| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၈. မနသိကာရလက္ခဏပဉ္ဟော
8. Manasikāralakkhaṇapañho
၈. ရာဇာ အာဟ ‘‘ကိံလက္ခဏော, ဘန္တေ နာဂသေန, မနသိကာရော, ကိံလက္ခဏာ ပညာ’’တိ? ‘‘ဦဟနလက္ခဏော ခော, မဟာရာဇ, မနသိကာရော, ဆေဒနလက္ခဏာ ပညာ’’တိ။
8. Rājā āha ‘‘kiṃlakkhaṇo, bhante nāgasena, manasikāro, kiṃlakkhaṇā paññā’’ti? ‘‘Ūhanalakkhaṇo kho, mahārāja, manasikāro, chedanalakkhaṇā paññā’’ti.
‘‘ကထံ ဦဟနလက္ခဏော မနသိကာရော, ကထံ ဆေဒနလက္ခဏာ ပညာ, ဩပမ္မံ ကရောဟီ’’တိ။ ‘‘ဇာနာသိ, တ္ဝံ မဟာရာဇ, ယဝလာဝကေ’’တိ။ ‘‘အာမ , ဘန္တေ, ဇာနာမီ’’တိ ။ ‘‘ကထံ, မဟာရာဇ, ယဝလာဝကာ ယဝံ လုနန္တီ’’တိ? ‘‘ဝာမေန, ဘန္တေ, ဟတ္ထေန ယဝကလာပံ ဂဟေတ္ဝာ ဒက္ခိဏေန ဟတ္ထေန ဒာတ္တံ ဂဟေတ္ဝာ ဒာတ္တေန ဆိန္ဒန္တီ’’တိ။
‘‘Kathaṃ ūhanalakkhaṇo manasikāro, kathaṃ chedanalakkhaṇā paññā, opammaṃ karohī’’ti. ‘‘Jānāsi, tvaṃ mahārāja, yavalāvake’’ti. ‘‘Āma , bhante, jānāmī’’ti . ‘‘Kathaṃ, mahārāja, yavalāvakā yavaṃ lunantī’’ti? ‘‘Vāmena, bhante, hatthena yavakalāpaṃ gahetvā dakkhiṇena hatthena dāttaṃ gahetvā dāttena chindantī’’ti.
‘‘ယထာ, မဟာရာဇ, ယဝလာဝကော ဝာမေန ဟတ္ထေန ယဝကလာပံ ဂဟေတ္ဝာ ဒက္ခိဏေန ဟတ္ထေန ဒာတ္တံ ဂဟေတ္ဝာ ယဝံ ဆိန္ဒတိ, ဧဝမေဝ ခော, မဟာရာဇ, ယောဂာဝစရော မနသိကာရေန မာနသံ ဂဟေတ္ဝာ ပညာယ ကိလေသေ ဆိန္ဒတိ, ဧဝံ ခော, မဟာရာဇ, ဦဟနလက္ခဏော မနသိကာရော, ဧဝံ ဆေဒနလက္ခဏာ ပညာ’’တိ။
‘‘Yathā, mahārāja, yavalāvako vāmena hatthena yavakalāpaṃ gahetvā dakkhiṇena hatthena dāttaṃ gahetvā yavaṃ chindati, evameva kho, mahārāja, yogāvacaro manasikārena mānasaṃ gahetvā paññāya kilese chindati, evaṃ kho, mahārāja, ūhanalakkhaṇo manasikāro, evaṃ chedanalakkhaṇā paññā’’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
မနသိကာရလက္ခဏပဉ္ဟော အဋ္ဌမော။
Manasikāralakkhaṇapañho aṭṭhamo.
