| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༨. མནསིཀཱརལཀྑཎཔཉྷོ
8. Manasikāralakkhaṇapañho
༨. རཱཛཱ ཨཱཧ ‘‘ཀིཾལཀྑཎོ, བྷནྟེ ནཱགསེན, མནསིཀཱརོ, ཀིཾལཀྑཎཱ པཉྙཱ’’ཏི? ‘‘ཨཱུཧནལཀྑཎོ ཁོ, མཧཱརཱཛ, མནསིཀཱརོ, ཚེདནལཀྑཎཱ པཉྙཱ’’ཏི།
8. Rājā āha ‘‘kiṃlakkhaṇo, bhante nāgasena, manasikāro, kiṃlakkhaṇā paññā’’ti? ‘‘Ūhanalakkhaṇo kho, mahārāja, manasikāro, chedanalakkhaṇā paññā’’ti.
‘‘ཀཐཾ ཨཱུཧནལཀྑཎོ མནསིཀཱརོ, ཀཐཾ ཚེདནལཀྑཎཱ པཉྙཱ, ཨོཔམྨཾ ཀརོཧཱི’’ཏི། ‘‘ཛཱནཱསི, ཏྭཾ མཧཱརཱཛ, ཡཝལཱཝཀེ’’ཏི། ‘‘ཨཱམ , བྷནྟེ, ཛཱནཱམཱི’’ཏི ། ‘‘ཀཐཾ, མཧཱརཱཛ, ཡཝལཱཝཀཱ ཡཝཾ ལུནནྟཱི’’ཏི? ‘‘ཝཱམེན, བྷནྟེ, ཧཏྠེན ཡཝཀལཱཔཾ གཧེཏྭཱ དཀྑིཎེན ཧཏྠེན དཱཏྟཾ གཧེཏྭཱ དཱཏྟེན ཚིནྡནྟཱི’’ཏི།
‘‘Kathaṃ ūhanalakkhaṇo manasikāro, kathaṃ chedanalakkhaṇā paññā, opammaṃ karohī’’ti. ‘‘Jānāsi, tvaṃ mahārāja, yavalāvake’’ti. ‘‘Āma , bhante, jānāmī’’ti . ‘‘Kathaṃ, mahārāja, yavalāvakā yavaṃ lunantī’’ti? ‘‘Vāmena, bhante, hatthena yavakalāpaṃ gahetvā dakkhiṇena hatthena dāttaṃ gahetvā dāttena chindantī’’ti.
‘‘ཡཐཱ, མཧཱརཱཛ, ཡཝལཱཝཀོ ཝཱམེན ཧཏྠེན ཡཝཀལཱཔཾ གཧེཏྭཱ དཀྑིཎེན ཧཏྠེན དཱཏྟཾ གཧེཏྭཱ ཡཝཾ ཚིནྡཏི, ཨེཝམེཝ ཁོ, མཧཱརཱཛ, ཡོགཱཝཙརོ མནསིཀཱརེན མཱནསཾ གཧེཏྭཱ པཉྙཱཡ ཀིལེསེ ཚིནྡཏི, ཨེཝཾ ཁོ, མཧཱརཱཛ, ཨཱུཧནལཀྑཎོ མནསིཀཱརོ, ཨེཝཾ ཚེདནལཀྑཎཱ པཉྙཱ’’ཏི།
‘‘Yathā, mahārāja, yavalāvako vāmena hatthena yavakalāpaṃ gahetvā dakkhiṇena hatthena dāttaṃ gahetvā yavaṃ chindati, evameva kho, mahārāja, yogāvacaro manasikārena mānasaṃ gahetvā paññāya kilese chindati, evaṃ kho, mahārāja, ūhanalakkhaṇo manasikāro, evaṃ chedanalakkhaṇā paññā’’ti.
‘‘ཀལློསི, བྷནྟེ ནཱགསེནཱ’’ཏི།
‘‘Kallosi, bhante nāgasenā’’ti.
མནསིཀཱརལཀྑཎཔཉྷོ ཨཊྛམོ།
Manasikāralakkhaṇapañho aṭṭhamo.
