| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
11. பஞ்சக³திபெய்யாலவக்³கோ³
11. Pañcagatipeyyālavaggo
1. மனுஸ்ஸசுதினிரயஸுத்தங்
1. Manussacutinirayasuttaṃ
1172. அத² கோ² ப⁴க³வா பரித்தங் நக²ஸிகா²யங் பங்ஸுங் ஆரோபெத்வா பி⁴க்கூ² ஆமந்தேஸி – ‘‘தங் கிங் மஞ்ஞத², பி⁴க்க²வே, கதமங் நு கோ² ப³ஹுதரங் – யோ வாயங் மயா பரித்தோ நக²ஸிகா²யங் பங்ஸு ஆரோபிதோ, அயங் வா மஹாபத²வீ’’தி? ‘‘ஏததே³வ, ப⁴ந்தே, ப³ஹுதரங், யதி³த³ங் – மஹாபத²வீ; அப்பமத்தகாயங் ப⁴க³வதா பரித்தோ நக²ஸிகா²யங் பங்ஸு ஆரோபிதோ. ஸங்க²ம்பி ந உபேதி, உபனித⁴ம்பி ந உபேதி, கலபா⁴க³ம்பி ந உபேதி மஹாபத²விங் உபனிதா⁴ய ப⁴க³வதா பரித்தோ நக²ஸிகா²யங் பங்ஸு ஆரோபிதோ’’தி. ஏவமேவ கோ², பி⁴க்க²வே, அப்பகா தே ஸத்தா யே மனுஸ்ஸா சுதா மனுஸ்ஸேஸு பச்சாஜாயந்தி; அத² கோ² ஏதேவ ப³ஹுதரா ஸத்தா யே மனுஸ்ஸா சுதா நிரயே பச்சாஜாயந்தி…பே॰…. பட²மங்.
1172. Atha kho bhagavā parittaṃ nakhasikhāyaṃ paṃsuṃ āropetvā bhikkhū āmantesi – ‘‘taṃ kiṃ maññatha, bhikkhave, katamaṃ nu kho bahutaraṃ – yo vāyaṃ mayā paritto nakhasikhāyaṃ paṃsu āropito, ayaṃ vā mahāpathavī’’ti? ‘‘Etadeva, bhante, bahutaraṃ, yadidaṃ – mahāpathavī; appamattakāyaṃ bhagavatā paritto nakhasikhāyaṃ paṃsu āropito. Saṅkhampi na upeti, upanidhampi na upeti, kalabhāgampi na upeti mahāpathaviṃ upanidhāya bhagavatā paritto nakhasikhāyaṃ paṃsu āropito’’ti. Evameva kho, bhikkhave, appakā te sattā ye manussā cutā manussesu paccājāyanti; atha kho eteva bahutarā sattā ye manussā cutā niraye paccājāyanti…pe…. Paṭhamaṃ.
