| Library / Tipiṭaka / ತಿಪಿಟಕ • Tipiṭaka / ಪಟಿಸಮ್ಭಿದಾಮಗ್ಗಪಾಳಿ • Paṭisambhidāmaggapāḷi |
೧೦. ಮಣ್ಡಪೇಯ್ಯಕಥಾ
10. Maṇḍapeyyakathā
೨೩೮. ‘‘ಮಣ್ಡಪೇಯ್ಯಮಿದಂ , ಭಿಕ್ಖವೇ, ಬ್ರಹ್ಮಚರಿಯಂ। ಸತ್ಥಾ ಸಮ್ಮುಖೀಭೂತೋ ತಿಧತ್ತಮಣ್ಡೋ 1। ಸತ್ಥರಿ ಸಮ್ಮುಖೀಭೂತೇ ದೇಸನಾಮಣ್ಡೋ, ಪಟಿಗ್ಗಹಮಣ್ಡೋ, ಬ್ರಹ್ಮಚರಿಯಮಣ್ಡೋ’’।
238. ‘‘Maṇḍapeyyamidaṃ , bhikkhave, brahmacariyaṃ. Satthā sammukhībhūto tidhattamaṇḍo 2. Satthari sammukhībhūte desanāmaṇḍo, paṭiggahamaṇḍo, brahmacariyamaṇḍo’’.
ಕತಮೋ ದೇಸನಾಮಣ್ಡೋ? ಚತುನ್ನಂ ಅರಿಯಸಚ್ಚಾನಂ ಆಚಿಕ್ಖನಾ ದೇಸನಾ ಪಞ್ಞಾಪನಾ ಪಟ್ಠಪನಾ ವಿವರಣಾ ವಿಭಜನಾ ಉತ್ತಾನೀಕಮ್ಮಂ 3, ಚತುನ್ನಂ ಸತಿಪಟ್ಠಾನಾನಂ…ಪೇ॰… ಚತುನ್ನಂ ಸಮ್ಮಪ್ಪಧಾನಾನಂ… ಚತುನ್ನಂ ಇದ್ಧಿಪಾದಾನಂ… ಪಞ್ಚನ್ನಂ ಇನ್ದ್ರಿಯಾನಂ… ಪಞ್ಚನ್ನಂ ಬಲಾನಂ… ಸತ್ತನ್ನಂ ಬೋಜ್ಝಙ್ಗಾನಂ… ಅರಿಯಸ್ಸ ಅಟ್ಠಙ್ಗಿಕಸ್ಸ ಮಗ್ಗಸ್ಸ ಆಚಿಕ್ಖನಾ ದೇಸನಾ ಪಞ್ಞಾಪನಾ ಪಟ್ಠಪನಾ ವಿವರಣಾ ವಿಭಜನಾ ಉತ್ತಾನೀಕಮ್ಮಂ – ಅಯಂ ದೇಸನಾಮಣ್ಡೋ।
Katamo desanāmaṇḍo? Catunnaṃ ariyasaccānaṃ ācikkhanā desanā paññāpanā paṭṭhapanā vivaraṇā vibhajanā uttānīkammaṃ 4, catunnaṃ satipaṭṭhānānaṃ…pe… catunnaṃ sammappadhānānaṃ… catunnaṃ iddhipādānaṃ… pañcannaṃ indriyānaṃ… pañcannaṃ balānaṃ… sattannaṃ bojjhaṅgānaṃ… ariyassa aṭṭhaṅgikassa maggassa ācikkhanā desanā paññāpanā paṭṭhapanā vivaraṇā vibhajanā uttānīkammaṃ – ayaṃ desanāmaṇḍo.
ಕತಮೋ ಪಟಿಗ್ಗಹಮಣ್ಡೋ? ಭಿಕ್ಖೂ ಭಿಕ್ಖುನಿಯೋ ಉಪಾಸಕಾ ಉಪಾಸಿಕಾಯೋ ದೇವಾ ಮನುಸ್ಸಾ ಯೇ ವಾ ಪನಞ್ಞೇಪಿ ಕೇಚಿ ವಿಞ್ಞಾತಾರೋ – ಅಯಂ ಪಟಿಗ್ಗಹಮಣ್ಡೋ।
Katamo paṭiggahamaṇḍo? Bhikkhū bhikkhuniyo upāsakā upāsikāyo devā manussā ye vā panaññepi keci viññātāro – ayaṃ paṭiggahamaṇḍo.
ಕತಮೋ ಬ್ರಹ್ಮಚರಿಯಮಣ್ಡೋ? ಅಯಮೇವ ಅರಿಯೋ ಅಟ್ಠಙ್ಗಿಕೋ ಮಗ್ಗೋ, ಸೇಯ್ಯಥಿದಂ – ಸಮ್ಮಾದಿಟ್ಠಿ, ಸಮ್ಮಾಸಙ್ಕಪ್ಪೋ, ಸಮ್ಮಾವಾಚಾ, ಸಮ್ಮಾಕಮ್ಮನ್ತೋ, ಸಮ್ಮಾಆಜೀವೋ, ಸಮ್ಮಾವಾಯಾಮೋ, ಸಮ್ಮಾಸತಿ, ಸಮ್ಮಾಸಮಾಧಿ – ಅಯಂ ಬ್ರಹ್ಮಚರಿಯಮಣ್ಡೋ।
Katamo brahmacariyamaṇḍo? Ayameva ariyo aṭṭhaṅgiko maggo, seyyathidaṃ – sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi – ayaṃ brahmacariyamaṇḍo.
೨೩೯. ಅಧಿಮೋಕ್ಖಮಣ್ಡೋ ಸದ್ಧಿನ್ದ್ರಿಯಂ, ಅಸ್ಸದ್ಧಿಯಂ ಕಸಟೋ; ಅಸ್ಸದ್ಧಿಯಂ ಕಸಟಂ ಛಡ್ಡೇತ್ವಾ ಸದ್ಧಿನ್ದ್ರಿಯಸ್ಸ ಅಧಿಮೋಕ್ಖಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ಪಗ್ಗಹಮಣ್ಡೋ ವೀರಿಯಿನ್ದ್ರಿಯಂ, ಕೋಸಜ್ಜಂ ಕಸಟೋ; ಕೋಸಜ್ಜಂ ಕಸಟಂ ಛಡ್ಡೇತ್ವಾ ವೀರಿಯಿನ್ದ್ರಿಯಸ್ಸ ಪಗ್ಗಹಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ಉಪಟ್ಠಾನಮಣ್ಡೋ ಸತಿನ್ದ್ರಿಯಂ, ಪಮಾದೋ ಕಸಟೋ; ಪಮಾದಂ ಕಸಟಂ ಛಡ್ಡೇತ್ವಾ ಸತಿನ್ದ್ರಿಯಸ್ಸ ಉಪಟ್ಠಾನಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ಅವಿಕ್ಖೇಪಮಣ್ಡೋ ಸಮಾಧಿನ್ದ್ರಿಯಂ, ಉದ್ಧಚ್ಚಂ ಕಸಟೋ; ಉದ್ಧಚ್ಚಂ ಕಸಟಂ ಛಡ್ಡೇತ್ವಾ ಸಮಾಧಿನ್ದ್ರಿಯಸ್ಸ ಅವಿಕ್ಖೇಪಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ದಸ್ಸನಮಣ್ಡೋ ಪಞ್ಞಿನ್ದ್ರಿಯಂ, ಅವಿಜ್ಜಂ ಕಸಟೋ; ಅವಿಜ್ಜಂ ಕಸಟಂ ಛಡ್ಡೇತ್ವಾ ಪಞ್ಞಿನ್ದ್ರಿಯಸ್ಸ ದಸ್ಸನಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ।
239. Adhimokkhamaṇḍo saddhindriyaṃ, assaddhiyaṃ kasaṭo; assaddhiyaṃ kasaṭaṃ chaḍḍetvā saddhindriyassa adhimokkhamaṇḍaṃ pivatīti – maṇḍapeyyaṃ. Paggahamaṇḍo vīriyindriyaṃ, kosajjaṃ kasaṭo; kosajjaṃ kasaṭaṃ chaḍḍetvā vīriyindriyassa paggahamaṇḍaṃ pivatīti – maṇḍapeyyaṃ. Upaṭṭhānamaṇḍo satindriyaṃ, pamādo kasaṭo; pamādaṃ kasaṭaṃ chaḍḍetvā satindriyassa upaṭṭhānamaṇḍaṃ pivatīti – maṇḍapeyyaṃ. Avikkhepamaṇḍo samādhindriyaṃ, uddhaccaṃ kasaṭo; uddhaccaṃ kasaṭaṃ chaḍḍetvā samādhindriyassa avikkhepamaṇḍaṃ pivatīti – maṇḍapeyyaṃ. Dassanamaṇḍo paññindriyaṃ, avijjaṃ kasaṭo; avijjaṃ kasaṭaṃ chaḍḍetvā paññindriyassa dassanamaṇḍaṃ pivatīti – maṇḍapeyyaṃ.
ಅಸ್ಸದ್ಧಿಯೇ ಅಕಮ್ಪಿಯಮಣ್ಡೋ ಸದ್ಧಾಬಲಂ, ಅಸ್ಸದ್ಧಿಯಂ ಕಸಟೋ; ಅಸ್ಸದ್ಧಿಯಂ ಕಸಟಂ ಛಡ್ಡೇತ್ವಾ ಸದ್ಧಾಬಲಸ್ಸ ಅಸ್ಸದ್ಧಿಯೇ ಅಕಮ್ಪಿಯಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ಕೋಸಜ್ಜೇ ಅಕಮ್ಪಿಯಮಣ್ಡೋ ವೀರಿಯಬಲಂ, ಕೋಸಜ್ಜಂ ಕಸಟೋ; ಕೋಸಜ್ಜಂ ಕಸಟಂ ಛಡ್ಡೇತ್ವಾ ವೀರಿಯಬಲಸ್ಸ ಕೋಸಜ್ಜೇ ಅಕಮ್ಪಿಯಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ಪಮಾದೇ ಅಕಮ್ಪಿಯಮಣ್ಡೋ ಸತಿಬಲಂ, ಪಮಾದೋ ಕಸಟೋ; ಪಮಾದಂ ಕಸಟಂ ಛಡ್ಡೇತ್ವಾ ಸತಿಬಲಸ್ಸ ಪಮಾದೇ ಅಕಮ್ಪಿಯಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ಉದ್ಧಚ್ಚೇ ಅಕಮ್ಪಿಯಮಣ್ಡೋ ಸಮಾಧಿಬಲಂ, ಉದ್ಧಚ್ಚಂ ಕಸಟೋ; ಉದ್ಧಚ್ಚಂ ಕಸಟಂ ಛಡ್ಡೇತ್ವಾ ಸಮಾಧಿಬಲಸ್ಸ ಉದ್ಧಚ್ಚೇ ಅಕಮ್ಪಿಯಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ಅವಿಜ್ಜಾಯ ಅಕಮ್ಪಿಯಮಣ್ಡೋ ಪಞ್ಞಾಬಲಂ, ಅವಿಜ್ಜಾ ಕಸಟೋ; ಅವಿಜ್ಜಂ ಕಸಟಂ ಛಡ್ಡೇತ್ವಾ ಪಞ್ಞಾಬಲಸ್ಸ ಅವಿಜ್ಜಾಯ ಅಕಮ್ಪಿಯಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ।
Assaddhiye akampiyamaṇḍo saddhābalaṃ, assaddhiyaṃ kasaṭo; assaddhiyaṃ kasaṭaṃ chaḍḍetvā saddhābalassa assaddhiye akampiyamaṇḍaṃ pivatīti – maṇḍapeyyaṃ. Kosajje akampiyamaṇḍo vīriyabalaṃ, kosajjaṃ kasaṭo; kosajjaṃ kasaṭaṃ chaḍḍetvā vīriyabalassa kosajje akampiyamaṇḍaṃ pivatīti – maṇḍapeyyaṃ. Pamāde akampiyamaṇḍo satibalaṃ, pamādo kasaṭo; pamādaṃ kasaṭaṃ chaḍḍetvā satibalassa pamāde akampiyamaṇḍaṃ pivatīti – maṇḍapeyyaṃ. Uddhacce akampiyamaṇḍo samādhibalaṃ, uddhaccaṃ kasaṭo; uddhaccaṃ kasaṭaṃ chaḍḍetvā samādhibalassa uddhacce akampiyamaṇḍaṃ pivatīti – maṇḍapeyyaṃ. Avijjāya akampiyamaṇḍo paññābalaṃ, avijjā kasaṭo; avijjaṃ kasaṭaṃ chaḍḍetvā paññābalassa avijjāya akampiyamaṇḍaṃ pivatīti – maṇḍapeyyaṃ.
ಉಪಟ್ಠಾನಮಣ್ಡೋ ಸತಿಸಮ್ಬೋಜ್ಝಙ್ಗಾ, ಪಮಾದೋ ಕಸಟೋ; ಪಮಾದಂ ಕಸಟಂ ಛಡ್ಡೇತ್ವಾ ಸತಿಸಮ್ಬೋಜ್ಝಙ್ಗಸ್ಸ ಉಪಟ್ಠಾನಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ಪವಿಚಯಮಣ್ಡೋ ಧಮ್ಮವಿಚಯಸಮ್ಬೋಜ್ಝಙ್ಗೋ, ಅವಿಜ್ಜಾ ಕಸಟೋ; ಅವಿಜ್ಜಂ ಕಸಟಂ ಛಡ್ಡೇತ್ವಾ ಧಮ್ಮವಿಚಯಸಮ್ಬೋಜ್ಝಙ್ಗಸ್ಸ ಪವಿಚಯಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ಪಗ್ಗಹಮಣ್ಡೋ ವೀರಿಯಸಮ್ಬೋಜ್ಝಙ್ಗೋ, ಕೋಸಜ್ಜಂ ಕಸಟೋ; ಕೋಸಜ್ಜಂ ಕಸಟಂ ಛಡ್ಡೇತ್ವಾ ವೀರಿಯಸಮ್ಬೋಜ್ಝಙ್ಗಸ್ಸ ಪಗ್ಗಹಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ಫರಣಮಣ್ಡೋ ಪೀತಿಸಮ್ಬೋಜ್ಝಙ್ಗೋ, ಪರಿಳಾಹೋ ಕಸಟೋ; ಪರಿಳಾಹಂ ಕಸಟಂ ಛಡ್ಡೇತ್ವಾ ಪೀತಿಸಮ್ಬೋಜ್ಝಙ್ಗಸ್ಸ ಫರಣಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ಉಪಸಮಮಣ್ಡೋ ಪಸ್ಸದ್ಧಿಸಮ್ಬೋಜ್ಝಙ್ಗೋ , ದುಟ್ಠುಲ್ಲಂ ಕಸಟೋ; ದುಟ್ಠುಲ್ಲಂ ಕಸಟಂ ಛಡ್ಡೇತ್ವಾ ಪಸ್ಸದ್ಧಿಸಮ್ಬೋಜ್ಝಙ್ಗಸ್ಸ ಉಪಸಮಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ಅವಿಕ್ಖೇಪಮಣ್ಡೋ ಸಮಾಧಿಸಮ್ಬೋಜ್ಝಙ್ಗೋ, ಉದ್ಧಚ್ಚಂ ಕಸಟೋ; ಉದ್ಧಚ್ಚಂ ಕಸಟಂ ಛಡ್ಡೇತ್ವಾ ಸಮಾಧಿಸಮ್ಬೋಜ್ಝಙ್ಗಸ್ಸ ಅವಿಕ್ಖೇಪಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ಪಟಿಸಙ್ಖಾನಮಣ್ಡೋ ಉಪೇಕ್ಖಾಸಮ್ಬೋಜ್ಝಙ್ಗೋ, ಅಪ್ಪಟಿಸಙ್ಖಾ ಕಸಟೋ; ಅಪ್ಪಟಿಸಙ್ಖಂ ಕಸಟಂ ಛಡ್ಡೇತ್ವಾ ಉಪೇಕ್ಖಾಸಮ್ಬೋಜ್ಝಙ್ಗಸ್ಸ ಪಟಿಸಙ್ಖಾನಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ।
Upaṭṭhānamaṇḍo satisambojjhaṅgā, pamādo kasaṭo; pamādaṃ kasaṭaṃ chaḍḍetvā satisambojjhaṅgassa upaṭṭhānamaṇḍaṃ pivatīti – maṇḍapeyyaṃ. Pavicayamaṇḍo dhammavicayasambojjhaṅgo, avijjā kasaṭo; avijjaṃ kasaṭaṃ chaḍḍetvā dhammavicayasambojjhaṅgassa pavicayamaṇḍaṃ pivatīti – maṇḍapeyyaṃ. Paggahamaṇḍo vīriyasambojjhaṅgo, kosajjaṃ kasaṭo; kosajjaṃ kasaṭaṃ chaḍḍetvā vīriyasambojjhaṅgassa paggahamaṇḍaṃ pivatīti – maṇḍapeyyaṃ. Pharaṇamaṇḍo pītisambojjhaṅgo, pariḷāho kasaṭo; pariḷāhaṃ kasaṭaṃ chaḍḍetvā pītisambojjhaṅgassa pharaṇamaṇḍaṃ pivatīti – maṇḍapeyyaṃ. Upasamamaṇḍo passaddhisambojjhaṅgo , duṭṭhullaṃ kasaṭo; duṭṭhullaṃ kasaṭaṃ chaḍḍetvā passaddhisambojjhaṅgassa upasamamaṇḍaṃ pivatīti – maṇḍapeyyaṃ. Avikkhepamaṇḍo samādhisambojjhaṅgo, uddhaccaṃ kasaṭo; uddhaccaṃ kasaṭaṃ chaḍḍetvā samādhisambojjhaṅgassa avikkhepamaṇḍaṃ pivatīti – maṇḍapeyyaṃ. Paṭisaṅkhānamaṇḍo upekkhāsambojjhaṅgo, appaṭisaṅkhā kasaṭo; appaṭisaṅkhaṃ kasaṭaṃ chaḍḍetvā upekkhāsambojjhaṅgassa paṭisaṅkhānamaṇḍaṃ pivatīti – maṇḍapeyyaṃ.
ದಸ್ಸನಮಣ್ಡೋ ಸಮ್ಮಾದಿಟ್ಠಿ, ಮಿಚ್ಛಾದಿಟ್ಠಿ ಕಸಟೋ; ಮಿಚ್ಛಾದಿಟ್ಠಿಂ ಕಸಟಂ ಛಡ್ಡೇತ್ವಾ ಸಮ್ಮಾದಿಟ್ಠಿಯಾ ದಸ್ಸನಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ಅಭಿನಿರೋಪನಮಣ್ಡೋ ಸಮ್ಮಾಸಙ್ಕಪ್ಪೋ, ಮಿಚ್ಛಾಸಙ್ಕಪ್ಪೋ ಕಸಟೋ; ಮಿಚ್ಛಾಸಙ್ಕಪ್ಪಂ ಕಸಟಂ ಛಡ್ಡೇತ್ವಾ ಸಮ್ಮಾಸಙ್ಕಪ್ಪಸ್ಸ ಅಭಿನಿರೋಪನಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ಪರಿಗ್ಗಹಮಣ್ಡೋ ಸಮ್ಮಾವಾಚಾ, ಮಿಚ್ಛಾವಾಚಾ ಕಸಟೋ; ಮಿಚ್ಛಾವಾಚಂ ಕಸಟಂ ಛಡ್ಡೇತ್ವಾ ಸಮ್ಮಾವಾಚಾಯ ಪರಿಗ್ಗಹಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ಸಮುಟ್ಠಾನಮಣ್ಡೋ ಸಮ್ಮಾಕಮ್ಮನ್ತೋ, ಮಿಚ್ಛಾಕಮ್ಮನ್ತೋ ಕಸಟೋ; ಮಿಚ್ಛಾಕಮ್ಮನ್ತಂ ಕಸಟಂ ಛಡ್ಡೇತ್ವಾ ಸಮ್ಮಾಕಮ್ಮನ್ತಸ್ಸ ಸಮುಟ್ಠಾನಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ವೋದಾನಮಣ್ಡೋ ಸಮ್ಮಾಆಜೀವೋ, ಮಿಚ್ಛಾಆಜೀವೋ ಕಸಟೋ; ಮಿಚ್ಛಾಆಜೀವಂ ಕಸಟಂ ಛಡ್ಡೇತ್ವಾ ಸಮ್ಮಾಆಜೀವಸ್ಸ ವೋದಾನಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ಪಗ್ಗಹಮಣ್ಡೋ ಸಮ್ಮಾವಾಯಾಮೋ, ಮಿಚ್ಛಾವಾಯಾಮೋ ಕಸಟೋ; ಮಿಚ್ಛಾವಾಯಾಮಂ ಕಸಟಂ ಛಡ್ಡೇತ್ವಾ ಸಮ್ಮಾವಾಯಾಮಸ್ಸ ಪಗ್ಗಹಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ಉಪಟ್ಠಾನಮಣ್ಡೋ ಸಮ್ಮಾಸತಿ, ಮಿಚ್ಛಾಸತಿ ಕಸಟೋ; ಮಿಚ್ಛಾಸತಿಂ ಕಸಟಂ ಛಡ್ಡೇತ್ವಾ ಸಮ್ಮಾಸತಿಯಾ ಉಪಟ್ಠಾನಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ। ಅವಿಕ್ಖೇಪಮಣ್ಡೋ ಸಮ್ಮಾಸಮಾಧಿ, ಮಿಚ್ಛಾಸಮಾಧಿ ಕಸಟೋ; ಮಿಚ್ಛಾಸಮಾಧಿಂ ಕಸಟಂ ಛಡ್ಡೇತ್ವಾ ಸಮ್ಮಾಸಮಾಧಿಸ್ಸ ಅವಿಕ್ಖೇಪಮಣ್ಡಂ ಪಿವತೀತಿ – ಮಣ್ಡಪೇಯ್ಯಂ।
Dassanamaṇḍo sammādiṭṭhi, micchādiṭṭhi kasaṭo; micchādiṭṭhiṃ kasaṭaṃ chaḍḍetvā sammādiṭṭhiyā dassanamaṇḍaṃ pivatīti – maṇḍapeyyaṃ. Abhiniropanamaṇḍo sammāsaṅkappo, micchāsaṅkappo kasaṭo; micchāsaṅkappaṃ kasaṭaṃ chaḍḍetvā sammāsaṅkappassa abhiniropanamaṇḍaṃ pivatīti – maṇḍapeyyaṃ. Pariggahamaṇḍo sammāvācā, micchāvācā kasaṭo; micchāvācaṃ kasaṭaṃ chaḍḍetvā sammāvācāya pariggahamaṇḍaṃ pivatīti – maṇḍapeyyaṃ. Samuṭṭhānamaṇḍo sammākammanto, micchākammanto kasaṭo; micchākammantaṃ kasaṭaṃ chaḍḍetvā sammākammantassa samuṭṭhānamaṇḍaṃ pivatīti – maṇḍapeyyaṃ. Vodānamaṇḍo sammāājīvo, micchāājīvo kasaṭo; micchāājīvaṃ kasaṭaṃ chaḍḍetvā sammāājīvassa vodānamaṇḍaṃ pivatīti – maṇḍapeyyaṃ. Paggahamaṇḍo sammāvāyāmo, micchāvāyāmo kasaṭo; micchāvāyāmaṃ kasaṭaṃ chaḍḍetvā sammāvāyāmassa paggahamaṇḍaṃ pivatīti – maṇḍapeyyaṃ. Upaṭṭhānamaṇḍo sammāsati, micchāsati kasaṭo; micchāsatiṃ kasaṭaṃ chaḍḍetvā sammāsatiyā upaṭṭhānamaṇḍaṃ pivatīti – maṇḍapeyyaṃ. Avikkhepamaṇḍo sammāsamādhi, micchāsamādhi kasaṭo; micchāsamādhiṃ kasaṭaṃ chaḍḍetvā sammāsamādhissa avikkhepamaṇḍaṃ pivatīti – maṇḍapeyyaṃ.
೨೪೦. ಅತ್ಥಿ ಮಣ್ಡೋ, ಅತ್ಥಿ ಪೇಯ್ಯಂ, ಅತ್ಥಿ ಕಸಟೋ। ಅಧಿಮೋಕ್ಖಮಣ್ಡೋ ಸದ್ಧಿನ್ದ್ರಿಯಂ, ಅಸ್ಸದ್ಧಿಯಂ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ಪಗ್ಗಹಮಣ್ಡೋ ವೀರಿಯಿನ್ದ್ರಿಯಂ, ಕೋಸಜ್ಜಂ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ಉಪಟ್ಠಾನಮಣ್ಡೋ ಸತಿನ್ದ್ರಿಯಂ, ಪಮಾದೋ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ಅವಿಕ್ಖೇಪಮಣ್ಡೋ ಸಮಾಧಿನ್ದ್ರಿಯಂ, ಉದ್ಧಚ್ಚಂ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ದಸ್ಸನಮಣ್ಡೋ ಪಞ್ಞಿನ್ದ್ರಿಯಂ, ಅವಿಜ್ಜಾ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ।
240. Atthi maṇḍo, atthi peyyaṃ, atthi kasaṭo. Adhimokkhamaṇḍo saddhindriyaṃ, assaddhiyaṃ kasaṭo; yo tattha attharaso dhammaraso vimuttiraso – idaṃ peyyaṃ. Paggahamaṇḍo vīriyindriyaṃ, kosajjaṃ kasaṭo; yo tattha attharaso dhammaraso vimuttiraso – idaṃ peyyaṃ. Upaṭṭhānamaṇḍo satindriyaṃ, pamādo kasaṭo; yo tattha attharaso dhammaraso vimuttiraso – idaṃ peyyaṃ. Avikkhepamaṇḍo samādhindriyaṃ, uddhaccaṃ kasaṭo; yo tattha attharaso dhammaraso vimuttiraso – idaṃ peyyaṃ. Dassanamaṇḍo paññindriyaṃ, avijjā kasaṭo; yo tattha attharaso dhammaraso vimuttiraso – idaṃ peyyaṃ.
ಅಸ್ಸದ್ಧಿಯೇ ಅಕಮ್ಪಿಯಮಣ್ಡೋ ಸದ್ಧಾಬಲಂ, ಅಸ್ಸದ್ಧಿಯಂ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ಕೋಸಜ್ಜೇ ಅಕಮ್ಪಿಯಮಣ್ಡೋ ವೀರಿಯಬಲಂ, ಕೋಸಜ್ಜಂ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ಪಮಾದೇ ಅಕಮ್ಪಿಯಮಣ್ಡೋ ಸತಿಬಲಂ, ಪಮಾದೋ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ಉದ್ಧಚ್ಚೇ ಅಕಮ್ಪಿಯಮಣ್ಡೋ ಸಮಾಧಿಬಲಂ, ಉದ್ಧಚ್ಚಂ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ಅವಿಜ್ಜಾಯ ಅಕಮ್ಪಿಯಮಣ್ಡೋ ಪಞ್ಞಾಬಲಂ, ಅವಿಜ್ಜಾ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ।
Assaddhiye akampiyamaṇḍo saddhābalaṃ, assaddhiyaṃ kasaṭo; yo tattha attharaso dhammaraso vimuttiraso – idaṃ peyyaṃ. Kosajje akampiyamaṇḍo vīriyabalaṃ, kosajjaṃ kasaṭo; yo tattha attharaso dhammaraso vimuttiraso – idaṃ peyyaṃ. Pamāde akampiyamaṇḍo satibalaṃ, pamādo kasaṭo; yo tattha attharaso dhammaraso vimuttiraso – idaṃ peyyaṃ. Uddhacce akampiyamaṇḍo samādhibalaṃ, uddhaccaṃ kasaṭo; yo tattha attharaso dhammaraso vimuttiraso – idaṃ peyyaṃ. Avijjāya akampiyamaṇḍo paññābalaṃ, avijjā kasaṭo; yo tattha attharaso dhammaraso vimuttiraso – idaṃ peyyaṃ.
ಉಪಟ್ಠಾನಮಣ್ಡೋ ಸತಿಸಮ್ಬೋಜ್ಝಙ್ಗೋ, ಪಮಾದೋ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ಪವಿಚಯಮಣ್ಡೋ ಧಮ್ಮವಿಚಯಸಮ್ಬೋಜ್ಝಙ್ಗೋ, ಅವಿಜ್ಜಾ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ಪಗ್ಗಹಮಣ್ಡೋ ವೀರಿಯಸಮ್ಬೋಜ್ಝಙ್ಗೋ, ಕೋಸಜ್ಜಂ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ಫರಣಮಣ್ಡೋ ಪೀತಿಸಮ್ಬೋಜ್ಝಙ್ಗೋ, ಪರಿಳಾಹೋ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ಉಪಸಮಮಣ್ಡೋ ಪಸ್ಸದ್ಧಿಸಮ್ಬೋಜ್ಝಙ್ಗೋ, ದುಟ್ಠುಲ್ಲಂ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ಅವಿಕ್ಖೇಪಮಣ್ಡೋ ಸಮಾಧಿಸಮ್ಬೋಜ್ಝಙ್ಗೋ, ಉದ್ಧಚ್ಚಂ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ಪಟಿಸಙ್ಖಾನಮಣ್ಡೋ ಉಪೇಕ್ಖಾಸಮ್ಬೋಜ್ಝಙ್ಗೋ, ಅಪಟಿಸಙ್ಖಾ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ।
Upaṭṭhānamaṇḍo satisambojjhaṅgo, pamādo kasaṭo; yo tattha attharaso dhammaraso vimuttiraso – idaṃ peyyaṃ. Pavicayamaṇḍo dhammavicayasambojjhaṅgo, avijjā kasaṭo; yo tattha attharaso dhammaraso vimuttiraso – idaṃ peyyaṃ. Paggahamaṇḍo vīriyasambojjhaṅgo, kosajjaṃ kasaṭo; yo tattha attharaso dhammaraso vimuttiraso – idaṃ peyyaṃ. Pharaṇamaṇḍo pītisambojjhaṅgo, pariḷāho kasaṭo; yo tattha attharaso dhammaraso vimuttiraso – idaṃ peyyaṃ. Upasamamaṇḍo passaddhisambojjhaṅgo, duṭṭhullaṃ kasaṭo; yo tattha attharaso dhammaraso vimuttiraso – idaṃ peyyaṃ. Avikkhepamaṇḍo samādhisambojjhaṅgo, uddhaccaṃ kasaṭo; yo tattha attharaso dhammaraso vimuttiraso – idaṃ peyyaṃ. Paṭisaṅkhānamaṇḍo upekkhāsambojjhaṅgo, apaṭisaṅkhā kasaṭo; yo tattha attharaso dhammaraso vimuttiraso – idaṃ peyyaṃ.
ದಸ್ಸನಮಣ್ಡೋ ಸಮ್ಮಾದಿಟ್ಠಿ, ಮಿಚ್ಛಾದಿಟ್ಠಿ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ಅಭಿನಿರೋಪನಮಣ್ಡೋ ಸಮ್ಮಾಸಙ್ಕಪ್ಪೋ, ಮಿಚ್ಛಾಸಙ್ಕಪ್ಪೋ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ಪರಿಗ್ಗಹಮಣ್ಡೋ ಸಮ್ಮಾವಾಚಾ, ಮಿಚ್ಛಾವಾಚಾ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ಸಮುಟ್ಠಾನಮಣ್ಡೋ ಸಮ್ಮಾಕಮ್ಮನ್ತೋ, ಮಿಚ್ಛಾಕಮ್ಮನ್ತೋ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ವೋದಾನಮಣ್ಡೋ ಸಮ್ಮಾಆಜೀವೋ, ಮಿಚ್ಛಾಆಜೀವೋ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ಪಗ್ಗಹಮಣ್ಡೋ ಸಮ್ಮಾವಾಯಾಮೋ, ಮಿಚ್ಛಾವಾಯಾಮೋ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ಉಪಟ್ಠಾನಮಣ್ಡೋ ಸಮ್ಮಾಸತಿ, ಮಿಚ್ಛಾಸತಿ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ। ಅವಿಕ್ಖೇಪಮಣ್ಡೋ ಸಮ್ಮಾಸಮಾಧಿ, ಮಿಚ್ಛಾಸಮಾಧಿ ಕಸಟೋ; ಯೋ ತತ್ಥ ಅತ್ಥರಸೋ ಧಮ್ಮರಸೋ ವಿಮುತ್ತಿರಸೋ – ಇದಂ ಪೇಯ್ಯಂ।
Dassanamaṇḍo sammādiṭṭhi, micchādiṭṭhi kasaṭo; yo tattha attharaso dhammaraso vimuttiraso – idaṃ peyyaṃ. Abhiniropanamaṇḍo sammāsaṅkappo, micchāsaṅkappo kasaṭo; yo tattha attharaso dhammaraso vimuttiraso – idaṃ peyyaṃ. Pariggahamaṇḍo sammāvācā, micchāvācā kasaṭo; yo tattha attharaso dhammaraso vimuttiraso – idaṃ peyyaṃ. Samuṭṭhānamaṇḍo sammākammanto, micchākammanto kasaṭo; yo tattha attharaso dhammaraso vimuttiraso – idaṃ peyyaṃ. Vodānamaṇḍo sammāājīvo, micchāājīvo kasaṭo; yo tattha attharaso dhammaraso vimuttiraso – idaṃ peyyaṃ. Paggahamaṇḍo sammāvāyāmo, micchāvāyāmo kasaṭo; yo tattha attharaso dhammaraso vimuttiraso – idaṃ peyyaṃ. Upaṭṭhānamaṇḍo sammāsati, micchāsati kasaṭo; yo tattha attharaso dhammaraso vimuttiraso – idaṃ peyyaṃ. Avikkhepamaṇḍo sammāsamādhi, micchāsamādhi kasaṭo; yo tattha attharaso dhammaraso vimuttiraso – idaṃ peyyaṃ.
ದಸ್ಸನಮಣ್ಡೋ ಸಮ್ಮಾದಿಟ್ಠಿ… ಅಭಿನಿರೋಪನಮಣ್ಡೋ ಸಮ್ಮಾಸಙ್ಕಪ್ಪೋ… ಪರಿಗ್ಗಹಮಣ್ಡೋ ಸಮ್ಮಾವಾಚಾ… ಸಮುಟ್ಠಾನಮಣ್ಡೋ ಸಮ್ಮಾಕಮ್ಮನ್ತೋ… ವೋದಾನಮಣ್ಡೋ ಸಮ್ಮಾಆಜೀವೋ… ಪಗ್ಗಹಮಣ್ಡೋ ಸಮ್ಮಾವಾಯಾಮೋ… ಉಪಟ್ಠಾನಮಣ್ಡೋ ಸಮ್ಮಾಸತಿ… ಅವಿಕ್ಖೇಪಮಣ್ಡೋ ಸಮ್ಮಾಸಮಾಧಿ।
Dassanamaṇḍo sammādiṭṭhi… abhiniropanamaṇḍo sammāsaṅkappo… pariggahamaṇḍo sammāvācā… samuṭṭhānamaṇḍo sammākammanto… vodānamaṇḍo sammāājīvo… paggahamaṇḍo sammāvāyāmo… upaṭṭhānamaṇḍo sammāsati… avikkhepamaṇḍo sammāsamādhi.
ಉಪಟ್ಠಾನಮಣ್ಡೋ ಸತಿಸಮ್ಬೋಜ್ಝಙ್ಗೋ… ಪವಿಚಯಮಣ್ಡೋ ಧಮ್ಮವಿಚಯಸಮ್ಬೋಜ್ಝಙ್ಗೋ… ಪಗ್ಗಹಮಣ್ಡೋ ವೀರಿಯಸಮ್ಬೋಜ್ಝಙ್ಗೋ… ಫರಣಮಣ್ಡೋ ಪೀತಿಸಮ್ಬೋಜ್ಝಙ್ಗೋ… ಉಪಸಮಮಣ್ಡೋ ಪಸ್ಸದ್ಧಿಸಮ್ಬೋಜ್ಝಙ್ಗೋ… ಅವಿಕ್ಖೇಪಮಣ್ಡೋ ಸಮಾಧಿಸಮ್ಬೋಜ್ಝಙ್ಗೋ… ಪಟಿಸಙ್ಖಾನಮಣ್ಡೋ ಉಪೇಕ್ಖಾಸಮ್ಬೋಜ್ಝಙ್ಗೋ।
Upaṭṭhānamaṇḍo satisambojjhaṅgo… pavicayamaṇḍo dhammavicayasambojjhaṅgo… paggahamaṇḍo vīriyasambojjhaṅgo… pharaṇamaṇḍo pītisambojjhaṅgo… upasamamaṇḍo passaddhisambojjhaṅgo… avikkhepamaṇḍo samādhisambojjhaṅgo… paṭisaṅkhānamaṇḍo upekkhāsambojjhaṅgo.
ಅಸ್ಸದ್ಧಿಯೇ ಅಕಮ್ಪಿಯಮಣ್ಡೋ ಸದ್ಧಾಬಲಂ… ಕೋಸಜ್ಜೇ ಅಕಮ್ಪಿಯಮಣ್ಡೋ ವೀರಿಯಬಲಂ… ಪಮಾದೇ ಅಕಮ್ಪಿಯಮಣ್ಡೋ ಸತಿಬಲಂ… ಉದ್ಧಚ್ಚೇ ಅಕಮ್ಪಿಯಮಣ್ಡೋ ಸಮಾಧಿಬಲಂ… ಅವಿಜ್ಜಾಯ ಅಕಮ್ಪಿಯಮಣ್ಡೋ ಪಞ್ಞಾಬಲಂ।
Assaddhiye akampiyamaṇḍo saddhābalaṃ… kosajje akampiyamaṇḍo vīriyabalaṃ… pamāde akampiyamaṇḍo satibalaṃ… uddhacce akampiyamaṇḍo samādhibalaṃ… avijjāya akampiyamaṇḍo paññābalaṃ.
ಅಧಿಮೋಕ್ಖಮಣ್ಡೋ ಸದ್ಧಿನ್ದ್ರಿಯಂ… ಪಗ್ಗಹಮಣ್ಡೋ ವೀರಿಯಿನ್ದ್ರಿಯಂ… ಉಪಟ್ಠಾನಮಣ್ಡೋ ಸತಿನ್ದ್ರಿಯಂ… ಅವಿಕ್ಖೇಪಮಣ್ಡೋ ಸಮಾಧಿನ್ದ್ರಿಯಂ… ದಸ್ಸನಮಣ್ಡೋ ಪಞ್ಞಿನ್ದ್ರಿಯಂ।
Adhimokkhamaṇḍo saddhindriyaṃ… paggahamaṇḍo vīriyindriyaṃ… upaṭṭhānamaṇḍo satindriyaṃ… avikkhepamaṇḍo samādhindriyaṃ… dassanamaṇḍo paññindriyaṃ.
ಆಧಿಪತೇಯ್ಯಟ್ಠೇನ ಇನ್ದ್ರಿಯಾ ಮಣ್ಡೋ, ಅಕಮ್ಪಿಯಟ್ಠೇನ ಬಲಾ ಮಣ್ಡೋ, ನಿಯ್ಯಾನಟ್ಠೇನ ಬೋಜ್ಝಙ್ಗಾ ಮಣ್ಡೋ, ಹೇತುಟ್ಠೇನ ಮಗ್ಗೋ ಮಣ್ಡೋ, ಉಪಟ್ಠಾನಟ್ಠೇನ ಸತಿಪಟ್ಠಾನಾ ಮಣ್ಡೋ, ಪದಹನಟ್ಠೇನ ಸಮ್ಮಪ್ಪಧಾನಾ ಮಣ್ಡೋ, ಇಜ್ಝನಟ್ಠೇನ ಇದ್ಧಿಪಾದಾ ಮಣ್ಡೋ, ತಥಟ್ಠೇನ ಸಚ್ಚಾ ಮಣ್ಡೋ, ಅವಿಕ್ಖೇಪಟ್ಠೇನ ಸಮಥೋ ಮಣ್ಡೋ, ಅನುಪಸ್ಸನಟ್ಠೇನ ವಿಪಸ್ಸನಾ ಮಣ್ಡೋ, ಏಕರಸಟ್ಠೇನ ಸಮಥವಿಪಸ್ಸನಾ ಮಣ್ಡೋ, ಅನತಿವತ್ತನಟ್ಠೇನ ಯುಗನದ್ಧಾ ಮಣ್ಡೋ, ಸಂವರಟ್ಠೇನ ಸೀಲವಿಸುದ್ಧಿ ಮಣ್ಡೋ, ಅವಿಕ್ಖೇಪಟ್ಠೇನ ಚಿತ್ತವಿಸುದ್ಧಿ ಮಣ್ಡೋ, ದಸ್ಸನಟ್ಠೇನ ದಿಟ್ಠಿವಿಸುದ್ಧಿ ಮಣ್ಡೋ, ಮುತ್ತಟ್ಠೇನ ವಿಮೋಕ್ಖೋ ಮಣ್ಡೋ, ಪಟಿವೇಧಟ್ಠೇನ ವಿಜ್ಜಾ ಮಣ್ಡೋ, ಪರಿಚ್ಚಾಗಟ್ಠೇನ ವಿಮುತ್ತಿ ಮಣ್ಡೋ, ಸಮುಚ್ಛೇದಟ್ಠೇನ ಖಯೇ ಞಾಣಂ ಮಣ್ಡೋ, ಪಟಿಪ್ಪಸ್ಸದ್ಧಟ್ಠೇನ ಅನುಪ್ಪಾದೇ ಞಾಣಂ ಮಣ್ಡೋ, ಛನ್ದೋ ಮೂಲಟ್ಠೇನ ಮಣ್ಡೋ, ಮನಸಿಕಾರೋ ಸಮುಟ್ಠಾನಟ್ಠೇನ ಮಣ್ಡೋ, ಫಸ್ಸೋ ಸಮೋಧಾನಟ್ಠೇನ ಮಣ್ಡೋ, ವೇದನಾ ಸಮೋಸರಣಟ್ಠೇನ ಮಣ್ಡೋ, ಸಮಾಧಿ ಪಮುಖಟ್ಠೇನ ಮಣ್ಡೋ, ಸತಿ ಆಧಿಪತೇಯ್ಯಟ್ಠೇನ ಮಣ್ಡೋ, ಪಞ್ಞಾ ತತುತ್ತರಟ್ಠೇನ ಮಣ್ಡೋ, ವಿಮುತ್ತಿ ಸಾರಟ್ಠೇನ ಮಣ್ಡೋ, ಅಮತೋಗಧಂ ನಿಬ್ಬಾನಂ ಪರಿಯೋಸಾನಟ್ಠೇನ ಮಣ್ಡೋತಿ।
Ādhipateyyaṭṭhena indriyā maṇḍo, akampiyaṭṭhena balā maṇḍo, niyyānaṭṭhena bojjhaṅgā maṇḍo, hetuṭṭhena maggo maṇḍo, upaṭṭhānaṭṭhena satipaṭṭhānā maṇḍo, padahanaṭṭhena sammappadhānā maṇḍo, ijjhanaṭṭhena iddhipādā maṇḍo, tathaṭṭhena saccā maṇḍo, avikkhepaṭṭhena samatho maṇḍo, anupassanaṭṭhena vipassanā maṇḍo, ekarasaṭṭhena samathavipassanā maṇḍo, anativattanaṭṭhena yuganaddhā maṇḍo, saṃvaraṭṭhena sīlavisuddhi maṇḍo, avikkhepaṭṭhena cittavisuddhi maṇḍo, dassanaṭṭhena diṭṭhivisuddhi maṇḍo, muttaṭṭhena vimokkho maṇḍo, paṭivedhaṭṭhena vijjā maṇḍo, pariccāgaṭṭhena vimutti maṇḍo, samucchedaṭṭhena khaye ñāṇaṃ maṇḍo, paṭippassaddhaṭṭhena anuppāde ñāṇaṃ maṇḍo, chando mūlaṭṭhena maṇḍo, manasikāro samuṭṭhānaṭṭhena maṇḍo, phasso samodhānaṭṭhena maṇḍo, vedanā samosaraṇaṭṭhena maṇḍo, samādhi pamukhaṭṭhena maṇḍo, sati ādhipateyyaṭṭhena maṇḍo, paññā tatuttaraṭṭhena maṇḍo, vimutti sāraṭṭhena maṇḍo, amatogadhaṃ nibbānaṃ pariyosānaṭṭhena maṇḍoti.
ಚತುತ್ಥಭಾಣವಾರೋ।
Catutthabhāṇavāro.
ಮಣ್ಡಪೇಯ್ಯಕಥಾ ನಿಟ್ಠಿತಾ।
Maṇḍapeyyakathā niṭṭhitā.
ಮಹಾವಗ್ಗೋ ಪಠಮೋ।
Mahāvaggo paṭhamo.
ತಸ್ಸುದ್ದಾನಂ –
Tassuddānaṃ –
ಞಾಣದಿಟ್ಠೀ ಚ ಅಸ್ಸಾಸಾ, ಇನ್ದ್ರಿಯಂ ವಿಮೋಕ್ಖಪಞ್ಚಮಾ।
Ñāṇadiṭṭhī ca assāsā, indriyaṃ vimokkhapañcamā;
ಗತಿಕಮ್ಮವಿಪಲ್ಲಾಸಾ, ಮಗ್ಗೋ ಮಣ್ಡೇನ ತೇ ದಸಾತಿ॥
Gatikammavipallāsā, maggo maṇḍena te dasāti.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಪಟಿಸಮ್ಭಿದಾಮಗ್ಗ-ಅಟ್ಠಕಥಾ • Paṭisambhidāmagga-aṭṭhakathā / ಮಣ್ಡಪೇಯ್ಯಕಥಾವಣ್ಣನಾ • Maṇḍapeyyakathāvaṇṇanā
