| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༡༡. པཉྩགཏིཔེཡྻཱལཝགྒོ
11. Pañcagatipeyyālavaggo
༡. མནུསྶཙུཏིནིརཡསུཏྟཾ
1. Manussacutinirayasuttaṃ
༡༡༧༢. ཨཐ ཁོ བྷགཝཱ པརིཏྟཾ ནཁསིཁཱཡཾ པཾསུཾ ཨཱརོཔེཏྭཱ བྷིཀྑཱུ ཨཱམནྟེསི – ‘‘ཏཾ ཀིཾ མཉྙཐ, བྷིཀྑཝེ, ཀཏམཾ ནུ ཁོ བཧུཏརཾ – ཡོ ཝཱཡཾ མཡཱ པརིཏྟོ ནཁསིཁཱཡཾ པཾསུ ཨཱརོཔིཏོ, ཨཡཾ ཝཱ མཧཱཔཐཝཱི’’ཏི? ‘‘ཨེཏདེཝ, བྷནྟེ, བཧུཏརཾ, ཡདིདཾ – མཧཱཔཐཝཱི; ཨཔྤམཏྟཀཱཡཾ བྷགཝཏཱ པརིཏྟོ ནཁསིཁཱཡཾ པཾསུ ཨཱརོཔིཏོ། སངྑམྤི ན ཨུཔེཏི, ཨུཔནིདྷམྤི ན ཨུཔེཏི, ཀལབྷཱགམྤི ན ཨུཔེཏི མཧཱཔཐཝིཾ ཨུཔནིདྷཱཡ བྷགཝཏཱ པརིཏྟོ ནཁསིཁཱཡཾ པཾསུ ཨཱརོཔིཏོ’’ཏི། ཨེཝམེཝ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ མནུསྶཱ ཙུཏཱ མནུསྶེསུ པཙྩཱཛཱཡནྟི; ཨཐ ཁོ ཨེཏེཝ བཧུཏརཱ སཏྟཱ ཡེ མནུསྶཱ ཙུཏཱ ནིརཡེ པཙྩཱཛཱཡནྟི…པེ॰…། པཋམཾ།
1172. Atha kho bhagavā parittaṃ nakhasikhāyaṃ paṃsuṃ āropetvā bhikkhū āmantesi – ‘‘taṃ kiṃ maññatha, bhikkhave, katamaṃ nu kho bahutaraṃ – yo vāyaṃ mayā paritto nakhasikhāyaṃ paṃsu āropito, ayaṃ vā mahāpathavī’’ti? ‘‘Etadeva, bhante, bahutaraṃ, yadidaṃ – mahāpathavī; appamattakāyaṃ bhagavatā paritto nakhasikhāyaṃ paṃsu āropito. Saṅkhampi na upeti, upanidhampi na upeti, kalabhāgampi na upeti mahāpathaviṃ upanidhāya bhagavatā paritto nakhasikhāyaṃ paṃsu āropito’’ti. Evameva kho, bhikkhave, appakā te sattā ye manussā cutā manussesu paccājāyanti; atha kho eteva bahutarā sattā ye manussā cutā niraye paccājāyanti…pe…. Paṭhamaṃ.
