| Library / Tipiṭaka / ਤਿਪਿਟਕ • Tipiṭaka / ਅਪਦਾਨ-ਅਟ੍ਠਕਥਾ • Apadāna-aṭṭhakathā |
੮. ਮਣਿਪੂਜਕਤ੍ਥੇਰਅਪਦਾਨવਣ੍ਣਨਾ
8. Maṇipūjakattheraapadānavaṇṇanā
ਓਰੇਨ ਹਿਮવਨ੍ਤਸ੍ਸਾਤਿਆਦਿਕਂ ਆਯਸ੍ਮਤੋ ਮਣਿਪੂਜਕਤ੍ਥੇਰਸ੍ਸ ਅਪਦਾਨਂ। ਅਯਮ੍ਪਿ ਥੇਰੋ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭવੇ વਿવਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗવਤੋ ਕਾਲੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਘਰਾવਾਸਂ ਸਣ੍ਠਪੇਤ੍વਾ ਤਤ੍ਥਾਦੀਨવਂ ਦਿਸ੍વਾ ਘਰਾવਾਸਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍વਾ ਹਿਮવਨ੍ਤਓਰਭਾਗੇ ਏਕਿਸ੍ਸਾ ਨਦਿਯਾ ਸਮੀਪੇ ਪਣ੍ਣਸਾਲਂ ਕਾਰੇਤ੍વਾ વਸਨ੍ਤੋ વਿવੇਕਕਾਮਤਾਯ ਤਸ੍ਸਾਨੁਕਮ੍ਪਾਯ ਚ ਤਤ੍ਥ ਉਪਗਤਂ ਪਦੁਮੁਤ੍ਤਰਂ ਭਗવਨ੍ਤਂ ਦਿਸ੍વਾ ਪਸਨ੍ਨਮਾਨਸੋ ਮਣਿਪਲ੍ਲਙ੍ਕਂ ਭਗવਤੋ ਪੂਜੇਸਿ। ਭਗવਾ ਤਸ੍ਸ ਪਸਾਦવਡ੍ਢਨਤ੍ਥਾਯ ਤਤ੍ਥ ਨਿਸੀਦਿ। ਸੋ ਭਿਯ੍ਯੋਸੋਮਤ੍ਤਾਯ ਪਸਨ੍ਨੋ ਨਿਬ੍ਬਾਨਾਧਿਗਮਤ੍ਥਾਯ ਪਤ੍ਥਨਂ ਅਕਾਸਿ। ਭਗવਾ ਅਨੁਮੋਦਨਂ વਤ੍વਾ ਪਕ੍ਕਾਮਿ। ਸੋ ਤੇਨ ਪੁਞ੍ਞੇਨ ਦੇવਮਨੁਸ੍ਸੇਸੁ ਸਂਸਰਨ੍ਤੋ ਸਬ੍ਬਤ੍ਥ ਪੂਜਿਤੋ ਸੁਖਂ ਅਨੁਭવਿਤ੍વਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾવਤ੍ਥਿਯਂ વਿਭવਸਮ੍ਪਨ੍ਨੇ ਕੁਲੇ ਨਿਬ੍ਬਤ੍ਤੋ ਘਰਾવਾਸਂ વਸਨ੍ਤੋ ਏਕਦਿવਸਂ ਸਤ੍ਥੁ ਧਮ੍ਮਦੇਸਨਂ ਸੁਤ੍વਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍વਾ ਨਚਿਰਸ੍ਸੇવ ਅਰਹਾ ਅਹੋਸਿ।
Orenahimavantassātiādikaṃ āyasmato maṇipūjakattherassa apadānaṃ. Ayampi thero purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle ekasmiṃ kule nibbatto gharāvāsaṃ saṇṭhapetvā tatthādīnavaṃ disvā gharāvāsaṃ pahāya tāpasapabbajjaṃ pabbajitvā himavantaorabhāge ekissā nadiyā samīpe paṇṇasālaṃ kāretvā vasanto vivekakāmatāya tassānukampāya ca tattha upagataṃ padumuttaraṃ bhagavantaṃ disvā pasannamānaso maṇipallaṅkaṃ bhagavato pūjesi. Bhagavā tassa pasādavaḍḍhanatthāya tattha nisīdi. So bhiyyosomattāya pasanno nibbānādhigamatthāya patthanaṃ akāsi. Bhagavā anumodanaṃ vatvā pakkāmi. So tena puññena devamanussesu saṃsaranto sabbattha pūjito sukhaṃ anubhavitvā imasmiṃ buddhuppāde sāvatthiyaṃ vibhavasampanne kule nibbatto gharāvāsaṃ vasanto ekadivasaṃ satthu dhammadesanaṃ sutvā paṭiladdhasaddho pabbajitvā nacirasseva arahā ahosi.
੩੪. ਸੋ ਏਕਦਿવਸਂ ਅਤ੍ਤਨਾ ਕਤਕੁਸਲਂ ਸਰਿਤ੍વਾ ਸਞ੍ਜਾਤਸੋਮਨਸ੍ਸੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਓਰੇਨ ਹਿਮવਨ੍ਤਸ੍ਸਾਤਿਆਦਿਮਾਹ। ਤਤ੍ਥ ਓਰੇਨਾਤਿ ਹਿਮવਨ੍ਤਸ੍ਸ ਅਪਰਂ ਭਾਗਂ વਿਹਾਯ ਓਰੇਨ, ਭੁਮ੍ਮਤ੍ਥੇ ਕਰਣવਚਨਂ, ਓਰਸ੍ਮਿਂ ਦਿਸਾਭਾਗੇਤਿ ਅਤ੍ਥੋ। ਨਦਿਕਾ ਸਮ੍ਪવਤ੍ਤਥਾਤਿ ਅਪਾਕਟਨਾਮਧੇਯ੍ਯਾ ਏਕਾ ਨਦੀ ਸਂਸੁਟ੍ਠੁ ਪવਤ੍ਤਾਨੀ વਹਾਨੀ ਸਨ੍ਦਮਾਨਾ ਅਹੋਸੀਤਿ ਅਤ੍ਥੋ। ਤਸ੍ਸਾ ਚਾਨੁਪਖੇਤ੍ਤਮ੍ਹੀਤਿ ਤਸ੍ਸਾ ਨਦਿਯਾ ਅਨੁਪਖੇਤ੍ਤਮ੍ਹਿ ਤੀਰਸਮੀਪੇਤਿ ਅਤ੍ਥੋ। ਸਯਮ੍ਭੂ વਸਤੇ ਤਦਾਤਿ ਯਦਾ ਅਹਂ ਮਣਿਪਲ੍ਲਙ੍ਕਂ ਪੂਜੇਸਿਂ, ਤਦਾ ਅਨਾਚਰਿਯਕੋ ਹੁਤ੍વਾ ਸਯਮੇવ ਬੁਦ੍ਧਭੂਤੋ ਭਗવਾ વਸਤੇ વਿਹਰਤੀਤਿ ਅਤ੍ਥੋ।
34. So ekadivasaṃ attanā katakusalaṃ saritvā sañjātasomanasso pubbacaritāpadānaṃ pakāsento orena himavantassātiādimāha. Tattha orenāti himavantassa aparaṃ bhāgaṃ vihāya orena, bhummatthe karaṇavacanaṃ, orasmiṃ disābhāgeti attho. Nadikā sampavattathāti apākaṭanāmadheyyā ekā nadī saṃsuṭṭhu pavattānī vahānī sandamānā ahosīti attho. Tassā cānupakhettamhīti tassā nadiyā anupakhettamhi tīrasamīpeti attho. Sayambhū vasate tadāti yadā ahaṃ maṇipallaṅkaṃ pūjesiṃ, tadā anācariyako hutvā sayameva buddhabhūto bhagavā vasate viharatīti attho.
੩੫. ਮਣਿਂ ਪਗ੍ਗਯ੍ਹ ਪਲ੍ਲਙ੍ਕਨ੍ਤਿ ਮਣਿਨ੍ਤਿ ਚਿਤ੍ਤਂ ਆਰਾਧੇਤਿ ਸੋਮਨਸ੍ਸਂ ਕਰੋਤੀਤਿ ਮਣਿ, ਅਥ વਾ ਮਾਤਿ ਪਮਾਣਂ ਕਰੋਤਿ ਆਭਰਣਨ੍ਤਿ ਮਣਿ, ਅਥ વਾ ਮਰਨ੍ਤਾਪਿ ਰਾਜਯੁવਰਾਜਾਦਯੋ ਤਂ ਨ ਪਰਿਚ੍ਚਜਨ੍ਤਿ ਤਦਤ੍ਥਾਯ ਸਙ੍ਗਾਮਂ ਕਰੋਨ੍ਤੀਤਿ ਮਣਿ, ਤਂ ਮਣਿਂ ਮਣਿਮਯਂ ਪਲ੍ਲਙ੍ਕਂ ਮਨੋਰਮਂ ਸਾਧੁ ਚਿਤ੍ਤਂ ਸੁਟ੍ਠੁ વਿਚਿਤ੍ਤਂ ਪਗ੍ਗਯ੍ਹ ਗਹੇਤ੍વਾ ਬੁਦ੍ਧਸੇਟ੍ਠਸ੍ਸ ਅਭਿਰੋਪਯਿਂ ਪੂਜੇਸਿਨ੍ਤਿ ਅਤ੍ਥੋ। ਸੇਸਂ ਸਬ੍ਬਂ ਉਤ੍ਤਾਨਤ੍ਥਮੇવਾਤਿ।
35.Maṇiṃ paggayha pallaṅkanti maṇinti cittaṃ ārādheti somanassaṃ karotīti maṇi, atha vā māti pamāṇaṃ karoti ābharaṇanti maṇi, atha vā marantāpi rājayuvarājādayo taṃ na pariccajanti tadatthāya saṅgāmaṃ karontīti maṇi, taṃ maṇiṃ maṇimayaṃ pallaṅkaṃ manoramaṃ sādhu cittaṃ suṭṭhu vicittaṃ paggayha gahetvā buddhaseṭṭhassa abhiropayiṃ pūjesinti attho. Sesaṃ sabbaṃ uttānatthamevāti.
ਮਣਿਪੂਜਕਤ੍ਥੇਰਅਪਦਾਨવਣ੍ਣਨਾ ਸਮਤ੍ਤਾ।
Maṇipūjakattheraapadānavaṇṇanā samattā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਅਪਦਾਨਪਾਲ਼ਿ • Apadānapāḷi / ੮. ਮਣਿਪੂਜਕਤ੍ਥੇਰਅਪਦਾਨਂ • 8. Maṇipūjakattheraapadānaṃ
