| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༧. མཎིརཏནངྒཔཉྷོ
7. Maṇiratanaṅgapañho
༧. ‘‘བྷནྟེ ནཱགསེན, ‘མཎིརཏནསྶ ཏཱིཎི ཨངྒཱནི གཧེཏབྦཱནཱི’ཏི ཡཾ ཝདེསི, ཀཏམཱནི ཏཱནི ཏཱིཎི ཨངྒཱནི གཧེཏབྦཱནཱི’’ཏི? ‘‘ཡཐཱ, མཧཱརཱཛ, མཎིརཏནཾ ཨེཀནྟཔརིསུདྡྷཾ, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨེཀནྟཔརིསུདྡྷཱཛཱིཝེན བྷཝིཏབྦཾ། ཨིདཾ, མཧཱརཱཛ, མཎིརཏནསྶ པཋམཾ ཨངྒཾ གཧེཏབྦཾ།
7. ‘‘Bhante nāgasena, ‘maṇiratanassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, maṇiratanaṃ ekantaparisuddhaṃ, evameva kho, mahārāja, yoginā yogāvacarena ekantaparisuddhājīvena bhavitabbaṃ. Idaṃ, mahārāja, maṇiratanassa paṭhamaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, མཎིརཏནཾ ན ཀེནཙི སདྡྷིཾ མིསྶཱིཡཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན པཱཔེཧི པཱཔསཧཱཡེཧི སདྡྷིཾ ན མིསྶིཏབྦཾ། ཨིདཾ, མཧཱརཱཛ, མཎིརཏནསྶ དུཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, maṇiratanaṃ na kenaci saddhiṃ missīyati, evameva kho, mahārāja, yoginā yogāvacarena pāpehi pāpasahāyehi saddhiṃ na missitabbaṃ. Idaṃ, mahārāja, maṇiratanassa dutiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, མཎིརཏནཾ ཛཱཏིརཏནེཧི ཡོཛཱིཡཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨུཏྟམཝརཛཱཏིམནྟེཧི སདྡྷིཾ སཾཝསིཏབྦཾ, པཊིཔནྣཀཕལཊྛསེཀྑཕལསམངྒཱིཧི སོཏཱཔནྣསཀདཱགཱམིཨནཱགཱམིཨརཧནྟཏེཝིཛྫཚལ༹བྷིཉྙསམཎམཎིརཏནེཧི སདྡྷིཾ སཾཝསིཏབྦཾ། ཨིདཾ, མཧཱརཱཛ, མཎིརཏནསྶ ཏཏིཡཾ ཨངྒཾ གཧེཏབྦཾ། བྷཱསིཏམྤེཏཾ, མཧཱརཱཛ, བྷགཝཏཱ དེཝཱཏིདེཝེན སུཏྟནིཔཱཏེ –
‘‘Puna caparaṃ, mahārāja, maṇiratanaṃ jātiratanehi yojīyati, evameva kho, mahārāja, yoginā yogāvacarena uttamavarajātimantehi saddhiṃ saṃvasitabbaṃ, paṭipannakaphalaṭṭhasekkhaphalasamaṅgīhi sotāpannasakadāgāmianāgāmiarahantatevijjachaḷabhiññasamaṇamaṇiratanehi saddhiṃ saṃvasitabbaṃ. Idaṃ, mahārāja, maṇiratanassa tatiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena suttanipāte –
‘‘‘སུདྡྷཱ སུདྡྷེཧི སཾཝཱསཾ, ཀཔྤཡཝ྄ཧོ པཏིསྶཏཱ།
‘‘‘Suddhā suddhehi saṃvāsaṃ, kappayavho patissatā;
ཏཏོ སམགྒཱ ནིཔཀཱ, དུཀྑསྶནྟཾ ཀརིསྶཐཱ’’’ཏི༎
Tato samaggā nipakā, dukkhassantaṃ karissathā’’’ti.
མཎིརཏནཔཉྷོ སཏྟམོ།
Maṇiratanapañho sattamo.
