| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
4. மானத்தசாரிகவத்தங்
4. Mānattacārikavattaṃ
90. தேன கோ² பன ஸமயேன மானத்தசாரிகா பி⁴க்கூ² ஸாதி³யந்தி பகதத்தானங் பி⁴க்கூ²னங் அபி⁴வாத³னங், பச்சுட்டா²னங், அஞ்ஜலிகம்மங், ஸாமீசிகம்மங், ஆஸனாபி⁴ஹாரங், ஸெய்யாபி⁴ஹாரங், பாதோ³த³கங் பாத³பீட²ங், பாத³கத²லிகங், பத்தசீவரபடிக்³க³ஹணங், நஹானே பிட்டி²பரிகம்மங். யே தே பி⁴க்கூ² அப்பிச்சா²…பே॰… தே உஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம மானத்தசாரிகா பி⁴க்கூ² ஸாதி³யிஸ்ஸந்தி பகதத்தானங் பி⁴க்கூ²னங் அபி⁴வாத³னங், பச்சுட்டா²னங்…பே॰… நஹானே பிட்டி²பரிகம்ம’’ந்தி! அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்.
90. Tena kho pana samayena mānattacārikā bhikkhū sādiyanti pakatattānaṃ bhikkhūnaṃ abhivādanaṃ, paccuṭṭhānaṃ, añjalikammaṃ, sāmīcikammaṃ, āsanābhihāraṃ, seyyābhihāraṃ, pādodakaṃ pādapīṭhaṃ, pādakathalikaṃ, pattacīvarapaṭiggahaṇaṃ, nahāne piṭṭhiparikammaṃ. Ye te bhikkhū appicchā…pe… te ujhāyanti khiyyanti vipācenti – ‘‘kathañhi nāma mānattacārikā bhikkhū sādiyissanti pakatattānaṃ bhikkhūnaṃ abhivādanaṃ, paccuṭṭhānaṃ…pe… nahāne piṭṭhiparikamma’’nti! Atha kho te bhikkhū bhagavato etamatthaṃ ārocesuṃ.
அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே பி⁴க்கு²ஸங்க⁴ங் ஸன்னிபாதாபெத்வா பி⁴க்கூ² படிபுச்சி² – ‘‘ஸச்சங் கிர, பி⁴க்க²வே, மானத்தசாரிகா பி⁴க்கூ² ஸாதி³யந்தி பகதத்தானங் பி⁴க்கூ²னங் அபி⁴வாத³னங், பச்சுட்டா²னங்…பே॰… நஹானே பிட்டி²பரிகம்ம’’ந்தி? ‘‘ஸச்சங் ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனநுச்ச²விகங்…பே॰… கத²ஞ்ஹி நாம, பி⁴க்க²வே, மானத்தசாரிகா பி⁴க்கூ² ஸாதி³யிஸ்ஸந்தி பகதத்தானங் பி⁴க்கூ²னங் அபி⁴வாத³னங்…பே॰… நஹானே பிட்டி²பரிகம்மங்! நேதங், பி⁴க்க²வே, அப்பஸன்னானங் வா பஸாதா³ய…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி –
Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, mānattacārikā bhikkhū sādiyanti pakatattānaṃ bhikkhūnaṃ abhivādanaṃ, paccuṭṭhānaṃ…pe… nahāne piṭṭhiparikamma’’nti? ‘‘Saccaṃ bhagavā’’ti. Vigarahi buddho bhagavā – ‘‘ananucchavikaṃ…pe… kathañhi nāma, bhikkhave, mānattacārikā bhikkhū sādiyissanti pakatattānaṃ bhikkhūnaṃ abhivādanaṃ…pe… nahāne piṭṭhiparikammaṃ! Netaṃ, bhikkhave, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi –
‘‘ந , பி⁴க்க²வே, மானத்தசாரிகேன பி⁴க்கு²னா ஸாதி³தப்³ப³ங் பகதத்தானங் பி⁴க்கூ²னங் அபி⁴வாத³னங், பச்சுட்டா²னங், அஞ்ஜலிகம்மங், ஸாமீசிகம்மங், ஆஸனாபி⁴ஹாரோ, ஸெய்யாபி⁴ஹாரோ, பாதோ³த³கங் பாத³பீட²ங், பாத³கத²லிகங், பத்தசீவரபடிக்³க³ஹணங், நஹானே பிட்டி²பரிகம்மங். யோ ஸாதி³யெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, மானத்தசாரிகானங் பி⁴க்கூ²னங் மிது² யதா²வுட்³ட⁴ங் அபி⁴வாத³னங், பச்சுட்டா²னங்…பே॰… நஹானே பிட்டி²பரிகம்மங். அனுஜானாமி, பி⁴க்க²வே, மானத்தசாரிகானங் பி⁴க்கூ²னங் பஞ்ச யதா²வுட்³ட⁴ங் – உபோஸத²ங், பவாரணங், வஸ்ஸிகஸாடிகங், ஓணோஜனங், ப⁴த்தங். தேன ஹி, பி⁴க்க²வே, மானத்தசாரிகானங் பி⁴க்கூ²னங் வத்தங் பஞ்ஞபெஸ்ஸாமி யதா² மானத்தசாரிகேஹி பி⁴க்கூ²ஹி வத்திதப்³ப³ங்.
‘‘Na , bhikkhave, mānattacārikena bhikkhunā sāditabbaṃ pakatattānaṃ bhikkhūnaṃ abhivādanaṃ, paccuṭṭhānaṃ, añjalikammaṃ, sāmīcikammaṃ, āsanābhihāro, seyyābhihāro, pādodakaṃ pādapīṭhaṃ, pādakathalikaṃ, pattacīvarapaṭiggahaṇaṃ, nahāne piṭṭhiparikammaṃ. Yo sādiyeyya, āpatti dukkaṭassa. Anujānāmi, bhikkhave, mānattacārikānaṃ bhikkhūnaṃ mithu yathāvuḍḍhaṃ abhivādanaṃ, paccuṭṭhānaṃ…pe… nahāne piṭṭhiparikammaṃ. Anujānāmi, bhikkhave, mānattacārikānaṃ bhikkhūnaṃ pañca yathāvuḍḍhaṃ – uposathaṃ, pavāraṇaṃ, vassikasāṭikaṃ, oṇojanaṃ, bhattaṃ. Tena hi, bhikkhave, mānattacārikānaṃ bhikkhūnaṃ vattaṃ paññapessāmi yathā mānattacārikehi bhikkhūhi vattitabbaṃ.
91. ‘‘மானத்தசாரிகேன , பி⁴க்க²வே, பி⁴க்கு²னா ஸம்மா வத்திதப்³ப³ங். தத்ராயங் ஸம்மாவத்தனா –
91. ‘‘Mānattacārikena , bhikkhave, bhikkhunā sammā vattitabbaṃ. Tatrāyaṃ sammāvattanā –
ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³, ந பி⁴க்கு²னோவாத³கஸம்முதி ஸாதி³தப்³பா³, ஸம்மதேனபி பி⁴க்கு²னியோ ந ஓவதி³தப்³பா³. யாய ஆபத்தியா ஸங்கே⁴ன மானத்தங் தி³ன்னங் ஹோதி ஸா ஆபத்தி ந ஆபஜ்ஜிதப்³பா³, அஞ்ஞா வா தாதி³ஸிகா, ததோ வா பாபிட்ட²தரா; கம்மங் ந க³ரஹிதப்³ப³ங், கம்மிகா ந க³ரஹிதப்³பா³. ந பகதத்தஸ்ஸ பி⁴க்கு²னோ உபோஸதோ² ட²பேதப்³போ³, ந பவாரணா ட²பேதப்³பா³, ந ஸவசனீயங் காதப்³ப³ங், ந அனுவாதோ³ பட்ட²பேதப்³போ³, ந ஓகாஸோ காரேதப்³போ³, ந சோதே³தப்³போ³, ந ஸாரேதப்³போ³, ந பி⁴க்கூ²ஹி ஸம்பயோஜேதப்³ப³ங்.
Na upasampādetabbaṃ, na nissayo dātabbo, na sāmaṇero upaṭṭhāpetabbo, na bhikkhunovādakasammuti sāditabbā, sammatenapi bhikkhuniyo na ovaditabbā. Yāya āpattiyā saṅghena mānattaṃ dinnaṃ hoti sā āpatti na āpajjitabbā, aññā vā tādisikā, tato vā pāpiṭṭhatarā; kammaṃ na garahitabbaṃ, kammikā na garahitabbā. Na pakatattassa bhikkhuno uposatho ṭhapetabbo, na pavāraṇā ṭhapetabbā, na savacanīyaṃ kātabbaṃ, na anuvādo paṭṭhapetabbo, na okāso kāretabbo, na codetabbo, na sāretabbo, na bhikkhūhi sampayojetabbaṃ.
‘‘ந, பி⁴க்க²வே, மானத்தசாரிகேன பி⁴க்கு²னா பகதத்தஸ்ஸ பி⁴க்கு²னோ புரதோ க³ந்தப்³ப³ங், ந புரதோ நிஸீதி³தப்³ப³ங். யோ ஹோதி ஸங்க⁴ஸ்ஸ ஆஸனபரியந்தோ ஸெய்யாபரியந்தோ விஹாரபரியந்தோ ஸோ தஸ்ஸ பதா³தப்³போ³. தேன ச ஸோ ஸாதி³தப்³போ³.
‘‘Na, bhikkhave, mānattacārikena bhikkhunā pakatattassa bhikkhuno purato gantabbaṃ, na purato nisīditabbaṃ. Yo hoti saṅghassa āsanapariyanto seyyāpariyanto vihārapariyanto so tassa padātabbo. Tena ca so sāditabbo.
‘‘ந, பி⁴க்க²வே, மானத்தசாரிகேன பி⁴க்கு²னா பகதத்தேன பி⁴க்கு²னா புரேஸமணேன வா பச்சா²ஸமணேன வா குலானி உபஸங்கமிதப்³பா³னி, ந ஆரஞ்ஞிகங்க³ங் ஸமாதா³தப்³ப³ங், ந பிண்ட³பாதிகங்க³ங் ஸமாதா³தப்³ப³ங், ந ச தப்பச்சயா பிண்ட³பாதோ நீஹராபேதப்³போ³ – மா மங் ஜானிங்ஸூதி.
‘‘Na, bhikkhave, mānattacārikena bhikkhunā pakatattena bhikkhunā puresamaṇena vā pacchāsamaṇena vā kulāni upasaṅkamitabbāni, na āraññikaṅgaṃ samādātabbaṃ, na piṇḍapātikaṅgaṃ samādātabbaṃ, na ca tappaccayā piṇḍapāto nīharāpetabbo – mā maṃ jāniṃsūti.
‘‘மானத்தசாரிகேன, பி⁴க்க²வே, பி⁴க்கு²னா ஆக³ந்துகேன ஆரோசேதப்³ப³ங், ஆக³ந்துகஸ்ஸ ஆரோசேதப்³ப³ங், உபோஸதே² ஆரோசேதப்³ப³ங், பவாரணாய ஆரோசேதப்³ப³ங் , தே³வஸிகங் ஆரோசேதப்³ப³ங். ஸசே கி³லானோ ஹோதி, தூ³தேனபி ஆரோசேதப்³ப³ங்.
‘‘Mānattacārikena, bhikkhave, bhikkhunā āgantukena ārocetabbaṃ, āgantukassa ārocetabbaṃ, uposathe ārocetabbaṃ, pavāraṇāya ārocetabbaṃ , devasikaṃ ārocetabbaṃ. Sace gilāno hoti, dūtenapi ārocetabbaṃ.
‘‘ந, பி⁴க்க²வே, மானத்தசாரிகேன பி⁴க்கு²னா ஸபி⁴க்கு²கா ஆவாஸா அபி⁴க்கு²கோ ஆவாஸோ க³ந்தப்³போ³, அஞ்ஞத்ர ஸங்கே⁴ன, அஞ்ஞத்ர அந்தராயா.
‘‘Na, bhikkhave, mānattacārikena bhikkhunā sabhikkhukā āvāsā abhikkhuko āvāso gantabbo, aññatra saṅghena, aññatra antarāyā.
‘‘ந, பி⁴க்க²வே, மானத்தசாரிகேன பி⁴க்கு²னா ஸபி⁴க்கு²கா ஆவாஸா அபி⁴க்கு²கோ அனாவாஸோ க³ந்தப்³போ³, அஞ்ஞத்ர ஸங்கே⁴ன, அஞ்ஞத்ர அந்தராயா.
‘‘Na, bhikkhave, mānattacārikena bhikkhunā sabhikkhukā āvāsā abhikkhuko anāvāso gantabbo, aññatra saṅghena, aññatra antarāyā.
‘‘ந , பி⁴க்க²வே, மானத்தசாரிகேன பி⁴க்கு²னா ஸபி⁴க்கு²கா ஆவாஸா அபி⁴க்கு²கோ ஆவாஸோ வா அனாவாஸோ வா க³ந்தப்³போ³, அஞ்ஞத்ர ஸங்கே⁴ன, அஞ்ஞத்ர அந்தராயா.
‘‘Na , bhikkhave, mānattacārikena bhikkhunā sabhikkhukā āvāsā abhikkhuko āvāso vā anāvāso vā gantabbo, aññatra saṅghena, aññatra antarāyā.
‘‘ந, பி⁴க்க²வே, மானத்தசாரிகேன பி⁴க்கு²னா ஸபி⁴க்கு²கா அனாவாஸா அபி⁴க்கு²கோ ஆவாஸோ க³ந்தப்³போ³…பே॰… அபி⁴க்கு²கோ அனாவாஸோ க³ந்தப்³போ³…பே॰… அபி⁴க்கு²கோ ஆவாஸோ வா அனாவாஸோ வா க³ந்தப்³போ³, அஞ்ஞத்ர ஸங்கே⁴ன, அஞ்ஞத்ர அந்தராயா.
‘‘Na, bhikkhave, mānattacārikena bhikkhunā sabhikkhukā anāvāsā abhikkhuko āvāso gantabbo…pe… abhikkhuko anāvāso gantabbo…pe… abhikkhuko āvāso vā anāvāso vā gantabbo, aññatra saṅghena, aññatra antarāyā.
‘‘ந, பி⁴க்க²வே, மானத்தசாரிகேன பி⁴க்கு²னா ஸபி⁴க்கு²கா ஆவாஸா வா அனாவாஸா வா அபி⁴க்கு²கோ ஆவாஸோ க³ந்தப்³போ³…பே॰… அபி⁴க்கு²கோ அனாவாஸோ க³ந்தப்³போ³…பே॰… அபி⁴க்கு²கோ ஆவாஸோ வா அனாவாஸோ வா க³ந்தப்³போ³, அஞ்ஞத்ர ஸங்கே⁴ன, அஞ்ஞத்ர அந்தராயா.
‘‘Na, bhikkhave, mānattacārikena bhikkhunā sabhikkhukā āvāsā vā anāvāsā vā abhikkhuko āvāso gantabbo…pe… abhikkhuko anāvāso gantabbo…pe… abhikkhuko āvāso vā anāvāso vā gantabbo, aññatra saṅghena, aññatra antarāyā.
‘‘ந, பி⁴க்க²வே, மானத்தசாரிகேன பி⁴க்கு²னா ஸபி⁴க்கு²கா ஆவாஸா ஸபி⁴க்கு²கோ ஆவாஸோ க³ந்தப்³போ³…பே॰… ஸபி⁴க்கு²கோ அனாவாஸோ க³ந்தப்³போ³…பே॰… ஸபி⁴க்கு²கோ ஆவாஸோ வா அனாவாஸோ வா க³ந்தப்³போ³, யத்த²ஸ்ஸு பி⁴க்கூ² நானாஸங்வாஸகா, அஞ்ஞத்ர ஸங்கே⁴ன, அஞ்ஞத்ர அந்தராயா.
‘‘Na, bhikkhave, mānattacārikena bhikkhunā sabhikkhukā āvāsā sabhikkhuko āvāso gantabbo…pe… sabhikkhuko anāvāso gantabbo…pe… sabhikkhuko āvāso vā anāvāso vā gantabbo, yatthassu bhikkhū nānāsaṃvāsakā, aññatra saṅghena, aññatra antarāyā.
‘‘ந பி⁴க்க²வே , மானத்தசாரிகேன பி⁴க்கு²னா ஸபி⁴க்கு²கா அனாவாஸா ஸபி⁴க்கு²கோ ஆவாஸோ க³ந்தப்³போ³…பே॰… ஸபி⁴க்கு²கோ அனாவாஸோ க³ந்தப்³போ³…பே॰… ஸபி⁴க்கு²கோ ஆவாஸோ வா அனாவாஸோ வா க³ந்தப்³போ³, யத்த²ஸ்ஸு பி⁴க்கூ² நானாஸங்வாஸகா, அஞ்ஞத்ர ஸங்கே⁴ன, அஞ்ஞத்ர அந்தராயா.
‘‘Na bhikkhave , mānattacārikena bhikkhunā sabhikkhukā anāvāsā sabhikkhuko āvāso gantabbo…pe… sabhikkhuko anāvāso gantabbo…pe… sabhikkhuko āvāso vā anāvāso vā gantabbo, yatthassu bhikkhū nānāsaṃvāsakā, aññatra saṅghena, aññatra antarāyā.
‘‘ந, பி⁴க்க²வே, மானத்தசாரிகேன பி⁴க்கு²னா ஸபி⁴க்கு²கா ஆவாஸா வா அனாவாஸா வா ஸபி⁴க்கு²கோ ஆவாஸோ க³ந்தப்³போ³…பே॰… ஸபி⁴க்கு²கோ அனாவாஸோ க³ந்தப்³போ³…பே॰… ஸபி⁴க்கு²கோ ஆவாஸோ வா அனாவாஸோ வா க³ந்தப்³போ³ , யத்த²ஸ்ஸு பி⁴க்கூ² நானாஸங்வாஸகா, அஞ்ஞத்ர ஸங்கே⁴ன, அஞ்ஞத்ர அந்தராயா.
‘‘Na, bhikkhave, mānattacārikena bhikkhunā sabhikkhukā āvāsā vā anāvāsā vā sabhikkhuko āvāso gantabbo…pe… sabhikkhuko anāvāso gantabbo…pe… sabhikkhuko āvāso vā anāvāso vā gantabbo , yatthassu bhikkhū nānāsaṃvāsakā, aññatra saṅghena, aññatra antarāyā.
‘‘க³ந்தப்³போ³, பி⁴க்க²வே மானத்தசாரிகேன பி⁴க்கு²னா ஸபி⁴க்கு²கா ஆவாஸா ஸபி⁴க்கு²கோ ஆவாஸோ…பே॰… ஸபி⁴க்கு²கோ அனாவாஸோ…பே॰… ஸபி⁴க்கு²கோ ஆவாஸோ வா அனாவாஸோ வா, யத்த²ஸ்ஸு பி⁴க்கூ² ஸமானஸங்வாஸகா, யங் ஜஞ்ஞா ஸக்கோமி அஜ்ஜேவ க³ந்துந்தி.
‘‘Gantabbo, bhikkhave mānattacārikena bhikkhunā sabhikkhukā āvāsā sabhikkhuko āvāso…pe… sabhikkhuko anāvāso…pe… sabhikkhuko āvāso vā anāvāso vā, yatthassu bhikkhū samānasaṃvāsakā, yaṃ jaññā sakkomi ajjeva gantunti.
‘‘க³ந்தப்³போ³ , பி⁴க்க²வே, மானத்தசாரிகேன பி⁴க்கு²னா ஸபி⁴க்கு²கா அனாவாஸா ஸபி⁴க்கு²கோ ஆவாஸோ…பே॰… ஸபி⁴க்கு²கோ அனாவாஸோ…பே॰… ஸபி⁴க்கு²கோ ஆவாஸோ வா அனாவாஸோ வா, யத்த²ஸ்ஸு பி⁴க்கூ² ஸமானஸங்வாஸகா, யங் ஜஞ்ஞா ஸக்கோமி அஜ்ஜேவ க³ந்துந்தி.
‘‘Gantabbo , bhikkhave, mānattacārikena bhikkhunā sabhikkhukā anāvāsā sabhikkhuko āvāso…pe… sabhikkhuko anāvāso…pe… sabhikkhuko āvāso vā anāvāso vā, yatthassu bhikkhū samānasaṃvāsakā, yaṃ jaññā sakkomi ajjeva gantunti.
‘‘க³ந்தப்³போ³, பி⁴க்க²வே, மானத்தசாரிகேன பி⁴க்கு²னா ஸபி⁴க்கு²கா ஆவாஸா வா அனாவாஸா வா ஸபி⁴க்கு²கோ ஆவாஸோ…பே॰… ஸபி⁴க்கு²கோ அனாவாஸோ…பே॰… ஸபி⁴க்கு²கோ ஆவாஸோ வா அனாவாஸோ வா, யத்த²ஸ்ஸு பி⁴க்கூ² ஸமானஸங்வாஸகா, யங் ஜஞ்ஞா ஸக்கோமி அஜ்ஜேவ க³ந்துந்தி.
‘‘Gantabbo, bhikkhave, mānattacārikena bhikkhunā sabhikkhukā āvāsā vā anāvāsā vā sabhikkhuko āvāso…pe… sabhikkhuko anāvāso…pe… sabhikkhuko āvāso vā anāvāso vā, yatthassu bhikkhū samānasaṃvāsakā, yaṃ jaññā sakkomi ajjeva gantunti.
‘‘ந , பி⁴க்க²வே, மானத்தசாரிகேன பி⁴க்கு²னா பகதத்தேன பி⁴க்கு²னா ஸத்³தி⁴ங் ஏகச்ச²ன்னே ஆவாஸே வத்த²ப்³ப³ங், ந ஏகச்ச²ன்னே அனாவாஸே வத்த²ப்³ப³ங், ந ஏகச்ச²ன்னே ஆவாஸே வா அனாவாஸே வா வத்த²ப்³ப³ங். பகதத்தங் பி⁴க்கு²ங் தி³ஸ்வா ஆஸனா வுட்டா²தப்³ப³ங். பகதத்தோ பி⁴க்கு² ஆஸனேன நிமந்தேதப்³போ³. ந பகதத்தேன பி⁴க்கு²னா ஸத்³தி⁴ங் ஏகாஸனே நிஸீதி³தப்³ப³ங், ந நீசே ஆஸனே நிஸின்னே உச்சே ஆஸனே நிஸீதி³தப்³ப³ங், ந ச²மாயங் நிஸின்னே ஆஸனே நிஸீதி³தப்³ப³ங்; ந ஏகசங்கமே சங்கமிதப்³ப³ங், ந நீசே சங்கமே சங்கமந்தே உச்சே சங்கமே சங்கமிதப்³ப³ங், ந ச²மாயங் சங்கமந்தே சங்கமே சங்கமிதப்³ப³ங்.
‘‘Na , bhikkhave, mānattacārikena bhikkhunā pakatattena bhikkhunā saddhiṃ ekacchanne āvāse vatthabbaṃ, na ekacchanne anāvāse vatthabbaṃ, na ekacchanne āvāse vā anāvāse vā vatthabbaṃ. Pakatattaṃ bhikkhuṃ disvā āsanā vuṭṭhātabbaṃ. Pakatatto bhikkhu āsanena nimantetabbo. Na pakatattena bhikkhunā saddhiṃ ekāsane nisīditabbaṃ, na nīce āsane nisinne ucce āsane nisīditabbaṃ, na chamāyaṃ nisinne āsane nisīditabbaṃ; na ekacaṅkame caṅkamitabbaṃ, na nīce caṅkame caṅkamante ucce caṅkame caṅkamitabbaṃ, na chamāyaṃ caṅkamante caṅkame caṅkamitabbaṃ.
‘‘ந, பி⁴க்க²வே, மானத்தசாரிகேன பி⁴க்கு²னா பாரிவாஸிகேன பி⁴க்கு²னா ஸத்³தி⁴ங்…பே॰… மூலாயபடிகஸ்ஸனாரஹேன பி⁴க்கு²னா ஸத்³தி⁴ங்…பே॰… மானத்தாரஹேன பி⁴க்கு²னா ஸத்³தி⁴ங்…பே॰… மானத்தசாரிகேன வுட்³ட⁴தரேன பி⁴க்கு²னா ஸத்³தி⁴ங்…பே॰… அப்³பா⁴னாரஹேன பி⁴க்கு²னா ஸத்³தி⁴ங் ஏகச்ச²ன்னே ஆவாஸே வத்த²ப்³ப³ங், ந ஏகச்ச²ன்னே அனாவாஸே வத்த²ப்³ப³ங், ந ஏகச்ச²ன்னே ஆவாஸே வா அனாவாஸே வா வத்த²ப்³ப³ங்; ந ஏகாஸனே நிஸீதி³தப்³ப³ங், ந நீசே ஆஸனே நிஸின்னே உச்சே ஆஸனே நிஸீதி³தப்³ப³ங், ந ச²மாயங் நிஸின்னே ஆஸனே நிஸீதி³தப்³ப³ங்; ந ஏகசங்கமே சங்கமிதப்³ப³ங் , ந நீசே சங்கமே சங்கமந்தே உச்சே சங்கமே சங்கமிதப்³ப³ங், ந ச²மாயங் சங்கமந்தே சங்கமே சங்கமிதப்³ப³ங்.
‘‘Na, bhikkhave, mānattacārikena bhikkhunā pārivāsikena bhikkhunā saddhiṃ…pe… mūlāyapaṭikassanārahena bhikkhunā saddhiṃ…pe… mānattārahena bhikkhunā saddhiṃ…pe… mānattacārikena vuḍḍhatarena bhikkhunā saddhiṃ…pe… abbhānārahena bhikkhunā saddhiṃ ekacchanne āvāse vatthabbaṃ, na ekacchanne anāvāse vatthabbaṃ, na ekacchanne āvāse vā anāvāse vā vatthabbaṃ; na ekāsane nisīditabbaṃ, na nīce āsane nisinne ucce āsane nisīditabbaṃ, na chamāyaṃ nisinne āsane nisīditabbaṃ; na ekacaṅkame caṅkamitabbaṃ , na nīce caṅkame caṅkamante ucce caṅkame caṅkamitabbaṃ, na chamāyaṃ caṅkamante caṅkame caṅkamitabbaṃ.
1 ‘‘மானத்தசாரிகசதுத்தோ² சே, பி⁴க்க²வே, பரிவாஸங் த³தெ³ய்ய, மூலாய படிகஸ்ஸெய்ய, மானத்தங் த³தெ³ய்ய, தங்வீஸோ அப்³பெ⁴ய்ய, அகம்மங், ந ச கரணீய’’ந்தி.
2 ‘‘Mānattacārikacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya, akammaṃ, na ca karaṇīya’’nti.
92. அத² கோ² ஆயஸ்மா உபாலி யேன ப⁴க³வா தேனுபஸங்கமி, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா உபாலி ப⁴க³வந்தங் ஏதத³வோச – ‘‘கதி நு கோ², ப⁴ந்தே, மானத்தசாரிகஸ்ஸ பி⁴க்கு²னோ ரத்திச்சே²தா³’’தி? ‘‘சத்தாரோ கோ² , உபாலி, மானத்தசாரிகஸ்ஸ பி⁴க்கு²னோ ரத்திச்சே²தா³. ஸஹவாஸோ, விப்பவாஸோ, அனாரோசனா, ஊனே க³ணே சரணங் 3 – இமே கோ², உபாலி, சத்தாரோ மானத்தசாரிகஸ்ஸ பி⁴க்கு²னோ ரத்திச்சே²தா³’’தி.
92. Atha kho āyasmā upāli yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā upāli bhagavantaṃ etadavoca – ‘‘kati nu kho, bhante, mānattacārikassa bhikkhuno ratticchedā’’ti? ‘‘Cattāro kho , upāli, mānattacārikassa bhikkhuno ratticchedā. Sahavāso, vippavāso, anārocanā, ūne gaṇe caraṇaṃ 4 – ime kho, upāli, cattāro mānattacārikassa bhikkhuno ratticchedā’’ti.
93. தேன கோ² பன ஸமயேன ஸாவத்தி²யங் மஹாபி⁴க்கு²ஸங்கோ⁴ ஸன்னிபதிதோ ஹோதி. ந ஸக்கொந்தி மானத்தசாரிகா பி⁴க்கூ² மானத்தங் ஸோதே⁴துங். ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, மானத்தங் நிக்கி²பிதுங். ஏவஞ்ச பன, பி⁴க்க²வே, நிக்கி²பிதப்³ப³ங். தேன மானத்தசாரிகேன பி⁴க்கு²னா ஏகங் பி⁴க்கு²ங் உபஸங்கமித்வா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘மானத்தங் நிக்கி²பாமீ’தி. நிக்கி²த்தங் ஹோதி மானத்தங். ‘வத்தங் நிக்கி²பாமீ’தி. நிக்கி²த்தங் ஹோதி மானத்த’’ந்தி.
93. Tena kho pana samayena sāvatthiyaṃ mahābhikkhusaṅgho sannipatito hoti. Na sakkonti mānattacārikā bhikkhū mānattaṃ sodhetuṃ. Bhagavato etamatthaṃ ārocesuṃ. ‘‘Anujānāmi, bhikkhave, mānattaṃ nikkhipituṃ. Evañca pana, bhikkhave, nikkhipitabbaṃ. Tena mānattacārikena bhikkhunā ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo – ‘mānattaṃ nikkhipāmī’ti. Nikkhittaṃ hoti mānattaṃ. ‘Vattaṃ nikkhipāmī’ti. Nikkhittaṃ hoti mānatta’’nti.
94. தேன கோ² பன ஸமயேன ஸாவத்தி²யா பி⁴க்கூ² தஹங் தஹங் பக்கமிங்ஸு . ஸக்கொந்தி மானத்தசாரிகா பி⁴க்கூ² மானத்தங் ஸோதே⁴துங். ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, மானத்தங் ஸமாதி³யிதுங். ஏவஞ்ச பன, பி⁴க்க²வே, ஸமாதி³யிதப்³ப³ங். தேன மானத்தசாரிகேன பி⁴க்கு²னா ஏகங் பி⁴க்கு²ங் உபஸங்கமித்வா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா, ஏவமஸ்ஸ வசனீயோ – ‘மானத்தங் ஸமாதி³யாமீ’தி. ஸமாதி³ன்னங் ஹோதி மானத்தங். ‘வத்தங் ஸமாதி³யாமீ’தி. ஸமாதி³ன்னங் ஹோதி மானத்த’’ந்தி.
94. Tena kho pana samayena sāvatthiyā bhikkhū tahaṃ tahaṃ pakkamiṃsu . Sakkonti mānattacārikā bhikkhū mānattaṃ sodhetuṃ. Bhagavato etamatthaṃ ārocesuṃ. ‘‘Anujānāmi, bhikkhave, mānattaṃ samādiyituṃ. Evañca pana, bhikkhave, samādiyitabbaṃ. Tena mānattacārikena bhikkhunā ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā, evamassa vacanīyo – ‘mānattaṃ samādiyāmī’ti. Samādinnaṃ hoti mānattaṃ. ‘Vattaṃ samādiyāmī’ti. Samādinnaṃ hoti mānatta’’nti.
மானத்தசாரிகவத்தங் நிட்டி²தங்.
Mānattacārikavattaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / மானத்தசாரிகவத்தகதா² • Mānattacārikavattakathā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 4. மானத்தாசாரிகவத்தகதா² • 4. Mānattācārikavattakathā
