| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
7. මණිරතනඞ්‌ගපඤ්‌හො
7. Maṇiratanaṅgapañho
7. ‘‘භන්‌තෙ නාගසෙන, ‘මණිරතනස්‌ස තීණි අඞ්‌ගානි ගහෙතබ්‌බානී’ති යං වදෙසි, කතමානි තානි තීණි අඞ්‌ගානි ගහෙතබ්‌බානී’’ති? ‘‘යථා, මහාරාජ, මණිරතනං එකන්‌තපරිසුද්‌ධං, එවමෙව ඛො, මහාරාජ, යොගිනා යොගාවචරෙන එකන්‌තපරිසුද්‌ධාජීවෙන භවිතබ්‌බං. ඉදං, මහාරාජ, මණිරතනස්‌ස පඨමං අඞ්‌ගං ගහෙතබ්‌බං.
7. ‘‘Bhante nāgasena, ‘maṇiratanassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, maṇiratanaṃ ekantaparisuddhaṃ, evameva kho, mahārāja, yoginā yogāvacarena ekantaparisuddhājīvena bhavitabbaṃ. Idaṃ, mahārāja, maṇiratanassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, මණිරතනං න කෙනචි සද්‌ධිං මිස්‌සීයති, එවමෙව ඛො, මහාරාජ, යොගිනා යොගාවචරෙන පාපෙහි පාපසහායෙහි සද්‌ධිං න මිස්‌සිතබ්‌බං. ඉදං, මහාරාජ, මණිරතනස්‌ස දුතියං අඞ්‌ගං ගහෙතබ්‌බං.
‘‘Puna caparaṃ, mahārāja, maṇiratanaṃ na kenaci saddhiṃ missīyati, evameva kho, mahārāja, yoginā yogāvacarena pāpehi pāpasahāyehi saddhiṃ na missitabbaṃ. Idaṃ, mahārāja, maṇiratanassa dutiyaṃ aṅgaṃ gahetabbaṃ.
‘‘පුන චපරං, මහාරාජ, මණිරතනං ජාතිරතනෙහි යොජීයති, එවමෙව ඛො, මහාරාජ, යොගිනා යොගාවචරෙන උත්‌තමවරජාතිමන්‌තෙහි සද්‌ධිං සංවසිතබ්‌බං, පටිපන්‌නකඵලට්‌ඨසෙක්‌ඛඵලසමඞ්‌ගීහි සොතාපන්‌නසකදාගාමිඅනාගාමිඅරහන්‌තතෙවිජ්‌ජඡළභිඤ්‌ඤසමණමණිරතනෙහි සද්‌ධිං සංවසිතබ්‌බං. ඉදං, මහාරාජ, මණිරතනස්‌ස තතියං අඞ්‌ගං ගහෙතබ්‌බං. භාසිතම්‌පෙතං, මහාරාජ, භගවතා දෙවාතිදෙවෙන සුත්‌තනිපාතෙ –
‘‘Puna caparaṃ, mahārāja, maṇiratanaṃ jātiratanehi yojīyati, evameva kho, mahārāja, yoginā yogāvacarena uttamavarajātimantehi saddhiṃ saṃvasitabbaṃ, paṭipannakaphalaṭṭhasekkhaphalasamaṅgīhi sotāpannasakadāgāmianāgāmiarahantatevijjachaḷabhiññasamaṇamaṇiratanehi saddhiṃ saṃvasitabbaṃ. Idaṃ, mahārāja, maṇiratanassa tatiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena suttanipāte –
‘‘‘සුද්‌ධා සුද්‌ධෙහි සංවාසං, කප්‌පයව්‌හො පතිස්‌සතා;
‘‘‘Suddhā suddhehi saṃvāsaṃ, kappayavho patissatā;
තතො සමග්‌ගා නිපකා, දුක්‌ඛස්‌සන්‌තං කරිස්‌සථා’’’ති.
Tato samaggā nipakā, dukkhassantaṃ karissathā’’’ti.
මණිරතනපඤ්‌හො සත්‌තමො.
Maṇiratanapañho sattamo.
