| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
11. පඤ්‌චගතිපෙය්‍යාලවග්‌ගො
11. Pañcagatipeyyālavaggo
1. මනුස්‌සචුතිනිරයසුත්‌තං
1. Manussacutinirayasuttaṃ
1172. අථ ඛො භගවා පරිත්‌තං නඛසිඛායං පංසුං ආරොපෙත්‌වා භික්‌ඛූ ආමන්‌තෙසි – ‘‘තං කිං මඤ්‌ඤථ, භික්‌ඛවෙ, කතමං නු ඛො බහුතරං – යො වායං මයා පරිත්‌තො නඛසිඛායං පංසු ආරොපිතො, අයං වා මහාපථවී’’ති? ‘‘එතදෙව, භන්‌තෙ, බහුතරං, යදිදං – මහාපථවී; අප්‌පමත්‌තකායං භගවතා පරිත්‌තො නඛසිඛායං පංසු ආරොපිතො. සඞ්‌ඛම්‌පි න උපෙති, උපනිධම්‌පි න උපෙති, කලභාගම්‌පි න උපෙති මහාපථවිං උපනිධාය භගවතා පරිත්‌තො නඛසිඛායං පංසු ආරොපිතො’’ති. එවමෙව ඛො, භික්‌ඛවෙ, අප්‌පකා තෙ සත්‌තා යෙ මනුස්‌සා චුතා මනුස්‌සෙසු පච්‌චාජායන්‌ති; අථ ඛො එතෙව බහුතරා සත්‌තා යෙ මනුස්‌සා චුතා නිරයෙ පච්‌චාජායන්‌ති…පෙ.…. පඨමං.
1172. Atha kho bhagavā parittaṃ nakhasikhāyaṃ paṃsuṃ āropetvā bhikkhū āmantesi – ‘‘taṃ kiṃ maññatha, bhikkhave, katamaṃ nu kho bahutaraṃ – yo vāyaṃ mayā paritto nakhasikhāyaṃ paṃsu āropito, ayaṃ vā mahāpathavī’’ti? ‘‘Etadeva, bhante, bahutaraṃ, yadidaṃ – mahāpathavī; appamattakāyaṃ bhagavatā paritto nakhasikhāyaṃ paṃsu āropito. Saṅkhampi na upeti, upanidhampi na upeti, kalabhāgampi na upeti mahāpathaviṃ upanidhāya bhagavatā paritto nakhasikhāyaṃ paṃsu āropito’’ti. Evameva kho, bhikkhave, appakā te sattā ye manussā cutā manussesu paccājāyanti; atha kho eteva bahutarā sattā ye manussā cutā niraye paccājāyanti…pe…. Paṭhamaṃ.
