| Library / Tipiṭaka / तिपिटक • Tipiṭaka / खुद्दकपाठपाळि • Khuddakapāṭhapāḷi |
५. मङ्गलसुत्तं
5. Maṅgalasuttaṃ
१. एवं मे सुतं – एकं समयं भगवा सावत्थियं विहरति जेतवने अनाथपिण्डिकस्स आरामे। अथ खो अञ्ञतरा देवता अभिक्कन्ताय रत्तिया अभिक्कन्तवण्णा केवलकप्पं जेतवनं ओभासेत्वा येन भगवा तेनुपसङ्कमि; उपसङ्कमित्वा भगवन्तं अभिवादेत्वा एकमन्तं अट्ठासि। एकमन्तं ठिता खो सा देवता भगवन्तं गाथाय अज्झभासि –
1. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā bhagavantaṃ gāthāya ajjhabhāsi –
२.
2.
‘‘बहू देवा मनुस्सा च, मङ्गलानि अचिन्तयुं।
‘‘Bahū devā manussā ca, maṅgalāni acintayuṃ;
आकङ्खमाना सोत्थानं, ब्रूहि मङ्गलमुत्तमं’’॥
Ākaṅkhamānā sotthānaṃ, brūhi maṅgalamuttamaṃ’’.
३.
3.
‘‘असेवना च बालानं, पण्डितानञ्च सेवना।
‘‘Asevanā ca bālānaṃ, paṇḍitānañca sevanā;
४.
4.
‘‘पतिरूपदेसवासो च, पुब्बे च कतपुञ्ञता।
‘‘Patirūpadesavāso ca, pubbe ca katapuññatā;
५.
5.
‘‘बाहुसच्चञ्च सिप्पञ्च, विनयो च सुसिक्खितो।
‘‘Bāhusaccañca sippañca, vinayo ca susikkhito;
सुभासिता च या वाचा, एतं मङ्गलमुत्तमं॥
Subhāsitā ca yā vācā, etaṃ maṅgalamuttamaṃ.
६.
6.
‘‘मातापितु उपट्ठानं, पुत्तदारस्स सङ्गहो।
‘‘Mātāpitu upaṭṭhānaṃ, puttadārassa saṅgaho;
अनाकुला च कम्मन्ता, एतं मङ्गलमुत्तमं॥
Anākulā ca kammantā, etaṃ maṅgalamuttamaṃ.
७.
7.
‘‘दानञ्च धम्मचरिया च, ञातकानञ्च सङ्गहो।
‘‘Dānañca dhammacariyā ca, ñātakānañca saṅgaho;
अनवज्जानि कम्मानि, एतं मङ्गलमुत्तमं॥
Anavajjāni kammāni, etaṃ maṅgalamuttamaṃ.
८.
8.
‘‘आरती विरती पापा, मज्जपाना च संयमो।
‘‘Āratī viratī pāpā, majjapānā ca saṃyamo;
अप्पमादो च धम्मेसु, एतं मङ्गलमुत्तमं॥
Appamādo ca dhammesu, etaṃ maṅgalamuttamaṃ.
९.
9.
‘‘गारवो च निवातो च, सन्तुट्ठि च कतञ्ञुता।
‘‘Gāravo ca nivāto ca, santuṭṭhi ca kataññutā;
१०.
10.
‘‘खन्ती च सोवचस्सता, समणानञ्च दस्सनं।
‘‘Khantī ca sovacassatā, samaṇānañca dassanaṃ;
कालेन धम्मसाकच्छा, एतं मङ्गलमुत्तमं॥
Kālena dhammasākacchā, etaṃ maṅgalamuttamaṃ.
११.
11.
‘‘तपो च ब्रह्मचरियञ्च, अरियसच्चान दस्सनं।
‘‘Tapo ca brahmacariyañca, ariyasaccāna dassanaṃ;
निब्बानसच्छिकिरिया च, एतं मङ्गलमुत्तमं॥
Nibbānasacchikiriyā ca, etaṃ maṅgalamuttamaṃ.
१२.
12.
‘‘फुट्ठस्स लोकधम्मेहि, चित्तं यस्स न कम्पति।
‘‘Phuṭṭhassa lokadhammehi, cittaṃ yassa na kampati;
असोकं विरजं खेमं, एतं मङ्गलमुत्तमं॥
Asokaṃ virajaṃ khemaṃ, etaṃ maṅgalamuttamaṃ.
१३.
13.
‘‘एतादिसानि कत्वान, सब्बत्थमपराजिता।
‘‘Etādisāni katvāna, sabbatthamaparājitā;
सब्बत्थ सोत्थिं गच्छन्ति, तं तेसं मङ्गलमुत्तम’’न्ति॥
Sabbattha sotthiṃ gacchanti, taṃ tesaṃ maṅgalamuttama’’nti.
मङ्गलसुत्तं निट्ठितं।
Maṅgalasuttaṃ niṭṭhitaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / खुद्दकपाठ-अट्ठकथा • Khuddakapāṭha-aṭṭhakathā / ५. मङ्गलसुत्तवण्णना • 5. Maṅgalasuttavaṇṇanā
