| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੪. ਮਨਾਪਦਾਯੀਸੁਤ੍ਤવਣ੍ਣਨਾ
4. Manāpadāyīsuttavaṇṇanā
੪੪. ਚਤੁਤ੍ਥੇ ਉਗ੍ਗੋਤਿ ਗੁਣੇਹਿ ਉਗ੍ਗਤਤ੍ਤਾ ਏવਂਲਦ੍ਧਨਾਮੋ। ਸਾਲਪੁਪ੍ਫਕਂ ਖਾਦਨੀਯਨ੍ਤਿ ਚਤੁਮਧੁਰਯੋਜਿਤੇਨ ਸਾਲਿਪਿਟ੍ਠੇਨ ਕਤਂ ਸਾਲਪੁਪ੍ਫਸਦਿਸਂ ਖਾਦਨੀਯਂ। ਤਞ੍ਹਿ ਪਞ੍ਞਾਯਮਾਨવਣ੍ਟਪਤ੍ਤਕੇਸਰਂ ਕਤ੍વਾ ਜੀਰਕਾਦਿਸਮ੍ਭਾਰਯੁਤ੍ਤੇ ਸਪ੍ਪਿਮ੍ਹਿ ਪਚਿਤ੍વਾ ਸਪ੍ਪਿਂ વਿਨਿવਤ੍ਤੇਤ੍વਾ ਕੋਲੁਮ੍ਬੇ ਪੂਰੇਤ੍વਾ ਗਨ੍ਧવਾਸਂ ਗਾਹਾਪੇਤ੍વਾ ਪਿਦਹਿਤ੍વਾ ਲਞ੍ਛੇਤ੍વਾ ਠਪਿਤਂ ਹੋਤਿ। ਤਂ ਸੋ ਯਾਗੁਂ ਪਿવਿਤ੍વਾ ਨਿਸਿਨ੍ਨਸ੍ਸ ਭਗવਤੋ ਅਨ੍ਤਰਭਤ੍ਤੇ ਦਾਤੁਕਾਮੋ ਏવਮਾਹ। ਪਟਿਗ੍ਗਹੇਸਿ ਭਗવਾਤਿ ਦੇਸਨਾਮਤ੍ਤਮੇਤਂ, ਉਪਾਸਕੋ ਪਨ ਤਂ ਭਗવਤੋ ਚ ਪਞ੍ਚਨ੍ਨਞ੍ਚ ਭਿਕ੍ਖੁਸਤਾਨਂ ਅਦਾਸਿ। ਯਥਾ ਚ ਤਂ, ਏવਂ ਸੂਕਰਮਂਸਾਦੀਨਿਪਿ। ਤਤ੍ਥ ਸਮ੍ਪਨ੍ਨਕੋਲਕਨ੍ਤਿ ਸਮ੍ਪਨ੍ਨਬਦਰਂ। ਸੂਕਰਮਂਸਨ੍ਤਿ ਮਧੁਰਰਸੇਹਿ ਬਦਰੇਹਿ ਸਦ੍ਧਿਂ ਜੀਰਕਾਦਿਸਮ੍ਭਾਰੇਹਿ ਯੋਜੇਤ੍વਾ ਪਕ੍ਕਂ ਏਕਸਂવਚ੍ਛਰਿਕਸੂਕਰਮਂਸਂ। ਨਿਬ੍ਬਤ੍ਤਤੇਲਕਨ੍ਤਿ વਿਨਿવਤ੍ਤਿਤਤੇਲਂ। ਨਾਲਿਯਸਾਕਨ੍ਤਿ ਸਾਲਿਪਿਟ੍ਠੇਨ ਸਦ੍ਧਿਂ ਮਦ੍ਦਿਤ੍વਾ ਜੀਰਕਾਦਿਸਂਯੁਤ੍ਤੇ ਸਪ੍ਪਿਮ੍ਹਿ ਪਚਿਤ੍વਾ ਚਤੁਮਧੁਰੇਨ ਯੋਜੇਤ੍વਾ વਾਸਂ ਗਾਹਾਪੇਤ੍વਾ ਠਪਿਤਂ ਨਾਲਿਯਸਾਕਂ। ਨੇਤਂ ਭਗવਤੋ ਕਪ੍ਪਤੀਤਿ ਏਤ੍ਥ ਅਕਪ੍ਪਿਯਂ ਉਪਾਦਾਯ ਕਪ੍ਪਿਯਮ੍ਪਿ ਨ ਕਪ੍ਪਤੀਤਿ વੁਤ੍ਤਂ, ਸੇਟ੍ਠਿ ਪਨ ਸਬ੍ਬਮ੍ਪਿ ਤਂ ਆਹਰਾਪੇਤ੍વਾ ਰਾਸਿਂ ਕਤ੍વਾ ਯਂ ਯਂ ਅਕਪ੍ਪਿਯਂ, ਤਂ ਤਂ ਅਨ੍ਤਰਾਪਣਂ ਪਹਿਣਿਤ੍વਾ ਕਪ੍ਪਿਯਂ ਉਪਭੋਗਪਰਿਭੋਗਭਣ੍ਡਂ ਅਦਾਸਿ। ਚਨ੍ਦਨਫਲਕਂ ਨਾਤਿਮਹਨ੍ਤਂ ਦੀਘਤੋ ਅਡ੍ਢਤੇਯ੍ਯਰਤਨਂ, ਤਿਰਿਯਂ ਦਿਯਡ੍ਢਰਤਨਂ, ਸਾਰવਰਭਣ੍ਡਤ੍ਤਾ ਪਨ ਮਹਗ੍ਘਂ ਅਹੋਸਿ। ਭਗવਾ ਤਂ ਪਟਿਗ੍ਗਹੇਤ੍વਾ ਖਣ੍ਡਾਖਣ੍ਡਿਕਂ ਛੇਦਾਪੇਤ੍વਾ ਭਿਕ੍ਖੂਨਂ ਅਞ੍ਜਨਪਿਸਨਤ੍ਥਾਯ ਦਾਪੇਸਿ।
44. Catutthe uggoti guṇehi uggatattā evaṃladdhanāmo. Sālapupphakaṃ khādanīyanti catumadhurayojitena sālipiṭṭhena kataṃ sālapupphasadisaṃ khādanīyaṃ. Tañhi paññāyamānavaṇṭapattakesaraṃ katvā jīrakādisambhārayutte sappimhi pacitvā sappiṃ vinivattetvā kolumbe pūretvā gandhavāsaṃ gāhāpetvā pidahitvā lañchetvā ṭhapitaṃ hoti. Taṃ so yāguṃ pivitvā nisinnassa bhagavato antarabhatte dātukāmo evamāha. Paṭiggahesi bhagavāti desanāmattametaṃ, upāsako pana taṃ bhagavato ca pañcannañca bhikkhusatānaṃ adāsi. Yathā ca taṃ, evaṃ sūkaramaṃsādīnipi. Tattha sampannakolakanti sampannabadaraṃ. Sūkaramaṃsanti madhurarasehi badarehi saddhiṃ jīrakādisambhārehi yojetvā pakkaṃ ekasaṃvaccharikasūkaramaṃsaṃ. Nibbattatelakanti vinivattitatelaṃ. Nāliyasākanti sālipiṭṭhena saddhiṃ madditvā jīrakādisaṃyutte sappimhi pacitvā catumadhurena yojetvā vāsaṃ gāhāpetvā ṭhapitaṃ nāliyasākaṃ. Netaṃ bhagavato kappatīti ettha akappiyaṃ upādāya kappiyampi na kappatīti vuttaṃ, seṭṭhi pana sabbampi taṃ āharāpetvā rāsiṃ katvā yaṃ yaṃ akappiyaṃ, taṃ taṃ antarāpaṇaṃ pahiṇitvā kappiyaṃ upabhogaparibhogabhaṇḍaṃ adāsi. Candanaphalakaṃ nātimahantaṃ dīghato aḍḍhateyyaratanaṃ, tiriyaṃ diyaḍḍharatanaṃ, sāravarabhaṇḍattā pana mahagghaṃ ahosi. Bhagavā taṃ paṭiggahetvā khaṇḍākhaṇḍikaṃ chedāpetvā bhikkhūnaṃ añjanapisanatthāya dāpesi.
ਉਜ੍ਜੁਭੂਤੇਸੂਤਿ ਕਾਯવਾਚਾਚਿਤ੍ਤੇਹਿ ਉਜੁਕੇਸੁ। ਛਨ੍ਦਸਾਤਿ ਪੇਮੇਨ। ਚਤ੍ਤਨ੍ਤਿਆਦੀਸੁ ਪਰਿਚ੍ਚਾਗવਸੇਨ ਚਤ੍ਤਂ। ਮੁਤ੍ਤਚਾਗਤਾਯ ਮੁਤ੍ਤਂ। ਅਨਪੇਕ੍ਖਚਿਤ੍ਤਤਾਯ ਚਿਤ੍ਤੇਨ ਨ ਉਗ੍ਗਹਿਤਨ੍ਤਿ ਅਨੁਗ੍ਗਹੀਤਂ। ਖੇਤ੍ਤੂਪਮੇਤਿ વਿਰੁਹਨਟ੍ਠੇਨ ਖੇਤ੍ਤਸਦਿਸੇ।
Ujjubhūtesūti kāyavācācittehi ujukesu. Chandasāti pemena. Cattantiādīsu pariccāgavasena cattaṃ. Muttacāgatāya muttaṃ. Anapekkhacittatāya cittena na uggahitanti anuggahītaṃ. Khettūpameti viruhanaṭṭhena khettasadise.
ਅਞ੍ਞਤਰਂ ਮਨੋਮਯਨ੍ਤਿ ਸੁਦ੍ਧਾવਾਸੇਸੁ ਏਕਂ ਝਾਨਮਨੇਨ ਨਿਬ੍ਬਤ੍ਤਂ ਦੇવਕਾਯਂ। ਯਥਾਧਿਪ੍ਪਾਯੋਤਿ ਯਥਾਜ੍ਝਾਸਯੋ। ਇਮਿਨਾ ਕਿਂ ਪੁਚ੍ਛਤਿ? ਤਸ੍ਸ ਕਿਰ ਮਨੁਸ੍ਸਕਾਲੇ ਅਰਹਤ੍ਤਤ੍ਥਾਯ ਅਜ੍ਝਾਸਯੋ ਅਹੋਸਿ, ਤਂ ਪੁਚ੍ਛਾਮੀਤਿ ਪੁਚ੍ਛਤਿ। ਦੇવਪੁਤ੍ਤੋਪਿ ਅਰਹਤ੍ਤਂ ਪਤ੍ਤਤਾਯ ਤਗ੍ਘ ਮੇ ਭਗવਾ ਯਥਾਧਿਪ੍ਪਾਯੋਤਿ ਆਹ। ਯਤ੍ਥ ਯਤ੍ਥੂਪਪਜ੍ਜਤੀਤਿ ਤੀਸੁ વਾ ਕੁਲਸਮ੍ਪਤ੍ਤੀਸੁ ਛਸੁ વਾ ਕਾਮਸਗ੍ਗੇਸੁ ਯਤ੍ਥ ਯਤ੍ਥ ਉਪ੍ਪਜ੍ਜਤਿ, ਤਤ੍ਥ ਤਤ੍ਥ ਦੀਘਾਯੁ ਯਸવਾ ਹੋਤੀਤਿ। ਪਞ੍ਚਮਂ ਚਤੁਕ੍ਕਨਿਪਾਤੇ વੁਤ੍ਤਨਯੇਨੇવ વੇਦਿਤਬ੍ਬਂ। ਛਟ੍ਠਸਤ੍ਤਮਾਨਿ ਉਤ੍ਤਾਨਤ੍ਥਾਨੇવ।
Aññataraṃ manomayanti suddhāvāsesu ekaṃ jhānamanena nibbattaṃ devakāyaṃ. Yathādhippāyoti yathājjhāsayo. Iminā kiṃ pucchati? Tassa kira manussakāle arahattatthāya ajjhāsayo ahosi, taṃ pucchāmīti pucchati. Devaputtopi arahattaṃ pattatāya taggha me bhagavā yathādhippāyoti āha. Yattha yatthūpapajjatīti tīsu vā kulasampattīsu chasu vā kāmasaggesu yattha yattha uppajjati, tattha tattha dīghāyu yasavā hotīti. Pañcamaṃ catukkanipāte vuttanayeneva veditabbaṃ. Chaṭṭhasattamāni uttānatthāneva.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੪. ਮਨਾਪਦਾਯੀਸੁਤ੍ਤਂ • 4. Manāpadāyīsuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੪. ਮਨਾਪਦਾਯੀਸੁਤ੍ਤવਣ੍ਣਨਾ • 4. Manāpadāyīsuttavaṇṇanā
