| Library / Tipiṭaka / д̇ибидага • Tipiṭaka / вимаанавад̇т̇у-адтагат̇аа • Vimānavatthu-aṭṭhakathā |
2. бурисавимаанам̣
2. Purisavimānaṃ
5. махаарат̇аваг̇г̇о
5. Mahārathavaggo
1. ман̣д̣уугад̣̇звабуд̇д̇авимаанаван̣н̣анаа
1. Maṇḍūkadevaputtavimānavaṇṇanā
махаарат̇аваг̇г̇з го мз ванд̣̇ад̇и баад̣̇аанийд̇и ман̣д̣уугад̣̇звабуд̇д̇авимаанам̣. д̇асса гаа уббад̇д̇и? бхаг̇аваа жамбааяам̣ вихарад̇и г̇аг̇г̇арааяа богкаран̣ияаа д̇ийрз. со бажжуусавзлааяам̣ б̣уд̣̇д̇хаажин̣н̣ам̣ махаагарун̣аасамаабад̇д̇им̣ самаабаж̇ж̇ид̇ваа д̇ад̇о вудтааяа взнзяяаб̣анд̇хавз сад̇д̇з вологзнд̇о ад̣̇д̣̇аса ‘‘аж̇ж̇а маяи сааяанхасамаяз д̇хаммам̣ д̣̇зсзнд̇з зго ман̣д̣ууго мама сарз нимид̇д̇ам̣ г̇ан̣ханд̇о баруубаггамзна марид̇ваа д̣̇звалогз ниб̣б̣ад̇д̇ид̇ваа махад̇аа д̣̇звабариваарзна махааж̇анасса бассанд̇ассзва ааг̇амиссад̇и, д̇ад̇т̇а б̣ахуунам̣ д̇хаммаабхисамаяо бхависсад̇ий’’д̇и д̣̇исваа буб̣б̣ан̣хасамаяам̣ ниваасзд̇ваа бад̇д̇ажийварамаад̣̇ааяа махад̇аа бхигкусан̇гхзна сад̣̇д̇хим̣ жамбаанаг̇арам̣ бин̣д̣ааяа бависид̇ваа, бхигкуунам̣ сулабхабин̣д̣абаад̇ам̣ гад̇ваа гад̇абхад̇д̇агижжо вихаарам̣ бависид̇ваа бхигкуусу вад̇д̇ам̣ д̣̇ассзд̇ваа, ад̇д̇ано ад̇д̇ано д̣̇иваадтаанам̣ г̇ад̇зсу г̇анд̇хагудим̣ бависид̇ваа паласамаабад̇д̇исукзна д̣̇ивасабхааг̇ам̣ кзбзд̇ваа, сааяанхасамаяз жад̇уусу барисаасу саннибад̇ид̇аасу сурабхиг̇анд̇хагудид̇о нигкамид̇ваа д̇ан̇кан̣аануруубзна баадихаариязна богкаран̣ид̇ийрз д̇хаммасабхааман̣д̣абам̣ бависид̇ваа алан̇гад̇авараб̣уд̣̇д̇хаасанз нисинно маносилаад̇алз сийханаад̣̇ам̣ над̣̇анд̇о ачамбхийд̇агзсарасийхо вияа адтан̇г̇асаманнааг̇ад̇ам̣ б̣рахмассарам̣ нижчаарзнд̇о ажинд̇зяязна б̣уд̣̇д̇хаанубхаавзна анубамааяа б̣уд̣̇д̇халийлааяа д̇хаммам̣ д̣̇зсзд̇ум̣ аарабхи.
Mahārathavagge ko me vandati pādānīti maṇḍūkadevaputtavimānaṃ. Tassa kā uppatti? Bhagavā campāyaṃ viharati gaggarāya pokkharaṇiyā tīre. So paccūsavelāyaṃ buddhāciṇṇaṃ mahākaruṇāsamāpattiṃ samāpajjitvā tato vuṭṭhāya veneyyabandhave satte volokento addasa ‘‘ajja mayi sāyanhasamaye dhammaṃ desente eko maṇḍūko mama sare nimittaṃ gaṇhanto parūpakkamena maritvā devaloke nibbattitvā mahatā devaparivārena mahājanassa passantasseva āgamissati, tattha bahūnaṃ dhammābhisamayo bhavissatī’’ti disvā pubbaṇhasamayaṃ nivāsetvā pattacīvaramādāya mahatā bhikkhusaṅghena saddhiṃ campānagaraṃ piṇḍāya pavisitvā, bhikkhūnaṃ sulabhapiṇḍapātaṃ katvā katabhattakicco vihāraṃ pavisitvā bhikkhūsu vattaṃ dassetvā, attano attano divāṭṭhānaṃ gatesu gandhakuṭiṃ pavisitvā phalasamāpattisukhena divasabhāgaṃ khepetvā, sāyanhasamaye catūsu parisāsu sannipatitāsu surabhigandhakuṭito nikkhamitvā taṅkhaṇānurūpena pāṭihāriyena pokkharaṇitīre dhammasabhāmaṇḍapaṃ pavisitvā alaṅkatavarabuddhāsane nisinno manosilātale sīhanādaṃ nadanto achambhītakesarasīho viya aṭṭhaṅgasamannāgataṃ brahmassaraṃ nicchārento acinteyyena buddhānubhāvena anupamāya buddhalīlāya dhammaṃ desetuṃ ārabhi.
д̇асмин̃жа кан̣з зго ман̣д̣ууго богкаран̣ид̇о ааг̇анд̇ваа ‘‘д̇хаммо зсо вужжад̇ий’’д̇и д̇хаммасан̃н̃ааяа сарз нимид̇д̇ам̣ г̇ан̣ханд̇о барисабарияанд̇з нибаж̇ж̇и. ат̇зго важчабаало д̇ам̣ бад̣̇зсам̣ ааг̇ад̇о сад̇т̇аарам̣ д̇хаммам̣ д̣̇зсзнд̇ам̣ барисан̃жа барамзна убасамзна д̇хаммам̣ сун̣анд̇ам̣ д̣̇исваа д̇аг̇г̇ад̇амаанасо д̣̇ан̣д̣амолуб̣бха д̇идтанд̇о ман̣д̣уугам̣ анологзд̇ваа д̇асса сийсз саннирумбхид̇ваа адтааси. со д̇хаммасан̃н̃ааяа басаннажид̇д̇о д̇аавад̣̇зва гаалам̣ гад̇ваа д̇аавад̇им̣сабхаванз д̣̇ваад̣̇асаяож̇анигз ганагавимаанз ниб̣б̣ад̇д̇ид̇ваа суд̇д̇аббаб̣уд̣̇д̇хо вияа д̇ад̇т̇а ажчараасан̇гхабаривуд̇ам̣ ад̇д̇аанам̣ д̣̇исваа ‘‘гуд̇о ну ко ид̇ха ахам̣ ниб̣б̣ад̇д̇о’’д̇и ааваж̇ж̇знд̇о буримаж̇аад̇им̣ д̣̇исваа ‘‘ахамби наама ид̇ха уббаж̇ж̇им̣, ийд̣̇исан̃жа самбад̇д̇им̣ бадилабхим̣, гим̣ ну ко гаммам̣ агааси’’нд̇и убад̇хаарзнд̇о ан̃н̃ам̣ на ад̣̇д̣̇аса ан̃н̃ад̇ра бхаг̇авад̇о сарз нимид̇д̇аг̇г̇аахаа. со д̇аавад̣̇зва саха вимаанзна ааг̇анд̇ваа вимаанад̇о од̇арид̇ваа, махааж̇анасса бассанд̇ассзва махад̇аа бариваарзна маханд̇зна д̣̇иб̣б̣аанубхаавзна убасан̇гамид̇ваа, бхаг̇авад̇о баад̣̇з сирасаа ванд̣̇ид̇ваа ан̃ж̇алим̣ баг̇г̇аяха намассамаано адтааси. ат̇а нам̣ бхаг̇аваа ж̇аананд̇ова махааж̇анасса гаммапалам̣ б̣уд̣̇д̇хаанубхааван̃жа бажжагкам̣ гаад̇ум̣ –
Tasmiñca khaṇe eko maṇḍūko pokkharaṇito āgantvā ‘‘dhammo eso vuccatī’’ti dhammasaññāya sare nimittaṃ gaṇhanto parisapariyante nipajji. Atheko vacchapālo taṃ padesaṃ āgato satthāraṃ dhammaṃ desentaṃ parisañca paramena upasamena dhammaṃ suṇantaṃ disvā taggatamānaso daṇḍamolubbha tiṭṭhanto maṇḍūkaṃ anoloketvā tassa sīse sannirumbhitvā aṭṭhāsi. So dhammasaññāya pasannacitto tāvadeva kālaṃ katvā tāvatiṃsabhavane dvādasayojanike kanakavimāne nibbattitvā suttappabuddho viya tattha accharāsaṅghaparivutaṃ attānaṃ disvā ‘‘kuto nu kho idha ahaṃ nibbatto’’ti āvajjento purimajātiṃ disvā ‘‘ahampi nāma idha uppajjiṃ, īdisañca sampattiṃ paṭilabhiṃ, kiṃ nu kho kammaṃ akāsi’’nti upadhārento aññaṃ na addasa aññatra bhagavato sare nimittaggāhā. So tāvadeva saha vimānena āgantvā vimānato otaritvā, mahājanassa passantasseva mahatā parivārena mahantena dibbānubhāvena upasaṅkamitvā, bhagavato pāde sirasā vanditvā añjaliṃ paggayha namassamāno aṭṭhāsi. Atha naṃ bhagavā jānantova mahājanassa kammaphalaṃ buddhānubhāvañca paccakkhaṃ kātuṃ –
857.
857.
‘‘го мз ванд̣̇ад̇и баад̣̇аани, ид̣̇д̇хияаа яасасаа ж̇алам̣;
‘‘Ko me vandati pādāni, iddhiyā yasasā jalaṃ;
абхигганд̇зна ван̣н̣зна, саб̣б̣аа обхаасаяам̣ д̣̇исаа’’д̇и. –
Abhikkantena vaṇṇena, sabbā obhāsayaṃ disā’’ti. –
бужчи. д̇ад̇т̇а год̇и д̣̇званааг̇аяагкамануссаад̣̇ийсу го, гад̇амод̇и ад̇т̇о. мзд̇и мама. баад̣̇аанийд̇и баад̣̇з. ид̣̇д̇хияаад̇и имааяа ийд̣̇исааяа д̣̇звид̣̇д̇хияаа. яасасаад̇и иминаа ийд̣̇исзна бариваарзна барижчзд̣̇зна жа. ж̇аланд̇и виж̇ж̇од̇амаано. абхигганд̇знаад̇и ад̇ивияа ганд̇зна гаманийязна сунд̣̇арзна. ван̣н̣знаад̇и чавиван̣н̣зна, сарийраван̣н̣анибхааяаад̇и ад̇т̇о.
Pucchi. Tattha koti devanāgayakkhamanussādīsu ko, katamoti attho. Meti mama. Pādānīti pāde. Iddhiyāti imāya īdisāya deviddhiyā. Yasasāti iminā īdisena parivārena paricchedena ca. Jalanti vijjotamāno. Abhikkantenāti ativiya kantena kamanīyena sundarena. Vaṇṇenāti chavivaṇṇena, sarīravaṇṇanibhāyāti attho.
ат̇а д̣̇звабуд̇д̇о ад̇д̇ано буримаж̇аад̇иаад̣̇им̣ аави гаронд̇о имаахи г̇аат̇аахи б̣яаагааси –
Atha devaputto attano purimajātiādiṃ āvi karonto imāhi gāthāhi byākāsi –
858.
858.
‘‘ман̣д̣уугохам̣ бурз аасим̣, уд̣̇агз ваариг̇ожаро;
‘‘Maṇḍūkohaṃ pure āsiṃ, udake vārigocaro;
д̇ава д̇хаммам̣ сун̣анд̇асса, авад̇хий важчабаалаго.
Tava dhammaṃ suṇantassa, avadhī vacchapālako.
859.
859.
‘‘мухуд̇д̇ам̣ жид̇д̇абасаад̣̇асса, ид̣̇д̇хим̣ басса яасан̃жа мз;
‘‘Muhuttaṃ cittapasādassa, iddhiṃ passa yasañca me;
аанубхааван̃жа мз басса, ван̣н̣ам̣ басса ж̇уд̇ин̃жа мз.
Ānubhāvañca me passa, vaṇṇaṃ passa jutiñca me.
860.
860.
‘‘яз жа д̇з д̣̇ийгхамад̣̇д̇хаанам̣, д̇хаммам̣ ассосум̣ г̇од̇ама;
‘‘Ye ca te dīghamaddhānaṃ, dhammaṃ assosuṃ gotama;
бад̇д̇аа д̇з ажаладтаанам̣, яад̇т̇а г̇анд̇ваа на сожарз’’д̇и.
Pattā te acalaṭṭhānaṃ, yattha gantvā na socare’’ti.
858. д̇ад̇т̇а бурзд̇и буримаж̇аад̇ияам̣. уд̣̇агзд̇и ид̣̇ам̣ д̇ад̣̇аа ад̇д̇ано уббад̇д̇идтаанад̣̇ассанам̣. уд̣̇агз ман̣д̣уугод̇и зд̇зна уд̣̇д̇хумааяигаад̣̇игасса т̇алз ман̣д̣уугасса нивад̇д̇анам̣ гад̇ам̣ ход̇и. г̇ааво жаранд̇и зд̇т̇аад̇и г̇ожаро, г̇ожаро вияаад̇и г̇ожаро, гхаасзсанадтаанам̣. ваари уд̣̇агам̣ г̇ожаро зд̇ассаад̇и ваариг̇ожаро . уд̣̇агажаарийби хи гожи гажчабаад̣̇и аваариг̇ожароби ход̇ийд̇и ‘‘ваариг̇ожаро’’д̇и висзсзд̇ваа вуд̇д̇ам̣. д̇ава д̇хаммам̣ сун̣анд̇ассаад̇и б̣рахмассарзна гаравийгаруд̇аман̃ж̇унаа д̣̇зсзнд̇асса д̇ава д̇хаммам̣ ‘‘д̇хаммо зсо вужжад̇ий’’д̇и сарз нимид̇д̇аг̇г̇аахавасзна сун̣анд̇асса, анаад̣̇арз жзд̇ам̣ саамиважанам̣ взд̣̇ид̇аб̣б̣ам̣. авад̇хий важчабаалагод̇и важчз рагканд̇о г̇обаалад̣̇аараго мама самийбам̣ ааг̇анд̇ваа д̣̇ан̣д̣амолуб̣бхид̇ваа д̇идтанд̇о мама сийсз д̣̇ан̣д̣ам̣ саннирумбхид̇ваа мам̣ маарзси.
858. Tattha pureti purimajātiyaṃ. Udaketi idaṃ tadā attano uppattiṭṭhānadassanaṃ. Udake maṇḍūkoti etena uddhumāyikādikassa thale maṇḍūkassa nivattanaṃ kataṃ hoti. Gāvo caranti etthāti gocaro, gocaro viyāti gocaro, ghāsesanaṭṭhānaṃ. Vāri udakaṃ gocaro etassāti vārigocaro. Udakacārīpi hi koci kacchapādi avārigocaropi hotīti ‘‘vārigocaro’’ti visesetvā vuttaṃ. Tava dhammaṃ suṇantassāti brahmassarena karavīkarutamañjunā desentassa tava dhammaṃ ‘‘dhammo eso vuccatī’’ti sare nimittaggāhavasena suṇantassa, anādare cetaṃ sāmivacanaṃ veditabbaṃ. Avadhī vacchapālakoti vacche rakkhanto gopāladārako mama samīpaṃ āgantvā daṇḍamolubbhitvā tiṭṭhanto mama sīse daṇḍaṃ sannirumbhitvā maṃ māresi.
859. мухуд̇д̇ам̣ жид̇д̇абасаад̣̇ассаад̇и д̇ава д̇хаммз мухуд̇д̇амад̇д̇ам̣ уббаннасса жид̇д̇абасаад̣̇асса хзд̇убхууд̇асса ид̣̇д̇хинд̇и самид̣̇д̇хим̣, д̣̇иб̣б̣авибхууд̇инд̇и ад̇т̇о. яасанд̇и бариваарам̣. аанубхааванд̇и гаамаван̣н̣ид̇аад̣̇ид̣̇иб̣б̣аанубхаавам̣. ван̣н̣анд̇и сарийраван̣н̣асамбад̇д̇им̣. ж̇уд̇инд̇и д̣̇ваад̣̇асаяож̇анаани паран̣асамад̇т̇ам̣ бабхаависзсам̣.
859.Muhuttaṃ cittapasādassāti tava dhamme muhuttamattaṃ uppannassa cittapasādassa hetubhūtassa iddhinti samiddhiṃ, dibbavibhūtinti attho. Yasanti parivāraṃ. Ānubhāvanti kāmavaṇṇitādidibbānubhāvaṃ. Vaṇṇanti sarīravaṇṇasampattiṃ. Jutinti dvādasayojanāni pharaṇasamatthaṃ pabhāvisesaṃ.
860. язд̇и яз сад̇д̇аа. жа-сад̣̇д̣̇о б̣яад̇ирзгз. д̇зд̇и д̇ава. д̣̇ийгхамад̣̇д̇хаананд̇и б̣ахувзлам̣. ассосунд̇и сун̣им̣су. г̇од̇амаад̇и бхаг̇аванд̇ам̣ г̇од̇д̇зна аалабад̇и. ажаладтаананд̇и ниб̣б̣аанам̣. аяан̃хзд̇т̇а ад̇т̇о – г̇од̇ама бхаг̇аваа ахам̣ вияа ид̇д̇арамзва гаалам̣ асун̣ид̇ваа яз бана гад̇абун̃н̃аа жирам̣ гаалам̣ д̇ава д̇хаммам̣ ассосум̣ сод̇ум̣ лабхим̣су, д̇з д̣̇ийгхарад̇д̇ам̣ сам̣саараб̣яасанаабхибхууд̇аа имз сад̇д̇аа яад̇т̇а г̇анд̇ваа на сожзяяум̣, д̇ам̣ асогам̣ сассад̇абхаавзна ажалам̣ санд̇ибад̣̇ам̣ бад̇д̇аа зва, на д̇зсам̣ д̇асса бад̇д̇ияаа анд̇арааяод̇и.
860.Yeti ye sattā. Ca-saddo byatireke. Teti tava. Dīghamaddhānanti bahuvelaṃ. Assosunti suṇiṃsu. Gotamāti bhagavantaṃ gottena ālapati. Acalaṭṭhānanti nibbānaṃ. Ayañhettha attho – gotama bhagavā ahaṃ viya ittarameva kālaṃ asuṇitvā ye pana katapuññā ciraṃ kālaṃ tava dhammaṃ assosuṃ sotuṃ labhiṃsu, te dīgharattaṃ saṃsārabyasanābhibhūtā ime sattā yattha gantvā na soceyyuṃ, taṃ asokaṃ sassatabhāvena acalaṃ santipadaṃ pattā eva, na tesaṃ tassa pattiyā antarāyoti.
ат̇асса бхаг̇аваа самбад̇д̇абарисааяа жа убаниссаяасамбад̇д̇им̣ ологзд̇ваа вид̇т̇аарзна д̇хаммам̣ д̣̇зсзси. д̣̇зсанаабарияосаанз со д̣̇звабуд̇д̇о сод̇аабад̇д̇ипалз бад̇идтахи, жад̇ураасийд̇ияаа баан̣асахассаанам̣ д̇хаммаабхисамаяо ахоси. д̣̇звабуд̇д̇о бхаг̇аванд̇ам̣ ванд̣̇ид̇ваа д̇игкад̇д̇ум̣ бад̣̇агкин̣ам̣ гад̇ваа бхигкусан̇гхасса жа ан̃ж̇алим̣ гад̇ваа саха бариваарзна д̣̇звалогамзва г̇ад̇од̇и.
Athassa bhagavā sampattaparisāya ca upanissayasampattiṃ oloketvā vitthārena dhammaṃ desesi. Desanāpariyosāne so devaputto sotāpattiphale patiṭṭhahi, caturāsītiyā pāṇasahassānaṃ dhammābhisamayo ahosi. Devaputto bhagavantaṃ vanditvā tikkhattuṃ padakkhiṇaṃ katvā bhikkhusaṅghassa ca añjaliṃ katvā saha parivārena devalokameva gatoti.
ман̣д̣уугад̣̇звабуд̇д̇авимаанаван̣н̣анаа нидтид̇аа.
Maṇḍūkadevaputtavimānavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / вимаанавад̇т̇убаал̣и • Vimānavatthupāḷi / 1. ман̣д̣уугад̣̇звабуд̇д̇авимаанавад̇т̇у • 1. Maṇḍūkadevaputtavimānavatthu
