| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. මඤ්‌ඤමානසුත්‌තං
2. Maññamānasuttaṃ
64. සාවත්‌ථිනිදානං. අථ ඛො අඤ්‌ඤතරො භික්‌ඛු…පෙ.… එකමන්‌තං නිසින්‌නො ඛො සො භික්‌ඛු භගවන්‌තං එතදවොච – ‘‘සාධු මෙ, භන්‌තෙ, භගවා සංඛිත්‌තෙන ධම්‌මං දෙසෙතු…පෙ.… ආතාපී පහිතත්‌තො විහරෙය්‍ය’’න්‌ති. ‘‘මඤ්‌ඤමානො ඛො, භික්‌ඛු, බද්‌ධො මාරස්‌ස; අමඤ්‌ඤමානො මුත්‌තො පාපිමතො’’ති. ‘‘අඤ්‌ඤාතං භගවා, අඤ්‌ඤාතං සුගතා’’ති.
64. Sāvatthinidānaṃ. Atha kho aññataro bhikkhu…pe… ekamantaṃ nisinno kho so bhikkhu bhagavantaṃ etadavoca – ‘‘sādhu me, bhante, bhagavā saṃkhittena dhammaṃ desetu…pe… ātāpī pahitatto vihareyya’’nti. ‘‘Maññamāno kho, bhikkhu, baddho mārassa; amaññamāno mutto pāpimato’’ti. ‘‘Aññātaṃ bhagavā, aññātaṃ sugatā’’ti.
‘‘යථා කථං පන ත්‌වං, භික්‌ඛු, මයා සංඛිත්‌තෙන භාසිතස්‌ස විත්‌ථාරෙන අත්‌ථං ආජානාසී’’ති? ‘‘රූපං ඛො, භන්‌තෙ, මඤ්‌ඤමානො බද්‌ධො මාරස්‌ස; අමඤ්‌ඤමානො මුත්‌තො පාපිමතො. වෙදනං… සඤ්‌ඤං… සඞ්‌ඛාරෙ… විඤ්‌ඤාණං මඤ්‌ඤමානො බද්‌ධො මාරස්‌ස; අමඤ්‌ඤමානො මුත්‌තො පාපිමතො. ඉමස්‌ස ඛ්‌වාහං, භන්‌තෙ, භගවතා සංඛිත්‌තෙන භාසිතස්‌ස එවං විත්‌ථාරෙන අත්‌ථං ආජානාමී’’ති.
‘‘Yathā kathaṃ pana tvaṃ, bhikkhu, mayā saṃkhittena bhāsitassa vitthārena atthaṃ ājānāsī’’ti? ‘‘Rūpaṃ kho, bhante, maññamāno baddho mārassa; amaññamāno mutto pāpimato. Vedanaṃ… saññaṃ… saṅkhāre… viññāṇaṃ maññamāno baddho mārassa; amaññamāno mutto pāpimato. Imassa khvāhaṃ, bhante, bhagavatā saṃkhittena bhāsitassa evaṃ vitthārena atthaṃ ājānāmī’’ti.
‘‘සාධු සාධු , භික්‌ඛු! සාධු ඛො ත්‌වං, භික්‌ඛු, මයා සංඛිත්‌තෙන භාසිතස්‌ස විත්‌ථාරෙන අත්‌ථං ආජානාසි. රූපං ඛො, භික්‌ඛු, මඤ්‌ඤමානො බද්‌ධො මාරස්‌ස; අමඤ්‌ඤමානො මුත්‌තො පාපිමතො. වෙදනං… සඤ්‌ඤං… සඞ්‌ඛාරෙ… විඤ්‌ඤාණං මඤ්‌ඤමානො බද්‌ධො මාරස්‌ස; අමඤ්‌ඤමානො මුත්‌තො පාපිමතො. ඉමස්‌ස ඛො, භික්‌ඛු, මයා සංඛිත්‌තෙන භාසිතස්‌ස එවං විත්‌ථාරෙන අත්‌ථො දට්‌ඨබ්‌බො’’ති…පෙ.… අඤ්‌ඤතරො ච පන සො භික්‌ඛු අරහතං අහොසීති. දුතියං.
‘‘Sādhu sādhu , bhikkhu! Sādhu kho tvaṃ, bhikkhu, mayā saṃkhittena bhāsitassa vitthārena atthaṃ ājānāsi. Rūpaṃ kho, bhikkhu, maññamāno baddho mārassa; amaññamāno mutto pāpimato. Vedanaṃ… saññaṃ… saṅkhāre… viññāṇaṃ maññamāno baddho mārassa; amaññamāno mutto pāpimato. Imassa kho, bhikkhu, mayā saṃkhittena bhāsitassa evaṃ vitthārena attho daṭṭhabbo’’ti…pe… aññataro ca pana so bhikkhu arahataṃ ahosīti. Dutiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2. මඤ්‌ඤමානසුත්‌තවණ්‌ණනා • 2. Maññamānasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2-6. මඤ්‌ඤමානසුත්‌තාදිවණ්‌ණනා • 2-6. Maññamānasuttādivaṇṇanā
