| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
8. මනසිකාරලක්‌ඛණපඤ්‌හො
8. Manasikāralakkhaṇapañho
8. රාජා ආහ ‘‘කිංලක්‌ඛණො, භන්‌තෙ නාගසෙන, මනසිකාරො, කිංලක්‌ඛණා පඤ්‌ඤා’’ති? ‘‘ඌහනලක්‌ඛණො ඛො, මහාරාජ, මනසිකාරො, ඡෙදනලක්‌ඛණා පඤ්‌ඤා’’ති.
8. Rājā āha ‘‘kiṃlakkhaṇo, bhante nāgasena, manasikāro, kiṃlakkhaṇā paññā’’ti? ‘‘Ūhanalakkhaṇo kho, mahārāja, manasikāro, chedanalakkhaṇā paññā’’ti.
‘‘කථං ඌහනලක්‌ඛණො මනසිකාරො, කථං ඡෙදනලක්‌ඛණා පඤ්‌ඤා, ඔපම්‌මං කරොහී’’ති. ‘‘ජානාසි, ත්‌වං මහාරාජ, යවලාවකෙ’’ති. ‘‘ආම , භන්‌තෙ, ජානාමී’’ති . ‘‘කථං, මහාරාජ, යවලාවකා යවං ලුනන්‌තී’’ති? ‘‘වාමෙන, භන්‌තෙ, හත්‌ථෙන යවකලාපං ගහෙත්‌වා දක්‌ඛිණෙන හත්‌ථෙන දාත්‌තං ගහෙත්‌වා දාත්‌තෙන ඡින්‌දන්‌තී’’ති.
‘‘Kathaṃ ūhanalakkhaṇo manasikāro, kathaṃ chedanalakkhaṇā paññā, opammaṃ karohī’’ti. ‘‘Jānāsi, tvaṃ mahārāja, yavalāvake’’ti. ‘‘Āma , bhante, jānāmī’’ti . ‘‘Kathaṃ, mahārāja, yavalāvakā yavaṃ lunantī’’ti? ‘‘Vāmena, bhante, hatthena yavakalāpaṃ gahetvā dakkhiṇena hatthena dāttaṃ gahetvā dāttena chindantī’’ti.
‘‘යථා, මහාරාජ, යවලාවකො වාමෙන හත්‌ථෙන යවකලාපං ගහෙත්‌වා දක්‌ඛිණෙන හත්‌ථෙන දාත්‌තං ගහෙත්‌වා යවං ඡින්‌දති, එවමෙව ඛො, මහාරාජ, යොගාවචරො මනසිකාරෙන මානසං ගහෙත්‌වා පඤ්‌ඤාය කිලෙසෙ ඡින්‌දති, එවං ඛො, මහාරාජ, ඌහනලක්‌ඛණො මනසිකාරො, එවං ඡෙදනලක්‌ඛණා පඤ්‌ඤා’’ති.
‘‘Yathā, mahārāja, yavalāvako vāmena hatthena yavakalāpaṃ gahetvā dakkhiṇena hatthena dāttaṃ gahetvā yavaṃ chindati, evameva kho, mahārāja, yogāvacaro manasikārena mānasaṃ gahetvā paññāya kilese chindati, evaṃ kho, mahārāja, ūhanalakkhaṇo manasikāro, evaṃ chedanalakkhaṇā paññā’’ti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
මනසිකාරලක්‌ඛණපඤ්‌හො අට්‌ඨමො.
Manasikāralakkhaṇapañho aṭṭhamo.
