| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
১০. মণ্ডপেয্যকথা
10. Maṇḍapeyyakathā
২৩৮. ‘‘মণ্ডপেয্যমিদং , ভিক্খৰে, ব্রহ্মচরিযং। সত্থা সম্মুখীভূতো তিধত্তমণ্ডো 1। সত্থরি সম্মুখীভূতে দেসনামণ্ডো, পটিগ্গহমণ্ডো, ব্রহ্মচরিযমণ্ডো’’।
238. ‘‘Maṇḍapeyyamidaṃ , bhikkhave, brahmacariyaṃ. Satthā sammukhībhūto tidhattamaṇḍo 2. Satthari sammukhībhūte desanāmaṇḍo, paṭiggahamaṇḍo, brahmacariyamaṇḍo’’.
কতমো দেসনামণ্ডো? চতুন্নং অরিযসচ্চানং আচিক্খনা দেসনা পঞ্ঞাপনা পট্ঠপনা ৰিৰরণা ৰিভজনা উত্তানীকম্মং 3, চতুন্নং সতিপট্ঠানানং…পে॰… চতুন্নং সম্মপ্পধানানং… চতুন্নং ইদ্ধিপাদানং… পঞ্চন্নং ইন্দ্রিযানং… পঞ্চন্নং বলানং… সত্তন্নং বোজ্ঝঙ্গানং… অরিযস্স অট্ঠঙ্গিকস্স মগ্গস্স আচিক্খনা দেসনা পঞ্ঞাপনা পট্ঠপনা ৰিৰরণা ৰিভজনা উত্তানীকম্মং – অযং দেসনামণ্ডো।
Katamo desanāmaṇḍo? Catunnaṃ ariyasaccānaṃ ācikkhanā desanā paññāpanā paṭṭhapanā vivaraṇā vibhajanā uttānīkammaṃ 4, catunnaṃ satipaṭṭhānānaṃ…pe… catunnaṃ sammappadhānānaṃ… catunnaṃ iddhipādānaṃ… pañcannaṃ indriyānaṃ… pañcannaṃ balānaṃ… sattannaṃ bojjhaṅgānaṃ… ariyassa aṭṭhaṅgikassa maggassa ācikkhanā desanā paññāpanā paṭṭhapanā vivaraṇā vibhajanā uttānīkammaṃ – ayaṃ desanāmaṇḍo.
কতমো পটিগ্গহমণ্ডো? ভিক্খূ ভিক্খুনিযো উপাসকা উপাসিকাযো দেৰা মনুস্সা যে ৰা পনঞ্ঞেপি কেচি ৰিঞ্ঞাতারো – অযং পটিগ্গহমণ্ডো।
Katamo paṭiggahamaṇḍo? Bhikkhū bhikkhuniyo upāsakā upāsikāyo devā manussā ye vā panaññepi keci viññātāro – ayaṃ paṭiggahamaṇḍo.
কতমো ব্রহ্মচরিযমণ্ডো? অযমেৰ অরিযো অট্ঠঙ্গিকো মগ্গো, সেয্যথিদং – সম্মাদিট্ঠি, সম্মাসঙ্কপ্পো, সম্মাৰাচা, সম্মাকম্মন্তো, সম্মাআজীৰো, সম্মাৰাযামো, সম্মাসতি, সম্মাসমাধি – অযং ব্রহ্মচরিযমণ্ডো।
Katamo brahmacariyamaṇḍo? Ayameva ariyo aṭṭhaṅgiko maggo, seyyathidaṃ – sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi – ayaṃ brahmacariyamaṇḍo.
২৩৯. অধিমোক্খমণ্ডো সদ্ধিন্দ্রিযং, অস্সদ্ধিযং কসটো; অস্সদ্ধিযং কসটং ছড্ডেত্ৰা সদ্ধিন্দ্রিযস্স অধিমোক্খমণ্ডং পিৰতীতি – মণ্ডপেয্যং। পগ্গহমণ্ডো ৰীরিযিন্দ্রিযং, কোসজ্জং কসটো; কোসজ্জং কসটং ছড্ডেত্ৰা ৰীরিযিন্দ্রিযস্স পগ্গহমণ্ডং পিৰতীতি – মণ্ডপেয্যং। উপট্ঠানমণ্ডো সতিন্দ্রিযং, পমাদো কসটো; পমাদং কসটং ছড্ডেত্ৰা সতিন্দ্রিযস্স উপট্ঠানমণ্ডং পিৰতীতি – মণ্ডপেয্যং। অৰিক্খেপমণ্ডো সমাধিন্দ্রিযং, উদ্ধচ্চং কসটো; উদ্ধচ্চং কসটং ছড্ডেত্ৰা সমাধিন্দ্রিযস্স অৰিক্খেপমণ্ডং পিৰতীতি – মণ্ডপেয্যং। দস্সনমণ্ডো পঞ্ঞিন্দ্রিযং, অৰিজ্জং কসটো; অৰিজ্জং কসটং ছড্ডেত্ৰা পঞ্ঞিন্দ্রিযস্স দস্সনমণ্ডং পিৰতীতি – মণ্ডপেয্যং।
239. Adhimokkhamaṇḍo saddhindriyaṃ, assaddhiyaṃ kasaṭo; assaddhiyaṃ kasaṭaṃ chaḍḍetvā saddhindriyassa adhimokkhamaṇḍaṃ pivatīti – maṇḍapeyyaṃ. Paggahamaṇḍo vīriyindriyaṃ, kosajjaṃ kasaṭo; kosajjaṃ kasaṭaṃ chaḍḍetvā vīriyindriyassa paggahamaṇḍaṃ pivatīti – maṇḍapeyyaṃ. Upaṭṭhānamaṇḍo satindriyaṃ, pamādo kasaṭo; pamādaṃ kasaṭaṃ chaḍḍetvā satindriyassa upaṭṭhānamaṇḍaṃ pivatīti – maṇḍapeyyaṃ. Avikkhepamaṇḍo samādhindriyaṃ, uddhaccaṃ kasaṭo; uddhaccaṃ kasaṭaṃ chaḍḍetvā samādhindriyassa avikkhepamaṇḍaṃ pivatīti – maṇḍapeyyaṃ. Dassanamaṇḍo paññindriyaṃ, avijjaṃ kasaṭo; avijjaṃ kasaṭaṃ chaḍḍetvā paññindriyassa dassanamaṇḍaṃ pivatīti – maṇḍapeyyaṃ.
অস্সদ্ধিযে অকম্পিযমণ্ডো সদ্ধাবলং, অস্সদ্ধিযং কসটো; অস্সদ্ধিযং কসটং ছড্ডেত্ৰা সদ্ধাবলস্স অস্সদ্ধিযে অকম্পিযমণ্ডং পিৰতীতি – মণ্ডপেয্যং। কোসজ্জে অকম্পিযমণ্ডো ৰীরিযবলং, কোসজ্জং কসটো; কোসজ্জং কসটং ছড্ডেত্ৰা ৰীরিযবলস্স কোসজ্জে অকম্পিযমণ্ডং পিৰতীতি – মণ্ডপেয্যং। পমাদে অকম্পিযমণ্ডো সতিবলং, পমাদো কসটো; পমাদং কসটং ছড্ডেত্ৰা সতিবলস্স পমাদে অকম্পিযমণ্ডং পিৰতীতি – মণ্ডপেয্যং। উদ্ধচ্চে অকম্পিযমণ্ডো সমাধিবলং, উদ্ধচ্চং কসটো; উদ্ধচ্চং কসটং ছড্ডেত্ৰা সমাধিবলস্স উদ্ধচ্চে অকম্পিযমণ্ডং পিৰতীতি – মণ্ডপেয্যং। অৰিজ্জায অকম্পিযমণ্ডো পঞ্ঞাবলং, অৰিজ্জা কসটো; অৰিজ্জং কসটং ছড্ডেত্ৰা পঞ্ঞাবলস্স অৰিজ্জায অকম্পিযমণ্ডং পিৰতীতি – মণ্ডপেয্যং।
Assaddhiye akampiyamaṇḍo saddhābalaṃ, assaddhiyaṃ kasaṭo; assaddhiyaṃ kasaṭaṃ chaḍḍetvā saddhābalassa assaddhiye akampiyamaṇḍaṃ pivatīti – maṇḍapeyyaṃ. Kosajje akampiyamaṇḍo vīriyabalaṃ, kosajjaṃ kasaṭo; kosajjaṃ kasaṭaṃ chaḍḍetvā vīriyabalassa kosajje akampiyamaṇḍaṃ pivatīti – maṇḍapeyyaṃ. Pamāde akampiyamaṇḍo satibalaṃ, pamādo kasaṭo; pamādaṃ kasaṭaṃ chaḍḍetvā satibalassa pamāde akampiyamaṇḍaṃ pivatīti – maṇḍapeyyaṃ. Uddhacce akampiyamaṇḍo samādhibalaṃ, uddhaccaṃ kasaṭo; uddhaccaṃ kasaṭaṃ chaḍḍetvā samādhibalassa uddhacce akampiyamaṇḍaṃ pivatīti – maṇḍapeyyaṃ. Avijjāya akampiyamaṇḍo paññābalaṃ, avijjā kasaṭo; avijjaṃ kasaṭaṃ chaḍḍetvā paññābalassa avijjāya akampiyamaṇḍaṃ pivatīti – maṇḍapeyyaṃ.
উপট্ঠানমণ্ডো সতিসম্বোজ্ঝঙ্গা, পমাদো কসটো; পমাদং কসটং ছড্ডেত্ৰা সতিসম্বোজ্ঝঙ্গস্স উপট্ঠানমণ্ডং পিৰতীতি – মণ্ডপেয্যং। পৰিচযমণ্ডো ধম্মৰিচযসম্বোজ্ঝঙ্গো, অৰিজ্জা কসটো; অৰিজ্জং কসটং ছড্ডেত্ৰা ধম্মৰিচযসম্বোজ্ঝঙ্গস্স পৰিচযমণ্ডং পিৰতীতি – মণ্ডপেয্যং। পগ্গহমণ্ডো ৰীরিযসম্বোজ্ঝঙ্গো, কোসজ্জং কসটো; কোসজ্জং কসটং ছড্ডেত্ৰা ৰীরিযসম্বোজ্ঝঙ্গস্স পগ্গহমণ্ডং পিৰতীতি – মণ্ডপেয্যং। ফরণমণ্ডো পীতিসম্বোজ্ঝঙ্গো, পরিল়াহো কসটো; পরিল়াহং কসটং ছড্ডেত্ৰা পীতিসম্বোজ্ঝঙ্গস্স ফরণমণ্ডং পিৰতীতি – মণ্ডপেয্যং। উপসমমণ্ডো পস্সদ্ধিসম্বোজ্ঝঙ্গো , দুট্ঠুল্লং কসটো; দুট্ঠুল্লং কসটং ছড্ডেত্ৰা পস্সদ্ধিসম্বোজ্ঝঙ্গস্স উপসমমণ্ডং পিৰতীতি – মণ্ডপেয্যং। অৰিক্খেপমণ্ডো সমাধিসম্বোজ্ঝঙ্গো, উদ্ধচ্চং কসটো; উদ্ধচ্চং কসটং ছড্ডেত্ৰা সমাধিসম্বোজ্ঝঙ্গস্স অৰিক্খেপমণ্ডং পিৰতীতি – মণ্ডপেয্যং। পটিসঙ্খানমণ্ডো উপেক্খাসম্বোজ্ঝঙ্গো, অপ্পটিসঙ্খা কসটো; অপ্পটিসঙ্খং কসটং ছড্ডেত্ৰা উপেক্খাসম্বোজ্ঝঙ্গস্স পটিসঙ্খানমণ্ডং পিৰতীতি – মণ্ডপেয্যং।
Upaṭṭhānamaṇḍo satisambojjhaṅgā, pamādo kasaṭo; pamādaṃ kasaṭaṃ chaḍḍetvā satisambojjhaṅgassa upaṭṭhānamaṇḍaṃ pivatīti – maṇḍapeyyaṃ. Pavicayamaṇḍo dhammavicayasambojjhaṅgo, avijjā kasaṭo; avijjaṃ kasaṭaṃ chaḍḍetvā dhammavicayasambojjhaṅgassa pavicayamaṇḍaṃ pivatīti – maṇḍapeyyaṃ. Paggahamaṇḍo vīriyasambojjhaṅgo, kosajjaṃ kasaṭo; kosajjaṃ kasaṭaṃ chaḍḍetvā vīriyasambojjhaṅgassa paggahamaṇḍaṃ pivatīti – maṇḍapeyyaṃ. Pharaṇamaṇḍo pītisambojjhaṅgo, pariḷāho kasaṭo; pariḷāhaṃ kasaṭaṃ chaḍḍetvā pītisambojjhaṅgassa pharaṇamaṇḍaṃ pivatīti – maṇḍapeyyaṃ. Upasamamaṇḍo passaddhisambojjhaṅgo , duṭṭhullaṃ kasaṭo; duṭṭhullaṃ kasaṭaṃ chaḍḍetvā passaddhisambojjhaṅgassa upasamamaṇḍaṃ pivatīti – maṇḍapeyyaṃ. Avikkhepamaṇḍo samādhisambojjhaṅgo, uddhaccaṃ kasaṭo; uddhaccaṃ kasaṭaṃ chaḍḍetvā samādhisambojjhaṅgassa avikkhepamaṇḍaṃ pivatīti – maṇḍapeyyaṃ. Paṭisaṅkhānamaṇḍo upekkhāsambojjhaṅgo, appaṭisaṅkhā kasaṭo; appaṭisaṅkhaṃ kasaṭaṃ chaḍḍetvā upekkhāsambojjhaṅgassa paṭisaṅkhānamaṇḍaṃ pivatīti – maṇḍapeyyaṃ.
দস্সনমণ্ডো সম্মাদিট্ঠি, মিচ্ছাদিট্ঠি কসটো; মিচ্ছাদিট্ঠিং কসটং ছড্ডেত্ৰা সম্মাদিট্ঠিযা দস্সনমণ্ডং পিৰতীতি – মণ্ডপেয্যং। অভিনিরোপনমণ্ডো সম্মাসঙ্কপ্পো, মিচ্ছাসঙ্কপ্পো কসটো; মিচ্ছাসঙ্কপ্পং কসটং ছড্ডেত্ৰা সম্মাসঙ্কপ্পস্স অভিনিরোপনমণ্ডং পিৰতীতি – মণ্ডপেয্যং। পরিগ্গহমণ্ডো সম্মাৰাচা, মিচ্ছাৰাচা কসটো; মিচ্ছাৰাচং কসটং ছড্ডেত্ৰা সম্মাৰাচায পরিগ্গহমণ্ডং পিৰতীতি – মণ্ডপেয্যং। সমুট্ঠানমণ্ডো সম্মাকম্মন্তো, মিচ্ছাকম্মন্তো কসটো; মিচ্ছাকম্মন্তং কসটং ছড্ডেত্ৰা সম্মাকম্মন্তস্স সমুট্ঠানমণ্ডং পিৰতীতি – মণ্ডপেয্যং। ৰোদানমণ্ডো সম্মাআজীৰো, মিচ্ছাআজীৰো কসটো; মিচ্ছাআজীৰং কসটং ছড্ডেত্ৰা সম্মাআজীৰস্স ৰোদানমণ্ডং পিৰতীতি – মণ্ডপেয্যং। পগ্গহমণ্ডো সম্মাৰাযামো, মিচ্ছাৰাযামো কসটো; মিচ্ছাৰাযামং কসটং ছড্ডেত্ৰা সম্মাৰাযামস্স পগ্গহমণ্ডং পিৰতীতি – মণ্ডপেয্যং। উপট্ঠানমণ্ডো সম্মাসতি, মিচ্ছাসতি কসটো; মিচ্ছাসতিং কসটং ছড্ডেত্ৰা সম্মাসতিযা উপট্ঠানমণ্ডং পিৰতীতি – মণ্ডপেয্যং। অৰিক্খেপমণ্ডো সম্মাসমাধি, মিচ্ছাসমাধি কসটো; মিচ্ছাসমাধিং কসটং ছড্ডেত্ৰা সম্মাসমাধিস্স অৰিক্খেপমণ্ডং পিৰতীতি – মণ্ডপেয্যং।
Dassanamaṇḍo sammādiṭṭhi, micchādiṭṭhi kasaṭo; micchādiṭṭhiṃ kasaṭaṃ chaḍḍetvā sammādiṭṭhiyā dassanamaṇḍaṃ pivatīti – maṇḍapeyyaṃ. Abhiniropanamaṇḍo sammāsaṅkappo, micchāsaṅkappo kasaṭo; micchāsaṅkappaṃ kasaṭaṃ chaḍḍetvā sammāsaṅkappassa abhiniropanamaṇḍaṃ pivatīti – maṇḍapeyyaṃ. Pariggahamaṇḍo sammāvācā, micchāvācā kasaṭo; micchāvācaṃ kasaṭaṃ chaḍḍetvā sammāvācāya pariggahamaṇḍaṃ pivatīti – maṇḍapeyyaṃ. Samuṭṭhānamaṇḍo sammākammanto, micchākammanto kasaṭo; micchākammantaṃ kasaṭaṃ chaḍḍetvā sammākammantassa samuṭṭhānamaṇḍaṃ pivatīti – maṇḍapeyyaṃ. Vodānamaṇḍo sammāājīvo, micchāājīvo kasaṭo; micchāājīvaṃ kasaṭaṃ chaḍḍetvā sammāājīvassa vodānamaṇḍaṃ pivatīti – maṇḍapeyyaṃ. Paggahamaṇḍo sammāvāyāmo, micchāvāyāmo kasaṭo; micchāvāyāmaṃ kasaṭaṃ chaḍḍetvā sammāvāyāmassa paggahamaṇḍaṃ pivatīti – maṇḍapeyyaṃ. Upaṭṭhānamaṇḍo sammāsati, micchāsati kasaṭo; micchāsatiṃ kasaṭaṃ chaḍḍetvā sammāsatiyā upaṭṭhānamaṇḍaṃ pivatīti – maṇḍapeyyaṃ. Avikkhepamaṇḍo sammāsamādhi, micchāsamādhi kasaṭo; micchāsamādhiṃ kasaṭaṃ chaḍḍetvā sammāsamādhissa avikkhepamaṇḍaṃ pivatīti – maṇḍapeyyaṃ.
২৪০. অত্থি মণ্ডো, অত্থি পেয্যং, অত্থি কসটো। অধিমোক্খমণ্ডো সদ্ধিন্দ্রিযং, অস্সদ্ধিযং কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। পগ্গহমণ্ডো ৰীরিযিন্দ্রিযং, কোসজ্জং কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। উপট্ঠানমণ্ডো সতিন্দ্রিযং, পমাদো কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। অৰিক্খেপমণ্ডো সমাধিন্দ্রিযং, উদ্ধচ্চং কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। দস্সনমণ্ডো পঞ্ঞিন্দ্রিযং, অৰিজ্জা কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং।
240. Atthi maṇḍo, atthi peyyaṃ, atthi kasaṭo. Adhimokkhamaṇḍo saddhindriyaṃ, assaddhiyaṃ kasaṭo; yo tattha attharaso dhammaraso vimuttiraso – idaṃ peyyaṃ. Paggahamaṇḍo vīriyindriyaṃ, kosajjaṃ kasaṭo; yo tattha attharaso dhammaraso vimuttiraso – idaṃ peyyaṃ. Upaṭṭhānamaṇḍo satindriyaṃ, pamādo kasaṭo; yo tattha attharaso dhammaraso vimuttiraso – idaṃ peyyaṃ. Avikkhepamaṇḍo samādhindriyaṃ, uddhaccaṃ kasaṭo; yo tattha attharaso dhammaraso vimuttiraso – idaṃ peyyaṃ. Dassanamaṇḍo paññindriyaṃ, avijjā kasaṭo; yo tattha attharaso dhammaraso vimuttiraso – idaṃ peyyaṃ.
অস্সদ্ধিযে অকম্পিযমণ্ডো সদ্ধাবলং, অস্সদ্ধিযং কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। কোসজ্জে অকম্পিযমণ্ডো ৰীরিযবলং, কোসজ্জং কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। পমাদে অকম্পিযমণ্ডো সতিবলং, পমাদো কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। উদ্ধচ্চে অকম্পিযমণ্ডো সমাধিবলং, উদ্ধচ্চং কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। অৰিজ্জায অকম্পিযমণ্ডো পঞ্ঞাবলং, অৰিজ্জা কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং।
Assaddhiye akampiyamaṇḍo saddhābalaṃ, assaddhiyaṃ kasaṭo; yo tattha attharaso dhammaraso vimuttiraso – idaṃ peyyaṃ. Kosajje akampiyamaṇḍo vīriyabalaṃ, kosajjaṃ kasaṭo; yo tattha attharaso dhammaraso vimuttiraso – idaṃ peyyaṃ. Pamāde akampiyamaṇḍo satibalaṃ, pamādo kasaṭo; yo tattha attharaso dhammaraso vimuttiraso – idaṃ peyyaṃ. Uddhacce akampiyamaṇḍo samādhibalaṃ, uddhaccaṃ kasaṭo; yo tattha attharaso dhammaraso vimuttiraso – idaṃ peyyaṃ. Avijjāya akampiyamaṇḍo paññābalaṃ, avijjā kasaṭo; yo tattha attharaso dhammaraso vimuttiraso – idaṃ peyyaṃ.
উপট্ঠানমণ্ডো সতিসম্বোজ্ঝঙ্গো, পমাদো কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। পৰিচযমণ্ডো ধম্মৰিচযসম্বোজ্ঝঙ্গো, অৰিজ্জা কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। পগ্গহমণ্ডো ৰীরিযসম্বোজ্ঝঙ্গো, কোসজ্জং কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। ফরণমণ্ডো পীতিসম্বোজ্ঝঙ্গো, পরিল়াহো কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। উপসমমণ্ডো পস্সদ্ধিসম্বোজ্ঝঙ্গো, দুট্ঠুল্লং কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। অৰিক্খেপমণ্ডো সমাধিসম্বোজ্ঝঙ্গো, উদ্ধচ্চং কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। পটিসঙ্খানমণ্ডো উপেক্খাসম্বোজ্ঝঙ্গো, অপটিসঙ্খা কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং।
Upaṭṭhānamaṇḍo satisambojjhaṅgo, pamādo kasaṭo; yo tattha attharaso dhammaraso vimuttiraso – idaṃ peyyaṃ. Pavicayamaṇḍo dhammavicayasambojjhaṅgo, avijjā kasaṭo; yo tattha attharaso dhammaraso vimuttiraso – idaṃ peyyaṃ. Paggahamaṇḍo vīriyasambojjhaṅgo, kosajjaṃ kasaṭo; yo tattha attharaso dhammaraso vimuttiraso – idaṃ peyyaṃ. Pharaṇamaṇḍo pītisambojjhaṅgo, pariḷāho kasaṭo; yo tattha attharaso dhammaraso vimuttiraso – idaṃ peyyaṃ. Upasamamaṇḍo passaddhisambojjhaṅgo, duṭṭhullaṃ kasaṭo; yo tattha attharaso dhammaraso vimuttiraso – idaṃ peyyaṃ. Avikkhepamaṇḍo samādhisambojjhaṅgo, uddhaccaṃ kasaṭo; yo tattha attharaso dhammaraso vimuttiraso – idaṃ peyyaṃ. Paṭisaṅkhānamaṇḍo upekkhāsambojjhaṅgo, apaṭisaṅkhā kasaṭo; yo tattha attharaso dhammaraso vimuttiraso – idaṃ peyyaṃ.
দস্সনমণ্ডো সম্মাদিট্ঠি, মিচ্ছাদিট্ঠি কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। অভিনিরোপনমণ্ডো সম্মাসঙ্কপ্পো, মিচ্ছাসঙ্কপ্পো কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। পরিগ্গহমণ্ডো সম্মাৰাচা, মিচ্ছাৰাচা কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। সমুট্ঠানমণ্ডো সম্মাকম্মন্তো, মিচ্ছাকম্মন্তো কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। ৰোদানমণ্ডো সম্মাআজীৰো, মিচ্ছাআজীৰো কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। পগ্গহমণ্ডো সম্মাৰাযামো, মিচ্ছাৰাযামো কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। উপট্ঠানমণ্ডো সম্মাসতি, মিচ্ছাসতি কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং। অৰিক্খেপমণ্ডো সম্মাসমাধি, মিচ্ছাসমাধি কসটো; যো তত্থ অত্থরসো ধম্মরসো ৰিমুত্তিরসো – ইদং পেয্যং।
Dassanamaṇḍo sammādiṭṭhi, micchādiṭṭhi kasaṭo; yo tattha attharaso dhammaraso vimuttiraso – idaṃ peyyaṃ. Abhiniropanamaṇḍo sammāsaṅkappo, micchāsaṅkappo kasaṭo; yo tattha attharaso dhammaraso vimuttiraso – idaṃ peyyaṃ. Pariggahamaṇḍo sammāvācā, micchāvācā kasaṭo; yo tattha attharaso dhammaraso vimuttiraso – idaṃ peyyaṃ. Samuṭṭhānamaṇḍo sammākammanto, micchākammanto kasaṭo; yo tattha attharaso dhammaraso vimuttiraso – idaṃ peyyaṃ. Vodānamaṇḍo sammāājīvo, micchāājīvo kasaṭo; yo tattha attharaso dhammaraso vimuttiraso – idaṃ peyyaṃ. Paggahamaṇḍo sammāvāyāmo, micchāvāyāmo kasaṭo; yo tattha attharaso dhammaraso vimuttiraso – idaṃ peyyaṃ. Upaṭṭhānamaṇḍo sammāsati, micchāsati kasaṭo; yo tattha attharaso dhammaraso vimuttiraso – idaṃ peyyaṃ. Avikkhepamaṇḍo sammāsamādhi, micchāsamādhi kasaṭo; yo tattha attharaso dhammaraso vimuttiraso – idaṃ peyyaṃ.
দস্সনমণ্ডো সম্মাদিট্ঠি… অভিনিরোপনমণ্ডো সম্মাসঙ্কপ্পো… পরিগ্গহমণ্ডো সম্মাৰাচা… সমুট্ঠানমণ্ডো সম্মাকম্মন্তো… ৰোদানমণ্ডো সম্মাআজীৰো… পগ্গহমণ্ডো সম্মাৰাযামো… উপট্ঠানমণ্ডো সম্মাসতি… অৰিক্খেপমণ্ডো সম্মাসমাধি।
Dassanamaṇḍo sammādiṭṭhi… abhiniropanamaṇḍo sammāsaṅkappo… pariggahamaṇḍo sammāvācā… samuṭṭhānamaṇḍo sammākammanto… vodānamaṇḍo sammāājīvo… paggahamaṇḍo sammāvāyāmo… upaṭṭhānamaṇḍo sammāsati… avikkhepamaṇḍo sammāsamādhi.
উপট্ঠানমণ্ডো সতিসম্বোজ্ঝঙ্গো… পৰিচযমণ্ডো ধম্মৰিচযসম্বোজ্ঝঙ্গো… পগ্গহমণ্ডো ৰীরিযসম্বোজ্ঝঙ্গো… ফরণমণ্ডো পীতিসম্বোজ্ঝঙ্গো… উপসমমণ্ডো পস্সদ্ধিসম্বোজ্ঝঙ্গো… অৰিক্খেপমণ্ডো সমাধিসম্বোজ্ঝঙ্গো… পটিসঙ্খানমণ্ডো উপেক্খাসম্বোজ্ঝঙ্গো।
Upaṭṭhānamaṇḍo satisambojjhaṅgo… pavicayamaṇḍo dhammavicayasambojjhaṅgo… paggahamaṇḍo vīriyasambojjhaṅgo… pharaṇamaṇḍo pītisambojjhaṅgo… upasamamaṇḍo passaddhisambojjhaṅgo… avikkhepamaṇḍo samādhisambojjhaṅgo… paṭisaṅkhānamaṇḍo upekkhāsambojjhaṅgo.
অস্সদ্ধিযে অকম্পিযমণ্ডো সদ্ধাবলং… কোসজ্জে অকম্পিযমণ্ডো ৰীরিযবলং… পমাদে অকম্পিযমণ্ডো সতিবলং… উদ্ধচ্চে অকম্পিযমণ্ডো সমাধিবলং… অৰিজ্জায অকম্পিযমণ্ডো পঞ্ঞাবলং।
Assaddhiye akampiyamaṇḍo saddhābalaṃ… kosajje akampiyamaṇḍo vīriyabalaṃ… pamāde akampiyamaṇḍo satibalaṃ… uddhacce akampiyamaṇḍo samādhibalaṃ… avijjāya akampiyamaṇḍo paññābalaṃ.
অধিমোক্খমণ্ডো সদ্ধিন্দ্রিযং… পগ্গহমণ্ডো ৰীরিযিন্দ্রিযং… উপট্ঠানমণ্ডো সতিন্দ্রিযং… অৰিক্খেপমণ্ডো সমাধিন্দ্রিযং… দস্সনমণ্ডো পঞ্ঞিন্দ্রিযং।
Adhimokkhamaṇḍo saddhindriyaṃ… paggahamaṇḍo vīriyindriyaṃ… upaṭṭhānamaṇḍo satindriyaṃ… avikkhepamaṇḍo samādhindriyaṃ… dassanamaṇḍo paññindriyaṃ.
আধিপতেয্যট্ঠেন ইন্দ্রিযা মণ্ডো, অকম্পিযট্ঠেন বলা মণ্ডো, নিয্যানট্ঠেন বোজ্ঝঙ্গা মণ্ডো, হেতুট্ঠেন মগ্গো মণ্ডো, উপট্ঠানট্ঠেন সতিপট্ঠানা মণ্ডো, পদহনট্ঠেন সম্মপ্পধানা মণ্ডো, ইজ্ঝনট্ঠেন ইদ্ধিপাদা মণ্ডো, তথট্ঠেন সচ্চা মণ্ডো, অৰিক্খেপট্ঠেন সমথো মণ্ডো, অনুপস্সনট্ঠেন ৰিপস্সনা মণ্ডো, একরসট্ঠেন সমথৰিপস্সনা মণ্ডো, অনতিৰত্তনট্ঠেন যুগনদ্ধা মণ্ডো, সংৰরট্ঠেন সীলৰিসুদ্ধি মণ্ডো, অৰিক্খেপট্ঠেন চিত্তৰিসুদ্ধি মণ্ডো, দস্সনট্ঠেন দিট্ঠিৰিসুদ্ধি মণ্ডো, মুত্তট্ঠেন ৰিমোক্খো মণ্ডো, পটিৰেধট্ঠেন ৰিজ্জা মণ্ডো, পরিচ্চাগট্ঠেন ৰিমুত্তি মণ্ডো, সমুচ্ছেদট্ঠেন খযে ঞাণং মণ্ডো, পটিপ্পস্সদ্ধট্ঠেন অনুপ্পাদে ঞাণং মণ্ডো, ছন্দো মূলট্ঠেন মণ্ডো, মনসিকারো সমুট্ঠানট্ঠেন মণ্ডো, ফস্সো সমোধানট্ঠেন মণ্ডো, ৰেদনা সমোসরণট্ঠেন মণ্ডো, সমাধি পমুখট্ঠেন মণ্ডো, সতি আধিপতেয্যট্ঠেন মণ্ডো, পঞ্ঞা ততুত্তরট্ঠেন মণ্ডো, ৰিমুত্তি সারট্ঠেন মণ্ডো, অমতোগধং নিব্বানং পরিযোসানট্ঠেন মণ্ডোতি।
Ādhipateyyaṭṭhena indriyā maṇḍo, akampiyaṭṭhena balā maṇḍo, niyyānaṭṭhena bojjhaṅgā maṇḍo, hetuṭṭhena maggo maṇḍo, upaṭṭhānaṭṭhena satipaṭṭhānā maṇḍo, padahanaṭṭhena sammappadhānā maṇḍo, ijjhanaṭṭhena iddhipādā maṇḍo, tathaṭṭhena saccā maṇḍo, avikkhepaṭṭhena samatho maṇḍo, anupassanaṭṭhena vipassanā maṇḍo, ekarasaṭṭhena samathavipassanā maṇḍo, anativattanaṭṭhena yuganaddhā maṇḍo, saṃvaraṭṭhena sīlavisuddhi maṇḍo, avikkhepaṭṭhena cittavisuddhi maṇḍo, dassanaṭṭhena diṭṭhivisuddhi maṇḍo, muttaṭṭhena vimokkho maṇḍo, paṭivedhaṭṭhena vijjā maṇḍo, pariccāgaṭṭhena vimutti maṇḍo, samucchedaṭṭhena khaye ñāṇaṃ maṇḍo, paṭippassaddhaṭṭhena anuppāde ñāṇaṃ maṇḍo, chando mūlaṭṭhena maṇḍo, manasikāro samuṭṭhānaṭṭhena maṇḍo, phasso samodhānaṭṭhena maṇḍo, vedanā samosaraṇaṭṭhena maṇḍo, samādhi pamukhaṭṭhena maṇḍo, sati ādhipateyyaṭṭhena maṇḍo, paññā tatuttaraṭṭhena maṇḍo, vimutti sāraṭṭhena maṇḍo, amatogadhaṃ nibbānaṃ pariyosānaṭṭhena maṇḍoti.
চতুত্থভাণৰারো।
Catutthabhāṇavāro.
মণ্ডপেয্যকথা নিট্ঠিতা।
Maṇḍapeyyakathā niṭṭhitā.
মহাৰগ্গো পঠমো।
Mahāvaggo paṭhamo.
তস্সুদ্দানং –
Tassuddānaṃ –
ঞাণদিট্ঠী চ অস্সাসা, ইন্দ্রিযং ৰিমোক্খপঞ্চমা।
Ñāṇadiṭṭhī ca assāsā, indriyaṃ vimokkhapañcamā;
গতিকম্মৰিপল্লাসা, মগ্গো মণ্ডেন তে দসাতি॥
Gatikammavipallāsā, maggo maṇḍena te dasāti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / মণ্ডপেয্যকথাৰণ্ণনা • Maṇḍapeyyakathāvaṇṇanā
