| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. মঞ্ঞমানসুত্তং
2. Maññamānasuttaṃ
৬৪. সাৰত্থিনিদানং। অথ খো অঞ্ঞতরো ভিক্খু…পে॰… একমন্তং নিসিন্নো খো সো ভিক্খু ভগৰন্তং এতদৰোচ – ‘‘সাধু মে, ভন্তে, ভগৰা সংখিত্তেন ধম্মং দেসেতু…পে॰… আতাপী পহিতত্তো ৰিহরেয্য’’ন্তি। ‘‘মঞ্ঞমানো খো, ভিক্খু, বদ্ধো মারস্স; অমঞ্ঞমানো মুত্তো পাপিমতো’’তি। ‘‘অঞ্ঞাতং ভগৰা, অঞ্ঞাতং সুগতা’’তি।
64. Sāvatthinidānaṃ. Atha kho aññataro bhikkhu…pe… ekamantaṃ nisinno kho so bhikkhu bhagavantaṃ etadavoca – ‘‘sādhu me, bhante, bhagavā saṃkhittena dhammaṃ desetu…pe… ātāpī pahitatto vihareyya’’nti. ‘‘Maññamāno kho, bhikkhu, baddho mārassa; amaññamāno mutto pāpimato’’ti. ‘‘Aññātaṃ bhagavā, aññātaṃ sugatā’’ti.
‘‘যথা কথং পন ত্ৰং, ভিক্খু, মযা সংখিত্তেন ভাসিতস্স ৰিত্থারেন অত্থং আজানাসী’’তি? ‘‘রূপং খো, ভন্তে, মঞ্ঞমানো বদ্ধো মারস্স; অমঞ্ঞমানো মুত্তো পাপিমতো। ৰেদনং… সঞ্ঞং… সঙ্খারে… ৰিঞ্ঞাণং মঞ্ঞমানো বদ্ধো মারস্স; অমঞ্ঞমানো মুত্তো পাপিমতো। ইমস্স খ্ৰাহং, ভন্তে, ভগৰতা সংখিত্তেন ভাসিতস্স এৰং ৰিত্থারেন অত্থং আজানামী’’তি।
‘‘Yathā kathaṃ pana tvaṃ, bhikkhu, mayā saṃkhittena bhāsitassa vitthārena atthaṃ ājānāsī’’ti? ‘‘Rūpaṃ kho, bhante, maññamāno baddho mārassa; amaññamāno mutto pāpimato. Vedanaṃ… saññaṃ… saṅkhāre… viññāṇaṃ maññamāno baddho mārassa; amaññamāno mutto pāpimato. Imassa khvāhaṃ, bhante, bhagavatā saṃkhittena bhāsitassa evaṃ vitthārena atthaṃ ājānāmī’’ti.
‘‘সাধু সাধু , ভিক্খু! সাধু খো ত্ৰং, ভিক্খু, মযা সংখিত্তেন ভাসিতস্স ৰিত্থারেন অত্থং আজানাসি। রূপং খো, ভিক্খু, মঞ্ঞমানো বদ্ধো মারস্স; অমঞ্ঞমানো মুত্তো পাপিমতো। ৰেদনং… সঞ্ঞং… সঙ্খারে… ৰিঞ্ঞাণং মঞ্ঞমানো বদ্ধো মারস্স; অমঞ্ঞমানো মুত্তো পাপিমতো। ইমস্স খো, ভিক্খু, মযা সংখিত্তেন ভাসিতস্স এৰং ৰিত্থারেন অত্থো দট্ঠব্বো’’তি…পে॰… অঞ্ঞতরো চ পন সো ভিক্খু অরহতং অহোসীতি। দুতিযং।
‘‘Sādhu sādhu , bhikkhu! Sādhu kho tvaṃ, bhikkhu, mayā saṃkhittena bhāsitassa vitthārena atthaṃ ājānāsi. Rūpaṃ kho, bhikkhu, maññamāno baddho mārassa; amaññamāno mutto pāpimato. Vedanaṃ… saññaṃ… saṅkhāre… viññāṇaṃ maññamāno baddho mārassa; amaññamāno mutto pāpimato. Imassa kho, bhikkhu, mayā saṃkhittena bhāsitassa evaṃ vitthārena attho daṭṭhabbo’’ti…pe… aññataro ca pana so bhikkhu arahataṃ ahosīti. Dutiyaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. মঞ্ঞমানসুত্তৰণ্ণনা • 2. Maññamānasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২-৬. মঞ্ঞমানসুত্তাদিৰণ্ণনা • 2-6. Maññamānasuttādivaṇṇanā
