogaparibhogabhaṇḍaṃ adāsi. Candanaphalakaṃ nātimahantaṃ dīghato aḍḍhateyyaratanaṃ, tiriyaṃ diyaḍḍharatanaṃ, sāravarabhaṇḍattā pana mahagghaṃ ahosi. Bhagavā taṃ paṭiggahetvā khaṇḍākhaṇḍikaṃ chedāpetvā bhikkhūnaṃ añjanapisanatthāya dāpesi.
ឧជ្ជុភូតេសូតិ កាយវាចាចិត្តេហិ ឧជុកេសុ។ ឆន្ទសាតិ បេមេន។ ចត្តន្តិអាទីសុ បរិច្ចាគវសេន ចត្តំ។ មុត្តចាគតាយ មុត្តំ។ អនបេក្ខចិត្តតាយ ចិត្តេន ន ឧគ្គហិតន្តិ អនុគ្គហីតំ។ ខេត្តូបមេតិ វិរុហនដ្ឋេន ខេត្តសទិសេ។
Ujjubhūtesūti kāyavācācittehi ujukesu. Chandasāti pemena. Cattantiādīsu pariccāgavasena cattaṃ. Muttacāgatāya muttaṃ. Anapekkhacittatāya cittena na uggahitanti anuggahītaṃ. Khettūpameti viruhanaṭṭhena khettasadise.
អញ្ញតរំ មនោមយន្តិ សុទ្ធាវាសេសុ ឯកំ ឈានមនេន និព្ពត្តំ ទេវកាយំ។ យថាធិប្បាយោតិ យថាជ្ឈាសយោ។ ឥមិនា កិំ បុច្ឆតិ? តស្ស កិរ មនុស្សកាលេ អរហត្តត្ថាយ អជ្ឈាសយោ អហោសិ, តំ បុច្ឆាមីតិ បុច្ឆតិ។ ទេវបុត្តោបិ អរហត្តំ បត្តតាយ តគ្ឃ មេ ភគវា យថាធិប្បាយោតិ អាហ។ យត្ថ យត្ថូបបជ្ជតីតិ តីសុ វា កុលសម្បត្តីសុ ឆសុ វា កាមសគ្គេសុ យត្ថ យត្ថ ឧប្បជ្ជតិ, តត្ថ តត្ថ ទីឃាយុ យសវា ហោតីតិ។ បញ្ចមំ ចតុក្កនិបាតេ វុត្តនយេនេវ វេទិតព្ពំ។ ឆដ្ឋសត្តមានិ ឧត្តានត្ថានេវ។
Aññataraṃ manomayanti suddhāvāsesu ekaṃ jhānamanena nibbattaṃ devakāyaṃ. Yathādhippāyoti yathājjhāsayo. Iminā kiṃ pucchati? Tassa kira manussakāle arahattatthāya ajjhāsayo ahosi, taṃ pucchāmīti pucchati. Devaputtopi arahattaṃ pattatāya taggha me bhagavā yathādhippāyoti āha. Yattha yatthūpapajjatīti tīsu vā kulasampattīsu chasu vā kāmasaggesu yattha yattha uppajjati, tattha tattha dīghāyu yasavā hotīti. Pañcamaṃ catukkanipāte vuttanayeneva veditabbaṃ. Chaṭṭhasattamāni uttānatthāneva.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៤. មនាបទាយីសុត្តំ • 4. Manāpadāyīsuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៤. មនាបទាយីសុត្តវណ្ណនា • 4. Manāpadāyīsuttavaṇṇanā
