| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[285] 5. ман̣исуугараж̇аад̇агаван̣н̣анаа
[285] 5. Maṇisūkarajātakavaṇṇanā
д̣̇арияаа сад̇д̇а вассаанийд̇и ид̣̇ам̣ сад̇т̇аа ж̇зд̇аванз вихаранд̇о сунд̣̇ариймааран̣ам̣ аараб̣бха гат̇зси. д̇зна ко бана самаязна бхаг̇аваа саггад̇о ход̇и г̇аругад̇од̇и вад̇т̇у уд̣̇аанз (уд̣̇аа. 38) ааг̇ад̇амзва. аяам̣ банзд̇т̇а сан̇кзбо – бхаг̇авад̇о гира бхигкусан̇гхасса жа бан̃жаннам̣ махаанад̣̇ийнам̣ махогхасад̣̇исз лаабхасаггаарз уббаннз хад̇алаабхасаггаараа ан̃н̃ад̇ид̇т̇ияаа суурияуг̇г̇аманагаалз каж̇ж̇обанагаа вияа ниббабхаа худ̇ваа згад̇о саннибад̇ид̇ваа манд̇аяим̣су – ‘‘маяам̣ саман̣асса г̇од̇амасса уббаннагаалад̇о бадтааяа хад̇алаабхасаггаараа, на гожи амхаагам̣ ад̇т̇ибхаавамби ж̇аанаад̇и, гзна ну ко сад̣̇д̇хим̣ згад̇о худ̇ваа саман̣асса г̇од̇амасса аван̣н̣ам̣ уббаад̣̇зд̇ваа лаабхасаггаарамасса анд̇арад̇хаабзяяаамаа’’д̇и. ат̇а нзсам̣ зд̇ад̣̇ахоси – ‘‘сунд̣̇арияаа сад̣̇д̇хим̣ згад̇о худ̇ваа саггун̣иссаамаа’’д̇и.
Dariyāsatta vassānīti idaṃ satthā jetavane viharanto sundarīmāraṇaṃ ārabbha kathesi. Tena kho pana samayena bhagavā sakkato hoti garukatoti vatthu udāne (udā. 38) āgatameva. Ayaṃ panettha saṅkhepo – bhagavato kira bhikkhusaṅghassa ca pañcannaṃ mahānadīnaṃ mahoghasadise lābhasakkāre uppanne hatalābhasakkārā aññatitthiyā sūriyuggamanakāle khajjopanakā viya nippabhā hutvā ekato sannipatitvā mantayiṃsu – ‘‘mayaṃ samaṇassa gotamassa uppannakālato paṭṭhāya hatalābhasakkārā, na koci amhākaṃ atthibhāvampi jānāti, kena nu kho saddhiṃ ekato hutvā samaṇassa gotamassa avaṇṇaṃ uppādetvā lābhasakkāramassa antaradhāpeyyāmā’’ti. Atha nesaṃ etadahosi – ‘‘sundariyā saddhiṃ ekato hutvā sakkuṇissāmā’’ti.
д̇з згад̣̇ивасам̣ сунд̣̇арим̣ д̇ид̇т̇ияаараамам̣ бависид̇ваа ванд̣̇ид̇ваа тид̇ам̣ наалабим̣су. саа бунаббунам̣ саллабанд̇ийби бадиважанам̣ алабхид̇ваа ‘‘аби ну, аяяаа, д̇умхз гзнажи вихзтид̇аад̇т̇аа’’д̇и бужчи. ‘‘гим̣, бхаг̇ини, саман̣ам̣ г̇од̇амам̣ амхз вихзтзд̇ваа хад̇алаабхасаггаарз гад̇ваа вижаранд̇ам̣ на бассасий’’д̇и. саа звамааха – ‘‘маяаа зд̇т̇а гим̣ гаад̇ум̣ ваддад̇ий’’д̇и? д̇вам̣ коси, бхаг̇ини, абхируубаа собхаг̇г̇аббад̇д̇аа, саман̣асса г̇од̇амасса аяасам̣ ааробзд̇ваа махааж̇анам̣ д̇ава гат̇ам̣ г̇аахаабзд̇ваа хад̇алаабхасаггаарам̣ гарохий’’д̇и? саа ‘‘саад̇хуу’’д̇и самбадижчид̇ваа ванд̣̇ид̇ваа багганд̇аа. д̇ад̇о бадтааяа маалааг̇анд̇хавилзбанагаббуурагадугапалаад̣̇ийни г̇ахзд̇ваа сааяам̣ махааж̇анасса сад̇т̇у д̇хаммад̣̇зсанам̣ суд̇ваа наг̇арам̣ бависанагаалз ж̇зд̇аванаабхимукий г̇ажчад̇и. ‘‘гахам̣ г̇ажчасий’’д̇и жа будтаа ‘‘саман̣асса г̇од̇амасса санд̇игам̣, ахан̃хи д̇зна сад̣̇д̇хим̣ згаг̇анд̇хагудияам̣ васаамий’’д̇и вад̇ваа ан̃н̃ад̇арасмим̣ д̇ид̇т̇ияаараамз васид̇ваа баад̇ова ж̇зд̇аванамаг̇г̇ам̣ од̇арид̇ваа наг̇араабхимукий г̇ажчад̇и. ‘‘гим̣, сунд̣̇ари, гахам̣ г̇ад̇аасий’’д̇и жа будтаа ‘‘саман̣зна г̇од̇амзна сад̣̇д̇хим̣ згаг̇анд̇хагудияам̣ васид̇ваа д̇ам̣ гилзсарад̇ияаа рамаабзд̇ваа ааг̇ад̇аамхий’’д̇и вад̣̇ад̇и.
Te ekadivasaṃ sundariṃ titthiyārāmaṃ pavisitvā vanditvā ṭhitaṃ nālapiṃsu. Sā punappunaṃ sallapantīpi paṭivacanaṃ alabhitvā ‘‘api nu, ayyā, tumhe kenaci viheṭhitātthā’’ti pucchi. ‘‘Kiṃ, bhagini, samaṇaṃ gotamaṃ amhe viheṭhetvā hatalābhasakkāre katvā vicarantaṃ na passasī’’ti. Sā evamāha – ‘‘mayā ettha kiṃ kātuṃ vaṭṭatī’’ti? Tvaṃ khosi, bhagini, abhirūpā sobhaggappattā, samaṇassa gotamassa ayasaṃ āropetvā mahājanaṃ tava kathaṃ gāhāpetvā hatalābhasakkāraṃ karohī’’ti? Sā ‘‘sādhū’’ti sampaṭicchitvā vanditvā pakkantā. Tato paṭṭhāya mālāgandhavilepanakappūrakaṭukaphalādīni gahetvā sāyaṃ mahājanassa satthu dhammadesanaṃ sutvā nagaraṃ pavisanakāle jetavanābhimukhī gacchati. ‘‘Kahaṃ gacchasī’’ti ca puṭṭhā ‘‘samaṇassa gotamassa santikaṃ, ahañhi tena saddhiṃ ekagandhakuṭiyaṃ vasāmī’’ti vatvā aññatarasmiṃ titthiyārāme vasitvā pātova jetavanamaggaṃ otaritvā nagarābhimukhī gacchati. ‘‘Kiṃ, sundari, kahaṃ gatāsī’’ti ca puṭṭhā ‘‘samaṇena gotamena saddhiṃ ekagandhakuṭiyaṃ vasitvā taṃ kilesaratiyā ramāpetvā āgatāmhī’’ti vadati.
ат̇а нам̣ гад̇ибаахажжаязна д̇худ̇д̇аанам̣ гахаабан̣з д̣̇ад̇ваа ‘‘г̇ажчат̇а сунд̣̇арим̣ маарзд̇ваа саман̣асса г̇од̇амасса г̇анд̇хагудияаа самийбз маалаагажаваранд̇арз нигкибид̇ваа зт̇аа’’д̇и вад̣̇им̣су, д̇з д̇ат̇аа агам̣су. д̇ад̇о д̇ид̇т̇ияаа ‘‘сунд̣̇арим̣ на бассаамаа’’д̇и голаахалам̣ гад̇ваа ран̃н̃о аарожзд̇ваа ‘‘гахам̣ во аасан̇гаа’’д̇и вуд̇д̇аа ‘‘имзсу д̣̇ивасзсу ж̇зд̇аванз васад̇и, д̇ад̇рассаа бавад̇д̇им̣ на ж̇аанаамаа’’д̇и вад̇ваа ‘‘д̇зна хи г̇ажчат̇а, нам̣ вижинат̇аа’’д̇и ран̃н̃аа анун̃н̃аад̇аа ад̇д̇ано убадтаагз г̇ахзд̇ваа ж̇зд̇аванам̣ г̇анд̇ваа вижинанд̇аа маалаагажаваранд̇арз д̣̇исваа ман̃жагам̣ ааробзд̇ваа наг̇арам̣ бавзсзд̇ваа ‘‘саман̣асса г̇од̇амасса саавагаа ‘сад̇т̇аараа гад̇абаабагаммам̣ бадижчаад̣̇зссаамаа’д̇и сунд̣̇арим̣ маарзд̇ваа маалаагажаваранд̇арз нигкибим̣суу’’д̇и ран̃н̃о аарожзсум̣, рааж̇аа ‘‘д̇зна хи г̇ажчат̇а, наг̇арам̣ аахин̣д̣ат̇аа’’д̇и ааха. д̇з наг̇аравийт̇ийсу ‘‘бассат̇а саман̣аанам̣ сагяабуд̇д̇ияаанам̣ гамма’’нд̇иаад̣̇ийни виравид̇ваа буна ран̃н̃о нивзсанад̣̇ваарам̣ аг̇амам̣су.
Atha naṃ katipāhaccayena dhuttānaṃ kahāpaṇe datvā ‘‘gacchatha sundariṃ māretvā samaṇassa gotamassa gandhakuṭiyā samīpe mālākacavarantare nikkhipitvā ethā’’ti vadiṃsu, te tathā akaṃsu. Tato titthiyā ‘‘sundariṃ na passāmā’’ti kolāhalaṃ katvā rañño ārocetvā ‘‘kahaṃ vo āsaṅkā’’ti vuttā ‘‘imesu divasesu jetavane vasati, tatrassā pavattiṃ na jānāmā’’ti vatvā ‘‘tena hi gacchatha, naṃ vicinathā’’ti raññā anuññātā attano upaṭṭhāke gahetvā jetavanaṃ gantvā vicinantā mālākacavarantare disvā mañcakaṃ āropetvā nagaraṃ pavesetvā ‘‘samaṇassa gotamassa sāvakā ‘satthārā katapāpakammaṃ paṭicchādessāmā’ti sundariṃ māretvā mālākacavarantare nikkhipiṃsū’’ti rañño ārocesuṃ, rājā ‘‘tena hi gacchatha, nagaraṃ āhiṇḍathā’’ti āha. Te nagaravīthīsu ‘‘passatha samaṇānaṃ sakyaputtiyānaṃ kamma’’ntiādīni viravitvā puna rañño nivesanadvāraṃ agamaṃsu.
рааж̇аа сунд̣̇арияаа сарийрам̣ аамагасусаанз аддагам̣ ааробзд̇ваа рагкаабзси. саавад̇т̇иваасино табзд̇ваа арияасаавагз сзсаа язбхуяязна ‘‘бассат̇а саман̣аанам̣ сагяабуд̇д̇ияаанам̣ гамма’’нд̇иаад̣̇ийни вад̇ваа анд̇онаг̇арз жа б̣ахинаг̇арз жа бхигкуу аггосанд̇аа барибхаасанд̇аа вижаранд̇и. бхигкуу д̇ам̣ бавад̇д̇им̣ д̇ат̇ааг̇ад̇асса аарожзсум̣. сад̇т̇аа ‘‘д̇зна хи д̇умхзби д̇з мануссз звам̣ бадижод̣̇зт̇аа’’д̇и –
Rājā sundariyā sarīraṃ āmakasusāne aṭṭakaṃ āropetvā rakkhāpesi. Sāvatthivāsino ṭhapetvā ariyasāvake sesā yebhuyyena ‘‘passatha samaṇānaṃ sakyaputtiyānaṃ kamma’’ntiādīni vatvā antonagare ca bahinagare ca bhikkhū akkosantā paribhāsantā vicaranti. Bhikkhū taṃ pavattiṃ tathāgatassa ārocesuṃ. Satthā ‘‘tena hi tumhepi te manusse evaṃ paṭicodethā’’ti –
‘‘абхууд̇аваад̣̇ий нираяам̣ убзд̇и, яо вааби гад̇ваа на гароми жааха;
‘‘Abhūtavādī nirayaṃ upeti, yo vāpi katvā na karomi cāha;
убхоби д̇з бзжжа самаа бхаванд̇и, нихийнагаммаа мануж̇аа барад̇т̇аа’’д̇и. (уд̣̇аа. 38) –
Ubhopi te pecca samā bhavanti, nihīnakammā manujā paratthā’’ti. (udā. 38) –
имам̣ г̇аат̇амааха.
Imaṃ gāthamāha.
рааж̇аа ‘‘сунд̣̇арияаа ан̃н̃зхи маарид̇абхаавам̣ ж̇аанаат̇аа’’д̇и бурисз бзсзси. д̇зби ко д̇худ̇д̇аа д̇зхи гахаабан̣зхи сурам̣ биванд̇аа ан̃н̃аман̃н̃ам̣ галахам̣ гаронд̇и. д̇ад̇т̇зго звамааха – ‘‘д̇вам̣ сунд̣̇арим̣ згаббахаарзнзва маарзд̇ваа маалаагажаваранд̇арз нигкибид̇ваа д̇ад̇о лад̣̇д̇хагахаабан̣зхи сурам̣ биваси, ход̇у ход̇уу’’д̇и. рааж̇абурисаа д̇з д̇худ̇д̇з г̇ахзд̇ваа ран̃н̃о д̣̇ассзсум̣. ат̇а д̇з рааж̇аа ‘‘д̇умхзхи маарид̇аа’’д̇и бужчи. ‘‘аама, д̣̇зваа’’д̇и. ‘‘гзхи маараабид̇аа’’д̇и? ‘‘ан̃н̃ад̇ид̇т̇иязхи, д̣̇зваа’’д̇и. рааж̇аа д̇ид̇т̇ияз баггосаабзд̇ваа сунд̣̇арим̣ угкибаабзд̇ваа ‘‘г̇ажчат̇а д̇умхз, звам̣ вад̣̇анд̇аа наг̇арам̣ аахин̣д̣ат̇а ‘аяам̣ сунд̣̇арий саман̣асса г̇од̇амасса аван̣н̣ам̣ ааробзд̇угаамзхи амхзхи маараабид̇аа, нзва саман̣асса г̇од̇амасса, на г̇од̇амасаавагаанам̣ д̣̇осо ад̇т̇и, амхаагам̣язва д̣̇осо’’’д̇и аан̣аабзси. д̇з д̇ат̇аа агам̣су. б̣ааламахааж̇ано д̇ад̣̇аа сад̣̇д̣̇ахи, д̇ид̇т̇ияааби бурисавад̇хад̣̇ан̣д̣зна балиб̣уд̣̇д̇хаа. д̇ад̇о бадтааяа б̣уд̣̇д̇хаанам̣ маханд̇ад̇аро лаабхасаггааро ахоси.
Rājā ‘‘sundariyā aññehi māritabhāvaṃ jānāthā’’ti purise pesesi. Tepi kho dhuttā tehi kahāpaṇehi suraṃ pivantā aññamaññaṃ kalahaṃ karonti. Tattheko evamāha – ‘‘tvaṃ sundariṃ ekappahāreneva māretvā mālākacavarantare nikkhipitvā tato laddhakahāpaṇehi suraṃ pivasi, hotu hotū’’ti. Rājapurisā te dhutte gahetvā rañño dassesuṃ. Atha te rājā ‘‘tumhehi māritā’’ti pucchi. ‘‘Āma, devā’’ti. ‘‘Kehi mārāpitā’’ti? ‘‘Aññatitthiyehi, devā’’ti. Rājā titthiye pakkosāpetvā sundariṃ ukkhipāpetvā ‘‘gacchatha tumhe, evaṃ vadantā nagaraṃ āhiṇḍatha ‘ayaṃ sundarī samaṇassa gotamassa avaṇṇaṃ āropetukāmehi amhehi mārāpitā, neva samaṇassa gotamassa, na gotamasāvakānaṃ doso atthi, amhākaṃyeva doso’’’ti āṇāpesi. Te tathā akaṃsu. Bālamahājano tadā saddahi, titthiyāpi purisavadhadaṇḍena palibuddhā. Tato paṭṭhāya buddhānaṃ mahantataro lābhasakkāro ahosi.
ат̇згад̣̇ивасам̣ бхигкуу д̇хаммасабхааяам̣ гат̇ам̣ самудтаабзсум̣ – ‘‘аавусо, д̇ид̇т̇ияаа ‘б̣уд̣̇д̇хаанам̣ гаал̣агабхаавам̣ уббаад̣̇зссаамаа’д̇и саяам̣ гаал̣агаа ж̇аад̇аа, б̣уд̣̇д̇хаанам̣ бана маханд̇ад̇аро лаабхасаггааро уд̣̇абаад̣̇ий’’д̇и. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з ‘‘на, бхигкавз, саггаа б̣уд̣̇д̇хаанам̣ сам̣гилзсам̣ уббаад̣̇зд̇ум̣, б̣уд̣̇д̇хаанам̣ сам̣гилидтабхаавагаран̣ам̣ наама ж̇аад̇иман̣ино гилидтабхаавагаран̣асад̣̇исам̣, буб̣б̣з ж̇аад̇иман̣им̣ ‘гилидтам̣ гариссаамаа’д̇и вааяаманд̇ааби наасагким̣су гилидтам̣ гаад̇у’’нд̇и вад̇ваа д̇зхи яаажид̇о ад̇ийд̇ам̣ аахари.
Athekadivasaṃ bhikkhū dhammasabhāyaṃ kathaṃ samuṭṭhāpesuṃ – ‘‘āvuso, titthiyā ‘buddhānaṃ kāḷakabhāvaṃ uppādessāmā’ti sayaṃ kāḷakā jātā, buddhānaṃ pana mahantataro lābhasakkāro udapādī’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, sakkā buddhānaṃ saṃkilesaṃ uppādetuṃ, buddhānaṃ saṃkiliṭṭhabhāvakaraṇaṃ nāma jātimaṇino kiliṭṭhabhāvakaraṇasadisaṃ, pubbe jātimaṇiṃ ‘kiliṭṭhaṃ karissāmā’ti vāyamantāpi nāsakkhiṃsu kiliṭṭhaṃ kātu’’nti vatvā tehi yācito atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о згасмим̣ г̇аамагз б̣раахман̣агулз ниб̣б̣ад̇д̇ид̇ваа ваяаббад̇д̇о гаамзсу аад̣̇ийнавам̣ д̣̇исваа нигкамид̇ваа химаванд̇абад̣̇зсз д̇иссо баб̣б̣ад̇арааж̇ияо ад̇иггамид̇ваа д̇аабасо худ̇ваа бан̣н̣асаалааяам̣ васи. д̇ассаа авид̣̇уурз ман̣иг̇ухаа ахоси, д̇ад̇т̇а д̇им̣самад̇д̇аа суугараа васанд̇и, г̇ухааяа авид̣̇уурз зго сийхо жарад̇и, д̇асса ман̣имхи чааяаа бан̃н̃ааяад̇и. суугараа сийхажчааяам̣ д̣̇исваа бхийд̇аа уд̇расд̇аа аббамам̣салохид̇аа ахзсум̣. д̇з ‘‘имасса ман̣ино виббасаннад̇д̇аа аяам̣ чааяаа бан̃н̃ааяад̇и, имам̣ ман̣им̣ сам̣гилидтам̣ виван̣н̣ам̣ гаромаа’’д̇и жинд̇зд̇ваа авид̣̇уурз згам̣ сарам̣ г̇анд̇ваа галалз баваддзд̇ваа ааг̇анд̇ваа д̇ам̣ ман̣им̣ гхам̣санд̇и. со суугараломзхи гхам̣сияамаано виббасаннад̇аро ахоси. суугараа убааяам̣ абассанд̇аа ‘‘имасса ман̣ино виван̣н̣агаран̣уубааяам̣ д̇аабасам̣ бужчиссаамаа’’д̇и б̣од̇хисад̇д̇ам̣ убасан̇гамид̇ваа ванд̣̇ид̇ваа згаманд̇ам̣ тид̇аа буримаа д̣̇вз г̇аат̇аа уд̣̇аахарим̣су –
Atīte bārāṇasiyaṃ brahmadatte rajjaṃ kārente bodhisatto ekasmiṃ gāmake brāhmaṇakule nibbattitvā vayappatto kāmesu ādīnavaṃ disvā nikkhamitvā himavantapadese tisso pabbatarājiyo atikkamitvā tāpaso hutvā paṇṇasālāyaṃ vasi. Tassā avidūre maṇiguhā ahosi, tattha tiṃsamattā sūkarā vasanti, guhāya avidūre eko sīho carati, tassa maṇimhi chāyā paññāyati. Sūkarā sīhacchāyaṃ disvā bhītā utrastā appamaṃsalohitā ahesuṃ. Te ‘‘imassa maṇino vippasannattā ayaṃ chāyā paññāyati, imaṃ maṇiṃ saṃkiliṭṭhaṃ vivaṇṇaṃ karomā’’ti cintetvā avidūre ekaṃ saraṃ gantvā kalale pavaṭṭetvā āgantvā taṃ maṇiṃ ghaṃsanti. So sūkaralomehi ghaṃsiyamāno vippasannataro ahosi. Sūkarā upāyaṃ apassantā ‘‘imassa maṇino vivaṇṇakaraṇūpāyaṃ tāpasaṃ pucchissāmā’’ti bodhisattaṃ upasaṅkamitvā vanditvā ekamantaṃ ṭhitā purimā dve gāthā udāhariṃsu –
103.
103.
‘‘д̣̇арияаа сад̇д̇а вассаани, д̇им̣самад̇д̇аа васаамасз;
‘‘Dariyā satta vassāni, tiṃsamattā vasāmase;
хан̃н̃аама ман̣ино аабхам̣, ид̇и но манд̇арам̣ аху.
Haññāma maṇino ābhaṃ, iti no mantaraṃ ahu.
104.
104.
‘‘яаавад̇аа ман̣им̣ гхам̣саама, бхияяо вод̣̇ааяад̇з ман̣и;
‘‘Yāvatā maṇiṃ ghaṃsāma, bhiyyo vodāyate maṇi;
ид̣̇ан̃жад̣̇аани бужчаама, гим̣ гижжам̣ ид̇ха ман̃н̃асий’’д̇и.
Idañcadāni pucchāma, kiṃ kiccaṃ idha maññasī’’ti.
д̇ад̇т̇а д̣̇арияаад̇и ман̣иг̇ухааяам̣. васаамасзд̇и васаама. хан̃н̃аамаад̇и ханиссаама, маяамби виван̣н̣ам̣ гариссаама. ид̣̇ан̃жад̣̇аани бужчаамаад̇и ид̣̇аани маяам̣ ‘‘гзна гааран̣зна аяам̣ ман̣и гилиссамаано вод̣̇ааяад̇з’’д̇и ид̣̇ам̣ д̇ам̣ бужчаама. ‘‘гим̣ гижжам̣ ‘ид̇ха ман̃н̃асий’д̇и имасмим̣ ад̇т̇з д̇вам̣ имам̣ гижжам̣ гинд̇и ман̃н̃асий’’д̇и.
Tattha dariyāti maṇiguhāyaṃ. Vasāmaseti vasāma. Haññāmāti hanissāma, mayampi vivaṇṇaṃ karissāma. Idañcadāni pucchāmāti idāni mayaṃ ‘‘kena kāraṇena ayaṃ maṇi kilissamāno vodāyate’’ti idaṃ taṃ pucchāma. ‘‘Kiṃ kiccaṃ ‘idha maññasī’ti imasmiṃ atthe tvaṃ imaṃ kiccaṃ kinti maññasī’’ti.
ат̇а нзсам̣ аажигканд̇о б̣од̇хисад̇д̇о д̇ад̇ияам̣ г̇аат̇амааха –
Atha nesaṃ ācikkhanto bodhisatto tatiyaṃ gāthamāha –
105.
105.
‘‘аяам̣ ман̣и взл̣урияо, агаажо вимало субхо;
‘‘Ayaṃ maṇi veḷuriyo, akāco vimalo subho;
наасса саггаа сирим̣ ханд̇ум̣, абаггамат̇а суугараа’’д̇и.
Nāssa sakkā siriṃ hantuṃ, apakkamatha sūkarā’’ti.
д̇ад̇т̇а агаажод̇и агаггасо. субход̇и собхано. сиринд̇и бабхам̣. абаггамат̇аад̇и имасса ман̣исса бабхаа наасзд̇ум̣ на саггаа, д̇умхз бана имам̣ ман̣иг̇ухам̣ бахааяа ан̃н̃ад̇т̇а г̇ажчат̇аад̇и.
Tattha akācoti akakkaso. Subhoti sobhano. Sirinti pabhaṃ. Apakkamathāti imassa maṇissa pabhā nāsetuṃ na sakkā, tumhe pana imaṃ maṇiguhaṃ pahāya aññattha gacchathāti.
д̇з д̇асса гат̇ам̣ суд̇ваа д̇ат̇аа агам̣су. б̣од̇хисад̇д̇о жхаанам̣ уббаад̣̇зд̇ваа б̣рахмалогабарааяан̣о ахоси.
Te tassa kathaṃ sutvā tathā akaṃsu. Bodhisatto jhānaṃ uppādetvā brahmalokaparāyaṇo ahosi.
сад̇т̇аа имам̣ д̇хаммад̣̇зсанам̣ аахарид̇ваа ж̇аад̇агам̣ самод̇хаанзси – ‘‘д̇ад̣̇аа д̇аабасо ахамзва ахоси’’нд̇и.
Satthā imaṃ dhammadesanaṃ āharitvā jātakaṃ samodhānesi – ‘‘tadā tāpaso ahameva ahosi’’nti.
ман̣исуугараж̇аад̇агаван̣н̣анаа бан̃жамаа.
Maṇisūkarajātakavaṇṇanā pañcamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 285. ман̣исуугараж̇аад̇агам̣ • 285. Maṇisūkarajātakaṃ
