| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
5. මානසසුත්‌තං
5. Mānasasuttaṃ
151. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. අථ ඛො මාරො පාපිමා යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං ගාථාය අජ්‌ඣභාසි –
151. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho māro pāpimā yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi –
‘‘අන්‌තලික්‌ඛචරො පාසො, ය්‌වායං චරති මානසො;
‘‘Antalikkhacaro pāso, yvāyaṃ carati mānaso;
තෙන තං බාධයිස්‌සාමි, න මෙ සමණ මොක්‌ඛසී’’ති.
Tena taṃ bādhayissāmi, na me samaṇa mokkhasī’’ti.
‘‘රූපා සද්‌දා රසා ගන්‌ධා, ඵොට්‌ඨබ්‌බා ච මනොරමා;
‘‘Rūpā saddā rasā gandhā, phoṭṭhabbā ca manoramā;
එත්‌ථ මෙ විගතො ඡන්‌දො, නිහතො ත්‌වමසි අන්‌තකා’’ති.
Ettha me vigato chando, nihato tvamasi antakā’’ti.
අථ ඛො මාරො පාපිමා ‘‘ජානාති මං භගවා, ජානාති මං සුගතො’’ති දුක්‌ඛී දුම්‌මනො තත්‌ථෙවන්‌තරධායීති.
Atha kho māro pāpimā ‘‘jānāti maṃ bhagavā, jānāti maṃ sugato’’ti dukkhī dummano tatthevantaradhāyīti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5. මානසසුත්‌තවණ්‌ණනා • 5. Mānasasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 5. මානසසුත්‌තවණ්‌ණනා • 5. Mānasasuttavaṇṇanā
