| Library / Tipiṭaka / တိပိဋက • Tipiṭaka / ဓမ္မသင္ဂဏိ-အဋ္ဌကထာ • Dhammasaṅgaṇi-aṭṭhakathā |
မနောကမ္မဒ္ဝာရကထာ
Manokammadvārakathā
မနောကမ္မဒ္ဝာရကထာယံ ပန ကာမာဝစရာဒိဝသေန စတုဗ္ဗိဓော မနော မနော နာမ။ တတ္ထ ကာမာဝစရော စတုပညာသဝိဓော ဟောတိ, ရူပာဝစရော ပန္နရသဝိဓော, အရူပာဝစရော ဒ္ဝာဒသဝိဓော, လောကုတ္တရော အဋ္ဌဝိဓောတိ သဗ္ဗောပိ ဧကူနနဝုတိဝိဓော ဟောတိ။ တတ္ထ အယံ နာမ မနော မနောဒ္ဝာရံ န ဟောတီတိ န ဝတ္တဗ္ဗော။ ယထာ ဟိ အယံ နာမ စေတနာ ကမ္မံ န ဟောတီတိ န ဝတ္တဗ္ဗာ, အန္တမသော ပဉ္စဝိညာဏသမ္ပယုတ္တာပိ ဟိ စေတနာ မဟာပကရဏေ ကမ္မန္တ္ဝေဝ နိဒ္ဒိဋ္ဌာ, ဧဝမေဝ အယံ နာမ မနော မနောဒ္ဝာရံ န ဟောတီတိ န ဝတ္တဗ္ဗော။
Manokammadvārakathāyaṃ pana kāmāvacarādivasena catubbidho mano mano nāma. Tattha kāmāvacaro catupaññāsavidho hoti, rūpāvacaro pannarasavidho, arūpāvacaro dvādasavidho, lokuttaro aṭṭhavidhoti sabbopi ekūnanavutividho hoti. Tattha ayaṃ nāma mano manodvāraṃ na hotīti na vattabbo. Yathā hi ayaṃ nāma cetanā kammaṃ na hotīti na vattabbā, antamaso pañcaviññāṇasampayuttāpi hi cetanā mahāpakaraṇe kammantveva niddiṭṭhā, evameva ayaṃ nāma mano manodvāraṃ na hotīti na vattabbo.
ဧတ္ထာဟ – ကမ္မံ နာမေတံ ကိံ ကရောတီတိ? အာယူဟတိ, အဘိသင္ခရောတိ, ပိဏ္ဍံ ကရောတိ, စေတေတိ, ကပ္ပေတိ, ပကပ္ပေတီတိ။ ဧဝံ သန္တေ ပဉ္စဝိညာဏစေတနာ ကိံ အာယူဟတိ, အဘိသင္ခရောတိ, ပိဏ္ဍံ ကရောတိ, စေတေတိ, ကပ္ပေတိ, ပကပ္ပေတီတိ?။ သဟဇာတဓမ္မေ။ သာပိ ဟိ သဟဇာတေ သမ္ပယုတ္တက္ခန္ဓေ အာယူဟတိ အဘိသင္ခရောတိ ပိဏ္ဍံ ကရောတိ စေတေတိ ကပ္ပေတိ ပကပ္ပေတီတိ။ ကိံ ဝာ ဣမိနာ ဝာဒေန? သဗ္ဗသင္ဂာဟိကဝသေန ဟေတံ ဝုတ္တံ။ ဣဒံ ပနေတ္ထ သန္နိဋ္ဌာနံ – တေဘူမကကုသလာကုသလော ဧကူနတိံသဝိဓော မနော မနောကမ္မဒ္ဝာရံ နာမ။ ယာ ပန တသ္မိံ မနောဒ္ဝာရေ သိဒ္ဓာ စေတနာ ယာယ အဘိဇ္ဈာဗ္ယာပာဒမိစ္ဆာဒသ္သနာနိ စေဝ အနဘိဇ္ဈာအဗ္ယာပာဒသမ္မာဒသ္သနာနိ စ ဂဏ္ဟာတိ, ဣဒံ မနောကမ္မံ နာမ။ ဣတော ပရံ သဗ္ဗံ ကမ္မဝဝတ္ထာနဉ္စ ဒ္ဝာရဝဝတ္ထာနဉ္စ ဟေဋ္ဌာ ဝုတ္တနယေနေဝ ဝေဒိတဗ္ဗန္တိ။ ဣမာနိ တီဏိ ကမ္မဒ္ဝာရာနိ နာမ။
Etthāha – kammaṃ nāmetaṃ kiṃ karotīti? Āyūhati, abhisaṅkharoti, piṇḍaṃ karoti, ceteti, kappeti, pakappetīti. Evaṃ sante pañcaviññāṇacetanā kiṃ āyūhati, abhisaṅkharoti, piṇḍaṃ karoti, ceteti, kappeti, pakappetīti?. Sahajātadhamme. Sāpi hi sahajāte sampayuttakkhandhe āyūhati abhisaṅkharoti piṇḍaṃ karoti ceteti kappeti pakappetīti. Kiṃ vā iminā vādena? Sabbasaṅgāhikavasena hetaṃ vuttaṃ. Idaṃ panettha sanniṭṭhānaṃ – tebhūmakakusalākusalo ekūnatiṃsavidho mano manokammadvāraṃ nāma. Yā pana tasmiṃ manodvāre siddhā cetanā yāya abhijjhābyāpādamicchādassanāni ceva anabhijjhāabyāpādasammādassanāni ca gaṇhāti, idaṃ manokammaṃ nāma. Ito paraṃ sabbaṃ kammavavatthānañca dvāravavatthānañca heṭṭhā vuttanayeneva veditabbanti. Imāni tīṇi kammadvārāni nāma.
မနောကမ္မဒ္ဝာရကထာ နိဋ္ဌိတာ။
Manokammadvārakathā niṭṭhitā.
