| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၇. မဏိရတနင္ဂပဉ္ဟော
7. Maṇiratanaṅgapañho
၇. ‘‘ဘန္တေ နာဂသေန, ‘မဏိရတနသ္သ တီဏိ အင္ဂာနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ တီဏိ အင္ဂာနိ ဂဟေတဗ္ဗာနီ’’တိ? ‘‘ယထာ, မဟာရာဇ, မဏိရတနံ ဧကန္တပရိသုဒ္ဓံ, ဧဝမေဝ ခော, မဟာရာဇ, ယောဂိနာ ယောဂာဝစရေန ဧကန္တပရိသုဒ္ဓာဇီဝေန ဘဝိတဗ္ဗံ။ ဣဒံ, မဟာရာဇ, မဏိရတနသ္သ ပဌမံ အင္ဂံ ဂဟေတဗ္ဗံ။
7. ‘‘Bhante nāgasena, ‘maṇiratanassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, maṇiratanaṃ ekantaparisuddhaṃ, evameva kho, mahārāja, yoginā yogāvacarena ekantaparisuddhājīvena bhavitabbaṃ. Idaṃ, mahārāja, maṇiratanassa paṭhamaṃ aṅgaṃ gahetabbaṃ.
‘‘ပုန စပရံ, မဟာရာဇ, မဏိရတနံ န ကေနစိ သဒ္ဓိံ မိသ္သီယတိ, ဧဝမေဝ ခော, မဟာရာဇ, ယောဂိနာ ယောဂာဝစရေန ပာပေဟိ ပာပသဟာယေဟိ သဒ္ဓိံ န မိသ္သိတဗ္ဗံ။ ဣဒံ, မဟာရာဇ, မဏိရတနသ္သ ဒုတိယံ အင္ဂံ ဂဟေတဗ္ဗံ။
‘‘Puna caparaṃ, mahārāja, maṇiratanaṃ na kenaci saddhiṃ missīyati, evameva kho, mahārāja, yoginā yogāvacarena pāpehi pāpasahāyehi saddhiṃ na missitabbaṃ. Idaṃ, mahārāja, maṇiratanassa dutiyaṃ aṅgaṃ gahetabbaṃ.
‘‘ပုန စပရံ, မဟာရာဇ, မဏိရတနံ ဇာတိရတနေဟိ ယောဇီယတိ, ဧဝမေဝ ခော, မဟာရာဇ, ယောဂိနာ ယောဂာဝစရေန ဥတ္တမဝရဇာတိမန္တေဟိ သဒ္ဓိံ သံဝသိတဗ္ဗံ, ပဋိပန္နကဖလဋ္ဌသေက္ခဖလသမင္ဂီဟိ သောတာပန္နသကဒာဂာမိအနာဂာမိအရဟန္တတေဝိဇ္ဇဆဠဘိညသမဏမဏိရတနေဟိ သဒ္ဓိံ သံဝသိတဗ္ဗံ။ ဣဒံ, မဟာရာဇ, မဏိရတနသ္သ တတိယံ အင္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝာတိဒေဝေန သုတ္တနိပာတေ –
‘‘Puna caparaṃ, mahārāja, maṇiratanaṃ jātiratanehi yojīyati, evameva kho, mahārāja, yoginā yogāvacarena uttamavarajātimantehi saddhiṃ saṃvasitabbaṃ, paṭipannakaphalaṭṭhasekkhaphalasamaṅgīhi sotāpannasakadāgāmianāgāmiarahantatevijjachaḷabhiññasamaṇamaṇiratanehi saddhiṃ saṃvasitabbaṃ. Idaṃ, mahārāja, maṇiratanassa tatiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena suttanipāte –
‘‘‘သုဒ္ဓာ သုဒ္ဓေဟိ သံဝာသံ၊ ကပ္ပယဝ္ဟော ပတိသ္သတာ။
‘‘‘Suddhā suddhehi saṃvāsaṃ, kappayavho patissatā;
တတော သမဂ္ဂာ နိပကာ၊ ဒုက္ခသ္သန္တံ ကရိသ္သထာ’’’တိ။
Tato samaggā nipakā, dukkhassantaṃ karissathā’’’ti.
မဏိရတနပဉ္ဟော သတ္တမော။
Maṇiratanapañho sattamo.
