| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
5. මානත්‌ථද්‌ධසුත්‌තවණ්‌ණනා
5. Mānatthaddhasuttavaṇṇanā
201. පඤ්‌චමෙ මානත්‌ථද්‌ධොති වාතභරිතභස්‌තා විය මානෙන ථද්‌ධො. ආචරියන්‌ති සිප්‌පුග්‌ගහණකාලෙ ආචරියො අනභිවාදෙන්‌තස්‌ස සිප්‌පං න දෙති, අඤ්‌ඤස්‌මිං පන කාලෙ තං න අභිවාදෙති, අත්‌ථිභාවම්‌පිස්‌ස න ජානාති. නායං සමණොති එවං කිරස්‌ස අහොසි – ‘‘යස්‌මා අයං සමණො මාදිසෙ ජාතිසම්‌පන්‌නබ්‍රාහ්‌මණෙ සම්‌පත්‌තෙ පටිසන්‌ථාරමත්‌තම්‌පි න කරොති, තස්‌මා න කිඤ්‌චි ජානාතී’’ති.
201. Pañcame mānatthaddhoti vātabharitabhastā viya mānena thaddho. Ācariyanti sippuggahaṇakāle ācariyo anabhivādentassa sippaṃ na deti, aññasmiṃ pana kāle taṃ na abhivādeti, atthibhāvampissa na jānāti. Nāyaṃ samaṇoti evaṃ kirassa ahosi – ‘‘yasmā ayaṃ samaṇo mādise jātisampannabrāhmaṇe sampatte paṭisanthāramattampi na karoti, tasmā na kiñci jānātī’’ti.
අබ්‌භුතවිත්‌තජාතාති අභූතපුබ්‌බාය තුට්‌ඨියා සමන්‌නාගතා. කෙසු චස්‌සාති කෙසු භවෙය්‍ය. ක්‍යස්‌සාති කෙ අස්‌ස පුග්‌ගලස්‌ස. අපචිතා අස්‌සූති අපචිතිං දස්‌සෙතුං යුත්‌තා භවෙය්‍යුං. අරහන්‌තෙති ඉමාය ගාථාය දෙසනාකුසලත්‌තා අත්‌තානං අන්‌තොකත්‌වා පූජනෙය්‍යං දස්‌සෙති. පඤ්‌චමං.
Abbhutavittajātāti abhūtapubbāya tuṭṭhiyā samannāgatā. Kesu cassāti kesu bhaveyya. Kyassāti ke assa puggalassa. Apacitā assūti apacitiṃ dassetuṃ yuttā bhaveyyuṃ. Arahanteti imāya gāthāya desanākusalattā attānaṃ antokatvā pūjaneyyaṃ dasseti. Pañcamaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 5. මානත්‌ථද්‌ධසුත්‌තං • 5. Mānatthaddhasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 5. මානත්‌ථද්‌ධසුත්‌තවණ්‌ණනා • 5. Mānatthaddhasuttavaṇṇanā
