| Library / Tipiṭaka / තිපිටක • Tipiṭaka / චූළවග්‌ගපාළි • Cūḷavaggapāḷi |
මානත්‌තචාරිකමූලායපටිකස්‌සනාදි
Mānattacārikamūlāyapaṭikassanādi
130. සො මානත්‌තං චරන්‌තො අන්‌තරා එකං ආපත්‌තිං ආපජ්‌ජි සඤ්‌චෙතනිකං සුක්‌කවිස්‌සට්‌ඨිං පඤ්‌චාහප්‌පටිච්‌ඡන්‌නං. සො භික්‌ඛූනං ආරොචෙසි – ‘‘අහං, ආවුසො, එකං ආපත්‌තිං ආපජ්‌ජිං සඤ්‌චෙතනිකං සුක්‌කවිස්‌සට්‌ඨිං පක්‌ඛප්‌පටිච්‌ඡන්‌නං…පෙ.… සොහං මානත්‌තං චරන්‌තො අන්‌තරා එකං ආපත්‌තිං ආපජ්‌ජිං සඤ්‌චෙතනිකං සුක්‌කවිස්‌සට්‌ඨිං පඤ්‌චාහප්‌පටිච්‌ඡන්‌නං. කථං නු ඛො මයා පටිපජ්‌ජිතබ්‌බ’’න්‌ති? භගවතො එතමත්‌ථං ආරොචෙසුං. ‘‘තෙන හි, භික්‌ඛවෙ, සඞ්‌ඝො උදායිං භික්‌ඛුං අන්‌තරා එකිස්‌සා ආපත්‌තියා සඤ්‌චෙතනිකාය සුක්‌කවිස්‌සට්‌ඨියා පඤ්‌චාහප්‌පටිච්‌ඡන්‌නාය මූලාය පටිකස්‌සිත්‌වා පුරිමාය ආපත්‌තියා සමොධානපරිවාසං දත්‌වා ඡාරත්‌තං මානත්‌තං දෙතු. එවඤ්‌ච පන, භික්‌ඛවෙ, මූලාය පටිකස්‌සිතබ්‌බො…පෙ.….
130. So mānattaṃ caranto antarā ekaṃ āpattiṃ āpajji sañcetanikaṃ sukkavissaṭṭhiṃ pañcāhappaṭicchannaṃ. So bhikkhūnaṃ ārocesi – ‘‘ahaṃ, āvuso, ekaṃ āpattiṃ āpajjiṃ sañcetanikaṃ sukkavissaṭṭhiṃ pakkhappaṭicchannaṃ…pe… sohaṃ mānattaṃ caranto antarā ekaṃ āpattiṃ āpajjiṃ sañcetanikaṃ sukkavissaṭṭhiṃ pañcāhappaṭicchannaṃ. Kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. ‘‘Tena hi, bhikkhave, saṅgho udāyiṃ bhikkhuṃ antarā ekissā āpattiyā sañcetanikāya sukkavissaṭṭhiyā pañcāhappaṭicchannāya mūlāya paṭikassitvā purimāya āpattiyā samodhānaparivāsaṃ datvā chārattaṃ mānattaṃ detu. Evañca pana, bhikkhave, mūlāya paṭikassitabbo…pe….
‘‘එවඤ්‌ච පන, භික්‌ඛවෙ, පුරිමාය ආපත්‌තියා සමොධානපරිවාසො දාතබ්‌බො…පෙ.….
‘‘Evañca pana, bhikkhave, purimāya āpattiyā samodhānaparivāso dātabbo…pe….
‘‘එවඤ්‌ච පන, භික්‌ඛවෙ, ඡාරත්‌තං මානත්‌තං දාතබ්‌බං…පෙ.… දෙති…පෙ.… .
‘‘Evañca pana, bhikkhave, chārattaṃ mānattaṃ dātabbaṃ…pe… deti…pe… .
‘‘දින්‌නං සඞ්‌ඝෙන උදායිස්‌ස භික්‌ඛුනො අන්‌තරා එකිස්‌සා ආපත්‌තියා සඤ්‌චෙතනිකාය සුක්‌කවිස්‌සට්‌ඨියා පඤ්‌චාහප්‌පටිච්‌ඡන්‌නාය ඡාරත්‌තං මානත්‌තං. ඛමති සඞ්‌ඝස්‌ස, තස්‌මා තුණ්‌හී, එවමෙතං ධාරයාමී’’ති.
‘‘Dinnaṃ saṅghena udāyissa bhikkhuno antarā ekissā āpattiyā sañcetanikāya sukkavissaṭṭhiyā pañcāhappaṭicchannāya chārattaṃ mānattaṃ. Khamati saṅghassa, tasmā tuṇhī, evametaṃ dhārayāmī’’ti.
