| Library / Tipiṭaka / ತಿಪಿಟಕ • Tipiṭaka / ಬುದ್ಧವಂಸಪಾಳಿ • Buddhavaṃsapāḷi |
೫. ಮಙ್ಗಲಬುದ್ಧವಂಸೋ
5. Maṅgalabuddhavaṃso
೧.
1.
ಕೋಣ್ಡಞ್ಞಸ್ಸ ಅಪರೇನ, ಮಙ್ಗಲೋ ನಾಮ ನಾಯಕೋ।
Koṇḍaññassa aparena, maṅgalo nāma nāyako;
ತಮಂ ಲೋಕೇ ನಿಹನ್ತ್ವಾನ, ಧಮ್ಮೋಕ್ಕಮಭಿಧಾರಯಿ॥
Tamaṃ loke nihantvāna, dhammokkamabhidhārayi.
೨.
2.
ಅತುಲಾಸಿ ಪಭಾ ತಸ್ಸ, ಜಿನೇಹಞ್ಞೇಹಿ ಉತ್ತರಿಂ।
Atulāsi pabhā tassa, jinehaññehi uttariṃ;
ಚನ್ದಸೂರಿಯಪಭಂ ಹನ್ತ್ವಾ, ದಸಸಹಸ್ಸೀ ವಿರೋಚತಿ॥
Candasūriyapabhaṃ hantvā, dasasahassī virocati.
೩.
3.
ಸೋಪಿ ಬುದ್ಧೋ ಪಕಾಸೇಸಿ, ಚತುರೋ ಸಚ್ಚವರುತ್ತಮೇ।
Sopi buddho pakāsesi, caturo saccavaruttame;
ತೇ ತೇ ಸಚ್ಚರಸಂ ಪೀತ್ವಾ, ವಿನೋದೇನ್ತಿ ಮಹಾತಮಂ॥
Te te saccarasaṃ pītvā, vinodenti mahātamaṃ.
೪.
4.
ಪತ್ವಾನ ಬೋಧಿಮತುಲಂ, ಪಠಮೇ ಧಮ್ಮದೇಸನೇ।
Patvāna bodhimatulaṃ, paṭhame dhammadesane;
ಕೋಟಿಸತಸಹಸ್ಸಾನಂ, ಧಮ್ಮಾಭಿಸಮಯೋ ಅಹು॥
Koṭisatasahassānaṃ, dhammābhisamayo ahu.
೫.
5.
ಸುರಿನ್ದದೇವಭವನೇ , ಬುದ್ಧೋ ಧಮ್ಮಮದೇಸಯಿ।
Surindadevabhavane , buddho dhammamadesayi;
೬.
6.
ಯದಾ ಸುನನ್ದೋ ಚಕ್ಕವತ್ತೀ, ಸಮ್ಬುದ್ಧಂ ಉಪಸಙ್ಕಮಿ।
Yadā sunando cakkavattī, sambuddhaṃ upasaṅkami;
ತದಾ ಆಹನಿ ಸಮ್ಬುದ್ಧೋ, ಧಮ್ಮಭೇರಿಂ ವರುತ್ತಮಂ॥
Tadā āhani sambuddho, dhammabheriṃ varuttamaṃ.
೭.
7.
ಸುನನ್ದಸ್ಸಾನುಚರಾ ಜನತಾ, ತದಾಸುಂ ನವುತಿಕೋಟಿಯೋ।
Sunandassānucarā janatā, tadāsuṃ navutikoṭiyo;
ಸಬ್ಬೇಪಿ ತೇ ನಿರವಸೇಸಾ, ಅಹೇಸುಂ ಏಹಿ ಭಿಕ್ಖುಕಾ॥
Sabbepi te niravasesā, ahesuṃ ehi bhikkhukā.
೮.
8.
ಸನ್ನಿಪಾತಾ ತಯೋ ಆಸುಂ, ಮಙ್ಗಲಸ್ಸ ಮಹೇಸಿನೋ।
Sannipātā tayo āsuṃ, maṅgalassa mahesino;
ಕೋಟಿಸತಸಹಸ್ಸಾನಂ, ಪಠಮೋ ಆಸಿ ಸಮಾಗಮೋ॥
Koṭisatasahassānaṃ, paṭhamo āsi samāgamo.
೯.
9.
ದುತಿಯೋ ಕೋಟಿಸತಸಹಸ್ಸಾನಂ, ತತಿಯೋ ನವುತಿಕೋಟಿನಂ।
Dutiyo koṭisatasahassānaṃ, tatiyo navutikoṭinaṃ;
ಖೀಣಾಸವಾನಂ ವಿಮಲಾನಂ, ತದಾ ಆಸಿ ಸಮಾಗಮೋ॥
Khīṇāsavānaṃ vimalānaṃ, tadā āsi samāgamo.
೧೦.
10.
ಅಹಂ ತೇನ ಸಮಯೇನ, ಸುರುಚೀ ನಾಮ ಬ್ರಾಹ್ಮಣೋ।
Ahaṃ tena samayena, surucī nāma brāhmaṇo;
ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ॥
Ajjhāyako mantadharo, tiṇṇaṃ vedāna pāragū.
೧೧.
11.
ತಮಹಂ ಉಪಸಙ್ಕಮ್ಮ, ಸರಣಂ ಗನ್ತ್ವಾನ ಸತ್ಥುನೋ।
Tamahaṃ upasaṅkamma, saraṇaṃ gantvāna satthuno;
ಸಮ್ಬುದ್ಧಪ್ಪಮುಖಂ ಸಙ್ಘಂ, ಗನ್ಧಮಾಲೇನ ಪೂಜಯಿಂ।
Sambuddhappamukhaṃ saṅghaṃ, gandhamālena pūjayiṃ;
ಪೂಜೇತ್ವಾ ಗನ್ಧಮಾಲೇನ, ಗವಪಾನೇನ ತಪ್ಪಯಿಂ॥
Pūjetvā gandhamālena, gavapānena tappayiṃ.
೧೨.
12.
ಸೋಪಿ ಮಂ ಬುದ್ಧೋ ಬ್ಯಾಕಾಸಿ, ಮಙ್ಗಲೋ ದ್ವಿಪದುತ್ತಮೋ।
Sopi maṃ buddho byākāsi, maṅgalo dvipaduttamo;
‘‘ಅಪರಿಮೇಯ್ಯಿತೋ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ॥
‘‘Aparimeyyito kappe, ayaṃ buddho bhavissati.
೧೩.
13.
‘‘ಪಧಾನಂ ಪದಹಿತ್ವಾನ…ಪೇ॰… ಹೇಸ್ಸಾಮ ಸಮ್ಮುಖಾ ಇಮಂ’’॥
‘‘Padhānaṃ padahitvāna…pe… hessāma sammukhā imaṃ’’.
೧೪.
14.
ತಸ್ಸಾಪಿ ವಚನಂ ಸುತ್ವಾ, ಭಿಯ್ಯೋ ಚಿತ್ತಂ ಪಸಾದಯಿಂ।
Tassāpi vacanaṃ sutvā, bhiyyo cittaṃ pasādayiṃ;
ಉತ್ತರಿಂ ವತಮಧಿಟ್ಠಾಸಿಂ, ದಸ ಪಾರಮಿಪೂರಿಯಾ॥
Uttariṃ vatamadhiṭṭhāsiṃ, dasa pāramipūriyā.
೧೫.
15.
ತದಾ ಪೀತಿಮನುಬ್ರೂಹನ್ತೋ, ಸಮ್ಬೋಧಿವರಪತ್ತಿಯಾ।
Tadā pītimanubrūhanto, sambodhivarapattiyā;
ಬುದ್ಧೇ ದತ್ವಾನ ಮಂ ಗೇಹಂ, ಪಬ್ಬಜಿಂ ತಸ್ಸ ಸನ್ತಿಕೇ॥
Buddhe datvāna maṃ gehaṃ, pabbajiṃ tassa santike.
೧೬.
16.
ಸುತ್ತನ್ತಂ ವಿನಯಞ್ಚಾಪಿ, ನವಙ್ಗಂ ಸತ್ಥುಸಾಸನಂ।
Suttantaṃ vinayañcāpi, navaṅgaṃ satthusāsanaṃ;
ಸಬ್ಬಂ ಪರಿಯಾಪುಣಿತ್ವಾ, ಸೋಭಯಿಂ ಜಿನಸಾಸನಂ॥
Sabbaṃ pariyāpuṇitvā, sobhayiṃ jinasāsanaṃ.
೧೭.
17.
ತತ್ಥಪ್ಪಮತ್ತೋ ವಿಹರನ್ತೋ, ಬ್ರಹ್ಮಂ ಭಾವೇತ್ವ ಭಾವನಂ।
Tatthappamatto viharanto, brahmaṃ bhāvetva bhāvanaṃ;
ಅಭಿಞ್ಞಾಪಾರಮಿಂ ಗನ್ತ್ವಾ, ಬ್ರಹ್ಮಲೋಕಮಗಚ್ಛಹಂ॥
Abhiññāpāramiṃ gantvā, brahmalokamagacchahaṃ.
೧೮.
18.
ಉತ್ತರಂ ನಾಮ ನಗರಂ, ಉತ್ತರೋ ನಾಮ ಖತ್ತಿಯೋ।
Uttaraṃ nāma nagaraṃ, uttaro nāma khattiyo;
ಉತ್ತರಾ ನಾಮ ಜನಿಕಾ, ಮಙ್ಗಲಸ್ಸ ಮಹೇಸಿನೋ॥
Uttarā nāma janikā, maṅgalassa mahesino.
೧೯.
19.
ನವವಸ್ಸಸಹಸ್ಸಾನಿ , ಅಗಾರಂ ಅಜ್ಝ ಸೋ ವಸಿ।
Navavassasahassāni , agāraṃ ajjha so vasi;
ಯಸವಾ ಸುಚಿಮಾ ಸಿರೀಮಾ, ತಯೋ ಪಾಸಾದಮುತ್ತಮಾ॥
Yasavā sucimā sirīmā, tayo pāsādamuttamā.
೨೦.
20.
ಸಮತಿಂಸಸಹಸ್ಸಾನಿ, ನಾರಿಯೋ ಸಮಲಙ್ಕತಾ।
Samatiṃsasahassāni, nāriyo samalaṅkatā;
ಯಸವತೀ ನಾಮ ನಾರೀ, ಸೀವಲೋ ನಾಮ ಅತ್ರಜೋ॥
Yasavatī nāma nārī, sīvalo nāma atrajo.
೨೧.
21.
ನಿಮಿತ್ತೇ ಚತುರೋ ದಿಸ್ವಾ, ಅಸ್ಸಯಾನೇನ ನಿಕ್ಖಮಿ।
Nimitte caturo disvā, assayānena nikkhami;
ಅನೂನಅಟ್ಠಮಾಸಾನಿ, ಪಧಾನಂ ಪದಹೀ ಜಿನೋ॥
Anūnaaṭṭhamāsāni, padhānaṃ padahī jino.
೨೨.
22.
ಬ್ರಹ್ಮುನಾ ಯಾಚಿತೋ ಸನ್ತೋ, ಮಙ್ಗಲೋ ನಾಮ ನಾಯಕೋ।
Brahmunā yācito santo, maṅgalo nāma nāyako;
ವತ್ತಿ ಚಕ್ಕಂ ಮಹಾವೀರೋ, ವನೇ ಸಿರೀವರುತ್ತಮೇ॥
Vatti cakkaṃ mahāvīro, vane sirīvaruttame.
೨೩.
23.
ಸುದೇವೋ ಧಮ್ಮಸೇನೋ ಚ, ಅಹೇಸುಂ ಅಗ್ಗಸಾವಕಾ।
Sudevo dhammaseno ca, ahesuṃ aggasāvakā;
ಪಾಲಿತೋ ನಾಮುಪಟ್ಠಾಕೋ, ಮಙ್ಗಲಸ್ಸ ಮಹೇಸಿನೋ॥
Pālito nāmupaṭṭhāko, maṅgalassa mahesino.
೨೪.
24.
ಸೀವಲಾ ಚ ಅಸೋಕಾ ಚ, ಅಹೇಸುಂ ಅಗ್ಗಸಾವಿಕಾ।
Sīvalā ca asokā ca, ahesuṃ aggasāvikā;
ಬೋಧಿ ತಸ್ಸ ಭಗವತೋ, ನಾಗರುಕ್ಖೋತಿ ವುಚ್ಚತಿ॥
Bodhi tassa bhagavato, nāgarukkhoti vuccati.
೨೫.
25.
ನನ್ದೋ ಚೇವ ವಿಸಾಖೋ ಚ, ಅಹೇಸುಂ ಅಗ್ಗುಪಟ್ಠಕಾ।
Nando ceva visākho ca, ahesuṃ aggupaṭṭhakā;
ಅನುಲಾ ಚೇವ ಸುತನಾ ಚ, ಅಹೇಸುಂ ಅಗ್ಗುಪಟ್ಠಿಕಾ॥
Anulā ceva sutanā ca, ahesuṃ aggupaṭṭhikā.
೨೬.
26.
ಅಟ್ಠಾಸೀತಿ ರತನಾನಿ, ಅಚ್ಚುಗ್ಗತೋ ಮಹಾಮುನಿ।
Aṭṭhāsīti ratanāni, accuggato mahāmuni;
ತತೋ ನಿದ್ಧಾವತೀ ರಂಸೀ, ಅನೇಕಸತಸಹಸ್ಸಿಯೋ॥
Tato niddhāvatī raṃsī, anekasatasahassiyo.
೨೭.
27.
ನವುತಿವಸ್ಸಸಹಸ್ಸಾನಿ, ಆಯು ವಿಜ್ಜತಿ ತಾವದೇ।
Navutivassasahassāni, āyu vijjati tāvade;
ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ॥
Tāvatā tiṭṭhamāno so, tāresi janataṃ bahuṃ.
೨೮.
28.
ಯಥಾಪಿ ಸಾಗರೇ ಊಮೀ, ನ ಸಕ್ಕಾ ತಾ ಗಣೇತುಯೇ।
Yathāpi sāgare ūmī, na sakkā tā gaṇetuye;
ತಥೇವ ಸಾವಕಾ ತಸ್ಸ, ನ ಸಕ್ಕಾ ತೇ ಗಣೇತುಯೇ॥
Tatheva sāvakā tassa, na sakkā te gaṇetuye.
೨೯.
29.
ಯಾವ ಅಟ್ಠಾಸಿ ಸಮ್ಬುದ್ಧೋ, ಮಙ್ಗಲೋ ಲೋಕನಾಯಕೋ।
Yāva aṭṭhāsi sambuddho, maṅgalo lokanāyako;
೩೦.
30.
ಧಮ್ಮೋಕ್ಕಂ ಧಾರಯಿತ್ವಾನ, ಸನ್ತಾರೇತ್ವಾ ಮಹಾಜನಂ।
Dhammokkaṃ dhārayitvāna, santāretvā mahājanaṃ;
ಜಲಿತ್ವಾ ಧೂಮಕೇತೂವ, ನಿಬ್ಬುತೋ ಸೋ ಮಹಾಯಸೋ॥
Jalitvā dhūmaketūva, nibbuto so mahāyaso.
೩೧.
31.
ಸಙ್ಖಾರಾನಂ ಸಭಾವತ್ಥಂ, ದಸ್ಸಯಿತ್ವಾ ಸದೇವಕೇ।
Saṅkhārānaṃ sabhāvatthaṃ, dassayitvā sadevake;
ಜಲಿತ್ವಾ ಅಗ್ಗಿಕ್ಖನ್ಧೋವ, ಸೂರಿಯೋ ಅತ್ಥಙ್ಗತೋ ಯಥಾ॥
Jalitvā aggikkhandhova, sūriyo atthaṅgato yathā.
೩೨.
32.
ಉಯ್ಯಾನೇ ವಸ್ಸರೇ ನಾಮ, ಬುದ್ಧೋ ನಿಬ್ಬಾಯಿ ಮಙ್ಗಲೋ।
Uyyāne vassare nāma, buddho nibbāyi maṅgalo;
ತತ್ಥೇವಸ್ಸ ಜಿನಥೂಪೋ, ತಿಂಸಯೋಜನಮುಗ್ಗತೋತಿ॥
Tatthevassa jinathūpo, tiṃsayojanamuggatoti.
ಮಙ್ಗಲಸ್ಸ ಭಗವತೋ ವಂಸೋ ತತಿಯೋ।
Maṅgalassa bhagavato vaṃso tatiyo.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಬುದ್ಧವಂಸ-ಅಟ್ಠಕಥಾ • Buddhavaṃsa-aṭṭhakathā / ೫. ಮಙ್ಗಲಬುದ್ಧವಂಸವಣ್ಣನಾ • 5. Maṅgalabuddhavaṃsavaṇṇanā
