| Library / Tipiṭaka / তিপিটক • Tipiṭaka / ৰিনযালঙ্কার-টীকা • Vinayālaṅkāra-ṭīkā |
১৭. মঞ্চপীঠাদিসঙ্ঘিকসেনাসনেসুপটিপজ্জিতব্বৰিনিচ্ছযকথা
17. Mañcapīṭhādisaṅghikasenāsanesupaṭipajjitabbavinicchayakathā
৮২. এৰং সহসেয্যৰিনিচ্ছযং কথেত্ৰা ইদানি সঙ্ঘিকে ৰিহারে সেয্যাসু কত্তব্বৰিনিচ্ছযং কথেতুং ‘‘ৰিহারে সঙ্ঘিকে সেয্য’’ন্ত্যাদিমাহ। তত্থ সমগ্গং কম্মং সমুপগচ্ছতীতি সঙ্ঘো, অযমেৰ ৰচনত্থো সব্বসঙ্ঘসাধারণো। সঙ্ঘস্স দিন্নো সঙ্ঘিকো, ৰিহরতি এত্থাতি ৰিহারো, তস্মিং। সযন্তি এত্থাতি সেয্যা, তং। অসন্থরীতি সন্থরিত্ৰান। পক্কমনং পক্কমো, গমনন্তি অত্থো। ‘‘ৰিহারে সঙ্ঘিকে সেয্যং, সন্থরিত্ৰান পক্কমো’’তি ইমস্স উদ্দেসপাঠস্স সঙ্ঘিকে ৰিহারে…পে॰… পক্কমনন্তি অত্থো দট্ঠব্বোতি যোজনা। তত্রাতি তস্মিং পক্কমনে অযং ঈদিসো মযা ৰুচ্চমানো ৰিনিচ্ছযো ৰেদিতব্বোতি অত্থো। কতমো সো ৰিনিচ্ছযোতি আহ ‘‘সঙ্ঘিকে…পে॰… পাচিত্তিয’’ন্তি। অপরিক্খিত্তস্স উপচারো নাম সেনাসনতো দ্ৰে লেড্ডুপাতা। পাচিত্তিযন্তি পঠমং পাদং অতিক্কামেন্তস্স দুক্কটং, দুতিযাতিক্কমে পাচিত্তিযং। কথং ৰিঞ্ঞাযতিচ্চাহ ‘‘যো পন ভিক্খু…পে॰… ৰচনতো’’তি।
82. Evaṃ sahaseyyavinicchayaṃ kathetvā idāni saṅghike vihāre seyyāsu kattabbavinicchayaṃ kathetuṃ ‘‘vihāre saṅghike seyya’’ntyādimāha. Tattha samaggaṃ kammaṃ samupagacchatīti saṅgho, ayameva vacanattho sabbasaṅghasādhāraṇo. Saṅghassa dinno saṅghiko, viharati etthāti vihāro, tasmiṃ. Sayanti etthāti seyyā, taṃ. Asantharīti santharitvāna. Pakkamanaṃ pakkamo, gamananti attho. ‘‘Vihāre saṅghike seyyaṃ, santharitvāna pakkamo’’ti imassa uddesapāṭhassa saṅghike vihāre…pe… pakkamananti attho daṭṭhabboti yojanā. Tatrāti tasmiṃ pakkamane ayaṃ īdiso mayā vuccamāno vinicchayo veditabboti attho. Katamo so vinicchayoti āha ‘‘saṅghike…pe… pācittiya’’nti. Aparikkhittassa upacāro nāma senāsanato dve leḍḍupātā. Pācittiyanti paṭhamaṃ pādaṃ atikkāmentassa dukkaṭaṃ, dutiyātikkame pācittiyaṃ. Kathaṃ viññāyaticcāha ‘‘yo pana bhikkhu…pe… vacanato’’ti.
তত্থ সঙ্ঘিকো ৰিহারো পাকটো, সেয্যা অপাকটা, সা কতিৰিধাইচ্চাহ ‘‘সেয্যা নাম…পে॰… দসৰিধা’’তি। তত্থাপি কতমা ভিসি, কতমা চিমিলিকাদযোতি আহ ‘‘তত্থ ভিসীতি…পে॰… এস নযো পণ্ণসন্থারে’’তি। তত্থ মঞ্চে অত্থরিতব্বাতি মঞ্চকভিসি, এৰং ইতরত্র, ৰণ্ণানুরক্খণত্থং কতাতি পটখণ্ডাদীহি সিব্বিত্ৰা কতা। ভূমিযং অত্থরিতব্বাতি চিমিলিকায সতি তস্সা উপরি, অসতি সুদ্ধভূমিযং অত্থরিতব্বা। সীহধম্মাদীনং পরিহরণে এৰ পটিক্খেপোতি ইমিনা মঞ্চপীঠাদীসু অত্থরিত্ৰা পুন সংহরিত্ৰা ঠপনাদিৰসেন অত্তনো অত্থায পরিহরণমেৰ ন ৰট্টতি, ভূমত্থরণাদিৰসেন পরিভোগো পন অত্তনো পরিহরণং ন হোতীতি দস্সেতি। খন্ধকে হি ‘‘অন্তোপি মঞ্চে পঞ্ঞত্তানি হোন্তি, বহিপি মঞ্চে পঞ্ঞত্তানি হোন্তী’’তি এৰং অত্তনো অত্থায মঞ্চাদীসু পঞ্ঞপেত্ৰা পরিহরণৰত্থুস্মিং ‘‘ন, ভিক্খৰে, মহাচম্মানি ধারেতব্বানি সীহচম্মং ব্যগ্ঘচম্মং দীপিচম্মং, যো ধারেয্য, আপত্তি দুক্কটস্সা’’তি (মহাৰ॰ ২৫৫) পটিক্খেপো কতো, তস্মা ৰুত্তনযেনেৰেত্থ অধিপ্পাযো দট্ঠব্বো। সারত্থদীপনিযং (সারত্থ॰ টী॰ পাচিত্তিয ৩.১১২) পন ‘‘যদি এৰং ‘পরিহরণেযেৰ পটিক্খেপো’তি ইদং কস্মা ৰুত্তন্তি চোদনং কত্ৰা ‘অনুজানামি, ভিক্খৰে, সব্বং পাসাদপরিভোগ’ন্তি (চূল়ৰ॰ ৩২০) ৰচনতো পুগ্গলিকেপি সেনাসনে সেনাসনপরিভোগৰসেন নিযমিতং সুৰণ্ণঘটাদিকং পরিভুঞ্জিতুং ৰট্টমানম্পি কেৰলং অত্তনো সন্তকং কত্ৰা পরিভুঞ্জিতুং ন ৰট্টতি। এৰমিদং ভূমত্থরণৰসেন পরিভুঞ্জিতুং ৰট্টমানম্পি অত্তনো সন্তকং কত্ৰা তং তং ৰিহারং হরিত্ৰা পরিভুঞ্জিতুং ন ৰট্টতীতি দস্সনত্থং পরিহরণেযেৰ পটিক্খেপো ৰেদিতব্বো’’তি ৰুত্তং।
Tattha saṅghiko vihāro pākaṭo, seyyā apākaṭā, sā katividhāiccāha ‘‘seyyā nāma…pe… dasavidhā’’ti. Tatthāpi katamā bhisi, katamā cimilikādayoti āha ‘‘tattha bhisīti…pe… esa nayo paṇṇasanthāre’’ti. Tattha mañce attharitabbāti mañcakabhisi, evaṃ itaratra, vaṇṇānurakkhaṇatthaṃ katāti paṭakhaṇḍādīhi sibbitvā katā. Bhūmiyaṃ attharitabbāti cimilikāya sati tassā upari, asati suddhabhūmiyaṃ attharitabbā. Sīhadhammādīnaṃ pariharaṇe evapaṭikkhepoti iminā mañcapīṭhādīsu attharitvā puna saṃharitvā ṭhapanādivasena attano atthāya pariharaṇameva na vaṭṭati, bhūmattharaṇādivasena paribhogo pana attano pariharaṇaṃ na hotīti dasseti. Khandhake hi ‘‘antopi mañce paññattāni honti, bahipi mañce paññattāni hontī’’ti evaṃ attano atthāya mañcādīsu paññapetvā pariharaṇavatthusmiṃ ‘‘na, bhikkhave, mahācammāni dhāretabbāni sīhacammaṃ byagghacammaṃ dīpicammaṃ, yo dhāreyya, āpatti dukkaṭassā’’ti (mahāva. 255) paṭikkhepo kato, tasmā vuttanayenevettha adhippāyo daṭṭhabbo. Sāratthadīpaniyaṃ (sārattha. ṭī. pācittiya 3.112) pana ‘‘yadi evaṃ ‘pariharaṇeyeva paṭikkhepo’ti idaṃ kasmā vuttanti codanaṃ katvā ‘anujānāmi, bhikkhave, sabbaṃ pāsādaparibhoga’nti (cūḷava. 320) vacanato puggalikepi senāsane senāsanaparibhogavasena niyamitaṃ suvaṇṇaghaṭādikaṃ paribhuñjituṃ vaṭṭamānampi kevalaṃ attano santakaṃ katvā paribhuñjituṃ na vaṭṭati. Evamidaṃ bhūmattharaṇavasena paribhuñjituṃ vaṭṭamānampi attano santakaṃ katvā taṃ taṃ vihāraṃ haritvā paribhuñjituṃ na vaṭṭatīti dassanatthaṃ pariharaṇeyeva paṭikkhepo veditabbo’’ti vuttaṃ.
পাৰারো কোজৰোতি পচ্চত্থরণত্থাযেৰ ঠপিতা উগ্গতলোমা অত্থরণৰিসেসা। এত্তকমেৰ ৰুত্তন্তি অট্ঠকথাসু (পাচি॰ অট্ঠ॰ ১১৬) ৰুত্তং। ‘‘ইদং অট্ঠকথাসু তথাৰুত্তভাৰদস্সনত্থং ৰুত্তং, অঞ্ঞম্পি তাদিসং মঞ্চপীঠেসু অত্থরিতব্বং অত্থরণমেৰা’’তি তীসুপি গণ্ঠিপদেসু ৰুত্তং। মাতিকাট্ঠকথাযং (কঙ্খা॰ অট্ঠ॰ দুতিযসেনাসনসিক্খাপদৰণ্ণনা) পন ‘‘পচ্চত্থরণং নাম পাৰারো কোজৰো’’তি নিযমেত্ৰা ৰুত্তং, তস্মা গণ্ঠিপদেসু ৰুত্তং ইমিনা ন সমেতি, ‘‘ৰীমংসিত্ৰা গহেতব্ব’’ন্তি সারত্থদীপনিযং (সারত্থ॰ টী॰ পাচিত্তিয ৩.১১৬) ৰুত্তং। ৰীমংসিতে পন এৰমধিপ্পাযো পঞ্ঞাযতি – মাতিকাট্ঠকথাপি অট্ঠকথাযেৰ, তস্মা মহাঅট্ঠকথাদীসু ৰুত্তনযেন ‘‘পাৰারো কোজৰো’’তি নিযমেত্ৰা ৰুত্তং, এৰং নিযমনে সতিপি যথা ‘‘লদ্ধাতপত্তো রাজকুমারো’’তি আতপত্তস্স লদ্ধভাৰেযেৰ নিযমেত্ৰা ৰুত্তেপি নিদস্সননযৰসেন রাজককুধভণ্ডসামঞ্ঞেন সমানা ৰালবীজনাদযোপি ৰুত্তাযেৰ হোন্তি, এৰং ‘‘পাৰারো কোজৰো’’তি নিযমেত্ৰা ৰুত্তেপি নিদস্সননযৰসেন তেহি মঞ্চপীঠেসু অত্থরিতব্বভাৰসামঞ্ঞেন সমানা অঞ্ঞে অত্থরণাপি ৰুত্তাযেৰ হোন্তি, তস্মা গণ্ঠিপদেসু ৰুত্তৰচনং অট্ঠকথাৰচনস্স পটিলোমং ন হোতি, অনুলোমমেৰাতি দট্ঠব্বং।
Pāvāro kojavoti paccattharaṇatthāyeva ṭhapitā uggatalomā attharaṇavisesā. Ettakameva vuttanti aṭṭhakathāsu (pāci. aṭṭha. 116) vuttaṃ. ‘‘Idaṃ aṭṭhakathāsu tathāvuttabhāvadassanatthaṃ vuttaṃ, aññampi tādisaṃ mañcapīṭhesu attharitabbaṃ attharaṇamevā’’ti tīsupi gaṇṭhipadesu vuttaṃ. Mātikāṭṭhakathāyaṃ (kaṅkhā. aṭṭha. dutiyasenāsanasikkhāpadavaṇṇanā) pana ‘‘paccattharaṇaṃ nāma pāvāro kojavo’’ti niyametvā vuttaṃ, tasmā gaṇṭhipadesu vuttaṃ iminā na sameti, ‘‘vīmaṃsitvā gahetabba’’nti sāratthadīpaniyaṃ (sārattha. ṭī. pācittiya 3.116) vuttaṃ. Vīmaṃsite pana evamadhippāyo paññāyati – mātikāṭṭhakathāpi aṭṭhakathāyeva, tasmā mahāaṭṭhakathādīsu vuttanayena ‘‘pāvāro kojavo’’ti niyametvā vuttaṃ, evaṃ niyamane satipi yathā ‘‘laddhātapatto rājakumāro’’ti ātapattassa laddhabhāveyeva niyametvā vuttepi nidassananayavasena rājakakudhabhaṇḍasāmaññena samānā vālabījanādayopi vuttāyeva honti, evaṃ ‘‘pāvāro kojavo’’ti niyametvā vuttepi nidassananayavasena tehi mañcapīṭhesu attharitabbabhāvasāmaññena samānā aññe attharaṇāpi vuttāyeva honti, tasmā gaṇṭhipadesu vuttavacanaṃ aṭṭhakathāvacanassa paṭilomaṃ na hoti, anulomamevāti daṭṭhabbaṃ.
ইমস্মিং পন ঠানে ‘‘যেন ৰিহারো কারিতো, সো ৰিহারস্সামিকো’’তি পাঠং নিস্সায একচ্চে ৰিনযধরা ‘‘সঙ্ঘিকৰিহারস্স ৰা পুগ্গলিকৰিহারস্স ৰা ৰিহারদাযকোযেৰ সামিকো, সোযেৰ ইস্সরো, তস্স রুচিযা এৰ ৰসিতুং লভতি, ন সঙ্ঘগণপুগ্গলানং রুচিযা’’তি ৰিনিচ্ছযং করোন্তি, সো ৰীমংসিতব্বো, কথং অযং পাঠো কিমত্থং সাধেতি ইস্সরত্থং ৰা আপুচ্ছিতব্বত্থং ৰাতি? এৰং ৰীমংসিতে ‘‘ভিক্খুম্হি সতি ভিক্খু আপুচ্ছিতব্বো’’তিআদিৰচনতো আপুচ্ছিতব্বত্থমেৰ সাধেতি, ন ইস্সরত্থন্তি ৰিঞ্ঞাযতি।
Imasmiṃ pana ṭhāne ‘‘yena vihāro kārito, so vihārassāmiko’’ti pāṭhaṃ nissāya ekacce vinayadharā ‘‘saṅghikavihārassa vā puggalikavihārassa vā vihāradāyakoyeva sāmiko, soyeva issaro, tassa ruciyā eva vasituṃ labhati, na saṅghagaṇapuggalānaṃ ruciyā’’ti vinicchayaṃ karonti, so vīmaṃsitabbo, kathaṃ ayaṃ pāṭho kimatthaṃ sādheti issaratthaṃ vā āpucchitabbatthaṃ vāti? Evaṃ vīmaṃsite ‘‘bhikkhumhi sati bhikkhu āpucchitabbo’’tiādivacanato āpucchitabbatthameva sādheti, na issaratthanti viññāyati.
অথ সিযা ‘‘আপুচ্ছিতব্বত্থে সিদ্ধে ইস্সরত্থো সিদ্ধোযেৰ হোতি। ইস্সরভাৰতোযেৰ হি সো আপুচ্ছিতব্বো’’তি। তত্থেৰং ৰত্তব্বং – ‘‘আপুচ্ছন্তেন চ ভিক্খুম্হি সতি ভিক্খু আপুচ্ছিতব্বো, তস্মিং অসতি সামণেরো, তস্মিং অসতি আরামিকো’’তিআদিৰচনতো আযস্মন্তানং মতেন ভিক্খুপি সামণেরোপি আরামিকোপি ৰিহারকারকোপি তস্স কুলে যো কোচি পুগ্গলোপি ইস্সরোতি আপজ্জেয্য, এৰং ৰিঞ্ঞাযমানেপি ভিক্খুম্হি ৰা সামণেরে ৰা আরামিকে ৰা সতি তেযেৰ ইস্সরা, ন ৰিহারকারকো। তেসু একস্মিম্পি অসতিযেৰ ৰিহারকারকো ইস্সরো সিযাতি। ইমস্মিং পন অধিকারে সঙ্ঘিকং সেনাসনং রক্খণত্থায আপুচ্ছিতব্বংযেৰ ৰদতি, ন ইস্সরভাৰতো আপুচ্ছিতব্বং। ৰুত্তঞ্হি অট্ঠকথাযং (পাচি॰ অট্ঠ॰ ১১৬) ‘‘অনাপুচ্ছং ৰা গচ্ছেয্যাতি এত্থ ভিক্খুম্হি সতি ভিক্খু আপুচ্ছিতব্বো’’তিআদি।
Atha siyā ‘‘āpucchitabbatthe siddhe issarattho siddhoyeva hoti. Issarabhāvatoyeva hi so āpucchitabbo’’ti. Tatthevaṃ vattabbaṃ – ‘‘āpucchantena ca bhikkhumhi sati bhikkhu āpucchitabbo, tasmiṃ asati sāmaṇero, tasmiṃ asati ārāmiko’’tiādivacanato āyasmantānaṃ matena bhikkhupi sāmaṇeropi ārāmikopi vihārakārakopi tassa kule yo koci puggalopi issaroti āpajjeyya, evaṃ viññāyamānepi bhikkhumhi vā sāmaṇere vā ārāmike vā sati teyeva issarā, na vihārakārako. Tesu ekasmimpi asatiyeva vihārakārako issaro siyāti. Imasmiṃ pana adhikāre saṅghikaṃ senāsanaṃ rakkhaṇatthāya āpucchitabbaṃyeva vadati, na issarabhāvato āpucchitabbaṃ. Vuttañhi aṭṭhakathāyaṃ (pāci. aṭṭha. 116) ‘‘anāpucchaṃ vā gaccheyyāti ettha bhikkhumhi sati bhikkhu āpucchitabbo’’tiādi.
অথাপি এৰং ৰদেয্য ‘‘ন সকলস্স ৰাক্যপাঠস্স অধিপ্পাযত্থং সন্ধায অম্হেহি ৰুত্তং, অথ খো ‘ৰিহারস্সামিকো’তি এতস্স পদত্থংযেৰ সন্ধায ৰুত্তং। কথং? সং এতস্স অত্থীতি সামিকো, ৰিহারস্স সামিকো ৰিহারস্সামিকো। ‘কো ৰিহারস্সামিকো নামা’তি ৰুত্তে ‘যেন ৰিহারো কারিতো, সো ৰিহারস্সামিকো নামা’তি ৰত্তব্বো, তস্মা ৰিহারকারকো দাযকো ৰিহারস্সামিকো নামাতি ৰিঞ্ঞাযতি, এৰং ৰিঞ্ঞাযমানে সতি সামিকো নাম সস্স ধনস্স ইস্সরো, তস্স রুচিযা এৰ অঞ্ঞে লভন্তি, তস্মা ৰিহারস্সামিকভূতস্স দাযকস্স রুচিযা এৰ ভিক্খূ ৰসিতুং লভন্তি, ন সঙ্ঘগণপুগ্গলানং রুচিযাতি ইমমত্থং সন্ধায ৰুত্ত’’ন্তি। তে এৰং ৰত্তব্বা – মা আযস্মন্তো এৰং অৰচুত্থ, যথা নাম ‘‘ঘটিকারো ব্রহ্মা’’তি ৰুত্তো সো ব্রহ্মা ইদানি ঘটং ন করোতি, পুরিমত্তভাৰে পন করোতি, তস্মা ‘‘ঘটং করোতী’’তি ৰচনত্থেন ‘‘ঘটিকারো’’তি নামং লভতি। ইতি পুব্বে লদ্ধনামত্তা পুব্বৰোহারৰসেন ব্রহ্মভূতোপি ‘‘ঘটিকারো’’ইচ্চেৰ ৰুচ্চতি, এৰং সো ৰিহারকারকো ভিক্খূনং পরিচ্চত্তকালতো পট্ঠায ৰিহারস্সামিকো ন হোতি ৰত্থুপরিচ্চাগলক্খণত্তা দানস্স, পুব্বে পন অপরিচ্চত্তকালে ৰিহারস্স কারকত্তা ৰিহারস্সামিকো নাম হোতি, সো এৰং পুব্বে লদ্ধনামত্তা পুব্বৰোহারৰসেন ‘‘ৰিহারস্সামিকো’’তি ৰুচ্চতি, ন, পরিচ্চত্তস্স ৰিহারস্স ইস্সরভাৰতো। তেনেৰ সম্মাসম্বুদ্ধেন ‘‘ৰিহারদাযকানং রুচিযা ভিক্খূ ৰসন্তূ’’তি অৰত্ৰা সেনাসনপঞ্ঞাপকো অনুঞ্ঞাতোতি দট্ঠব্বো। তথা হি ৰুত্তং ৰিমতিৰিনোদনিযং (ৰি॰ ৰি॰ টী॰ মহাৰগ্গ ২.২৯৫) ‘‘তেসং গেহানীতি এত্থ ভিক্খূনং ৰাসত্থায কতম্পি যাৰ ন দেন্তি, তাৰ তেসং সন্তকংযেৰ ভৰিস্সতীতি দট্ঠব্ব’’ন্তি, তেন দিন্নকালতো পট্ঠায তেসং সন্তকানি ন হোন্তীতি দস্সেতি। অযং পন কথা পাঠস্স সম্মুখীভূতত্তা ইমস্মিং ঠানে কথিতা। ৰিহারৰিনিচ্ছযো পন চতুপচ্চযভাজনৰিনিচ্ছযে (ৰি॰ সঙ্গ॰ অট্ঠ॰ ১৯৪ আদযো) আৰি ভৰিস্সতি। যো কোচীতি ঞাতকো ৰা অঞ্ঞাতকো ৰা যো কোচি। যেন মঞ্চং পীঠং ৰা ৰিনন্তি, তং মঞ্চপীঠকৰানং।
Athāpi evaṃ vadeyya ‘‘na sakalassa vākyapāṭhassa adhippāyatthaṃ sandhāya amhehi vuttaṃ, atha kho ‘vihārassāmiko’ti etassa padatthaṃyeva sandhāya vuttaṃ. Kathaṃ? Saṃ etassa atthīti sāmiko, vihārassa sāmiko vihārassāmiko. ‘Ko vihārassāmiko nāmā’ti vutte ‘yena vihāro kārito, so vihārassāmiko nāmā’ti vattabbo, tasmā vihārakārako dāyako vihārassāmiko nāmāti viññāyati, evaṃ viññāyamāne sati sāmiko nāma sassa dhanassa issaro, tassa ruciyā eva aññe labhanti, tasmā vihārassāmikabhūtassa dāyakassa ruciyā eva bhikkhū vasituṃ labhanti, na saṅghagaṇapuggalānaṃ ruciyāti imamatthaṃ sandhāya vutta’’nti. Te evaṃ vattabbā – mā āyasmanto evaṃ avacuttha, yathā nāma ‘‘ghaṭikāro brahmā’’ti vutto so brahmā idāni ghaṭaṃ na karoti, purimattabhāve pana karoti, tasmā ‘‘ghaṭaṃ karotī’’ti vacanatthena ‘‘ghaṭikāro’’ti nāmaṃ labhati. Iti pubbe laddhanāmattā pubbavohāravasena brahmabhūtopi ‘‘ghaṭikāro’’icceva vuccati, evaṃ so vihārakārako bhikkhūnaṃ pariccattakālato paṭṭhāya vihārassāmiko na hoti vatthupariccāgalakkhaṇattā dānassa, pubbe pana apariccattakāle vihārassa kārakattā vihārassāmiko nāma hoti, so evaṃ pubbe laddhanāmattā pubbavohāravasena ‘‘vihārassāmiko’’ti vuccati, na, pariccattassa vihārassa issarabhāvato. Teneva sammāsambuddhena ‘‘vihāradāyakānaṃ ruciyā bhikkhū vasantū’’ti avatvā senāsanapaññāpako anuññātoti daṭṭhabbo. Tathā hi vuttaṃ vimativinodaniyaṃ (vi. vi. ṭī. mahāvagga 2.295) ‘‘tesaṃ gehānīti ettha bhikkhūnaṃ vāsatthāya katampi yāva na denti, tāva tesaṃ santakaṃyeva bhavissatīti daṭṭhabba’’nti, tena dinnakālato paṭṭhāya tesaṃ santakāni na hontīti dasseti. Ayaṃ pana kathā pāṭhassa sammukhībhūtattā imasmiṃ ṭhāne kathitā. Vihāravinicchayo pana catupaccayabhājanavinicchaye (vi. saṅga. aṭṭha. 194 ādayo) āvi bhavissati. Yo kocīti ñātako vā aññātako vā yo koci. Yena mañcaṃ pīṭhaṃ vā vinanti, taṃ mañcapīṭhakavānaṃ.
৮৩. সিলুচ্চযলেণন্তি সিলুচ্চযে লেণং, পব্বতগুহাতি অত্থো। ‘‘সেনাসনং উপচিকাহি খাযিত’’ন্তি ইমস্মিং ৰত্থুস্মিং পঞ্ঞত্তত্তা ৰত্থুঅনুরূপৰসেন অট্ঠকথাযং উপচিকাসঙ্কায অভাৰেন অনাপত্তি ৰুত্তা। ৰত্তক্খন্ধকে (চূল়ৰ॰ ৩৬০ আদযো) গমিকৰত্তং পঞ্ঞাপেন্তেন ‘‘সেনাসনং আপুচ্ছিতব্ব’’ন্তি ৰুত্তত্তা কেৰলং ইতিকত্তব্বতামত্তদস্সনত্থং ‘‘আপুচ্ছনং পন ৰত্ত’’ন্তি ৰুত্তং , ন পন ৰত্তভেদে দুক্কটন্তি দস্সনত্থং, তেনেৰ অন্ধকট্ঠকথাযং ‘‘সেনাসনং আপুচ্ছিতব্ব’’ন্তি এত্থ ‘‘যং পাসাণপিট্ঠিযং ৰা পাসাণত্থম্ভেসু ৰা কতসেনাসনং যত্থ উপচিকা নারোহন্তি, তং অনাপুচ্ছন্তস্সপি অনাপত্তী’’তি ৰুত্তং। তস্মা যং ৰুত্তং গণ্ঠিপদে ‘‘তাদিসে সেনাসনে অনাপুচ্ছা গচ্ছন্তস্স পাচিত্তিযং নত্থি, গমিকৰত্তে সেনাসনং অনাপুচ্ছা গচ্ছন্তো ৰত্তভেদো হোতি, তস্মা দুক্কটং আপজ্জতী’’তি, তং ন গহেতব্বং।
83.Siluccayaleṇanti siluccaye leṇaṃ, pabbataguhāti attho. ‘‘Senāsanaṃ upacikāhi khāyita’’nti imasmiṃ vatthusmiṃ paññattattā vatthuanurūpavasena aṭṭhakathāyaṃ upacikāsaṅkāya abhāvena anāpatti vuttā. Vattakkhandhake (cūḷava. 360 ādayo) gamikavattaṃ paññāpentena ‘‘senāsanaṃ āpucchitabba’’nti vuttattā kevalaṃ itikattabbatāmattadassanatthaṃ ‘‘āpucchanaṃ pana vatta’’nti vuttaṃ , na pana vattabhede dukkaṭanti dassanatthaṃ, teneva andhakaṭṭhakathāyaṃ ‘‘senāsanaṃ āpucchitabba’’nti ettha ‘‘yaṃ pāsāṇapiṭṭhiyaṃ vā pāsāṇatthambhesu vā katasenāsanaṃ yattha upacikā nārohanti, taṃ anāpucchantassapi anāpattī’’ti vuttaṃ. Tasmā yaṃ vuttaṃ gaṇṭhipade ‘‘tādise senāsane anāpucchā gacchantassa pācittiyaṃ natthi, gamikavatte senāsanaṃ anāpucchā gacchanto vattabhedo hoti, tasmā dukkaṭaṃ āpajjatī’’ti, taṃ na gahetabbaṃ.
পচ্ছিমস্স আভোগেন মুত্তি নত্থীতি তস্স পচ্ছতো গচ্ছন্তস্স অঞ্ঞস্স অভাৰতো ৰুত্তং। একং ৰা পেসেত্ৰা আপুচ্ছিতব্বন্তি এত্থ গমনচিত্তস্স উপ্পন্নট্ঠানতো অনাপুচ্ছিত্ৰা গচ্ছন্তে দুতিযপাদুদ্ধারে পাচিত্তিযং। মণ্ডপে ৰাতি সাখামণ্ডপে ৰা পদরমণ্ডপে ৰা। রুক্খমূলেতি যস্স কস্সচি রুক্খস্স হেট্ঠা। পলুজ্জতীতি ৰিনস্সতি।
Pacchimassa ābhogena mutti natthīti tassa pacchato gacchantassa aññassa abhāvato vuttaṃ. Ekaṃ vā pesetvā āpucchitabbanti ettha gamanacittassa uppannaṭṭhānato anāpucchitvā gacchante dutiyapāduddhāre pācittiyaṃ. Maṇḍape vāti sākhāmaṇḍape vā padaramaṇḍape vā. Rukkhamūleti yassa kassaci rukkhassa heṭṭhā. Palujjatīti vinassati.
৮৪. মজ্ঝে সংখিত্তং পণৰসণ্ঠানং কত্ৰা বদ্ধন্তি এরকপত্তাদীহি ৰেণিং কত্ৰা তায ৰেণিযা উভোসু পস্সেসু ৰিত্থতট্ঠানে বহুং ৰেঠেত্ৰা ততো পট্ঠায যাৰ মজ্ঝট্ঠানং, তাৰ অন্তোআকড্ঢনৰসেন ৰেঠেত্ৰা মজ্ঝে সংখিপিত্ৰা তত্থ তত্থ বন্ধিত্ৰা কতং। যত্থ কাকা ৰা কুললা ৰা ন ঊহদন্তীতি যত্থ ধুৰনিৰাসেন কুলাৰকে কত্ৰা ৰসমানা এতে কাককুললা, অঞ্ঞে ৰা সকুণা তং সেনাসনং ন ঊহদন্তি, তাদিসে রুক্খমূলে নিক্খিপিতুং অনুজানামীতি অত্থো।
84.Majjhesaṃkhittaṃ paṇavasaṇṭhānaṃ katvā baddhanti erakapattādīhi veṇiṃ katvā tāya veṇiyā ubhosu passesu vitthataṭṭhāne bahuṃ veṭhetvā tato paṭṭhāya yāva majjhaṭṭhānaṃ, tāva antoākaḍḍhanavasena veṭhetvā majjhe saṃkhipitvā tattha tattha bandhitvā kataṃ. Yattha kākā vā kulalā vā na ūhadantīti yattha dhuvanivāsena kulāvake katvā vasamānā ete kākakulalā, aññe vā sakuṇā taṃ senāsanaṃ na ūhadanti, tādise rukkhamūle nikkhipituṃ anujānāmīti attho.
৮৫. নৰৰাযিমোতি অধুনা সুত্তেন ৰীতকচ্ছেন পলিৰেঠিতমঞ্চো। ওনদ্ধোতি কপ্পিযচম্মেন ওনদ্ধো, সোৰ ওনদ্ধকো সকত্থে ক-পচ্চযৰসেন। তেন হি ৰস্সেন সীঘং ন নস্সতি। উক্কট্ঠঅব্ভোকাসিকোতি ইদং তস্স সুখপটিপত্তিদস্সনমত্তং , উক্কট্ঠস্সাপি পন চীৰরকুটি ৰট্টতেৰ। কাযানুগতিকত্তাতি ভিক্খুনো তত্থেৰ নিসিন্নভাৰং দীপেতি, তেন চ ৰস্সভযেন সযং অঞ্ঞত্থ গচ্ছন্তস্স আপত্তিং দস্সেতি। অব্ভোকাসিকানং অতেমনত্থায নিযমেত্ৰা দাযকেহি দিন্নম্পি অত্তানং রক্খন্তেন রক্খিতব্বমেৰ। ‘‘যস্মা পন দাযকেহি দানকালেযেৰ সতসহস্সগ্ঘনকম্পি কম্বলং ‘পাদপুঞ্ছনিং কত্ৰা পরিভুঞ্জথা’তি দিন্নং তথেৰ পরিভুঞ্জিতুং ৰট্টতি, তস্মা ইদম্পি মঞ্চপীঠাদিসেনাসনং ‘অজ্ঝোকাসেপি যথাসুখং পরিভুঞ্জথা’তি দাযকেহি দিন্নং চে, সব্বস্মিম্পি কালে অজ্ঝোকাসে নিক্খিপিতুং ৰট্টতীতি ৰদন্তী’’তি সারত্থদীপনিযং (সারত্থ॰ টী॰ পাচিত্তিয ৩.১০৮-১১০) ৰুত্তং। পেসেত্ৰা গন্তব্বন্তি এত্থ ‘‘যো ভিক্খু ইমং ঠানং আগন্ত্ৰা ৰসতি, তস্স দেথা’’তি ৰত্ৰা পেসেতব্বং।
85.Navavāyimoti adhunā suttena vītakacchena paliveṭhitamañco. Onaddhoti kappiyacammena onaddho, sova onaddhako sakatthe ka-paccayavasena. Tena hi vassena sīghaṃ na nassati. Ukkaṭṭhaabbhokāsikoti idaṃ tassa sukhapaṭipattidassanamattaṃ , ukkaṭṭhassāpi pana cīvarakuṭi vaṭṭateva. Kāyānugatikattāti bhikkhuno tattheva nisinnabhāvaṃ dīpeti, tena ca vassabhayena sayaṃ aññattha gacchantassa āpattiṃ dasseti. Abbhokāsikānaṃ atemanatthāya niyametvā dāyakehi dinnampi attānaṃ rakkhantena rakkhitabbameva. ‘‘Yasmā pana dāyakehi dānakāleyeva satasahassagghanakampi kambalaṃ ‘pādapuñchaniṃ katvā paribhuñjathā’ti dinnaṃ tatheva paribhuñjituṃ vaṭṭati, tasmā idampi mañcapīṭhādisenāsanaṃ ‘ajjhokāsepi yathāsukhaṃ paribhuñjathā’ti dāyakehi dinnaṃ ce, sabbasmimpi kāle ajjhokāse nikkhipituṃ vaṭṭatīti vadantī’’ti sāratthadīpaniyaṃ (sārattha. ṭī. pācittiya 3.108-110) vuttaṃ. Pesetvā gantabbanti ettha ‘‘yo bhikkhu imaṃ ṭhānaṃ āgantvā vasati, tassa dethā’’ti vatvā pesetabbaṃ.
ৰলাহকানং অনুট্ঠিতভাৰং সল্লক্খেত্ৰাতি ইমিনা গিম্হানেপি মেঘে উট্ঠিতে অব্ভোকাসে নিক্খিপিতুং ন ৰট্টতীতি দীপেতি। তত্র তত্রাতি চেতিযঙ্গণাদিকে তস্মিং তস্মিং অব্ভোকাসে নিযমেত্ৰা নিক্খিত্তা। মজ্ঝতো পট্ঠায পাদট্ঠানাভিমুখাতি যত্থ সমন্ততো সম্মজ্জিত্ৰা অঙ্গণমজ্ঝে সব্বদা কচৰরস্স সঙ্কড্ঢনেন মজ্ঝে ৰালিকা সঞ্চিতা হোতি, তত্থ কত্তব্বৰিধিদস্সনত্থং ৰুত্তং, উচ্চৰত্থুপাদট্ঠানাভিমুখং, ভিত্তিপাদট্ঠানাভিমুখং ৰা ৰালিকা হরিতব্বাতি অত্থো। ‘‘যত্থ ৰা পন কোণেসু ৰালিকা সঞ্চিতা, তত্থ ততো পট্ঠায অপরদিসাভিমুখা হরিতব্বা’’তি কেচি অত্থং ৰদন্তি। কেচি পন ‘‘সম্মট্ঠট্ঠানস্স পদৰলঞ্জেন অৰিকোপনত্থায সযং অসম্মট্ঠট্ঠানে ঠত্ৰা অত্তনো পাদাভিমুখং ৰালিকা হরিতব্বাতি ৰুত্ত’’ন্তি ৰদন্তি। তত্থ ‘‘মজ্ঝতো পট্ঠাযা’’তি ৰচনস্স পযোজনং ন দিস্সতি। সারত্থদীপনিযং পন ‘‘পাদট্ঠানাভিমুখাতি নিসীদন্তানং পাদট্ঠানাভিমুখন্তি কেচি, সম্মজ্জন্তস্স পাদট্ঠানাভিমুখন্তি অপরে, বহিৰালিকায অগমননিমিত্তং পাদট্ঠানাভিমুখা হরিতব্বাতি ৰুত্তন্তি একে’’তি ৰুত্তং। কচৰরং হত্থেহি গহেত্ৰা বহি ছড্ডেতব্বন্তি ইমিনা ‘‘কচৰরং ছড্ডেস্সামী’’তি ৰালিকা ন ছড্ডেতব্বাতি দীপেতি।
Valāhakānaṃ anuṭṭhitabhāvaṃ sallakkhetvāti iminā gimhānepi meghe uṭṭhite abbhokāse nikkhipituṃ na vaṭṭatīti dīpeti. Tatra tatrāti cetiyaṅgaṇādike tasmiṃ tasmiṃ abbhokāse niyametvā nikkhittā. Majjhato paṭṭhāya pādaṭṭhānābhimukhāti yattha samantato sammajjitvā aṅgaṇamajjhe sabbadā kacavarassa saṅkaḍḍhanena majjhe vālikā sañcitā hoti, tattha kattabbavidhidassanatthaṃ vuttaṃ, uccavatthupādaṭṭhānābhimukhaṃ, bhittipādaṭṭhānābhimukhaṃ vā vālikā haritabbāti attho. ‘‘Yattha vā pana koṇesu vālikā sañcitā, tattha tato paṭṭhāya aparadisābhimukhā haritabbā’’ti keci atthaṃ vadanti. Keci pana ‘‘sammaṭṭhaṭṭhānassa padavalañjena avikopanatthāya sayaṃ asammaṭṭhaṭṭhāne ṭhatvā attano pādābhimukhaṃ vālikā haritabbāti vutta’’nti vadanti. Tattha ‘‘majjhato paṭṭhāyā’’ti vacanassa payojanaṃ na dissati. Sāratthadīpaniyaṃ pana ‘‘pādaṭṭhānābhimukhāti nisīdantānaṃ pādaṭṭhānābhimukhanti keci, sammajjantassa pādaṭṭhānābhimukhanti apare, bahivālikāya agamananimittaṃ pādaṭṭhānābhimukhā haritabbāti vuttanti eke’’ti vuttaṃ. Kacavaraṃ hatthehi gahetvā bahi chaḍḍetabbanti iminā ‘‘kacavaraṃ chaḍḍessāmī’’ti vālikā na chaḍḍetabbāti dīpeti.
৮৬. কপ্পং লভিত্ৰাতি ‘‘গচ্ছা’’তি ৰুত্তৰচনেন কপ্পং লভিত্ৰা। থেরস্স হি আণত্তিযা গচ্ছন্তস্স অনাপত্তি। পুরিমনযেনেৰাতি ‘‘নিসীদিত্ৰা সযং গচ্ছন্তো’’তিআদিনা পুব্বে ৰুত্তনযেনেৰ।
86.Kappaṃ labhitvāti ‘‘gacchā’’ti vuttavacanena kappaṃ labhitvā. Therassa hi āṇattiyā gacchantassa anāpatti. Purimanayenevāti ‘‘nisīditvā sayaṃ gacchanto’’tiādinā pubbe vuttanayeneva.
অঞ্ঞত্থ গচ্ছতীতি তং মগ্গং অতিক্কমিত্ৰা অঞ্ঞত্থ গচ্ছতি। লেড্ডুপাতুপচারতো বহি ঠিতত্তা ‘‘পাদুদ্ধারেন কারেতব্বো’’তি ৰুত্তং, অঞ্ঞত্থ গচ্ছন্তস্স পঠমপাদুদ্ধারে দুক্কটং, দুতিযপাদুদ্ধারে পাচিত্তিযন্তি অত্থো। পাকতিকং অকত্ৰাতি অপটিসামেত্ৰা। অন্তরসন্নিপাতেতি অন্তরন্তরা সন্নিপাতে।
Aññattha gacchatīti taṃ maggaṃ atikkamitvā aññattha gacchati. Leḍḍupātupacārato bahi ṭhitattā ‘‘pāduddhārena kāretabbo’’ti vuttaṃ, aññattha gacchantassa paṭhamapāduddhāre dukkaṭaṃ, dutiyapāduddhāre pācittiyanti attho. Pākatikaṃ akatvāti apaṭisāmetvā. Antarasannipāteti antarantarā sannipāte.
৮৭. আৰাসিকানংযেৰ পলিবোধোতি এত্থ আগন্তুকেসু আগন্ত্ৰা কিঞ্চি অৰত্ৰা তত্থ নিসিন্নেসুপি নিসীদিত্ৰা ‘‘আৰাসিকাযেৰ উদ্ধরিস্সন্তী’’তি গতেসুপি আৰাসিকানমেৰ পলিবোধো। মহাপচ্চরিৰাদে পন ‘‘ইদং অম্হাক’’ন্তি ৰত্ৰাপি অৰত্ৰাপি নিসিন্নানমেৰাতি অধিপ্পাযো। মহাঅট্ঠকথাৰাদে ‘‘আপত্তী’’তি পাচিত্তিযমেৰ ৰুত্তং। মহাপচ্চরিযং পন সন্থরাপনে পাচিত্তিযেন ভৰিতব্বন্তি অনাণত্তিযা পঞ্ঞত্তত্তা দুক্কটং ৰুত্তং। উস্সারকোতি সরভাণকো। সো হি উদ্ধংউদ্ধং পাল়িপাঠং সারেতি পৰত্তেতীতি ‘‘উস্সারকো’’তি ৰুচ্চতি। ‘‘ইদং উস্সারকস্স, ইদং ধম্মকথিকস্সা’’তি ৰিসুং পঞ্ঞত্তত্তা অনাণত্তিযা পঞ্ঞত্তেপি পাচিত্তিযেনেৰ ভৰিতব্বন্তি অধিপ্পাযেন ‘‘তস্মিং আগন্ত্ৰা নিসিন্নে তস্স পলিবোধো’’তি ৰুত্তং। কেচি পন ৰদন্তি ‘‘অনাণত্তিযা পঞ্ঞত্তেপি ধম্মকথিকস্স অনুট্ঠাপনীযত্তা পাচিত্তিযেন ভৰিতব্বং, আগন্তুকস্স পন পচ্ছা আগতেহি ৰুড্ঢতরেহি উট্ঠাপনীযত্তা দুক্কটং ৰুত্ত’’ন্তি।
87.Āvāsikānaṃyeva palibodhoti ettha āgantukesu āgantvā kiñci avatvā tattha nisinnesupi nisīditvā ‘‘āvāsikāyeva uddharissantī’’ti gatesupi āvāsikānameva palibodho. Mahāpaccarivāde pana ‘‘idaṃ amhāka’’nti vatvāpi avatvāpi nisinnānamevāti adhippāyo. Mahāaṭṭhakathāvāde ‘‘āpattī’’ti pācittiyameva vuttaṃ. Mahāpaccariyaṃ pana santharāpane pācittiyena bhavitabbanti anāṇattiyā paññattattā dukkaṭaṃ vuttaṃ. Ussārakoti sarabhāṇako. So hi uddhaṃuddhaṃ pāḷipāṭhaṃ sāreti pavattetīti ‘‘ussārako’’ti vuccati. ‘‘Idaṃ ussārakassa, idaṃ dhammakathikassā’’ti visuṃ paññattattā anāṇattiyā paññattepi pācittiyeneva bhavitabbanti adhippāyena ‘‘tasmiṃ āgantvā nisinne tassa palibodho’’ti vuttaṃ. Keci pana vadanti ‘‘anāṇattiyā paññattepi dhammakathikassa anuṭṭhāpanīyattā pācittiyena bhavitabbaṃ, āgantukassa pana pacchā āgatehi vuḍḍhatarehi uṭṭhāpanīyattā dukkaṭaṃ vutta’’nti.
৮৮. পাদপুঞ্ছনী নাম রজ্জুকেহি ৰা পিলোতিকায ৰা পাদপুঞ্ছনত্থং কতা। ফলকপীঠং নাম ফলকমযং পীঠং। অথ ৰা ফলকঞ্চেৰ দারুমযপীঠঞ্চ। দারুমযপীঠন্তি চ ফলকমযমেৰ পীঠং ৰেদিতব্বং। পাদকঠলিকন্তি অধোতপাদট্ঠাপনকং। অজ্ঝোকাসে রজনং পচিত্ৰা …পে॰… পটিসামেতব্বন্তি এত্থ থেৰে অসতি রজনকম্মে নিট্ঠিতে পটিসামেতব্বং। ‘‘ভিক্খু ৰা সামণেরো ৰা আরামিকো ৰা লজ্জী হোতীতি ৰুত্তত্তা অলজ্জিং আপুচ্ছিত্ৰা গন্তুং ন ৰট্টতী’’তি ৰদন্তি। ওতাপেন্তো…পে॰… গচ্ছতীতি এত্থ ‘‘কিঞ্চাপি ‘এত্তকং দূরং গন্তব্ব’ন্তি পরিচ্ছেদো নত্থি, তথাপি লেড্ডুপাতং অতিক্কম্ম নাতিদূরং গন্তব্ব’’ন্তি ৰদন্তি।
88.Pādapuñchanī nāma rajjukehi vā pilotikāya vā pādapuñchanatthaṃ katā. Phalakapīṭhaṃ nāma phalakamayaṃ pīṭhaṃ. Atha vā phalakañceva dārumayapīṭhañca. Dārumayapīṭhanti ca phalakamayameva pīṭhaṃ veditabbaṃ. Pādakaṭhalikanti adhotapādaṭṭhāpanakaṃ. Ajjhokāse rajanaṃ pacitvā …pe… paṭisāmetabbanti ettha theve asati rajanakamme niṭṭhite paṭisāmetabbaṃ. ‘‘Bhikkhu vā sāmaṇero vā ārāmiko vā lajjī hotīti vuttattā alajjiṃ āpucchitvā gantuṃ na vaṭṭatī’’ti vadanti. Otāpento…pe… gacchatīti ettha ‘‘kiñcāpi ‘ettakaṃ dūraṃ gantabba’nti paricchedo natthi, tathāpi leḍḍupātaṃ atikkamma nātidūraṃ gantabba’’nti vadanti.
ইতি ৰিনযসঙ্গহসংৰণ্ণনাভূতে ৰিনযালঙ্কারে
Iti vinayasaṅgahasaṃvaṇṇanābhūte vinayālaṅkāre
মঞ্চপীঠাদিসঙ্ঘিকসেনাসনেসুপটিপজ্জিতব্ব-
Mañcapīṭhādisaṅghikasenāsanesupaṭipajjitabba-
ৰিনিচ্ছযকথালঙ্কারো নাম
Vinicchayakathālaṅkāro nāma
সত্তরসমো পরিচ্ছেদো।
Sattarasamo paricchedo.
