| Library / Tipiṭaka / តិបិដក • Tipiṭaka / កង្ខាវិតរណី-អភិនវ-ដីកា • Kaṅkhāvitaraṇī-abhinava-ṭīkā |
៥. មញ្ចបីឋសិក្ខាបទវណ្ណនា
5. Mañcapīṭhasikkhāpadavaṇṇanā
អដ្ឋង្គុលបាទកន្តិ ភាវនបុំសកនិទ្ទេសោ។ ‘‘ឆេទនកំ ភេទនកសទិសមេវា’’តិ ឥមិនា ‘‘ឆេទនមេវ ឆេទនកំ, តំ អស្ស អត្ថីតិ ឆេទនក’’ន្តិ ឥមមត្ថំ អតិទិសតិ។
Aṭṭhaṅgulapādakanti bhāvanapuṃsakaniddeso. ‘‘Chedanakaṃ bhedanakasadisamevā’’ti iminā ‘‘chedanameva chedanakaṃ, taṃ assa atthīti chedanaka’’nti imamatthaṃ atidisati.
យថា បមាណមេវ ឧបរិ ទិស្សតិ, ឯវំ និខណិត្វា វាតិ សចេ បន ន ឆិន្ទិតុកាមោ ហោតិ, យថា បមាណមេវ ឧបរិ ទិស្សតិ, ឯវំ ភូមិយំ និខណិត្វា វា។ អដ្ដកំ វា ពន្ធិត្វាតិ ឧក្ខិបិត្វា តុលាសង្ឃាតេ ឋបេត្វា អដ្ដំ កត្វា។
Yathā pamāṇameva upari dissati, evaṃ nikhaṇitvā vāti sace pana na chinditukāmo hoti, yathā pamāṇameva upari dissati, evaṃ bhūmiyaṃ nikhaṇitvā vā. Aṭṭakaṃ vā bandhitvāti ukkhipitvā tulāsaṅghāte ṭhapetvā aṭṭaṃ katvā.
មញ្ចបីឋសិក្ខាបទវណ្ណនា និដ្ឋិតា។
Mañcapīṭhasikkhāpadavaṇṇanā niṭṭhitā.
