| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
10. மண்ட³பெய்யகதா²
10. Maṇḍapeyyakathā
மண்ட³பெய்யகதா²வண்ணனா
Maṇḍapeyyakathāvaṇṇanā
238. இதா³னி தஸ்ஸ மக்³க³ஸ்ஸ மண்ட³பெய்யத்தங் த³ஸ்ஸெந்தேன கதி²தாய ப⁴க³வதோ வசனேகதே³ஸபுப்³ப³ங்க³மாய மண்ட³பெய்யகதா²ய அபுப்³ப³த்தா²னுவண்ணனா. தத்த² மண்ட³பெய்யந்தி யதா² ஸம்பன்னங் நிம்மலங் விப்பஸன்னங் ஸப்பி ஸப்பிமண்டோ³தி வுச்சதி, ஏவங் விப்பஸன்னட்டே²ன மண்டோ³, பாதப்³ப³ட்டே²ன பெய்யங். யஞ்ஹி பிவித்வா அந்தரவீதி²யங் பதிதா விஸஞ்ஞினோ அத்தனோ ஸாடகாதீ³னம்பி அஸ்ஸாமிகா ஹொந்தி, தங் பஸன்னம்பி ந பாதப்³ப³ங். மய்ஹங் பன இத³ங் ஸிக்க²த்தயஸங்க³ஹிதங் ஸாஸனப்³ரஹ்மசரியங் ஸம்பன்னத்தா நிம்மலத்தா விப்பஸன்னத்தா மண்ட³ஞ்ச ஹிதஸுகா²வஹத்தா பெய்யஞ்சாதி மண்ட³பெய்யந்தி தீ³பேதி. மண்டோ³ பெய்யோ எத்தா²தி மண்ட³பெய்யங். கிங் தங்? ஸாஸனப்³ரஹ்மசரியங். கஸ்மா ஸிக்க²த்தயங் ப்³ரஹ்மசரியங் நாம? உத்தமட்டே²ன நிப்³பா³னங் ப்³ரஹ்மங் நாம, ஸிக்க²த்தயங் நிப்³பா³னத்தா²ய பவத்தனதோ ப்³ரஹ்மத்தா²ய சரியாதி ப்³ரஹ்மசரியந்தி வுச்சதி. ஸாஸனப்³ரஹ்மசரியந்தி தங்யேவ. ஸத்தா² ஸம்முகீ²பூ⁴தோதி இத³மெத்த² காரணவசனங். யஸ்மா பன ஸத்தா² ஸம்முகீ²பூ⁴தோ, தஸ்மா வீரியபயோக³ங் கத்வா பிவதே²தங் மண்ட³ங். பா³ஹிரகஞ்ஹி பே⁴ஸஜ்ஜமண்ட³ங் வேஜ்ஜஸ்ஸ அஸம்முகா² பிவந்தானங் பமாணங் வா உக்³க³மனநிக்³க³மனங் வா ந ஜானாமாதி ஆஸங்கா ஹோதி. வேஜ்ஜஸ்ஸ ஸம்முகா² பன வேஜ்ஜோ ஜானிஸ்ஸதீதி நிராஸங்கா பிவந்தி. ஏவமேவங் அம்ஹாகஞ்ச த⁴ம்மஸ்ஸாமீ ஸத்தா² ஸம்முகீ²பூ⁴தோதி வீரியங் கத்வா பிவதா²தி மண்ட³பானே ஸன்னியோஜேதி. தி³ட்ட²த⁴ம்மிகஸம்பராயிகபரமத்தே²ஹி யதா²ரஹங் அனுஸாஸதீதி ஸத்தா². அபிச ‘‘ஸத்தா² ப⁴க³வா ஸத்த²வாஹோ’’திஆதி³னா (மஹானி॰ 190) நித்³தே³ஸனயேனபெத்த² அத்தோ² வேதி³தப்³போ³. ஸந்தி³ஸ்ஸமானோ முகோ² பூ⁴தோதி ஸம்முகீ²பூ⁴தோ.
238. Idāni tassa maggassa maṇḍapeyyattaṃ dassentena kathitāya bhagavato vacanekadesapubbaṅgamāya maṇḍapeyyakathāya apubbatthānuvaṇṇanā. Tattha maṇḍapeyyanti yathā sampannaṃ nimmalaṃ vippasannaṃ sappi sappimaṇḍoti vuccati, evaṃ vippasannaṭṭhena maṇḍo, pātabbaṭṭhena peyyaṃ. Yañhi pivitvā antaravīthiyaṃ patitā visaññino attano sāṭakādīnampi assāmikā honti, taṃ pasannampi na pātabbaṃ. Mayhaṃ pana idaṃ sikkhattayasaṅgahitaṃ sāsanabrahmacariyaṃ sampannattā nimmalattā vippasannattā maṇḍañca hitasukhāvahattā peyyañcāti maṇḍapeyyanti dīpeti. Maṇḍo peyyo etthāti maṇḍapeyyaṃ. Kiṃ taṃ? Sāsanabrahmacariyaṃ. Kasmā sikkhattayaṃ brahmacariyaṃ nāma? Uttamaṭṭhena nibbānaṃ brahmaṃ nāma, sikkhattayaṃ nibbānatthāya pavattanato brahmatthāya cariyāti brahmacariyanti vuccati. Sāsanabrahmacariyanti taṃyeva. Satthāsammukhībhūtoti idamettha kāraṇavacanaṃ. Yasmā pana satthā sammukhībhūto, tasmā vīriyapayogaṃ katvā pivathetaṃ maṇḍaṃ. Bāhirakañhi bhesajjamaṇḍaṃ vejjassa asammukhā pivantānaṃ pamāṇaṃ vā uggamananiggamanaṃ vā na jānāmāti āsaṅkā hoti. Vejjassa sammukhā pana vejjo jānissatīti nirāsaṅkā pivanti. Evamevaṃ amhākañca dhammassāmī satthā sammukhībhūtoti vīriyaṃ katvā pivathāti maṇḍapāne sanniyojeti. Diṭṭhadhammikasamparāyikaparamatthehi yathārahaṃ anusāsatīti satthā. Apica ‘‘satthā bhagavā satthavāho’’tiādinā (mahāni. 190) niddesanayenapettha attho veditabbo. Sandissamāno mukho bhūtoti sammukhībhūto.
மண்ட³பெய்யனித்³தே³ஸே தித⁴த்தமண்டோ³தி திதா⁴பா⁴வோ தித⁴த்தங். தித⁴த்தேன மண்டோ³ தித⁴த்தமண்டோ³, திவிதே⁴ன மண்டோ³தி அத்தோ². ஸத்த²ரி ஸம்முகீ²பூ⁴தேதி இத³ங் ஸப்³பா³காரபரிபுண்ணமண்ட³த்தயத³ஸ்ஸனத்த²ங் வுத்தங். பரினிப்³பு³தேபி பன ஸத்த²ரி ஏகதே³ஸேன மண்ட³த்தயங் பவத்ததியேவ. தேனேவ சஸ்ஸ நித்³தே³ஸே ‘‘ஸத்த²ரி ஸம்முகீ²பூ⁴தே’’தி அவத்வா கதமோ தே³ஸனாமண்டோ³திஆதி³ வுத்தந்தி வேதி³தப்³ப³ங்.
Maṇḍapeyyaniddese tidhattamaṇḍoti tidhābhāvo tidhattaṃ. Tidhattena maṇḍo tidhattamaṇḍo, tividhena maṇḍoti attho. Satthari sammukhībhūteti idaṃ sabbākāraparipuṇṇamaṇḍattayadassanatthaṃ vuttaṃ. Parinibbutepi pana satthari ekadesena maṇḍattayaṃ pavattatiyeva. Teneva cassa niddese ‘‘satthari sammukhībhūte’’ti avatvā katamo desanāmaṇḍotiādi vuttanti veditabbaṃ.
தே³ஸனாமண்டோ³தி த⁴ம்மதே³ஸனா ஏவ மண்டோ³. படிக்³க³ஹமண்டோ³தி தே³ஸனாபடிக்³கா³ஹகோ ஏவ மண்டோ³. ப்³ரஹ்மசரியமண்டோ³தி மக்³க³ப்³ரஹ்மசரியமேவ மண்டோ³.
Desanāmaṇḍoti dhammadesanā eva maṇḍo. Paṭiggahamaṇḍoti desanāpaṭiggāhako eva maṇḍo. Brahmacariyamaṇḍoti maggabrahmacariyameva maṇḍo.
ஆசிக்க²னாதி தே³ஸேதப்³பா³னங் ஸச்சாதீ³னங் இமானி நாமானீதி நாமவஸேன கத²னா. தே³ஸனாதி த³ஸ்ஸனா. பஞ்ஞாபனாதி ஜானாபனா, ஞாணமுகே² ட²பனா வா. ஆஸனங் ட²பெந்தோ ஹி ‘‘ஆஸனங் பஞ்ஞாபேதீ’’தி வுச்சதி. பட்ட²பனாதி பஞ்ஞாபனா, பவத்தனாதி அத்தோ², ஞாணமுகே² ட²பனா வா. விவரணாதி விவடகரணங், விவரித்வா த³ஸ்ஸனாதி அத்தோ². விப⁴ஜனாதி விபா⁴க³கிரியா, விபா⁴க³தோ த³ஸ்ஸனாதி அத்தோ². உத்தானீகம்மந்தி பாகடபா⁴வகரணங். அத² வா ஆசிக்க²னாதி தே³ஸனாதீ³னங் ச²ன்னங் பதா³னங் மூலபத³ங். தே³ஸனாதீ³னி ச² பதா³னி தஸ்ஸ அத்த²விவரணத்த²ங் வுத்தானி. தத்த² தே³ஸனாதி உக்³க⁴டிதஞ்ஞூனங் வஸேன ஸங்கே²பதோ பட²மங் உத்³தே³ஸவஸேன தே³ஸனா. உக்³க⁴டிதஞ்ஞூ ஹி ஸங்கே²பேன வுத்தங் பட²மங் வுத்தஞ்ச படிவிஜ்ஜ²ந்தி. பஞ்ஞாபனாதி விபஞ்சிதஞ்ஞூனங் வஸேன தேஸங் சித்ததோஸனேன பு³த்³தி⁴னிஸானேன ச பட²மங் ஸங்கி²த்தஸ்ஸ வித்தா²ரதோ நித்³தே³ஸவஸேன பஞ்ஞாபனா. பட்ட²பனாதி தேஸங்யேவ நித்³தி³ட்ட²ஸ்ஸ நித்³தே³ஸஸ்ஸ படினித்³தே³ஸவஸேன வித்தா²ரதரவசனேன பஞ்ஞாபனா. விவரணாதி நித்³தி³ட்ட²ஸ்ஸாபி புனப்புனங் வசனேன விவரணா. விப⁴ஜனாதி புனப்புனங் வுத்தஸ்ஸாபி விபா⁴க³கரணேன விப⁴ஜனா. உத்தானீகம்மந்தி விவடஸ்ஸ வித்தா²ரதரவசனேன, விப⁴த்தஸ்ஸ ச நித³ஸ்ஸனவசனேன உத்தானீகரணங். அயங் தே³ஸனா நெய்யானம்பி படிவேதா⁴ய ஹோதி. யேவாபனஞ்ஞேபி கேசீதி பியங்கரமாதாதி³கா வினிபாதிகா க³ஹிதா. விஞ்ஞாதாரோதி படிவேத⁴வஸேன லோகுத்தரத⁴ம்மங் விஞ்ஞாதாரோ. ஏதே ஹி பி⁴க்கு²ஆத³யோ படிவேத⁴வஸேன த⁴ம்மதே³ஸனங் படிக்³க³ண்ஹந்தீதி படிக்³க³ஹா. அயமேவாதிஆதீ³னி பட²மஞாணனித்³தே³ஸே வுத்தத்தா²னி. அரியமக்³கோ³ நிப்³பா³னேன ஸங்ஸந்த³னதோ ப்³ரஹ்மத்தா²ய சரியாதி ப்³ரஹ்மசரியந்தி வுச்சதி.
Ācikkhanāti desetabbānaṃ saccādīnaṃ imāni nāmānīti nāmavasena kathanā. Desanāti dassanā. Paññāpanāti jānāpanā, ñāṇamukhe ṭhapanā vā. Āsanaṃ ṭhapento hi ‘‘āsanaṃ paññāpetī’’ti vuccati. Paṭṭhapanāti paññāpanā, pavattanāti attho, ñāṇamukhe ṭhapanā vā. Vivaraṇāti vivaṭakaraṇaṃ, vivaritvā dassanāti attho. Vibhajanāti vibhāgakiriyā, vibhāgato dassanāti attho. Uttānīkammanti pākaṭabhāvakaraṇaṃ. Atha vā ācikkhanāti desanādīnaṃ channaṃ padānaṃ mūlapadaṃ. Desanādīni cha padāni tassa atthavivaraṇatthaṃ vuttāni. Tattha desanāti ugghaṭitaññūnaṃ vasena saṅkhepato paṭhamaṃ uddesavasena desanā. Ugghaṭitaññū hi saṅkhepena vuttaṃ paṭhamaṃ vuttañca paṭivijjhanti. Paññāpanāti vipañcitaññūnaṃ vasena tesaṃ cittatosanena buddhinisānena ca paṭhamaṃ saṅkhittassa vitthārato niddesavasena paññāpanā. Paṭṭhapanāti tesaṃyeva niddiṭṭhassa niddesassa paṭiniddesavasena vitthārataravacanena paññāpanā. Vivaraṇāti niddiṭṭhassāpi punappunaṃ vacanena vivaraṇā. Vibhajanāti punappunaṃ vuttassāpi vibhāgakaraṇena vibhajanā. Uttānīkammanti vivaṭassa vitthārataravacanena, vibhattassa ca nidassanavacanena uttānīkaraṇaṃ. Ayaṃ desanā neyyānampi paṭivedhāya hoti. Yevāpanaññepi kecīti piyaṅkaramātādikā vinipātikā gahitā. Viññātāroti paṭivedhavasena lokuttaradhammaṃ viññātāro. Ete hi bhikkhuādayo paṭivedhavasena dhammadesanaṃ paṭiggaṇhantīti paṭiggahā. Ayamevātiādīni paṭhamañāṇaniddese vuttatthāni. Ariyamaggo nibbānena saṃsandanato brahmatthāya cariyāti brahmacariyanti vuccati.
239. இதா³னி அதி⁴மொக்க²மண்டோ³திஆதீ³ஹி தஸ்மிங் மக்³க³க்க²ணே விஜ்ஜமானானி இந்த்³ரியப³லபொ³ஜ்ஜ²ங்க³மக்³க³ங்கா³னி மண்ட³பெய்யவிதா⁴னே யோஜெத்வா த³ஸ்ஸேதி. தத்த² அதி⁴மொக்க²மண்டோ³தி அதி⁴மொக்க²ஸங்கா²தோ மண்டோ³. கஸடோதி பஸாத³விரஹிதோ ஆவிலோ. ச²ட்³டெ³த்வாதி ஸமுச்சே²த³வஸேன பஹாய. ஸத்³தி⁴ந்த்³ரியஸ்ஸ அதி⁴மொக்க²மண்ட³ங் பிவதீதி மண்ட³பெய்யந்தி ஸத்³தி⁴ந்த்³ரியதோ அதி⁴மொக்க²மண்ட³ஸ்ஸ அனஞ்ஞத்தேபி ஸதி அஞ்ஞங் விய கத்வா வோஹாரவஸேன வுச்சதி, யதா² லோகே நிஸத³போதகோ நிஸத³போதஸரீரஸ்ஸ அனஞ்ஞத்தேபி ஸதி நிஸத³போதஸ்ஸ ஸரீரந்தி வுச்சதி, யதா² ச பாளியங் ‘‘பு²ஸிதத்த’’ந்திஆதீ³ஸு த⁴ம்மதோ அனஞ்ஞோபி பா⁴வோ அஞ்ஞோ விய வுத்தோ, யதா² ச அட்ட²கதா²யங் ‘‘பு²ஸனலக்க²ணோ ப²ஸ்ஸோ’’திஆதீ³ஸு (த⁴॰ ஸ॰ அட்ட²॰ 1 த⁴ம்முத்³தே³ஸவார ப²ஸ்ஸபஞ்சமகராஸிவண்ணனா) த⁴ம்மதோ அனஞ்ஞம்பி லக்க²ணங் அஞ்ஞங் விய வுத்தங், ஏவமித³ந்தி வேதி³தப்³ப³ங் . பிவதீதி செத்த² தங்ஸமங்கி³புக்³க³லோதி வுத்தங் ஹோதி. தங்ஸமங்கி³புக்³க³லோ தங் மண்ட³ங் பிவதீதி கத்வா தேன புக்³க³லேன ஸோ மண்டோ³ பாதப்³ப³தோ மண்ட³பெய்யங் நாம ஹோதீதி வுத்தங் ஹோதி. ‘‘மண்ட³பெய்யோ’’தி ச வத்தப்³பே³ ‘‘மண்ட³பெய்ய’’ந்தி லிங்க³விபல்லாஸோ கதோ. ஸேஸானம்பி இமினா நயேன அத்தோ² வேதி³தப்³போ³. அபுப்³பே³ஸு பன பரிளாஹோதி பீணனலக்க²ணாய பீதியா படிபக்கோ² கிலேஸஸந்தாபோ. து³ட்டு²ல்லந்தி உபஸமபடிபக்கோ² கிலேஸவஸேன ஓளாரிகபா⁴வோ அஸந்தபா⁴வோ. அப்படிஸங்கா²தி படிஸங்கா²னபடிபக்கோ² கிலேஸவஸேன அஸமவாஹிதபா⁴வோ.
239. Idāni adhimokkhamaṇḍotiādīhi tasmiṃ maggakkhaṇe vijjamānāni indriyabalabojjhaṅgamaggaṅgāni maṇḍapeyyavidhāne yojetvā dasseti. Tattha adhimokkhamaṇḍoti adhimokkhasaṅkhāto maṇḍo. Kasaṭoti pasādavirahito āvilo. Chaḍḍetvāti samucchedavasena pahāya. Saddhindriyassa adhimokkhamaṇḍaṃ pivatīti maṇḍapeyyanti saddhindriyato adhimokkhamaṇḍassa anaññattepi sati aññaṃ viya katvā vohāravasena vuccati, yathā loke nisadapotako nisadapotasarīrassa anaññattepi sati nisadapotassa sarīranti vuccati, yathā ca pāḷiyaṃ ‘‘phusitatta’’ntiādīsu dhammato anaññopi bhāvo añño viya vutto, yathā ca aṭṭhakathāyaṃ ‘‘phusanalakkhaṇo phasso’’tiādīsu (dha. sa. aṭṭha. 1 dhammuddesavāra phassapañcamakarāsivaṇṇanā) dhammato anaññampi lakkhaṇaṃ aññaṃ viya vuttaṃ, evamidanti veditabbaṃ . Pivatīti cettha taṃsamaṅgipuggaloti vuttaṃ hoti. Taṃsamaṅgipuggalo taṃ maṇḍaṃ pivatīti katvā tena puggalena so maṇḍo pātabbato maṇḍapeyyaṃ nāma hotīti vuttaṃ hoti. ‘‘Maṇḍapeyyo’’ti ca vattabbe ‘‘maṇḍapeyya’’nti liṅgavipallāso kato. Sesānampi iminā nayena attho veditabbo. Apubbesu pana pariḷāhoti pīṇanalakkhaṇāya pītiyā paṭipakkho kilesasantāpo. Duṭṭhullanti upasamapaṭipakkho kilesavasena oḷārikabhāvo asantabhāvo. Appaṭisaṅkhāti paṭisaṅkhānapaṭipakkho kilesavasena asamavāhitabhāvo.
240. புன அஞ்ஞேன பரியாயேன மண்ட³பெய்யவிதி⁴ங் நித்³தி³ஸிதுகாமோ அத்தி² மண்டோ³திஆதி³மாஹ. தத்த² தத்தா²தி தஸ்மிங் ஸத்³தி⁴ந்த்³ரியே. அத்த²ரஸோதிஆதீ³ஸு ஸத்³தி⁴ந்த்³ரியஸ்ஸ அதி⁴முச்சனங் அத்தோ², ஸத்³தி⁴ந்த்³ரியங் த⁴ம்மோ, ததே³வ நானாகிலேஸேஹி விமுத்தத்தா விமுத்தி, தஸ்ஸ அத்த²ஸ்ஸ ஸம்பத்தி அத்த²ரஸோ. தஸ்ஸ த⁴ம்மஸ்ஸ ஸம்பத்தி த⁴ம்மரஸோ. தஸ்ஸா விமுத்தியா ஸம்பத்தி விமுத்திரஸோ. அத² வா அத்த²படிலாப⁴ரதி அத்த²ரஸோ, த⁴ம்மபடிலாப⁴ரதி த⁴ம்மரஸோ, விமுத்திபடிலாப⁴ரதி விமுத்திரஸோ. ரதீதி ச தங்ஸம்பயுத்தா, ததா³ரம்மணா வா பீதி. இமினா நயேன ஸேஸபதே³ஸுபி அத்தோ² வேதி³தப்³போ³. இமஸ்மிங் பரியாயே மண்ட³ஸ்ஸ பெய்யங் மண்ட³பெய்யந்தி அத்தோ² வுத்தோ ஹோதி.
240. Puna aññena pariyāyena maṇḍapeyyavidhiṃ niddisitukāmo atthi maṇḍotiādimāha. Tattha tatthāti tasmiṃ saddhindriye. Attharasotiādīsu saddhindriyassa adhimuccanaṃ attho, saddhindriyaṃ dhammo, tadeva nānākilesehi vimuttattā vimutti, tassa atthassa sampatti attharaso. Tassa dhammassa sampatti dhammaraso. Tassā vimuttiyā sampatti vimuttiraso. Atha vā atthapaṭilābharati attharaso, dhammapaṭilābharati dhammaraso, vimuttipaṭilābharati vimuttiraso. Ratīti ca taṃsampayuttā, tadārammaṇā vā pīti. Iminā nayena sesapadesupi attho veditabbo. Imasmiṃ pariyāye maṇḍassa peyyaṃ maṇḍapeyyanti attho vutto hoti.
ஏவங் இந்த்³ரியாதி³போ³தி⁴பக்கி²யத⁴ம்மபடிபாடியா இந்த்³ரியப³லபொ³ஜ்ஜ²ங்க³மக்³க³ங்கா³னங் வஸேன மண்ட³பெய்யங் த³ஸ்ஸெத்வா புன அந்தே டி²தங் ப்³ரஹ்மசரியமண்ட³ங் த³ஸ்ஸெந்தோ மக்³க³ஸ்ஸ பதா⁴னத்தா மக்³க³ங் புப்³ப³ங்க³மங் கத்வா உப்படிபாடிவஸேன மக்³க³ங்க³பொ³ஜ்ஜ²ங்க³ப³லஇந்த்³ரியானி த³ஸ்ஸேஸி . ஆதி⁴பதெய்யட்டே²ன இந்த்³ரியா மண்டோ³திஆத³யோ யதா²யோக³ங் லோகியலோகுத்தரா மண்டா³. தங் ஹெட்டா² வுத்தனயேன வேதி³தப்³ப³ங். தத²ட்டே²ன ஸச்சா மண்டோ³தி எத்த² பன து³க்க²ஸமுத³யானங் மண்ட³த்தாபா⁴வா மஹாஹத்தி²பத³ஸுத்தே (ம॰ நி॰ 1.300) விய ஸச்சஞாணானி ஸச்சாதி வுத்தந்தி வேதி³தப்³ப³ங்.
Evaṃ indriyādibodhipakkhiyadhammapaṭipāṭiyā indriyabalabojjhaṅgamaggaṅgānaṃ vasena maṇḍapeyyaṃ dassetvā puna ante ṭhitaṃ brahmacariyamaṇḍaṃ dassento maggassa padhānattā maggaṃ pubbaṅgamaṃ katvā uppaṭipāṭivasena maggaṅgabojjhaṅgabalaindriyāni dassesi . Ādhipateyyaṭṭhena indriyā maṇḍotiādayo yathāyogaṃ lokiyalokuttarā maṇḍā. Taṃ heṭṭhā vuttanayena veditabbaṃ. Tathaṭṭhena saccā maṇḍoti ettha pana dukkhasamudayānaṃ maṇḍattābhāvā mahāhatthipadasutte (ma. ni. 1.300) viya saccañāṇāni saccāti vuttanti veditabbaṃ.
ஸத்³த⁴ம்மப்பகாஸினியா படிஸம்பி⁴தா³மக்³க³-அட்ட²கதா²ய
Saddhammappakāsiniyā paṭisambhidāmagga-aṭṭhakathāya
மண்ட³பெய்யகதா²வண்ணனா நிட்டி²தா.
Maṇḍapeyyakathāvaṇṇanā niṭṭhitā.
நிட்டி²தா ச மஹாவக்³க³வண்ணனா.
Niṭṭhitā ca mahāvaggavaṇṇanā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 10. மண்ட³பெய்யகதா² • 10. Maṇḍapeyyakathā
