| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៤. មណិភទ្ទសុត្តវណ្ណនា
4. Maṇibhaddasuttavaṇṇanā
២៣៨. សុខំ បដិលភតីតិ ទិដ្ឋធម្មិកាទិភេទំ សុខំ អធិគច្ឆតិ។ និច្ចមេវ សេយ្យោ សតិមតោ អាយតិំ ហិតចរណតោ។ មណិភទ្ទោ ‘‘សតិមាបុគ្គលោ សតោការី សម្បតិ វេរំ នប្បសវតី’’តិ អធិប្បាយេន ‘‘វេរា ច បរិមុច្ចតី’’តិ អាហ។ ភគវា បន សតិមន្តតាសិទ្ធិយា វេរបរិមុច្ចនំ ន អច្ចន្តិកំ, នាបិ ឯកន្តិកំ បដិបក្ខេន បរតោ ច អប្បហីនត្តាតិ តំ និសេធេន្តោ ‘‘វេរា ច ន បរិមុច្ចតី’’តិ វត្វា, យំ អច្ចន្តិកំ ឯកន្តិកញ្ច បរស្ស វសេន វេរបរិមុច្ចនំ, តំ ទស្សេន្តោ ‘‘យស្សា’’តិ គាថមាហ។ ករុណាយាតិ អប្បនាប្បត្តាយ ករុណាយ។ ករុណាបុព្ពភាគេតិ ករុណាភាវនាយ វសេន ឧប្បាទិតបឋមជ្ឈានូបចារេ។ សោតិ ករុណាភាវនំ ភាវេន្តោ បុគ្គលោ។ មេត្តំសោតិ មេត្តចិត្តំ អំសោ ឯកោ កុសលកោដ្ឋាសោ ឯតស្សាតិ មេត្តំសោ។ តស្ស កេនចីតិ តស្ស អរហតោ ករុណាយ មេត្តាភាវនាយ ច សាតិសយត្តា តទភាវេន កេនចិ បុគ្គលេន សទ្ធិំ វេរប្បសង្គោ នាម នត្ថិ។ ឥមិនា ខីណាសវេបិ មេត្តាករុណាភាវនារហិតេ កោចិ អត្តនោ ចិត្តទោសេន វេរំ ករេយ្យ, ន បន តស្មិំ មេត្តាករុណាចេតោវិមុត្តិសមន្នាគតេ កោចិ វេរំ ករេយ្យ។ ឯវំ មហិទ្ធិកា ព្រហ្មវិហារភាវនាតិ ទស្សេតិ។
238.Sukhaṃ paṭilabhatīti diṭṭhadhammikādibhedaṃ sukhaṃ adhigacchati. Niccameva seyyo satimato āyatiṃ hitacaraṇato. Maṇibhaddo ‘‘satimāpuggalo satokārī sampati veraṃ nappasavatī’’ti adhippāyena ‘‘verā ca parimuccatī’’ti āha. Bhagavā pana satimantatāsiddhiyā veraparimuccanaṃ na accantikaṃ, nāpi ekantikaṃ paṭipakkhena parato ca appahīnattāti taṃ nisedhento ‘‘verā ca na parimuccatī’’ti vatvā, yaṃ accantikaṃ ekantikañca parassa vasena veraparimuccanaṃ, taṃ dassento ‘‘yassā’’ti gāthamāha. Karuṇāyāti appanāppattāya karuṇāya. Karuṇāpubbabhāgeti karuṇābhāvanāya vasena uppāditapaṭhamajjhānūpacāre. Soti karuṇābhāvanaṃ bhāvento puggalo. Mettaṃsoti mettacittaṃ aṃso eko kusalakoṭṭhāso etassāti mettaṃso. Tassa kenacīti tassa arahato karuṇāya mettābhāvanāya ca sātisayattā tadabhāvena kenaci puggalena saddhiṃ verappasaṅgo nāma natthi. Iminā khīṇāsavepi mettākaruṇābhāvanārahite koci attano cittadosena veraṃ kareyya, na pana tasmiṃ mettākaruṇācetovimuttisamannāgate koci veraṃ kareyya. Evaṃ mahiddhikā brahmavihārabhāvanāti dasseti.
មណិភទ្ទសុត្តវណ្ណនា និដ្ឋិតា។
Maṇibhaddasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៤. មណិភទ្ទសុត្តំ • 4. Maṇibhaddasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៤. មណិភទ្ទសុត្តវណ្ណនា • 4. Maṇibhaddasuttavaṇṇanā
