| Library / Tipiṭaka / තිපිටක • Tipiṭaka / අපදානපාළි • Apadānapāḷi |
2. මණිපූජකත්‌ථෙරඅපදානං
2. Maṇipūjakattheraapadānaṃ
8.
8.
‘‘පදුමුත්‌තරො නාම ජිනො, සබ්‌බධම්‌මාන පාරගූ;
‘‘Padumuttaro nāma jino, sabbadhammāna pāragū;
විවෙකකාමො සම්‌බුද්‌ධො, ගච්‌ඡතෙ අනිලඤ්‌ජසෙ.
Vivekakāmo sambuddho, gacchate anilañjase.
9.
9.
‘‘අවිදූරෙ හිමවන්‌තස්‌ස, මහාජාතස්‌සරො අහු;
‘‘Avidūre himavantassa, mahājātassaro ahu;
තත්‌ථ මෙ භවනං ආසි, පුඤ්‌ඤකම්‌මෙන සංයුතං.
Tattha me bhavanaṃ āsi, puññakammena saṃyutaṃ.
10.
10.
‘‘භවනා අභිනික්‌ඛම්‌ම, අද්‌දසං ලොකනායකං;
‘‘Bhavanā abhinikkhamma, addasaṃ lokanāyakaṃ;
ඉන්‌දීවරංව ජලිතං, ආදිත්‌තංව හුතාසනං.
Indīvaraṃva jalitaṃ, ādittaṃva hutāsanaṃ.
11.
11.
‘‘විචිනං නද්‌දසං පුප්‌ඵං, පූජයිස්‌සන්‌ති නායකං;
‘‘Vicinaṃ naddasaṃ pupphaṃ, pūjayissanti nāyakaṃ;
සකං චිත්‌තං පසාදෙත්‌වා, අවන්‌දිං සත්‌ථුනො අහං.
Sakaṃ cittaṃ pasādetvā, avandiṃ satthuno ahaṃ.
12.
12.
‘‘මම සීසෙ මණිං ගය්‌හ, පූජයිං ලොකනායකං;
‘‘Mama sīse maṇiṃ gayha, pūjayiṃ lokanāyakaṃ;
ඉමාය මණිපූජාය, විපාකො හොතු භද්‌දකො.
Imāya maṇipūjāya, vipāko hotu bhaddako.
13.
13.
‘‘පදුමුත්‌තරො ලොකවිදූ, ආහුතීනං පටිග්‌ගහො;
‘‘Padumuttaro lokavidū, āhutīnaṃ paṭiggaho;
අන්‌තලික්‌ඛෙ ඨිතො සත්‌ථා, ඉමං ගාථං අභාසථ.
Antalikkhe ṭhito satthā, imaṃ gāthaṃ abhāsatha.
14.
14.
‘සො තෙ ඉජ්‌ඣතු සඞ්‌කප්‌පො, ලභස්‌සු විපුලං සුඛං;
‘So te ijjhatu saṅkappo, labhassu vipulaṃ sukhaṃ;
ඉමාය මණිපූජාය, අනුභොහි මහායසං’.
Imāya maṇipūjāya, anubhohi mahāyasaṃ’.
15.
15.
‘‘ඉදං වත්‌වාන භගවා, ජලජුත්‌තමනාමකො;
‘‘Idaṃ vatvāna bhagavā, jalajuttamanāmako;
අගමාසි බුද්‌ධසෙට්‌ඨො, යත්‌ථ චිත්‌තං පණීහිතං.
Agamāsi buddhaseṭṭho, yattha cittaṃ paṇīhitaṃ.
16.
16.
‘‘සට්‌ඨිකප්‌පානි දෙවින්‌දො, දෙවරජ්‌ජමකාරයිං;
‘‘Saṭṭhikappāni devindo, devarajjamakārayiṃ;
අනෙකසතක්‌ඛත්‌තුඤ්‌ච, චක්‌කවත්‌තී අහොසහං.
Anekasatakkhattuñca, cakkavattī ahosahaṃ.
17.
17.
‘‘පුබ්‌බකම්‌මං සරන්‌තස්‌ස, දෙවභූතස්‌ස මෙ සතො;
‘‘Pubbakammaṃ sarantassa, devabhūtassa me sato;
මණි නිබ්‌බත්‌තතෙ මය්‌හං, ආලොකකරණො මමං.
Maṇi nibbattate mayhaṃ, ālokakaraṇo mamaṃ.
18.
18.
‘‘ඡළසීතිසහස්‌සානි, නාරියො මෙ පරිග්‌ගහා;
‘‘Chaḷasītisahassāni, nāriyo me pariggahā;
19.
19.
‘‘අළාරපම්‌හා හසුලා, සුසඤ්‌ඤා තනුමජ්‌ඣිමා;
‘‘Aḷārapamhā hasulā, susaññā tanumajjhimā;
පරිවාරෙන්‌ති මං නිච්‌චං, මණිපූජායිදං ඵලං.
Parivārenti maṃ niccaṃ, maṇipūjāyidaṃ phalaṃ.
20.
20.
‘‘සොණ්‌ණමයා මණිමයා, ලොහිතඞ්‌ගමයා තථා;
‘‘Soṇṇamayā maṇimayā, lohitaṅgamayā tathā;
21.
21.
‘‘කූටාගාරා ගහාරම්‌මා, සයනඤ්‌ච මහාරහං;
‘‘Kūṭāgārā gahārammā, sayanañca mahārahaṃ;
මම සඞ්‌කප්‌පමඤ්‌ඤාය, නිබ්‌බත්‌තන්‌ති යදිච්‌ඡකං.
Mama saṅkappamaññāya, nibbattanti yadicchakaṃ.
22.
22.
‘‘ලාභා තෙසං සුලද්‌ධඤ්‌ච, යෙ ලභන්‌ති උපස්‌සුතිං;
‘‘Lābhā tesaṃ suladdhañca, ye labhanti upassutiṃ;
පුඤ්‌ඤක්‌ඛෙත්‌තං මනුස්‌සානං, ඔසධං සබ්‌බපාණිනං.
Puññakkhettaṃ manussānaṃ, osadhaṃ sabbapāṇinaṃ.
23.
23.
‘‘මය්‌හම්‌පි සුකතං කම්‌මං, යොහං අදක්‌ඛි නායකං;
‘‘Mayhampi sukataṃ kammaṃ, yohaṃ adakkhi nāyakaṃ;
විනිපාතා පමුත්‌තොම්‌හි, පත්‌තොම්‌හි අචලං පදං.
Vinipātā pamuttomhi, pattomhi acalaṃ padaṃ.
24.
24.
‘‘යං යං යොනුපපජ්‌ජාමි, දෙවත්‌තං අථ මානුසං;
‘‘Yaṃ yaṃ yonupapajjāmi, devattaṃ atha mānusaṃ;
25.
25.
‘‘තායෙව මණිපූජාය, අනුභොත්‌වාන සම්‌පදා;
‘‘Tāyeva maṇipūjāya, anubhotvāna sampadā;
ඤාණාලොකො මයා දිට්‌ඨො, පත්‌තොම්‌හි අචලං පදං.
Ñāṇāloko mayā diṭṭho, pattomhi acalaṃ padaṃ.
26.
26.
‘‘සතසහස්‌සිතො කප්‌පෙ, යං මණිං අභිපූජයිං;
‘‘Satasahassito kappe, yaṃ maṇiṃ abhipūjayiṃ;
දුග්‌ගතිං නාභිජානාමි, මණිපූජායිදං ඵලං.
Duggatiṃ nābhijānāmi, maṇipūjāyidaṃ phalaṃ.
27.
27.
‘‘කිලෙසා ඣාපිතා මය්‌හං…පෙ.… විහරාමි අනාසවො.
‘‘Kilesā jhāpitā mayhaṃ…pe… viharāmi anāsavo.
28.
28.
‘‘ස්‌වාගතං වත මෙ ආසි…පෙ.… කතං බුද්‌ධස්‌ස සාසනං.
‘‘Svāgataṃ vata me āsi…pe… kataṃ buddhassa sāsanaṃ.
29.
29.
‘‘පටිසම්‌භිදා චතස්‌සො…පෙ.… කතං බුද්‌ධස්‌ස සාසනං’’.
‘‘Paṭisambhidā catasso…pe… kataṃ buddhassa sāsanaṃ’’.
ඉත්‌ථං සුදං ආයස්‌මා මණිපූජකො ථෙරො ඉමා ගාථායො
Itthaṃ sudaṃ āyasmā maṇipūjako thero imā gāthāyo
අභාසිත්‌ථාති.
Abhāsitthāti.
මණිපූජකත්‌ථෙරස්‌සාපදානං දුතියං.
Maṇipūjakattherassāpadānaṃ dutiyaṃ.
Footnotes:
