| Library / Tipiṭaka / তিপিটক • Tipiṭaka / ধম্মসঙ্গণি-অট্ঠকথা • Dhammasaṅgaṇi-aṭṭhakathā |
মনোকম্মদ্ৰারকথা
Manokammadvārakathā
মনোকম্মদ্ৰারকথাযং পন কামাৰচরাদিৰসেন চতুব্বিধো মনো মনো নাম। তত্থ কামাৰচরো চতুপঞ্ঞাসৰিধো হোতি, রূপাৰচরো পন্নরসৰিধো, অরূপাৰচরো দ্ৰাদসৰিধো, লোকুত্তরো অট্ঠৰিধোতি সব্বোপি একূননৰুতিৰিধো হোতি। তত্থ অযং নাম মনো মনোদ্ৰারং ন হোতীতি ন ৰত্তব্বো। যথা হি অযং নাম চেতনা কম্মং ন হোতীতি ন ৰত্তব্বা, অন্তমসো পঞ্চৰিঞ্ঞাণসম্পযুত্তাপি হি চেতনা মহাপকরণে কম্মন্ত্ৰেৰ নিদ্দিট্ঠা, এৰমেৰ অযং নাম মনো মনোদ্ৰারং ন হোতীতি ন ৰত্তব্বো।
Manokammadvārakathāyaṃ pana kāmāvacarādivasena catubbidho mano mano nāma. Tattha kāmāvacaro catupaññāsavidho hoti, rūpāvacaro pannarasavidho, arūpāvacaro dvādasavidho, lokuttaro aṭṭhavidhoti sabbopi ekūnanavutividho hoti. Tattha ayaṃ nāma mano manodvāraṃ na hotīti na vattabbo. Yathā hi ayaṃ nāma cetanā kammaṃ na hotīti na vattabbā, antamaso pañcaviññāṇasampayuttāpi hi cetanā mahāpakaraṇe kammantveva niddiṭṭhā, evameva ayaṃ nāma mano manodvāraṃ na hotīti na vattabbo.
এত্থাহ – কম্মং নামেতং কিং করোতীতি? আযূহতি, অভিসঙ্খরোতি, পিণ্ডং করোতি, চেতেতি, কপ্পেতি, পকপ্পেতীতি। এৰং সন্তে পঞ্চৰিঞ্ঞাণচেতনা কিং আযূহতি, অভিসঙ্খরোতি, পিণ্ডং করোতি, চেতেতি, কপ্পেতি, পকপ্পেতীতি?। সহজাতধম্মে। সাপি হি সহজাতে সম্পযুত্তক্খন্ধে আযূহতি অভিসঙ্খরোতি পিণ্ডং করোতি চেতেতি কপ্পেতি পকপ্পেতীতি। কিং ৰা ইমিনা ৰাদেন? সব্বসঙ্গাহিকৰসেন হেতং ৰুত্তং। ইদং পনেত্থ সন্নিট্ঠানং – তেভূমককুসলাকুসলো একূনতিংসৰিধো মনো মনোকম্মদ্ৰারং নাম। যা পন তস্মিং মনোদ্ৰারে সিদ্ধা চেতনা যায অভিজ্ঝাব্যাপাদমিচ্ছাদস্সনানি চেৰ অনভিজ্ঝাঅব্যাপাদসম্মাদস্সনানি চ গণ্হাতি, ইদং মনোকম্মং নাম। ইতো পরং সব্বং কম্মৰৰত্থানঞ্চ দ্ৰারৰৰত্থানঞ্চ হেট্ঠা ৰুত্তনযেনেৰ ৰেদিতব্বন্তি। ইমানি তীণি কম্মদ্ৰারানি নাম।
Etthāha – kammaṃ nāmetaṃ kiṃ karotīti? Āyūhati, abhisaṅkharoti, piṇḍaṃ karoti, ceteti, kappeti, pakappetīti. Evaṃ sante pañcaviññāṇacetanā kiṃ āyūhati, abhisaṅkharoti, piṇḍaṃ karoti, ceteti, kappeti, pakappetīti?. Sahajātadhamme. Sāpi hi sahajāte sampayuttakkhandhe āyūhati abhisaṅkharoti piṇḍaṃ karoti ceteti kappeti pakappetīti. Kiṃ vā iminā vādena? Sabbasaṅgāhikavasena hetaṃ vuttaṃ. Idaṃ panettha sanniṭṭhānaṃ – tebhūmakakusalākusalo ekūnatiṃsavidho mano manokammadvāraṃ nāma. Yā pana tasmiṃ manodvāre siddhā cetanā yāya abhijjhābyāpādamicchādassanāni ceva anabhijjhāabyāpādasammādassanāni ca gaṇhāti, idaṃ manokammaṃ nāma. Ito paraṃ sabbaṃ kammavavatthānañca dvāravavatthānañca heṭṭhā vuttanayeneva veditabbanti. Imāni tīṇi kammadvārāni nāma.
মনোকম্মদ্ৰারকথা নিট্ঠিতা।
Manokammadvārakathā niṭṭhitā.
