| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. মানত্থদ্ধসুত্তং
5. Mānatthaddhasuttaṃ
২০১. সাৰত্থিনিদানং । তেন খো পন সমযেন মানত্থদ্ধো নাম ব্রাহ্মণো সাৰত্থিযং পটিৰসতি। সো নেৰ মাতরং অভিৰাদেতি, ন পিতরং অভিৰাদেতি, ন আচরিযং অভিৰাদেতি, ন জেট্ঠভাতরং অভিৰাদেতি। তেন খো পন সমযেন ভগৰা মহতিযা পরিসায পরিৰুতো ধম্মং দেসেতি। অথ খো মানত্থদ্ধস্স ব্রাহ্মণস্স এতদহোসি – ‘‘অযং খো সমণো গোতমো মহতিযা পরিসায পরিৰুতো ধম্মং দেসেতি। যংনূনাহং যেন সমণো গোতমো তেনুপসঙ্কমেয্যং। সচে মং সমণো গোতমো আলপিস্সতি, অহম্পি তং আলপিস্সামি। নো চে মং সমণো গোতমো আলপিস্সতি, অহম্পি নালপিস্সামী’’তি। অথ খো মানত্থদ্ধো ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা তুণ্হীভূতো একমন্তং অট্ঠাসি। অথ খো ভগৰা তং নালপি। অথ খো মানত্থদ্ধো ব্রাহ্মণো – ‘নাযং সমণো গোতমো কিঞ্চি জানাতী’তি ততোৰ পুন নিৰত্তিতুকামো অহোসি। অথ খো ভগৰা মানত্থদ্ধস্স ব্রাহ্মণস্স চেতসা চেতোপরিৰিতক্কমঞ্ঞায মানত্থদ্ধং ব্রাহ্মণং গাথায অজ্ঝভাসি –
201. Sāvatthinidānaṃ . Tena kho pana samayena mānatthaddho nāma brāhmaṇo sāvatthiyaṃ paṭivasati. So neva mātaraṃ abhivādeti, na pitaraṃ abhivādeti, na ācariyaṃ abhivādeti, na jeṭṭhabhātaraṃ abhivādeti. Tena kho pana samayena bhagavā mahatiyā parisāya parivuto dhammaṃ deseti. Atha kho mānatthaddhassa brāhmaṇassa etadahosi – ‘‘ayaṃ kho samaṇo gotamo mahatiyā parisāya parivuto dhammaṃ deseti. Yaṃnūnāhaṃ yena samaṇo gotamo tenupasaṅkameyyaṃ. Sace maṃ samaṇo gotamo ālapissati, ahampi taṃ ālapissāmi. No ce maṃ samaṇo gotamo ālapissati, ahampi nālapissāmī’’ti. Atha kho mānatthaddho brāhmaṇo yena bhagavā tenupasaṅkami; upasaṅkamitvā tuṇhībhūto ekamantaṃ aṭṭhāsi. Atha kho bhagavā taṃ nālapi. Atha kho mānatthaddho brāhmaṇo – ‘nāyaṃ samaṇo gotamo kiñci jānātī’ti tatova puna nivattitukāmo ahosi. Atha kho bhagavā mānatthaddhassa brāhmaṇassa cetasā cetoparivitakkamaññāya mānatthaddhaṃ brāhmaṇaṃ gāthāya ajjhabhāsi –
‘‘ন মানং ব্রাহ্মণ সাধু, অত্থিকস্সীধ ব্রাহ্মণ।
‘‘Na mānaṃ brāhmaṇa sādhu, atthikassīdha brāhmaṇa;
যেন অত্থেন আগচ্ছি, তমেৰমনুব্রূহযে’’তি॥
Yena atthena āgacchi, tamevamanubrūhaye’’ti.
অথ খো মানত্থদ্ধো ব্রাহ্মণো – ‘‘চিত্তং মে সমণো গোতমো জানাতী’’তি তত্থেৰ ভগৰতো পাদেসু সিরসা নিপতিত্ৰা ভগৰতো পাদানি মুখেন চ পরিচুম্বতি পাণীহি চ পরিসম্বাহতি, নামঞ্চ সাৰেতি – ‘‘মানত্থদ্ধাহং, ভো গোতম, মানত্থদ্ধাহং, ভো গোতমা’’তি। অথ খো সা পরিসা অব্ভুতচিত্তজাতা 1 অহোসি – ‘অচ্ছরিযং ৰত ভো, অব্ভুতং ৰত ভো! অযঞ্হি মানত্থদ্ধো ব্রাহ্মণো নেৰ মাতরং অভিৰাদেতি, ন পিতরং অভিৰাদেতি, ন আচরিযং অভিৰাদেতি, ন জেট্ঠভাতরং অভিৰাদেতি; অথ চ পন সমণে গোতমে এৰরূপং পরমনিপচ্চকারং করোতী’তি। অথ খো ভগৰা মানত্থদ্ধং ব্রাহ্মণং এতদৰোচ – ‘‘অলং, ব্রাহ্মণ , উট্ঠেহি, সকে আসনে নিসীদ। যতো তে মযি চিত্তং পসন্ন’’ন্তি। অথ খো মানত্থদ্ধো ব্রাহ্মণো সকে আসনে নিসীদিত্ৰা ভগৰন্তং গাথায অজ্ঝভাসি –
Atha kho mānatthaddho brāhmaṇo – ‘‘cittaṃ me samaṇo gotamo jānātī’’ti tattheva bhagavato pādesu sirasā nipatitvā bhagavato pādāni mukhena ca paricumbati pāṇīhi ca parisambāhati, nāmañca sāveti – ‘‘mānatthaddhāhaṃ, bho gotama, mānatthaddhāhaṃ, bho gotamā’’ti. Atha kho sā parisā abbhutacittajātā 2 ahosi – ‘acchariyaṃ vata bho, abbhutaṃ vata bho! Ayañhi mānatthaddho brāhmaṇo neva mātaraṃ abhivādeti, na pitaraṃ abhivādeti, na ācariyaṃ abhivādeti, na jeṭṭhabhātaraṃ abhivādeti; atha ca pana samaṇe gotame evarūpaṃ paramanipaccakāraṃ karotī’ti. Atha kho bhagavā mānatthaddhaṃ brāhmaṇaṃ etadavoca – ‘‘alaṃ, brāhmaṇa , uṭṭhehi, sake āsane nisīda. Yato te mayi cittaṃ pasanna’’nti. Atha kho mānatthaddho brāhmaṇo sake āsane nisīditvā bhagavantaṃ gāthāya ajjhabhāsi –
‘‘কেসু ন মানং কযিরাথ, কেসু চস্স সগারৰো।
‘‘Kesu na mānaṃ kayirātha, kesu cassa sagāravo;
ক্যস্স অপচিতা অস্সু, ক্যস্সু সাধু সুপূজিতা’’তি॥
Kyassa apacitā assu, kyassu sādhu supūjitā’’ti.
‘‘মাতরি পিতরি চাপি, অথো জেট্ঠম্হি ভাতরি।
‘‘Mātari pitari cāpi, atho jeṭṭhamhi bhātari;
আচরিযে চতুত্থম্হি,
Ācariye catutthamhi,
তেসু ন মানং কযিরাথ।
Tesu na mānaṃ kayirātha;
তেসু অস্স সগারৰো,
Tesu assa sagāravo,
ত্যস্স অপচিতা অস্সু।
Tyassa apacitā assu;
ত্যস্সু সাধু সুপূজিতা॥
Tyassu sādhu supūjitā.
‘‘অরহন্তে সীতীভূতে, কতকিচ্চে অনাসৰে।
‘‘Arahante sītībhūte, katakicce anāsave;
নিহচ্চ মানং অথদ্ধো, তে নমস্সে অনুত্তরে’’তি॥
Nihacca mānaṃ athaddho, te namasse anuttare’’ti.
এৰং ৰুত্তে, মানত্থদ্ধো ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম…পে॰… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি।
Evaṃ vutte, mānatthaddho brāhmaṇo bhagavantaṃ etadavoca – ‘‘abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. মানত্থদ্ধসুত্তৰণ্ণনা • 5. Mānatthaddhasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. মানত্থদ্ধসুত্তৰণ্ণনা • 5. Mānatthaddhasuttavaṇṇanā
