| Library / Tipiṭaka / திபிடக • Tipiṭaka / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā |
மனோகம்மத்³வாரகதா²
Manokammadvārakathā
மனோகம்மத்³வாரகதா²யங் பன காமாவசராதி³வஸேன சதுப்³பி³தோ⁴ மனோ மனோ நாம. தத்த² காமாவசரோ சதுபஞ்ஞாஸவிதோ⁴ ஹோதி, ரூபாவசரோ பன்னரஸவிதோ⁴, அரூபாவசரோ த்³வாத³ஸவிதோ⁴, லோகுத்தரோ அட்ட²விதோ⁴தி ஸப்³போ³பி ஏகூனநவுதிவிதோ⁴ ஹோதி. தத்த² அயங் நாம மனோ மனொத்³வாரங் ந ஹோதீதி ந வத்தப்³போ³. யதா² ஹி அயங் நாம சேதனா கம்மங் ந ஹோதீதி ந வத்தப்³பா³, அந்தமஸோ பஞ்சவிஞ்ஞாணஸம்பயுத்தாபி ஹி சேதனா மஹாபகரணே கம்மந்த்வேவ நித்³தி³ட்டா², ஏவமேவ அயங் நாம மனோ மனொத்³வாரங் ந ஹோதீதி ந வத்தப்³போ³.
Manokammadvārakathāyaṃ pana kāmāvacarādivasena catubbidho mano mano nāma. Tattha kāmāvacaro catupaññāsavidho hoti, rūpāvacaro pannarasavidho, arūpāvacaro dvādasavidho, lokuttaro aṭṭhavidhoti sabbopi ekūnanavutividho hoti. Tattha ayaṃ nāma mano manodvāraṃ na hotīti na vattabbo. Yathā hi ayaṃ nāma cetanā kammaṃ na hotīti na vattabbā, antamaso pañcaviññāṇasampayuttāpi hi cetanā mahāpakaraṇe kammantveva niddiṭṭhā, evameva ayaṃ nāma mano manodvāraṃ na hotīti na vattabbo.
எத்தா²ஹ – கம்மங் நாமேதங் கிங் கரோதீதி? ஆயூஹதி, அபி⁴ஸங்க²ரோதி, பிண்ட³ங் கரோதி, சேதேதி, கப்பேதி, பகப்பேதீதி. ஏவங் ஸந்தே பஞ்சவிஞ்ஞாணசேதனா கிங் ஆயூஹதி, அபி⁴ஸங்க²ரோதி, பிண்ட³ங் கரோதி, சேதேதி, கப்பேதி, பகப்பேதீதி?. ஸஹஜாதத⁴ம்மே. ஸாபி ஹி ஸஹஜாதே ஸம்பயுத்தக்க²ந்தே⁴ ஆயூஹதி அபி⁴ஸங்க²ரோதி பிண்ட³ங் கரோதி சேதேதி கப்பேதி பகப்பேதீதி. கிங் வா இமினா வாதே³ன? ஸப்³ப³ஸங்கா³ஹிகவஸேன ஹேதங் வுத்தங். இத³ங் பனெத்த² ஸன்னிட்டா²னங் – தேபூ⁴மககுஸலாகுஸலோ ஏகூனதிங்ஸவிதோ⁴ மனோ மனோகம்மத்³வாரங் நாம. யா பன தஸ்மிங் மனொத்³வாரே ஸித்³தா⁴ சேதனா யாய அபி⁴ஜ்ஜா²ப்³யாபாத³மிச்சா²த³ஸ்ஸனானி சேவ அனபி⁴ஜ்ஜா²அப்³யாபாத³ஸம்மாத³ஸ்ஸனானி ச க³ண்ஹாதி, இத³ங் மனோகம்மங் நாம. இதோ பரங் ஸப்³ப³ங் கம்மவவத்தா²னஞ்ச த்³வாரவவத்தா²னஞ்ச ஹெட்டா² வுத்தனயேனேவ வேதி³தப்³ப³ந்தி. இமானி தீணி கம்மத்³வாரானி நாம.
Etthāha – kammaṃ nāmetaṃ kiṃ karotīti? Āyūhati, abhisaṅkharoti, piṇḍaṃ karoti, ceteti, kappeti, pakappetīti. Evaṃ sante pañcaviññāṇacetanā kiṃ āyūhati, abhisaṅkharoti, piṇḍaṃ karoti, ceteti, kappeti, pakappetīti?. Sahajātadhamme. Sāpi hi sahajāte sampayuttakkhandhe āyūhati abhisaṅkharoti piṇḍaṃ karoti ceteti kappeti pakappetīti. Kiṃ vā iminā vādena? Sabbasaṅgāhikavasena hetaṃ vuttaṃ. Idaṃ panettha sanniṭṭhānaṃ – tebhūmakakusalākusalo ekūnatiṃsavidho mano manokammadvāraṃ nāma. Yā pana tasmiṃ manodvāre siddhā cetanā yāya abhijjhābyāpādamicchādassanāni ceva anabhijjhāabyāpādasammādassanāni ca gaṇhāti, idaṃ manokammaṃ nāma. Ito paraṃ sabbaṃ kammavavatthānañca dvāravavatthānañca heṭṭhā vuttanayeneva veditabbanti. Imāni tīṇi kammadvārāni nāma.
மனோகம்மத்³வாரகதா² நிட்டி²தா.
Manokammadvārakathā niṭṭhitā.
