| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
8. மணிபூஜகத்தே²ரஅபதா³னவண்ணனா
8. Maṇipūjakattheraapadānavaṇṇanā
ஓரேன ஹிமவந்தஸ்ஸாதிஆதி³கங் ஆயஸ்மதோ மணிபூஜகத்தே²ரஸ்ஸ அபதா³னங். அயம்பி தே²ரோ புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ஏகஸ்மிங் குலே நிப்³ப³த்தோ க⁴ராவாஸங் ஸண்ட²பெத்வா தத்தா²தீ³னவங் தி³ஸ்வா க⁴ராவாஸங் பஹாய தாபஸபப்³ப³ஜ்ஜங் பப்³ப³ஜித்வா ஹிமவந்தஓரபா⁴கே³ ஏகிஸ்ஸா நதி³யா ஸமீபே பண்ணஸாலங் காரெத்வா வஸந்தோ விவேககாமதாய தஸ்ஸானுகம்பாய ச தத்த² உபக³தங் பது³முத்தரங் ப⁴க³வந்தங் தி³ஸ்வா பஸன்னமானஸோ மணிபல்லங்கங் ப⁴க³வதோ பூஜேஸி. ப⁴க³வா தஸ்ஸ பஸாத³வட்³ட⁴னத்தா²ய தத்த² நிஸீதி³. ஸோ பி⁴ய்யோஸோமத்தாய பஸன்னோ நிப்³பா³னாதி⁴க³மத்தா²ய பத்த²னங் அகாஸி. ப⁴க³வா அனுமோத³னங் வத்வா பக்காமி. ஸோ தேன புஞ்ஞேன தே³வமனுஸ்ஸேஸு ஸங்ஸரந்தோ ஸப்³ப³த்த² பூஜிதோ ஸுக²ங் அனுப⁴வித்வா இமஸ்மிங் பு³த்³து⁴ப்பாதே³ ஸாவத்தி²யங் விப⁴வஸம்பன்னே குலே நிப்³ப³த்தோ க⁴ராவாஸங் வஸந்தோ ஏகதி³வஸங் ஸத்து² த⁴ம்மதே³ஸனங் ஸுத்வா படிலத்³த⁴ஸத்³தோ⁴ பப்³ப³ஜித்வா நசிரஸ்ஸேவ அரஹா அஹோஸி.
Orenahimavantassātiādikaṃ āyasmato maṇipūjakattherassa apadānaṃ. Ayampi thero purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle ekasmiṃ kule nibbatto gharāvāsaṃ saṇṭhapetvā tatthādīnavaṃ disvā gharāvāsaṃ pahāya tāpasapabbajjaṃ pabbajitvā himavantaorabhāge ekissā nadiyā samīpe paṇṇasālaṃ kāretvā vasanto vivekakāmatāya tassānukampāya ca tattha upagataṃ padumuttaraṃ bhagavantaṃ disvā pasannamānaso maṇipallaṅkaṃ bhagavato pūjesi. Bhagavā tassa pasādavaḍḍhanatthāya tattha nisīdi. So bhiyyosomattāya pasanno nibbānādhigamatthāya patthanaṃ akāsi. Bhagavā anumodanaṃ vatvā pakkāmi. So tena puññena devamanussesu saṃsaranto sabbattha pūjito sukhaṃ anubhavitvā imasmiṃ buddhuppāde sāvatthiyaṃ vibhavasampanne kule nibbatto gharāvāsaṃ vasanto ekadivasaṃ satthu dhammadesanaṃ sutvā paṭiladdhasaddho pabbajitvā nacirasseva arahā ahosi.
34. ஸோ ஏகதி³வஸங் அத்தனா கதகுஸலங் ஸரித்வா ஸஞ்ஜாதஸோமனஸ்ஸோ புப்³ப³சரிதாபதா³னங் பகாஸெந்தோ ஓரேன ஹிமவந்தஸ்ஸாதிஆதி³மாஹ. தத்த² ஓரேனாதி ஹிமவந்தஸ்ஸ அபரங் பா⁴க³ங் விஹாய ஓரேன, பு⁴ம்மத்தே² கரணவசனங், ஓரஸ்மிங் தி³ஸாபா⁴கே³தி அத்தோ². நதி³கா ஸம்பவத்ததா²தி அபாகடனாமதெ⁴ய்யா ஏகா நதீ³ ஸங்ஸுட்டு² பவத்தானீ வஹானீ ஸந்த³மானா அஹோஸீதி அத்தோ². தஸ்ஸா சானுபகெ²த்தம்ஹீதி தஸ்ஸா நதி³யா அனுபகெ²த்தம்ஹி தீரஸமீபேதி அத்தோ². ஸயம்பூ⁴ வஸதே ததா³தி யதா³ அஹங் மணிபல்லங்கங் பூஜேஸிங், ததா³ அனாசரியகோ ஹுத்வா ஸயமேவ பு³த்³த⁴பூ⁴தோ ப⁴க³வா வஸதே விஹரதீதி அத்தோ².
34. So ekadivasaṃ attanā katakusalaṃ saritvā sañjātasomanasso pubbacaritāpadānaṃ pakāsento orena himavantassātiādimāha. Tattha orenāti himavantassa aparaṃ bhāgaṃ vihāya orena, bhummatthe karaṇavacanaṃ, orasmiṃ disābhāgeti attho. Nadikā sampavattathāti apākaṭanāmadheyyā ekā nadī saṃsuṭṭhu pavattānī vahānī sandamānā ahosīti attho. Tassā cānupakhettamhīti tassā nadiyā anupakhettamhi tīrasamīpeti attho. Sayambhū vasate tadāti yadā ahaṃ maṇipallaṅkaṃ pūjesiṃ, tadā anācariyako hutvā sayameva buddhabhūto bhagavā vasate viharatīti attho.
35. மணிங் பக்³க³ய்ஹ பல்லங்கந்தி மணிந்தி சித்தங் ஆராதே⁴தி ஸோமனஸ்ஸங் கரோதீதி மணி, அத² வா மாதி பமாணங் கரோதி ஆப⁴ரணந்தி மணி, அத² வா மரந்தாபி ராஜயுவராஜாத³யோ தங் ந பரிச்சஜந்தி தத³த்தா²ய ஸங்கா³மங் கரொந்தீதி மணி, தங் மணிங் மணிமயங் பல்லங்கங் மனோரமங் ஸாது⁴ சித்தங் ஸுட்டு² விசித்தங் பக்³க³ய்ஹ க³ஹெத்வா பு³த்³த⁴ஸெட்ட²ஸ்ஸ அபி⁴ரோபயிங் பூஜேஸிந்தி அத்தோ². ஸேஸங் ஸப்³ப³ங் உத்தானத்த²மேவாதி.
35.Maṇiṃ paggayha pallaṅkanti maṇinti cittaṃ ārādheti somanassaṃ karotīti maṇi, atha vā māti pamāṇaṃ karoti ābharaṇanti maṇi, atha vā marantāpi rājayuvarājādayo taṃ na pariccajanti tadatthāya saṅgāmaṃ karontīti maṇi, taṃ maṇiṃ maṇimayaṃ pallaṅkaṃ manoramaṃ sādhu cittaṃ suṭṭhu vicittaṃ paggayha gahetvā buddhaseṭṭhassa abhiropayiṃ pūjesinti attho. Sesaṃ sabbaṃ uttānatthamevāti.
மணிபூஜகத்தே²ரஅபதா³னவண்ணனா ஸமத்தா.
Maṇipūjakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 8. மணிபூஜகத்தே²ரஅபதா³னங் • 8. Maṇipūjakattheraapadānaṃ
