| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၁၀. မဏ္ဍပေယ္ယကထာ
10. Maṇḍapeyyakathā
၂၃၈. ‘‘မဏ္ဍပေယ္ယမိဒံ , ဘိက္ခဝေ, ဗ္ရဟ္မစရိယံ။ သတ္ထာ သမ္မုခီဘူတော တိဓတ္တမဏ္ဍော 1။ သတ္ထရိ သမ္မုခီဘူတေ ဒေသနာမဏ္ဍော, ပဋိဂ္ဂဟမဏ္ဍော, ဗ္ရဟ္မစရိယမဏ္ဍော’’။
238. ‘‘Maṇḍapeyyamidaṃ , bhikkhave, brahmacariyaṃ. Satthā sammukhībhūto tidhattamaṇḍo 2. Satthari sammukhībhūte desanāmaṇḍo, paṭiggahamaṇḍo, brahmacariyamaṇḍo’’.
ကတမော ဒေသနာမဏ္ဍော? စတုန္နံ အရိယသစ္စာနံ အာစိက္ခနာ ဒေသနာ ပညာပနာ ပဋ္ဌပနာ ဝိဝရဏာ ဝိဘဇနာ ဥတ္တာနီကမ္မံ 3, စတုန္နံ သတိပဋ္ဌာနာနံ။ပေ.။ စတုန္နံ သမ္မပ္ပဓာနာနံ။ စတုန္နံ ဣဒ္ဓိပာဒာနံ။ ပဉ္စန္နံ ဣန္ဒ္ရိယာနံ။ ပဉ္စန္နံ ဗလာနံ။ သတ္တန္နံ ဗောဇ္ဈင္ဂာနံ။ အရိယသ္သ အဋ္ဌင္ဂိကသ္သ မဂ္ဂသ္သ အာစိက္ခနာ ဒေသနာ ပညာပနာ ပဋ္ဌပနာ ဝိဝရဏာ ဝိဘဇနာ ဥတ္တာနီကမ္မံ – အယံ ဒေသနာမဏ္ဍော။
Katamo desanāmaṇḍo? Catunnaṃ ariyasaccānaṃ ācikkhanā desanā paññāpanā paṭṭhapanā vivaraṇā vibhajanā uttānīkammaṃ 4, catunnaṃ satipaṭṭhānānaṃ…pe… catunnaṃ sammappadhānānaṃ… catunnaṃ iddhipādānaṃ… pañcannaṃ indriyānaṃ… pañcannaṃ balānaṃ… sattannaṃ bojjhaṅgānaṃ… ariyassa aṭṭhaṅgikassa maggassa ācikkhanā desanā paññāpanā paṭṭhapanā vivaraṇā vibhajanā uttānīkammaṃ – ayaṃ desanāmaṇḍo.
ကတမော ပဋိဂ္ဂဟမဏ္ဍော? ဘိက္ခူ ဘိက္ခုနိယော ဥပာသကာ ဥပာသိကာယော ဒေဝာ မနုသ္သာ ယေ ဝာ ပနညေပိ ကေစိ ဝိညာတာရော – အယံ ပဋိဂ္ဂဟမဏ္ဍော။
Katamo paṭiggahamaṇḍo? Bhikkhū bhikkhuniyo upāsakā upāsikāyo devā manussā ye vā panaññepi keci viññātāro – ayaṃ paṭiggahamaṇḍo.
ကတမော ဗ္ရဟ္မစရိယမဏ္ဍော? အယမေဝ အရိယော အဋ္ဌင္ဂိကော မဂ္ဂော, သေယ္ယထိဒံ – သမ္မာဒိဋ္ဌိ, သမ္မာသင္ကပ္ပော, သမ္မာဝာစာ, သမ္မာကမ္မန္တော, သမ္မာအာဇီဝော, သမ္မာဝာယာမော, သမ္မာသတိ, သမ္မာသမာဓိ – အယံ ဗ္ရဟ္မစရိယမဏ္ဍော။
Katamo brahmacariyamaṇḍo? Ayameva ariyo aṭṭhaṅgiko maggo, seyyathidaṃ – sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi – ayaṃ brahmacariyamaṇḍo.
၂၃၉. အဓိမောက္ခမဏ္ဍော သဒ္ဓိန္ဒ္ရိယံ, အသ္သဒ္ဓိယံ ကသဋော; အသ္သဒ္ဓိယံ ကသဋံ ဆဍ္ဍေတ္ဝာ သဒ္ဓိန္ဒ္ရိယသ္သ အဓိမောက္ခမဏ္ဍံ ပိဝတီတိ – မဏ္ဍပေယ္ယံ။ ပဂ္ဂဟမဏ္ဍော ဝီရိယိန္ဒ္ရိယံ, ကောသဇ္ဇံ ကသဋော; ကောသဇ္ဇံ ကသဋံ ဆဍ္ဍေတ္ဝာ ဝီရိယိန္ဒ္ရိယသ္သ ပဂ္ဂဟမဏ္ဍံ ပိဝတီတိ – မဏ္ဍပေယ္ယံ။ ဥပဋ္ဌာနမဏ္ဍော သတိန္ဒ္ရိယံ, ပမာဒော ကသဋော; ပမာဒံ ကသဋံ ဆဍ္ဍေတ္ဝာ သတိန္ဒ္ရိယသ္သ ဥပဋ္ဌာနမဏ္ဍံ ပိဝတီတိ – မဏ္ဍပေယ္ယံ။ အဝိက္ခေပမဏ္ဍော သမာဓိန္ဒ္ရိယံ, ဥဒ္ဓစ္စံ ကသဋော; ဥဒ္ဓစ္စံ ကသဋံ ဆဍ္ဍေတ္ဝာ သမာဓိန္ဒ္ရိယသ္သ အဝိက္ခေပမဏ္ဍံ ပိဝတီတိ – မဏ္ဍပေယ္ယံ။ ဒသ္သနမဏ္ဍော ပညိန္ဒ္ရိယံ, အဝိဇ္ဇံ ကသဋော; အဝိဇ္ဇံ ကသဋံ ဆဍ္ဍေတ္ဝာ ပညိန္ဒ္ရိယသ္သ ဒသ္သနမဏ္ဍံ ပိဝတီတိ – မဏ္ဍပေယ္ယံ။
239. Adhimokkhamaṇḍo saddhindriyaṃ, assaddhiyaṃ kasaṭo; assaddhiyaṃ kasaṭaṃ chaḍḍetvā saddhindriyassa adhimokkhamaṇḍaṃ pivatīti – maṇḍapeyyaṃ. Paggahamaṇḍo vīriyindriyaṃ, kosajjaṃ kasaṭo; kosajjaṃ kasaṭaṃ chaḍḍetvā vīriyindriyassa paggahamaṇḍaṃ pivatīti – maṇḍapeyyaṃ. Upaṭṭhānamaṇḍo satindriyaṃ, pamādo kasaṭo; pamādaṃ kasaṭaṃ chaḍḍetvā satindriyassa upaṭṭhānamaṇḍaṃ pivatīti – maṇḍapeyyaṃ. Avikkhepamaṇḍo samādhindriyaṃ, uddhaccaṃ kasaṭo; uddhaccaṃ kasaṭaṃ chaḍḍetvā samādhindriyassa avikkhepamaṇḍaṃ pivatīti – maṇḍapeyyaṃ. Dassanamaṇḍo paññindriyaṃ, avijjaṃ kasaṭo; avijjaṃ kasaṭaṃ chaḍḍetvā paññindriyassa dassanamaṇḍaṃ pivatīti – maṇḍapeyyaṃ.
အသ္သဒ္ဓိယေ အကမ္ပိယမဏ္ဍော သဒ္ဓာဗလံ, အသ္သဒ္ဓိယံ ကသဋော; အသ္သဒ္ဓိယံ ကသဋံ ဆဍ္ဍေတ္ဝာ သဒ္ဓာဗလသ္သ အသ္သဒ္ဓိယေ အကမ္ပိယမဏ္ဍံ ပိဝတီတိ – မဏ္ဍပေယ္ယံ။ ကောသဇ္ဇေ အကမ္ပိယမဏ္ဍော ဝီရိယဗလံ, ကောသဇ္ဇံ ကသဋော; ကောသဇ္ဇံ ကသဋံ ဆဍ္ဍေတ္ဝာ ဝီရိယဗလသ္သ ကောသဇ္ဇေ အကမ္ပိယမဏ္ဍံ ပိဝတီတိ – မဏ္ဍပေယ္ယံ။ ပမာဒေ အကမ္ပိယမဏ္ဍော သတိဗလံ, ပမာဒော ကသဋော; ပမာဒံ ကသဋံ ဆဍ္ဍေတ္ဝာ သတိဗလသ္သ ပမာဒေ အကမ္ပိယမဏ္ဍံ ပိဝတီတိ – မဏ္ဍပေယ္ယံ။ ဥဒ္ဓစ္စေ အကမ္ပိယမဏ္ဍော သမာဓိဗလံ, ဥဒ္ဓစ္စံ ကသဋော; ဥဒ္ဓစ္စံ ကသဋံ ဆဍ္ဍေတ္ဝာ သမာဓိဗလသ္သ ဥဒ္ဓစ္စေ အကမ္ပိယမဏ္ဍံ ပိဝတီတိ – မဏ္ဍပေယ္ယံ။ အဝိဇ္ဇာယ အကမ္ပိယမဏ္ဍော ပညာဗလံ, အဝိဇ္ဇာ ကသဋော; အဝိဇ္ဇံ ကသဋံ ဆဍ္ဍေတ္ဝာ ပညာဗလသ္သ အဝိဇ္ဇာယ အကမ္ပိယမဏ္ဍံ ပိဝတီတိ – မဏ္ဍပေယ္ယံ။
Assaddhiye akampiyamaṇḍo saddhābalaṃ, assaddhiyaṃ kasaṭo; assaddhiyaṃ kasaṭaṃ chaḍḍetvā saddhābalassa assaddhiye akampiyamaṇḍaṃ pivatīti – maṇḍapeyyaṃ. Kosajje akampiyamaṇḍo vīriyabalaṃ, kosajjaṃ kasaṭo; kosajjaṃ kasaṭaṃ chaḍḍetvā vīriyabalassa kosajje akampiyamaṇḍaṃ pivatīti – maṇḍapeyyaṃ. Pamāde akampiyamaṇḍo satibalaṃ, pamādo kasaṭo; pamādaṃ kasaṭaṃ chaḍḍetvā satibalassa pamāde akampiyamaṇḍaṃ pivatīti – maṇḍapeyyaṃ. Uddhacce akampiyamaṇḍo samādhibalaṃ, uddhaccaṃ kasaṭo; uddhaccaṃ kasaṭaṃ chaḍḍetvā samādhibalassa uddhacce akampiyamaṇḍaṃ pivatīti – maṇḍapeyyaṃ. Avijjāya akampiyamaṇḍo paññābalaṃ, avijjā kasaṭo; avijjaṃ kasaṭaṃ chaḍḍetvā paññābalassa avijjāya akampiyamaṇḍaṃ pivatīti – maṇḍapeyyaṃ.
ဥပဋ္ဌာနမဏ္ဍော သတိသမ္ဗောဇ္ဈင္ဂာ, ပမာဒော ကသဋော; ပမာဒံ ကသဋံ ဆဍ္ဍေတ္ဝာ သတိသမ္ဗောဇ္ဈင္ဂသ္သ ဥပဋ္ဌာနမဏ္ဍံ ပိဝတီတိ – မဏ္ဍပေယ္ယံ။ ပဝိစယမဏ္ဍော ဓမ္မဝိစယသမ္ဗောဇ္ဈင္ဂော, အဝိဇ္ဇာ ကသဋော; အဝိဇ္ဇံ ကသဋံ ဆဍ္ဍေတ္ဝာ ဓမ္မဝိစယသမ္ဗောဇ္ဈင္ဂသ္သ ပဝိစယမဏ္ဍံ ပိဝတီတိ – မဏ္ဍပေယ္ယံ။ ပဂ္ဂဟမဏ္ဍော ဝီရိယသမ္ဗောဇ္ဈင္ဂော, ကောသဇ္ဇံ ကသဋော; ကောသဇ္ဇံ ကသဋံ ဆဍ္ဍေတ္ဝာ ဝီရိယသမ္ဗောဇ္ဈင္ဂသ္သ ပဂ္ဂဟမဏ္ဍံ ပိဝတီတိ – မဏ္ဍပေယ္ယံ။ ဖရဏမဏ္ဍော ပီတိသမ္ဗောဇ္ဈင္ဂော, ပရိဠာဟော ကသဋော; ပရိဠာဟံ ကသဋံ ဆဍ္ဍေတ္ဝာ ပီတိသမ္ဗောဇ္ဈင္ဂသ္သ ဖရဏမဏ္ဍံ ပိဝတီတိ – မဏ္ဍပေယ္ယံ။ ဥပသမမဏ္ဍော ပသ္သဒ္ဓိသမ္ဗောဇ္ဈင္ဂော , ဒုဋ္ဌုလ္လံ ကသဋော; ဒုဋ္ဌုလ္လံ ကသဋံ ဆဍ္ဍေတ္ဝာ ပသ္သဒ္ဓိသမ္ဗောဇ္ဈင္ဂသ္သ ဥပသမမဏ္ဍံ ပိဝတီတိ – မဏ္ဍပေယ္ယံ။ အဝိက္ခေပမဏ္ဍော သမာဓိသမ္ဗောဇ္ဈင္ဂော, ဥဒ္ဓစ္စံ ကသဋော; ဥဒ္ဓစ္စံ ကသဋံ ဆဍ္ဍေတ္ဝာ သမာဓိသမ္ဗောဇ္ဈင္ဂသ္သ အဝိက္ခေပမဏ္ဍံ ပိဝတီတိ – မဏ္ဍပေယ္ယံ။ ပဋိသင္ခာနမဏ္ဍော ဥပေက္ခာသမ္ဗောဇ္ဈင္ဂော, အပ္ပဋိသင္ခာ ကသဋော; အပ္ပဋိသင္ခံ ကသဋံ ဆဍ္ဍေတ္ဝာ ဥပေက္ခာသမ္ဗောဇ္ဈင္ဂသ္သ ပဋိသင္ခာနမဏ္ဍံ ပိဝတီတိ – မဏ္ဍပေယ္ယံ။
Upaṭṭhānamaṇḍo satisambojjhaṅgā, pamādo kasaṭo; pamādaṃ kasaṭaṃ chaḍḍetvā satisambojjhaṅgassa upaṭṭhānamaṇḍaṃ pivatīti – maṇḍapeyyaṃ. Pavicayamaṇḍo dhammavicayasambojjhaṅgo, avijjā kasaṭo; avijjaṃ kasaṭaṃ chaḍḍetvā dhammavicayasambojjhaṅgassa pavicayamaṇḍaṃ pivatīti – maṇḍapeyyaṃ. Paggahamaṇḍo vīriyasambojjhaṅgo, kosajjaṃ kasaṭo; kosajjaṃ kasaṭaṃ chaḍḍetvā vīriyasambojjhaṅgassa paggahamaṇḍaṃ pivatīti – maṇḍapeyyaṃ. Pharaṇamaṇḍo pītisambojjhaṅgo, pariḷāho kasaṭo; pariḷāhaṃ kasaṭaṃ chaḍḍetvā pītisambojjhaṅgassa pharaṇamaṇḍaṃ pivatīti – maṇḍapeyyaṃ. Upasamamaṇḍo passaddhisambojjhaṅgo , duṭṭhullaṃ kasaṭo; duṭṭhullaṃ kasaṭaṃ chaḍḍetvā passaddhisambojjhaṅgassa upasamamaṇḍaṃ pivatīti – maṇḍapeyyaṃ. Avikkhepamaṇḍo samādhisambojjhaṅgo, uddhaccaṃ kasaṭo; uddhaccaṃ kasaṭaṃ chaḍḍetvā samādhisambojjhaṅgassa avikkhepamaṇḍaṃ pivatīti – maṇḍapeyyaṃ. Paṭisaṅkhānamaṇḍo upekkhāsambojjhaṅgo, appaṭisaṅkhā kasaṭo; appaṭisaṅkhaṃ kasaṭaṃ chaḍḍetvā upekkhāsambojjhaṅgassa paṭisaṅkhānamaṇḍaṃ pivatīti – maṇḍapeyyaṃ.
ဒသ္သနမဏ္ဍော သမ္မာဒိဋ္ဌိ, မိစ္ဆာဒိဋ္ဌိ ကသဋော; မိစ္ဆာဒိဋ္ဌိံ ကသဋံ ဆဍ္ဍေတ္ဝာ သမ္မာဒိဋ္ဌိယာ ဒသ္သနမဏ္ဍံ ပိဝတီတိ – မဏ္ဍပေယ္ယံ။ အဘိနိရောပနမဏ္ဍော သမ္မာသင္ကပ္ပော, မိစ္ဆာသင္ကပ္ပော ကသဋော; မိစ္ဆာသင္ကပ္ပံ ကသဋံ ဆဍ္ဍေတ္ဝာ သမ္မာသင္ကပ္ပသ္သ အဘိနိရောပနမဏ္ဍံ ပိဝတီတိ – မဏ္ဍပေယ္ယံ။ ပရိဂ္ဂဟမဏ္ဍော သမ္မာဝာစာ, မိစ္ဆာဝာစာ ကသဋော; မိစ္ဆာဝာစံ ကသဋံ ဆဍ္ဍေတ္ဝာ သမ္မာဝာစာယ ပရိဂ္ဂဟမဏ္ဍံ ပိဝတီတိ – မဏ္ဍပေယ္ယံ။ သမုဋ္ဌာနမဏ္ဍော သမ္မာကမ္မန္တော, မိစ္ဆာကမ္မန္တော ကသဋော; မိစ္ဆာကမ္မန္တံ ကသဋံ ဆဍ္ဍေတ္ဝာ သမ္မာကမ္မန္တသ္သ သမုဋ္ဌာနမဏ္ဍံ ပိဝတီတိ – မဏ္ဍပေယ္ယံ။ ဝောဒာနမဏ္ဍော သမ္မာအာဇီဝော, မိစ္ဆာအာဇီဝော ကသဋော; မိစ္ဆာအာဇီဝံ ကသဋံ ဆဍ္ဍေတ္ဝာ သမ္မာအာဇီဝသ္သ ဝောဒာနမဏ္ဍံ ပိဝတီတိ – မဏ္ဍပေယ္ယံ။ ပဂ္ဂဟမဏ္ဍော သမ္မာဝာယာမော, မိစ္ဆာဝာယာမော ကသဋော; မိစ္ဆာဝာယာမံ ကသဋံ ဆဍ္ဍေတ္ဝာ သမ္မာဝာယာမသ္သ ပဂ္ဂဟမဏ္ဍံ ပိဝတီတိ – မဏ္ဍပေယ္ယံ။ ဥပဋ္ဌာနမဏ္ဍော သမ္မာသတိ, မိစ္ဆာသတိ ကသဋော; မိစ္ဆာသတိံ ကသဋံ ဆဍ္ဍေတ္ဝာ သမ္မာသတိယာ ဥပဋ္ဌာနမဏ္ဍံ ပိဝတီတိ – မဏ္ဍပေယ္ယံ။ အဝိက္ခေပမဏ္ဍော သမ္မာသမာဓိ, မိစ္ဆာသမာဓိ ကသဋော; မိစ္ဆာသမာဓိံ ကသဋံ ဆဍ္ဍေတ္ဝာ သမ္မာသမာဓိသ္သ အဝိက္ခေပမဏ္ဍံ ပိဝတီတိ – မဏ္ဍပေယ္ယံ။
Dassanamaṇḍo sammādiṭṭhi, micchādiṭṭhi kasaṭo; micchādiṭṭhiṃ kasaṭaṃ chaḍḍetvā sammādiṭṭhiyā dassanamaṇḍaṃ pivatīti – maṇḍapeyyaṃ. Abhiniropanamaṇḍo sammāsaṅkappo, micchāsaṅkappo kasaṭo; micchāsaṅkappaṃ kasaṭaṃ chaḍḍetvā sammāsaṅkappassa abhiniropanamaṇḍaṃ pivatīti – maṇḍapeyyaṃ. Pariggahamaṇḍo sammāvācā, micchāvācā kasaṭo; micchāvācaṃ kasaṭaṃ chaḍḍetvā sammāvācāya pariggahamaṇḍaṃ pivatīti – maṇḍapeyyaṃ. Samuṭṭhānamaṇḍo sammākammanto, micchākammanto kasaṭo; micchākammantaṃ kasaṭaṃ chaḍḍetvā sammākammantassa samuṭṭhānamaṇḍaṃ pivatīti – maṇḍapeyyaṃ. Vodānamaṇḍo sammāājīvo, micchāājīvo kasaṭo; micchāājīvaṃ kasaṭaṃ chaḍḍetvā sammāājīvassa vodānamaṇḍaṃ pivatīti – maṇḍapeyyaṃ. Paggahamaṇḍo sammāvāyāmo, micchāvāyāmo kasaṭo; micchāvāyāmaṃ kasaṭaṃ chaḍḍetvā sammāvāyāmassa paggahamaṇḍaṃ pivatīti – maṇḍapeyyaṃ. Upaṭṭhānamaṇḍo sammāsati, micchāsati kasaṭo; micchāsatiṃ kasaṭaṃ chaḍḍetvā sammāsatiyā upaṭṭhānamaṇḍaṃ pivatīti – maṇḍapeyyaṃ. Avikkhepamaṇḍo sammāsamādhi, micchāsamādhi kasaṭo; micchāsamādhiṃ kasaṭaṃ chaḍḍetvā sammāsamādhissa avikkhepamaṇḍaṃ pivatīti – maṇḍapeyyaṃ.
၂၄၀. အတ္ထိ မဏ္ဍော, အတ္ထိ ပေယ္ယံ, အတ္ထိ ကသဋော။ အဓိမောက္ခမဏ္ဍော သဒ္ဓိန္ဒ္ရိယံ, အသ္သဒ္ဓိယံ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ ပဂ္ဂဟမဏ္ဍော ဝီရိယိန္ဒ္ရိယံ, ကောသဇ္ဇံ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ ဥပဋ္ဌာနမဏ္ဍော သတိန္ဒ္ရိယံ, ပမာဒော ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ အဝိက္ခေပမဏ္ဍော သမာဓိန္ဒ္ရိယံ, ဥဒ္ဓစ္စံ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ ဒသ္သနမဏ္ဍော ပညိန္ဒ္ရိယံ, အဝိဇ္ဇာ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။
240. Atthi maṇḍo, atthi peyyaṃ, atthi kasaṭo. Adhimokkhamaṇḍo saddhindriyaṃ, assaddhiyaṃ kasaṭo; yo tattha attharaso dhammaraso vimuttiraso – idaṃ peyyaṃ. Paggahamaṇḍo vīriyindriyaṃ, kosajjaṃ kasaṭo; yo tattha attharaso dhammaraso vimuttiraso – idaṃ peyyaṃ. Upaṭṭhānamaṇḍo satindriyaṃ, pamādo kasaṭo; yo tattha attharaso dhammaraso vimuttiraso – idaṃ peyyaṃ. Avikkhepamaṇḍo samādhindriyaṃ, uddhaccaṃ kasaṭo; yo tattha attharaso dhammaraso vimuttiraso – idaṃ peyyaṃ. Dassanamaṇḍo paññindriyaṃ, avijjā kasaṭo; yo tattha attharaso dhammaraso vimuttiraso – idaṃ peyyaṃ.
အသ္သဒ္ဓိယေ အကမ္ပိယမဏ္ဍော သဒ္ဓာဗလံ, အသ္သဒ္ဓိယံ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ ကောသဇ္ဇေ အကမ္ပိယမဏ္ဍော ဝီရိယဗလံ, ကောသဇ္ဇံ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ ပမာဒေ အကမ္ပိယမဏ္ဍော သတိဗလံ, ပမာဒော ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ ဥဒ္ဓစ္စေ အကမ္ပိယမဏ္ဍော သမာဓိဗလံ, ဥဒ္ဓစ္စံ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ အဝိဇ္ဇာယ အကမ္ပိယမဏ္ဍော ပညာဗလံ, အဝိဇ္ဇာ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။
Assaddhiye akampiyamaṇḍo saddhābalaṃ, assaddhiyaṃ kasaṭo; yo tattha attharaso dhammaraso vimuttiraso – idaṃ peyyaṃ. Kosajje akampiyamaṇḍo vīriyabalaṃ, kosajjaṃ kasaṭo; yo tattha attharaso dhammaraso vimuttiraso – idaṃ peyyaṃ. Pamāde akampiyamaṇḍo satibalaṃ, pamādo kasaṭo; yo tattha attharaso dhammaraso vimuttiraso – idaṃ peyyaṃ. Uddhacce akampiyamaṇḍo samādhibalaṃ, uddhaccaṃ kasaṭo; yo tattha attharaso dhammaraso vimuttiraso – idaṃ peyyaṃ. Avijjāya akampiyamaṇḍo paññābalaṃ, avijjā kasaṭo; yo tattha attharaso dhammaraso vimuttiraso – idaṃ peyyaṃ.
ဥပဋ္ဌာနမဏ္ဍော သတိသမ္ဗောဇ္ဈင္ဂော, ပမာဒော ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ ပဝိစယမဏ္ဍော ဓမ္မဝိစယသမ္ဗောဇ္ဈင္ဂော, အဝိဇ္ဇာ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ ပဂ္ဂဟမဏ္ဍော ဝီရိယသမ္ဗောဇ္ဈင္ဂော, ကောသဇ္ဇံ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ ဖရဏမဏ္ဍော ပီတိသမ္ဗောဇ္ဈင္ဂော, ပရိဠာဟော ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ ဥပသမမဏ္ဍော ပသ္သဒ္ဓိသမ္ဗောဇ္ဈင္ဂော, ဒုဋ္ဌုလ္လံ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ အဝိက္ခေပမဏ္ဍော သမာဓိသမ္ဗောဇ္ဈင္ဂော, ဥဒ္ဓစ္စံ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ ပဋိသင္ခာနမဏ္ဍော ဥပေက္ခာသမ္ဗောဇ္ဈင္ဂော, အပဋိသင္ခာ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။
Upaṭṭhānamaṇḍo satisambojjhaṅgo, pamādo kasaṭo; yo tattha attharaso dhammaraso vimuttiraso – idaṃ peyyaṃ. Pavicayamaṇḍo dhammavicayasambojjhaṅgo, avijjā kasaṭo; yo tattha attharaso dhammaraso vimuttiraso – idaṃ peyyaṃ. Paggahamaṇḍo vīriyasambojjhaṅgo, kosajjaṃ kasaṭo; yo tattha attharaso dhammaraso vimuttiraso – idaṃ peyyaṃ. Pharaṇamaṇḍo pītisambojjhaṅgo, pariḷāho kasaṭo; yo tattha attharaso dhammaraso vimuttiraso – idaṃ peyyaṃ. Upasamamaṇḍo passaddhisambojjhaṅgo, duṭṭhullaṃ kasaṭo; yo tattha attharaso dhammaraso vimuttiraso – idaṃ peyyaṃ. Avikkhepamaṇḍo samādhisambojjhaṅgo, uddhaccaṃ kasaṭo; yo tattha attharaso dhammaraso vimuttiraso – idaṃ peyyaṃ. Paṭisaṅkhānamaṇḍo upekkhāsambojjhaṅgo, apaṭisaṅkhā kasaṭo; yo tattha attharaso dhammaraso vimuttiraso – idaṃ peyyaṃ.
ဒသ္သနမဏ္ဍော သမ္မာဒိဋ္ဌိ, မိစ္ဆာဒိဋ္ဌိ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ အဘိနိရောပနမဏ္ဍော သမ္မာသင္ကပ္ပော, မိစ္ဆာသင္ကပ္ပော ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ ပရိဂ္ဂဟမဏ္ဍော သမ္မာဝာစာ, မိစ္ဆာဝာစာ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ သမုဋ္ဌာနမဏ္ဍော သမ္မာကမ္မန္တော, မိစ္ဆာကမ္မန္တော ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ ဝောဒာနမဏ္ဍော သမ္မာအာဇီဝော, မိစ္ဆာအာဇီဝော ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ ပဂ္ဂဟမဏ္ဍော သမ္မာဝာယာမော, မိစ္ဆာဝာယာမော ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ ဥပဋ္ဌာနမဏ္ဍော သမ္မာသတိ, မိစ္ဆာသတိ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။ အဝိက္ခေပမဏ္ဍော သမ္မာသမာဓိ, မိစ္ဆာသမာဓိ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော – ဣဒံ ပေယ္ယံ။
Dassanamaṇḍo sammādiṭṭhi, micchādiṭṭhi kasaṭo; yo tattha attharaso dhammaraso vimuttiraso – idaṃ peyyaṃ. Abhiniropanamaṇḍo sammāsaṅkappo, micchāsaṅkappo kasaṭo; yo tattha attharaso dhammaraso vimuttiraso – idaṃ peyyaṃ. Pariggahamaṇḍo sammāvācā, micchāvācā kasaṭo; yo tattha attharaso dhammaraso vimuttiraso – idaṃ peyyaṃ. Samuṭṭhānamaṇḍo sammākammanto, micchākammanto kasaṭo; yo tattha attharaso dhammaraso vimuttiraso – idaṃ peyyaṃ. Vodānamaṇḍo sammāājīvo, micchāājīvo kasaṭo; yo tattha attharaso dhammaraso vimuttiraso – idaṃ peyyaṃ. Paggahamaṇḍo sammāvāyāmo, micchāvāyāmo kasaṭo; yo tattha attharaso dhammaraso vimuttiraso – idaṃ peyyaṃ. Upaṭṭhānamaṇḍo sammāsati, micchāsati kasaṭo; yo tattha attharaso dhammaraso vimuttiraso – idaṃ peyyaṃ. Avikkhepamaṇḍo sammāsamādhi, micchāsamādhi kasaṭo; yo tattha attharaso dhammaraso vimuttiraso – idaṃ peyyaṃ.
ဒသ္သနမဏ္ဍော သမ္မာဒိဋ္ဌိ။ အဘိနိရောပနမဏ္ဍော သမ္မာသင္ကပ္ပော။ ပရိဂ္ဂဟမဏ္ဍော သမ္မာဝာစာ။ သမုဋ္ဌာနမဏ္ဍော သမ္မာကမ္မန္တော။ ဝောဒာနမဏ္ဍော သမ္မာအာဇီဝော။ ပဂ္ဂဟမဏ္ဍော သမ္မာဝာယာမော။ ဥပဋ္ဌာနမဏ္ဍော သမ္မာသတိ။ အဝိက္ခေပမဏ္ဍော သမ္မာသမာဓိ။
Dassanamaṇḍo sammādiṭṭhi… abhiniropanamaṇḍo sammāsaṅkappo… pariggahamaṇḍo sammāvācā… samuṭṭhānamaṇḍo sammākammanto… vodānamaṇḍo sammāājīvo… paggahamaṇḍo sammāvāyāmo… upaṭṭhānamaṇḍo sammāsati… avikkhepamaṇḍo sammāsamādhi.
ဥပဋ္ဌာနမဏ္ဍော သတိသမ္ဗောဇ္ဈင္ဂော။ ပဝိစယမဏ္ဍော ဓမ္မဝိစယသမ္ဗောဇ္ဈင္ဂော။ ပဂ္ဂဟမဏ္ဍော ဝီရိယသမ္ဗောဇ္ဈင္ဂော။ ဖရဏမဏ္ဍော ပီတိသမ္ဗောဇ္ဈင္ဂော။ ဥပသမမဏ္ဍော ပသ္သဒ္ဓိသမ္ဗောဇ္ဈင္ဂော။ အဝိက္ခေပမဏ္ဍော သမာဓိသမ္ဗောဇ္ဈင္ဂော။ ပဋိသင္ခာနမဏ္ဍော ဥပေက္ခာသမ္ဗောဇ္ဈင္ဂော။
Upaṭṭhānamaṇḍo satisambojjhaṅgo… pavicayamaṇḍo dhammavicayasambojjhaṅgo… paggahamaṇḍo vīriyasambojjhaṅgo… pharaṇamaṇḍo pītisambojjhaṅgo… upasamamaṇḍo passaddhisambojjhaṅgo… avikkhepamaṇḍo samādhisambojjhaṅgo… paṭisaṅkhānamaṇḍo upekkhāsambojjhaṅgo.
အသ္သဒ္ဓိယေ အကမ္ပိယမဏ္ဍော သဒ္ဓာဗလံ။ ကောသဇ္ဇေ အကမ္ပိယမဏ္ဍော ဝီရိယဗလံ။ ပမာဒေ အကမ္ပိယမဏ္ဍော သတိဗလံ။ ဥဒ္ဓစ္စေ အကမ္ပိယမဏ္ဍော သမာဓိဗလံ။ အဝိဇ္ဇာယ အကမ္ပိယမဏ္ဍော ပညာဗလံ။
Assaddhiye akampiyamaṇḍo saddhābalaṃ… kosajje akampiyamaṇḍo vīriyabalaṃ… pamāde akampiyamaṇḍo satibalaṃ… uddhacce akampiyamaṇḍo samādhibalaṃ… avijjāya akampiyamaṇḍo paññābalaṃ.
အဓိမောက္ခမဏ္ဍော သဒ္ဓိန္ဒ္ရိယံ။ ပဂ္ဂဟမဏ္ဍော ဝီရိယိန္ဒ္ရိယံ။ ဥပဋ္ဌာနမဏ္ဍော သတိန္ဒ္ရိယံ။ အဝိက္ခေပမဏ္ဍော သမာဓိန္ဒ္ရိယံ။ ဒသ္သနမဏ္ဍော ပညိန္ဒ္ရိယံ။
Adhimokkhamaṇḍo saddhindriyaṃ… paggahamaṇḍo vīriyindriyaṃ… upaṭṭhānamaṇḍo satindriyaṃ… avikkhepamaṇḍo samādhindriyaṃ… dassanamaṇḍo paññindriyaṃ.
အာဓိပတေယ္ယဋ္ဌေန ဣန္ဒ္ရိယာ မဏ္ဍော, အကမ္ပိယဋ္ဌေန ဗလာ မဏ္ဍော, နိယ္ယာနဋ္ဌေန ဗောဇ္ဈင္ဂာ မဏ္ဍော, ဟေတုဋ္ဌေန မဂ္ဂော မဏ္ဍော, ဥပဋ္ဌာနဋ္ဌေန သတိပဋ္ဌာနာ မဏ္ဍော, ပဒဟနဋ္ဌေန သမ္မပ္ပဓာနာ မဏ္ဍော, ဣဇ္ဈနဋ္ဌေန ဣဒ္ဓိပာဒာ မဏ္ဍော, တထဋ္ဌေန သစ္စာ မဏ္ဍော, အဝိက္ခေပဋ္ဌေန သမထော မဏ္ဍော, အနုပသ္သနဋ္ဌေန ဝိပသ္သနာ မဏ္ဍော, ဧကရသဋ္ဌေန သမထဝိပသ္သနာ မဏ္ဍော, အနတိဝတ္တနဋ္ဌေန ယုဂနဒ္ဓာ မဏ္ဍော, သံဝရဋ္ဌေန သီလဝိသုဒ္ဓိ မဏ္ဍော, အဝိက္ခေပဋ္ဌေန စိတ္တဝိသုဒ္ဓိ မဏ္ဍော, ဒသ္သနဋ္ဌေန ဒိဋ္ဌိဝိသုဒ္ဓိ မဏ္ဍော, မုတ္တဋ္ဌေန ဝိမောက္ခော မဏ္ဍော, ပဋိဝေဓဋ္ဌေန ဝိဇ္ဇာ မဏ္ဍော, ပရိစ္စာဂဋ္ဌေန ဝိမုတ္တိ မဏ္ဍော, သမုစ္ဆေဒဋ္ဌေန ခယေ ဉာဏံ မဏ္ဍော, ပဋိပ္ပသ္သဒ္ဓဋ္ဌေန အနုပ္ပာဒေ ဉာဏံ မဏ္ဍော, ဆန္ဒော မူလဋ္ဌေန မဏ္ဍော, မနသိကာရော သမုဋ္ဌာနဋ္ဌေန မဏ္ဍော, ဖသ္သော သမောဓာနဋ္ဌေန မဏ္ဍော, ဝေဒနာ သမောသရဏဋ္ဌေန မဏ္ဍော, သမာဓိ ပမုခဋ္ဌေန မဏ္ဍော, သတိ အာဓိပတေယ္ယဋ္ဌေန မဏ္ဍော, ပညာ တတုတ္တရဋ္ဌေန မဏ္ဍော, ဝိမုတ္တိ သာရဋ္ဌေန မဏ္ဍော, အမတောဂဓံ နိဗ္ဗာနံ ပရိယောသာနဋ္ဌေန မဏ္ဍောတိ။
Ādhipateyyaṭṭhena indriyā maṇḍo, akampiyaṭṭhena balā maṇḍo, niyyānaṭṭhena bojjhaṅgā maṇḍo, hetuṭṭhena maggo maṇḍo, upaṭṭhānaṭṭhena satipaṭṭhānā maṇḍo, padahanaṭṭhena sammappadhānā maṇḍo, ijjhanaṭṭhena iddhipādā maṇḍo, tathaṭṭhena saccā maṇḍo, avikkhepaṭṭhena samatho maṇḍo, anupassanaṭṭhena vipassanā maṇḍo, ekarasaṭṭhena samathavipassanā maṇḍo, anativattanaṭṭhena yuganaddhā maṇḍo, saṃvaraṭṭhena sīlavisuddhi maṇḍo, avikkhepaṭṭhena cittavisuddhi maṇḍo, dassanaṭṭhena diṭṭhivisuddhi maṇḍo, muttaṭṭhena vimokkho maṇḍo, paṭivedhaṭṭhena vijjā maṇḍo, pariccāgaṭṭhena vimutti maṇḍo, samucchedaṭṭhena khaye ñāṇaṃ maṇḍo, paṭippassaddhaṭṭhena anuppāde ñāṇaṃ maṇḍo, chando mūlaṭṭhena maṇḍo, manasikāro samuṭṭhānaṭṭhena maṇḍo, phasso samodhānaṭṭhena maṇḍo, vedanā samosaraṇaṭṭhena maṇḍo, samādhi pamukhaṭṭhena maṇḍo, sati ādhipateyyaṭṭhena maṇḍo, paññā tatuttaraṭṭhena maṇḍo, vimutti sāraṭṭhena maṇḍo, amatogadhaṃ nibbānaṃ pariyosānaṭṭhena maṇḍoti.
စတုတ္ထဘာဏဝာရော။
Catutthabhāṇavāro.
မဏ္ဍပေယ္ယကထာ နိဋ္ဌိတာ။
Maṇḍapeyyakathā niṭṭhitā.
မဟာဝဂ္ဂော ပဌမော။
Mahāvaggo paṭhamo.
တသ္သုဒ္ဒာနံ –
Tassuddānaṃ –
ဉာဏဒိဋ္ဌီ စ အသ္သာသာ၊ ဣန္ဒ္ရိယံ ဝိမောက္ခပဉ္စမာ။
Ñāṇadiṭṭhī ca assāsā, indriyaṃ vimokkhapañcamā;
ဂတိကမ္မဝိပလ္လာသာ၊ မဂ္ဂော မဏ္ဍေန တေ ဒသာတိ။
Gatikammavipallāsā, maggo maṇḍena te dasāti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / မဏ္ဍပေယ္ယကထာဝဏ္ဏနာ • Maṇḍapeyyakathāvaṇṇanā
