| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༡༠. མཎིཙཱུལ༹ཀསུཏྟཾ
10. Maṇicūḷakasuttaṃ
༣༦༢. ཨེཀཾ སམཡཾ བྷགཝཱ རཱཛགཧེ ཝིཧརཏི ཝེལུ༹ཝནེ ཀལནྡཀནིཝཱཔེ། ཏེན ཁོ པན སམཡེན རཱཛནྟེཔུརེ རཱཛཔརིསཱཡ སནྣིསིནྣཱནཾ སནྣིཔཏིཏཱནཾ ཨཡམནྟརཱཀཐཱ ཨུདཔཱདི – ‘‘ཀཔྤཏི སམཎཱནཾ སཀྱཔུཏྟིཡཱནཾ ཛཱཏརཱུཔརཛཏཾ, སཱདིཡནྟི སམཎཱ སཀྱཔུཏྟིཡཱ ཛཱཏརཱུཔརཛཏཾ, པཊིགྒཎྷནྟི སམཎཱ སཀྱཔུཏྟིཡཱ ཛཱཏརཱུཔརཛཏ’’ནྟི!
362. Ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena rājantepure rājaparisāya sannisinnānaṃ sannipatitānaṃ ayamantarākathā udapādi – ‘‘kappati samaṇānaṃ sakyaputtiyānaṃ jātarūparajataṃ, sādiyanti samaṇā sakyaputtiyā jātarūparajataṃ, paṭiggaṇhanti samaṇā sakyaputtiyā jātarūparajata’’nti!
ཏེན ཁོ པན སམཡེན མཎིཙཱུལ༹ཀོ གཱམཎི ཏསྶཾ པརིསཱཡཾ ནིསིནྣོ ཧོཏི། ཨཐ ཁོ མཎིཙཱུལ༹ཀོ གཱམཎི ཏཾ པརིསཾ ཨེཏདཝོཙ – ‘‘མཱ ཨཡྻོ 1 ཨེཝཾ ཨཝཙུཏྠ། ན ཀཔྤཏི སམཎཱནཾ སཀྱཔུཏྟིཡཱནཾ ཛཱཏརཱུཔརཛཏཾ, ན སཱདིཡནྟི སམཎཱ སཀྱཔུཏྟིཡཱ ཛཱཏརཱུཔརཛཏཾ, ནཔྤཊིགྒཎྷནྟི སམཎཱ སཀྱཔུཏྟིཡཱ ཛཱཏརཱུཔརཛཏཾ, ནིཀྑིཏྟམཎིསུཝཎྞཱ སམཎཱ སཀྱཔུཏྟིཡཱ ཨཔེཏཛཱཏརཱུཔརཛཏཱ’’ཏི། ཨསཀྑི ཁོ མཎིཙཱུལ༹ཀོ གཱམཎི ཏཾ པརིསཾ སཉྙཱཔེཏུཾ། ཨཐ ཁོ མཎིཙཱུལ༹ཀོ གཱམཎི ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ མཎིཙཱུལ༹ཀོ གཱམཎི བྷགཝནྟཾ ཨེཏདཝོཙ – ‘‘ཨིདྷ, བྷནྟེ, རཱཛནྟེཔུརེ རཱཛཔརིསཱཡ སནྣིསིནྣཱནཾ སནྣིཔཏིཏཱནཾ ཨཡམནྟརཱཀཐཱ ཨུདཔཱདི – ‘ཀཔྤཏི སམཎཱནཾ སཀྱཔུཏྟིཡཱནཾ ཛཱཏརཱུཔརཛཏཾ, སཱདིཡནྟི སམཎཱ སཀྱཔུཏྟིཡཱ ཛཱཏརཱུཔརཛཏཾ, པཊིགྒཎྷནྟི སམཎཱ སཀྱཔུཏྟིཡཱ ཛཱཏརཱུཔརཛཏ’ནྟི། ཨེཝཾ ཝུཏྟེ, ཨཧཾ, བྷནྟེ, ཏཾ པརིསཾ ཨེཏདཝོཙཾ – ‘མཱ ཨཡྻོ ཨེཝཾ ཨཝཙུཏྠ། ན ཀཔྤཏི སམཎཱནཾ སཀྱཔུཏྟིཡཱནཾ ཛཱཏརཱུཔརཛཏཾ, ན སཱདིཡནྟི སམཎཱ སཀྱཔུཏྟིཡཱ ཛཱཏརཱུཔརཛཏཾ, ནཔྤཊིགྒཎྷནྟི སམཎཱ སཀྱཔུཏྟིཡཱ ཛཱཏརཱུཔརཛཏཾ, ནིཀྑིཏྟམཎིསུཝཎྞཱ སམཎཱ སཀྱཔུཏྟིཡཱ ཨཔེཏཛཱཏརཱུཔརཛཏཱ’ཏི། ཨསཀྑིཾ ཁྭཱཧཾ, བྷནྟེ, ཏཾ པརིསཾ སཉྙཱཔེཏུཾ། ཀཙྩཱཧཾ, བྷནྟེ, ཨེཝཾ བྱཱཀརམཱནོ ཝུཏྟཝཱདཱི ཙེཝ བྷགཝཏོ ཧོམི, ན ཙ བྷགཝནྟཾ ཨབྷཱུཏེན ཨབྦྷཱཙིཀྑཱམི, དྷམྨསྶ ཙཱནུདྷམྨཾ བྱཱཀརོམི, ན ཙ ཀོཙི སཧདྷམྨིཀོ ཝཱདཱནུཝཱདོ གཱརཡ྄ཧཾ ཋཱནཾ ཨཱགཙྪཏཱི’’ཏི?
Tena kho pana samayena maṇicūḷako gāmaṇi tassaṃ parisāyaṃ nisinno hoti. Atha kho maṇicūḷako gāmaṇi taṃ parisaṃ etadavoca – ‘‘mā ayyo 2 evaṃ avacuttha. Na kappati samaṇānaṃ sakyaputtiyānaṃ jātarūparajataṃ, na sādiyanti samaṇā sakyaputtiyā jātarūparajataṃ, nappaṭiggaṇhanti samaṇā sakyaputtiyā jātarūparajataṃ, nikkhittamaṇisuvaṇṇā samaṇā sakyaputtiyā apetajātarūparajatā’’ti. Asakkhi kho maṇicūḷako gāmaṇi taṃ parisaṃ saññāpetuṃ. Atha kho maṇicūḷako gāmaṇi yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho maṇicūḷako gāmaṇi bhagavantaṃ etadavoca – ‘‘idha, bhante, rājantepure rājaparisāya sannisinnānaṃ sannipatitānaṃ ayamantarākathā udapādi – ‘kappati samaṇānaṃ sakyaputtiyānaṃ jātarūparajataṃ, sādiyanti samaṇā sakyaputtiyā jātarūparajataṃ, paṭiggaṇhanti samaṇā sakyaputtiyā jātarūparajata’nti. Evaṃ vutte, ahaṃ, bhante, taṃ parisaṃ etadavocaṃ – ‘mā ayyo evaṃ avacuttha. Na kappati samaṇānaṃ sakyaputtiyānaṃ jātarūparajataṃ, na sādiyanti samaṇā sakyaputtiyā jātarūparajataṃ, nappaṭiggaṇhanti samaṇā sakyaputtiyā jātarūparajataṃ, nikkhittamaṇisuvaṇṇā samaṇā sakyaputtiyā apetajātarūparajatā’ti. Asakkhiṃ khvāhaṃ, bhante, taṃ parisaṃ saññāpetuṃ. Kaccāhaṃ, bhante, evaṃ byākaramāno vuttavādī ceva bhagavato homi, na ca bhagavantaṃ abhūtena abbhācikkhāmi, dhammassa cānudhammaṃ byākaromi, na ca koci sahadhammiko vādānuvādo gārayhaṃ ṭhānaṃ āgacchatī’’ti?
‘‘ཏགྒྷ ཏྭཾ, གཱམཎི, ཨེཝཾ བྱཱཀརམཱནོ ཝུཏྟཝཱདཱི ཙེཝ མེ ཧོསི, ན ཙ མཾ ཨབྷཱུཏེན ཨབྦྷཱཙིཀྑསི, དྷམྨསྶ ཙཱནུདྷམྨཾ བྱཱཀརོསི, ན ཙ ཀོཙི སཧདྷམྨིཀོ ཝཱདཱནུཝཱདོ གཱརཡ྄ཧཾ ཋཱནཾ ཨཱགཙྪཏི། ན ཧི, གཱམཎི, ཀཔྤཏི སམཎཱནཾ སཀྱཔུཏྟིཡཱནཾ ཛཱཏརཱུཔརཛཏཾ, ན སཱདིཡནྟི སམཎཱ སཀྱཔུཏྟིཡཱ ཛཱཏརཱུཔརཛཏཾ, ནཔྤཊིགྒཎྷནྟི སམཎཱ སཀྱཔུཏྟིཡཱ ཛཱཏརཱུཔརཛཏཾ, ནིཀྑིཏྟམཎིསུཝཎྞཱ སམཎཱ སཀྱཔུཏྟིཡཱ ཨཔེཏཛཱཏརཱུཔརཛཏཱ། ཡསྶ ཁོ, གཱམཎི, ཛཱཏརཱུཔརཛཏཾ ཀཔྤཏི, པཉྩཔི ཏསྶ ཀཱམགུཎཱ ཀཔྤནྟི། ཡསྶ པཉྩ ཀཱམགུཎཱ ཀཔྤནྟི ( ) 3, ཨེཀཾསེནེཏཾ , གཱམཎི, དྷཱརེཡྻཱསི ཨསྶམཎདྷམྨོ ཨསཀྱཔུཏྟིཡདྷམྨོཏི། ཨཔི ཙཱཧཾ, གཱམཎི, ཨེཝཾ ཝདཱམི – ཏིཎཾ ཏིཎཏྠིཀེན པརིཡེསིཏབྦཾ, དཱརུ དཱརུཏྠིཀེན པརིཡེསིཏབྦཾ, སཀཊཾ སཀཊཏྠིཀེན པརིཡེསིཏབྦཾ, པུརིསོ པུརིསཏྠིཀེན པརིཡེསིཏབྦོ 4། ནཏྭེཝཱཧཾ, གཱམཎི, ཀེནཙི པརིཡཱཡེན ‘ཛཱཏརཱུཔརཛཏཾ སཱདིཏབྦཾ པརིཡེསིཏབྦ’ནྟི ཝདཱམཱི’’ཏི། དསམཾ།
‘‘Taggha tvaṃ, gāmaṇi, evaṃ byākaramāno vuttavādī ceva me hosi, na ca maṃ abhūtena abbhācikkhasi, dhammassa cānudhammaṃ byākarosi, na ca koci sahadhammiko vādānuvādo gārayhaṃ ṭhānaṃ āgacchati. Na hi, gāmaṇi, kappati samaṇānaṃ sakyaputtiyānaṃ jātarūparajataṃ, na sādiyanti samaṇā sakyaputtiyā jātarūparajataṃ, nappaṭiggaṇhanti samaṇā sakyaputtiyā jātarūparajataṃ, nikkhittamaṇisuvaṇṇā samaṇā sakyaputtiyā apetajātarūparajatā. Yassa kho, gāmaṇi, jātarūparajataṃ kappati, pañcapi tassa kāmaguṇā kappanti. Yassa pañca kāmaguṇā kappanti ( ) 5, ekaṃsenetaṃ , gāmaṇi, dhāreyyāsi assamaṇadhammo asakyaputtiyadhammoti. Api cāhaṃ, gāmaṇi, evaṃ vadāmi – tiṇaṃ tiṇatthikena pariyesitabbaṃ, dāru dārutthikena pariyesitabbaṃ, sakaṭaṃ sakaṭatthikena pariyesitabbaṃ, puriso purisatthikena pariyesitabbo 6. Natvevāhaṃ, gāmaṇi, kenaci pariyāyena ‘jātarūparajataṃ sāditabbaṃ pariyesitabba’nti vadāmī’’ti. Dasamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡༠. མཎིཙཱུལ༹ཀསུཏྟཝཎྞནཱ • 10. Maṇicūḷakasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡༠. མཎིཙཱུལ༹ཀསུཏྟཝཎྞནཱ • 10. Maṇicūḷakasuttavaṇṇanā
