| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
២. មញ្ញមានសុត្តំ
2. Maññamānasuttaṃ
៦៤. សាវត្ថិនិទានំ។ អថ ខោ អញ្ញតរោ ភិក្ខុ…បេ.… ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘សាធុ មេ, ភន្តេ, ភគវា សំខិត្តេន ធម្មំ ទេសេតុ…បេ.… អាតាបី បហិតត្តោ វិហរេយ្យ’’ន្តិ។ ‘‘មញ្ញមានោ ខោ, ភិក្ខុ, ពទ្ធោ មារស្ស; អមញ្ញមានោ មុត្តោ បាបិមតោ’’តិ។ ‘‘អញ្ញាតំ ភគវា, អញ្ញាតំ សុគតា’’តិ។
64. Sāvatthinidānaṃ. Atha kho aññataro bhikkhu…pe… ekamantaṃ nisinno kho so bhikkhu bhagavantaṃ etadavoca – ‘‘sādhu me, bhante, bhagavā saṃkhittena dhammaṃ desetu…pe… ātāpī pahitatto vihareyya’’nti. ‘‘Maññamāno kho, bhikkhu, baddho mārassa; amaññamāno mutto pāpimato’’ti. ‘‘Aññātaṃ bhagavā, aññātaṃ sugatā’’ti.
‘‘យថា កថំ បន ត្វំ, ភិក្ខុ, មយា សំខិត្តេន ភាសិតស្ស វិត្ថារេន អត្ថំ អាជានាសី’’តិ? ‘‘រូបំ ខោ, ភន្តេ, មញ្ញមានោ ពទ្ធោ មារស្ស; អមញ្ញមានោ មុត្តោ បាបិមតោ។ វេទនំ… សញ្ញំ… សង្ខារេ… វិញ្ញាណំ មញ្ញមានោ ពទ្ធោ មារស្ស; អមញ្ញមានោ មុត្តោ បាបិមតោ។ ឥមស្ស ខ្វាហំ, ភន្តេ, ភគវតា សំខិត្តេន ភាសិតស្ស ឯវំ វិត្ថារេន អត្ថំ អាជានាមី’’តិ។
‘‘Yathā kathaṃ pana tvaṃ, bhikkhu, mayā saṃkhittena bhāsitassa vitthārena atthaṃ ājānāsī’’ti? ‘‘Rūpaṃ kho, bhante, maññamāno baddho mārassa; amaññamāno mutto pāpimato. Vedanaṃ… saññaṃ… saṅkhāre… viññāṇaṃ maññamāno baddho mārassa; amaññamāno mutto pāpimato. Imassa khvāhaṃ, bhante, bhagavatā saṃkhittena bhāsitassa evaṃ vitthārena atthaṃ ājānāmī’’ti.
‘‘សាធុ សាធុ , ភិក្ខុ! សាធុ ខោ ត្វំ, ភិក្ខុ, មយា សំខិត្តេន ភាសិតស្ស វិត្ថារេន អត្ថំ អាជានាសិ។ រូបំ ខោ, ភិក្ខុ, មញ្ញមានោ ពទ្ធោ មារស្ស; អមញ្ញមានោ មុត្តោ បាបិមតោ។ វេទនំ… សញ្ញំ… សង្ខារេ… វិញ្ញាណំ មញ្ញមានោ ពទ្ធោ មារស្ស; អមញ្ញមានោ មុត្តោ បាបិមតោ។ ឥមស្ស ខោ, ភិក្ខុ, មយា សំខិត្តេន ភាសិតស្ស ឯវំ វិត្ថារេន អត្ថោ ទដ្ឋព្ពោ’’តិ…បេ.… អញ្ញតរោ ច បន សោ ភិក្ខុ អរហតំ អហោសីតិ។ ទុតិយំ។
‘‘Sādhu sādhu , bhikkhu! Sādhu kho tvaṃ, bhikkhu, mayā saṃkhittena bhāsitassa vitthārena atthaṃ ājānāsi. Rūpaṃ kho, bhikkhu, maññamāno baddho mārassa; amaññamāno mutto pāpimato. Vedanaṃ… saññaṃ… saṅkhāre… viññāṇaṃ maññamāno baddho mārassa; amaññamāno mutto pāpimato. Imassa kho, bhikkhu, mayā saṃkhittena bhāsitassa evaṃ vitthārena attho daṭṭhabbo’’ti…pe… aññataro ca pana so bhikkhu arahataṃ ahosīti. Dutiyaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ២. មញ្ញមានសុត្តវណ្ណនា • 2. Maññamānasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ២-៦. មញ្ញមានសុត្តាទិវណ្ណនា • 2-6. Maññamānasuttādivaṇṇanā
