| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. মণিচূল়কসুত্তং
10. Maṇicūḷakasuttaṃ
৩৬২. একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে। তেন খো পন সমযেন রাজন্তেপুরে রাজপরিসায সন্নিসিন্নানং সন্নিপতিতানং অযমন্তরাকথা উদপাদি – ‘‘কপ্পতি সমণানং সক্যপুত্তিযানং জাতরূপরজতং, সাদিযন্তি সমণা সক্যপুত্তিযা জাতরূপরজতং, পটিগ্গণ্হন্তি সমণা সক্যপুত্তিযা জাতরূপরজত’’ন্তি!
362. Ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena rājantepure rājaparisāya sannisinnānaṃ sannipatitānaṃ ayamantarākathā udapādi – ‘‘kappati samaṇānaṃ sakyaputtiyānaṃ jātarūparajataṃ, sādiyanti samaṇā sakyaputtiyā jātarūparajataṃ, paṭiggaṇhanti samaṇā sakyaputtiyā jātarūparajata’’nti!
তেন খো পন সমযেন মণিচূল়কো গামণি তস্সং পরিসাযং নিসিন্নো হোতি। অথ খো মণিচূল়কো গামণি তং পরিসং এতদৰোচ – ‘‘মা অয্যো 1 এৰং অৰচুত্থ। ন কপ্পতি সমণানং সক্যপুত্তিযানং জাতরূপরজতং, ন সাদিযন্তি সমণা সক্যপুত্তিযা জাতরূপরজতং, নপ্পটিগ্গণ্হন্তি সমণা সক্যপুত্তিযা জাতরূপরজতং, নিক্খিত্তমণিসুৰণ্ণা সমণা সক্যপুত্তিযা অপেতজাতরূপরজতা’’তি। অসক্খি খো মণিচূল়কো গামণি তং পরিসং সঞ্ঞাপেতুং। অথ খো মণিচূল়কো গামণি যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো মণিচূল়কো গামণি ভগৰন্তং এতদৰোচ – ‘‘ইধ, ভন্তে, রাজন্তেপুরে রাজপরিসায সন্নিসিন্নানং সন্নিপতিতানং অযমন্তরাকথা উদপাদি – ‘কপ্পতি সমণানং সক্যপুত্তিযানং জাতরূপরজতং, সাদিযন্তি সমণা সক্যপুত্তিযা জাতরূপরজতং, পটিগ্গণ্হন্তি সমণা সক্যপুত্তিযা জাতরূপরজত’ন্তি। এৰং ৰুত্তে, অহং, ভন্তে, তং পরিসং এতদৰোচং – ‘মা অয্যো এৰং অৰচুত্থ। ন কপ্পতি সমণানং সক্যপুত্তিযানং জাতরূপরজতং, ন সাদিযন্তি সমণা সক্যপুত্তিযা জাতরূপরজতং, নপ্পটিগ্গণ্হন্তি সমণা সক্যপুত্তিযা জাতরূপরজতং, নিক্খিত্তমণিসুৰণ্ণা সমণা সক্যপুত্তিযা অপেতজাতরূপরজতা’তি। অসক্খিং খ্ৰাহং, ভন্তে, তং পরিসং সঞ্ঞাপেতুং। কচ্চাহং, ভন্তে, এৰং ব্যাকরমানো ৰুত্তৰাদী চেৰ ভগৰতো হোমি, ন চ ভগৰন্তং অভূতেন অব্ভাচিক্খামি, ধম্মস্স চানুধম্মং ব্যাকরোমি, ন চ কোচি সহধম্মিকো ৰাদানুৰাদো গারয্হং ঠানং আগচ্ছতী’’তি?
Tena kho pana samayena maṇicūḷako gāmaṇi tassaṃ parisāyaṃ nisinno hoti. Atha kho maṇicūḷako gāmaṇi taṃ parisaṃ etadavoca – ‘‘mā ayyo 2 evaṃ avacuttha. Na kappati samaṇānaṃ sakyaputtiyānaṃ jātarūparajataṃ, na sādiyanti samaṇā sakyaputtiyā jātarūparajataṃ, nappaṭiggaṇhanti samaṇā sakyaputtiyā jātarūparajataṃ, nikkhittamaṇisuvaṇṇā samaṇā sakyaputtiyā apetajātarūparajatā’’ti. Asakkhi kho maṇicūḷako gāmaṇi taṃ parisaṃ saññāpetuṃ. Atha kho maṇicūḷako gāmaṇi yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho maṇicūḷako gāmaṇi bhagavantaṃ etadavoca – ‘‘idha, bhante, rājantepure rājaparisāya sannisinnānaṃ sannipatitānaṃ ayamantarākathā udapādi – ‘kappati samaṇānaṃ sakyaputtiyānaṃ jātarūparajataṃ, sādiyanti samaṇā sakyaputtiyā jātarūparajataṃ, paṭiggaṇhanti samaṇā sakyaputtiyā jātarūparajata’nti. Evaṃ vutte, ahaṃ, bhante, taṃ parisaṃ etadavocaṃ – ‘mā ayyo evaṃ avacuttha. Na kappati samaṇānaṃ sakyaputtiyānaṃ jātarūparajataṃ, na sādiyanti samaṇā sakyaputtiyā jātarūparajataṃ, nappaṭiggaṇhanti samaṇā sakyaputtiyā jātarūparajataṃ, nikkhittamaṇisuvaṇṇā samaṇā sakyaputtiyā apetajātarūparajatā’ti. Asakkhiṃ khvāhaṃ, bhante, taṃ parisaṃ saññāpetuṃ. Kaccāhaṃ, bhante, evaṃ byākaramāno vuttavādī ceva bhagavato homi, na ca bhagavantaṃ abhūtena abbhācikkhāmi, dhammassa cānudhammaṃ byākaromi, na ca koci sahadhammiko vādānuvādo gārayhaṃ ṭhānaṃ āgacchatī’’ti?
‘‘তগ্ঘ ত্ৰং, গামণি, এৰং ব্যাকরমানো ৰুত্তৰাদী চেৰ মে হোসি, ন চ মং অভূতেন অব্ভাচিক্খসি, ধম্মস্স চানুধম্মং ব্যাকরোসি, ন চ কোচি সহধম্মিকো ৰাদানুৰাদো গারয্হং ঠানং আগচ্ছতি। ন হি, গামণি, কপ্পতি সমণানং সক্যপুত্তিযানং জাতরূপরজতং, ন সাদিযন্তি সমণা সক্যপুত্তিযা জাতরূপরজতং, নপ্পটিগ্গণ্হন্তি সমণা সক্যপুত্তিযা জাতরূপরজতং, নিক্খিত্তমণিসুৰণ্ণা সমণা সক্যপুত্তিযা অপেতজাতরূপরজতা। যস্স খো, গামণি, জাতরূপরজতং কপ্পতি, পঞ্চপি তস্স কামগুণা কপ্পন্তি। যস্স পঞ্চ কামগুণা কপ্পন্তি ( ) 3, একংসেনেতং , গামণি, ধারেয্যাসি অস্সমণধম্মো অসক্যপুত্তিযধম্মোতি। অপি চাহং, গামণি, এৰং ৰদামি – তিণং তিণত্থিকেন পরিযেসিতব্বং, দারু দারুত্থিকেন পরিযেসিতব্বং, সকটং সকটত্থিকেন পরিযেসিতব্বং, পুরিসো পুরিসত্থিকেন পরিযেসিতব্বো 4। নত্ৰেৰাহং, গামণি, কেনচি পরিযাযেন ‘জাতরূপরজতং সাদিতব্বং পরিযেসিতব্ব’ন্তি ৰদামী’’তি। দসমং।
‘‘Taggha tvaṃ, gāmaṇi, evaṃ byākaramāno vuttavādī ceva me hosi, na ca maṃ abhūtena abbhācikkhasi, dhammassa cānudhammaṃ byākarosi, na ca koci sahadhammiko vādānuvādo gārayhaṃ ṭhānaṃ āgacchati. Na hi, gāmaṇi, kappati samaṇānaṃ sakyaputtiyānaṃ jātarūparajataṃ, na sādiyanti samaṇā sakyaputtiyā jātarūparajataṃ, nappaṭiggaṇhanti samaṇā sakyaputtiyā jātarūparajataṃ, nikkhittamaṇisuvaṇṇā samaṇā sakyaputtiyā apetajātarūparajatā. Yassa kho, gāmaṇi, jātarūparajataṃ kappati, pañcapi tassa kāmaguṇā kappanti. Yassa pañca kāmaguṇā kappanti ( ) 5, ekaṃsenetaṃ , gāmaṇi, dhāreyyāsi assamaṇadhammo asakyaputtiyadhammoti. Api cāhaṃ, gāmaṇi, evaṃ vadāmi – tiṇaṃ tiṇatthikena pariyesitabbaṃ, dāru dārutthikena pariyesitabbaṃ, sakaṭaṃ sakaṭatthikena pariyesitabbaṃ, puriso purisatthikena pariyesitabbo 6. Natvevāhaṃ, gāmaṇi, kenaci pariyāyena ‘jātarūparajataṃ sāditabbaṃ pariyesitabba’nti vadāmī’’ti. Dasamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. মণিচূল়কসুত্তৰণ্ণনা • 10. Maṇicūḷakasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১০. মণিচূল়কসুত্তৰণ্ণনা • 10. Maṇicūḷakasuttavaṇṇanā
