| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੪. ਮਣਿਭਦ੍ਦਸੁਤ੍ਤવਣ੍ਣਨਾ
4. Maṇibhaddasuttavaṇṇanā
੨੩੮. ਸੁਖਂ ਪਟਿਲਭਤੀਤਿ ਦਿਟ੍ਠਧਮ੍ਮਿਕਾਦਿਭੇਦਂ ਸੁਖਂ ਅਧਿਗਚ੍ਛਤਿ। ਨਿਚ੍ਚਮੇવ ਸੇਯ੍ਯੋ ਸਤਿਮਤੋ ਆਯਤਿਂ ਹਿਤਚਰਣਤੋ। ਮਣਿਭਦ੍ਦੋ ‘‘ਸਤਿਮਾਪੁਗ੍ਗਲੋ ਸਤੋਕਾਰੀ ਸਮ੍ਪਤਿ વੇਰਂ ਨਪ੍ਪਸવਤੀ’’ਤਿ ਅਧਿਪ੍ਪਾਯੇਨ ‘‘વੇਰਾ ਚ ਪਰਿਮੁਚ੍ਚਤੀ’’ਤਿ ਆਹ। ਭਗવਾ ਪਨ ਸਤਿਮਨ੍ਤਤਾਸਿਦ੍ਧਿਯਾ વੇਰਪਰਿਮੁਚ੍ਚਨਂ ਨ ਅਚ੍ਚਨ੍ਤਿਕਂ, ਨਾਪਿ ਏਕਨ੍ਤਿਕਂ ਪਟਿਪਕ੍ਖੇਨ ਪਰਤੋ ਚ ਅਪ੍ਪਹੀਨਤ੍ਤਾਤਿ ਤਂ ਨਿਸੇਧੇਨ੍ਤੋ ‘‘વੇਰਾ ਚ ਨ ਪਰਿਮੁਚ੍ਚਤੀ’’ਤਿ વਤ੍વਾ, ਯਂ ਅਚ੍ਚਨ੍ਤਿਕਂ ਏਕਨ੍ਤਿਕਞ੍ਚ ਪਰਸ੍ਸ વਸੇਨ વੇਰਪਰਿਮੁਚ੍ਚਨਂ, ਤਂ ਦਸ੍ਸੇਨ੍ਤੋ ‘‘ਯਸ੍ਸਾ’’ਤਿ ਗਾਥਮਾਹ। ਕਰੁਣਾਯਾਤਿ ਅਪ੍ਪਨਾਪ੍ਪਤ੍ਤਾਯ ਕਰੁਣਾਯ। ਕਰੁਣਾਪੁਬ੍ਬਭਾਗੇਤਿ ਕਰੁਣਾਭਾવਨਾਯ વਸੇਨ ਉਪ੍ਪਾਦਿਤਪਠਮਜ੍ਝਾਨੂਪਚਾਰੇ। ਸੋਤਿ ਕਰੁਣਾਭਾવਨਂ ਭਾવੇਨ੍ਤੋ ਪੁਗ੍ਗਲੋ। ਮੇਤ੍ਤਂਸੋਤਿ ਮੇਤ੍ਤਚਿਤ੍ਤਂ ਅਂਸੋ ਏਕੋ ਕੁਸਲਕੋਟ੍ਠਾਸੋ ਏਤਸ੍ਸਾਤਿ ਮੇਤ੍ਤਂਸੋ। ਤਸ੍ਸ ਕੇਨਚੀਤਿ ਤਸ੍ਸ ਅਰਹਤੋ ਕਰੁਣਾਯ ਮੇਤ੍ਤਾਭਾવਨਾਯ ਚ ਸਾਤਿਸਯਤ੍ਤਾ ਤਦਭਾવੇਨ ਕੇਨਚਿ ਪੁਗ੍ਗਲੇਨ ਸਦ੍ਧਿਂ વੇਰਪ੍ਪਸਙ੍ਗੋ ਨਾਮ ਨਤ੍ਥਿ। ਇਮਿਨਾ ਖੀਣਾਸવੇਪਿ ਮੇਤ੍ਤਾਕਰੁਣਾਭਾવਨਾਰਹਿਤੇ ਕੋਚਿ ਅਤ੍ਤਨੋ ਚਿਤ੍ਤਦੋਸੇਨ વੇਰਂ ਕਰੇਯ੍ਯ, ਨ ਪਨ ਤਸ੍ਮਿਂ ਮੇਤ੍ਤਾਕਰੁਣਾਚੇਤੋવਿਮੁਤ੍ਤਿਸਮਨ੍ਨਾਗਤੇ ਕੋਚਿ વੇਰਂ ਕਰੇਯ੍ਯ। ਏવਂ ਮਹਿਦ੍ਧਿਕਾ ਬ੍ਰਹ੍ਮવਿਹਾਰਭਾવਨਾਤਿ ਦਸ੍ਸੇਤਿ।
238.Sukhaṃ paṭilabhatīti diṭṭhadhammikādibhedaṃ sukhaṃ adhigacchati. Niccameva seyyo satimato āyatiṃ hitacaraṇato. Maṇibhaddo ‘‘satimāpuggalo satokārī sampati veraṃ nappasavatī’’ti adhippāyena ‘‘verā ca parimuccatī’’ti āha. Bhagavā pana satimantatāsiddhiyā veraparimuccanaṃ na accantikaṃ, nāpi ekantikaṃ paṭipakkhena parato ca appahīnattāti taṃ nisedhento ‘‘verā ca na parimuccatī’’ti vatvā, yaṃ accantikaṃ ekantikañca parassa vasena veraparimuccanaṃ, taṃ dassento ‘‘yassā’’ti gāthamāha. Karuṇāyāti appanāppattāya karuṇāya. Karuṇāpubbabhāgeti karuṇābhāvanāya vasena uppāditapaṭhamajjhānūpacāre. Soti karuṇābhāvanaṃ bhāvento puggalo. Mettaṃsoti mettacittaṃ aṃso eko kusalakoṭṭhāso etassāti mettaṃso. Tassa kenacīti tassa arahato karuṇāya mettābhāvanāya ca sātisayattā tadabhāvena kenaci puggalena saddhiṃ verappasaṅgo nāma natthi. Iminā khīṇāsavepi mettākaruṇābhāvanārahite koci attano cittadosena veraṃ kareyya, na pana tasmiṃ mettākaruṇācetovimuttisamannāgate koci veraṃ kareyya. Evaṃ mahiddhikā brahmavihārabhāvanāti dasseti.
ਮਣਿਭਦ੍ਦਸੁਤ੍ਤવਣ੍ਣਨਾ ਨਿਟ੍ਠਿਤਾ।
Maṇibhaddasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੪. ਮਣਿਭਦ੍ਦਸੁਤ੍ਤਂ • 4. Maṇibhaddasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੪. ਮਣਿਭਦ੍ਦਸੁਤ੍ਤવਣ੍ਣਨਾ • 4. Maṇibhaddasuttavaṇṇanā
