| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
១០. មណិចូឡកសុត្តវណ្ណនា
10. Maṇicūḷakasuttavaṇṇanā
៣៦២. ទសមេ តំ បរិសំ ឯតទវោចាតិ តស្ស កិរ ឯវំ អហោសិ ‘‘កុលបុត្តា បព្ពជន្តា បុត្តទារញ្ចេវ ជាតរូបរជតញ្ច បហាយេវ បព្ពជន្តិ, ន ច សក្កា យំ បហាយ បព្ពជិតា, តំ តេហិ គហេតុ’’ន្តិ នយគ្គាហេ ឋត្វា ‘‘មា អយ្យោ’’តិអាទិវចនំ អវោច។ ឯកំសេនេតន្តិ ឯតំ បញ្ចកាមគុណកប្បនំ អស្សមណធម្មោ អសក្យបុត្តិយធម្មោតិ ឯកំសេន ធារេយ្យាសិ។
362. Dasame taṃ parisaṃ etadavocāti tassa kira evaṃ ahosi ‘‘kulaputtā pabbajantā puttadārañceva jātarūparajatañca pahāyeva pabbajanti, na ca sakkā yaṃ pahāya pabbajitā, taṃ tehi gahetu’’nti nayaggāhe ṭhatvā ‘‘mā ayyo’’tiādivacanaṃ avoca. Ekaṃsenetanti etaṃ pañcakāmaguṇakappanaṃ assamaṇadhammo asakyaputtiyadhammoti ekaṃsena dhāreyyāsi.
តិណន្តិ សេនាសនច្ឆទនតិណំ។ បរិយេសិតព្ពន្តិ តិណច្ឆទនេ វា ឥដ្ឋកច្ឆទនេ វា គេហេ បលុជ្ជន្តេ យេហិ តំ ការិតំ, តេសំ សន្តិកំ គន្ត្វា ‘‘តុម្ហេហិ ការិតសេនាសនំ ឱវស្សតិ, ន សក្កា តត្ថ វសិតុ’’ន្តិ អាចិក្ខិតព្ពំ។ មនុស្សា សក្កោន្តា ករិស្សន្តិ, អសក្កោន្តា ‘‘តុម្ហេ វឌ្ឍកិំ គហេត្វា ការាបេថ, មយំ តេ សញ្ញាបេស្សាមា’’តិ វក្ខន្តិ។ ឯវំ វុត្តេ ការេត្វា តេសំ អាចិក្ខិតព្ពំ។ មនុស្សា វឌ្ឍកីនំ ទាតព្ពំ ទស្សន្តិ។ សចេ អាវាសសាមិកា នត្ថិ, អញ្ញេសម្បិ ភិក្ខាចារវត្តេន អារោចេត្វា ការេតុំ វដ្ដតិ។ ឥទំ សន្ធាយ ‘‘បរិយេសិតព្ព’’ន្តិ វុត្តំ។
Tiṇanti senāsanacchadanatiṇaṃ. Pariyesitabbanti tiṇacchadane vā iṭṭhakacchadane vā gehe palujjante yehi taṃ kāritaṃ, tesaṃ santikaṃ gantvā ‘‘tumhehi kāritasenāsanaṃ ovassati, na sakkā tattha vasitu’’nti ācikkhitabbaṃ. Manussā sakkontā karissanti, asakkontā ‘‘tumhe vaḍḍhakiṃ gahetvā kārāpetha, mayaṃ te saññāpessāmā’’ti vakkhanti. Evaṃ vutte kāretvā tesaṃ ācikkhitabbaṃ. Manussā vaḍḍhakīnaṃ dātabbaṃ dassanti. Sace āvāsasāmikā natthi, aññesampi bhikkhācāravattena ārocetvā kāretuṃ vaṭṭati. Idaṃ sandhāya ‘‘pariyesitabba’’nti vuttaṃ.
ទារុន្តិ សេនាសនេ គោបានសិអាទីសុ បលុជ្ជមានេសុ តទត្ថាយ ទារុំ។ សកដន្តិ គិហិវិកតំ កត្វា តាវកាលិកសកដំ។ ន កេវលញ្ច សកដមេវ, អញ្ញម្បិ វាសិផរសុកុទ្ទាលាទិឧបករណំ ឯវំ បរិយេសិតុំ វដ្ដតិ។ បុរិសោតិ ហត្ថកម្មវសេន បុរិសោ បរិយេសិតព្ពោ។ យំកិញ្ចិ ហិ បុរិសំ ‘‘ហត្ថកម្មំ , អាវុសោ, កត្វា ទស្សសី’’តិ វត្វា ‘‘ទស្សាមិ, ភន្តេ,’’តិ វុត្តេ ‘‘ឥទញ្ចិទញ្ច ករោហី’’តិ យំ ឥច្ឆតិ, តំ ការេតុំ វដ្ដតិ។ ន ត្វេវាហំ, គាមណិ, កេនចិ បរិយាយេនាតិ ជាតរូបរជតំ បនាហំ កេនចិបិ ការណេន បរិយេសិតព្ពន្តិ ន វទាមិ។
Dārunti senāsane gopānasiādīsu palujjamānesu tadatthāya dāruṃ. Sakaṭanti gihivikataṃ katvā tāvakālikasakaṭaṃ. Na kevalañca sakaṭameva, aññampi vāsipharasukuddālādiupakaraṇaṃ evaṃ pariyesituṃ vaṭṭati. Purisoti hatthakammavasena puriso pariyesitabbo. Yaṃkiñci hi purisaṃ ‘‘hatthakammaṃ , āvuso, katvā dassasī’’ti vatvā ‘‘dassāmi, bhante,’’ti vutte ‘‘idañcidañca karohī’’ti yaṃ icchati, taṃ kāretuṃ vaṭṭati. Na tvevāhaṃ, gāmaṇi, kenaci pariyāyenāti jātarūparajataṃ panāhaṃ kenacipi kāraṇena pariyesitabbanti na vadāmi.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១០. មណិចូឡកសុត្តំ • 10. Maṇicūḷakasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១០. មណិចូឡកសុត្តវណ្ណនា • 10. Maṇicūḷakasuttavaṇṇanā
