| Library / Tipiṭaka / திபிடக • Tipiṭaka / கதா²வத்து²பாளி • Kathāvatthupāḷi |
18. அட்டா²ரஸமவக்³கோ³
18. Aṭṭhārasamavaggo
(177) 1. மனுஸ்ஸலோககதா²
(177) 1. Manussalokakathā
802. ந வத்தப்³ப³ங் – ‘‘பு³த்³தோ⁴ ப⁴க³வா மனுஸ்ஸலோகே அட்டா²ஸீ’’தி? ஆமந்தா. நனு அத்தி² பு³த்³த⁴வுத்தா²னி சேதியானி ஆராமவிஹாரகா³மனிக³மனக³ரானி ரட்டா²னி ஜனபதா³னீதி? ஆமந்தா. ஹஞ்சி அத்தி² பு³த்³த⁴வுத்தா²னி சேதியானி ஆராமவிஹாரகா³மனிக³மனக³ரானி ரட்டா²னி ஜனபதா³னி, தேன வத ரே வத்தப்³பே³ – ‘‘பு³த்³தோ⁴ ப⁴க³வா மனுஸ்ஸலோகே அட்டா²ஸீ’’தி.
802. Na vattabbaṃ – ‘‘buddho bhagavā manussaloke aṭṭhāsī’’ti? Āmantā. Nanu atthi buddhavutthāni cetiyāni ārāmavihāragāmanigamanagarāni raṭṭhāni janapadānīti? Āmantā. Hañci atthi buddhavutthāni cetiyāni ārāmavihāragāmanigamanagarāni raṭṭhāni janapadāni, tena vata re vattabbe – ‘‘buddho bhagavā manussaloke aṭṭhāsī’’ti.
ந வத்தப்³ப³ங் – ‘‘பு³த்³தோ⁴ ப⁴க³வா மனுஸ்ஸலோகே அட்டா²ஸீ’’தி? ஆமந்தா. நனு ப⁴க³வா லும்பி³னியா ஜாதோ, போ³தி⁴யா மூலே அபி⁴ஸம்பு³த்³தோ⁴, பா³ராணஸியங் ப⁴க³வதா த⁴ம்மசக்கங் பவத்திதங், சாபாலே சேதியே ஆயுஸங்கா²ரோ ஒஸ்ஸட்டோ², குஸினாராயங் ப⁴க³வா பரினிப்³பு³தோதி? ஆமந்தா. ஹஞ்சி ப⁴க³வா லும்பி³னியா ஜாதோ…பே॰… குஸினாராயங் ப⁴க³வா பரினிப்³பு³தோ, தேன வத ரே வத்தப்³பே³ – ‘‘பு³த்³தோ⁴ ப⁴க³வா மனுஸ்ஸலோகே அட்டா²ஸீ’’தி.
Na vattabbaṃ – ‘‘buddho bhagavā manussaloke aṭṭhāsī’’ti? Āmantā. Nanu bhagavā lumbiniyā jāto, bodhiyā mūle abhisambuddho, bārāṇasiyaṃ bhagavatā dhammacakkaṃ pavattitaṃ, cāpāle cetiye āyusaṅkhāro ossaṭṭho, kusinārāyaṃ bhagavā parinibbutoti? Āmantā. Hañci bhagavā lumbiniyā jāto…pe… kusinārāyaṃ bhagavā parinibbuto, tena vata re vattabbe – ‘‘buddho bhagavā manussaloke aṭṭhāsī’’ti.
ந வத்தப்³ப³ங் – ‘‘பு³த்³தோ⁴ ப⁴க³வா மனுஸ்ஸலோகே அட்டா²ஸீ’’தி? ஆமந்தா. நனு வுத்தங் ப⁴க³வதா – ‘‘ஏகமிதா³ஹங், பி⁴க்க²வே, ஸமயங் உக்கட்டா²யங் விஹராமி ஸுப⁴க³வனே ஸாலராஜமூலே’’தி 1; ‘‘ஏகமிதா³ஹங், பி⁴க்க²வே, ஸமயங் உருவேலாயங் விஹராமி அஜபாலனிக்³ரோதே⁴ பட²மாபி⁴ஸம்பு³த்³தோ⁴’’தி 2; ‘‘ஏகமிதா³ஹங், பி⁴க்க²வே, ஸமயங் ராஜக³ஹே விஹராமி வேளுவனே களந்த³கனிவாபே’’தி 3; ‘‘ஏகமிதா³ஹங், பி⁴க்க²வே, ஸமயங் ஸாவத்தி²யங் விஹராமி ஜேதவனே அனாத²பிண்டி³கஸ்ஸ ஆராமே’’தி ; ‘‘ஏகமிதா³ஹங், பி⁴க்க²வே, ஸமயங் வேஸாலியங் விஹராமி மஹாவனே கூடாகா³ரஸாலாய’’ந்தி 4! அத்தே²வ ஸுத்தந்தோதி? ஆமந்தா. தேன ஹி பு³த்³தோ⁴ ப⁴க³வா மனுஸ்ஸலோகே அட்டா²ஸீதி.
Na vattabbaṃ – ‘‘buddho bhagavā manussaloke aṭṭhāsī’’ti? Āmantā. Nanu vuttaṃ bhagavatā – ‘‘ekamidāhaṃ, bhikkhave, samayaṃ ukkaṭṭhāyaṃ viharāmi subhagavane sālarājamūle’’ti 5; ‘‘ekamidāhaṃ, bhikkhave, samayaṃ uruvelāyaṃ viharāmi ajapālanigrodhe paṭhamābhisambuddho’’ti 6; ‘‘ekamidāhaṃ, bhikkhave, samayaṃ rājagahe viharāmi veḷuvane kaḷandakanivāpe’’ti 7; ‘‘ekamidāhaṃ, bhikkhave, samayaṃ sāvatthiyaṃ viharāmi jetavane anāthapiṇḍikassa ārāme’’ti ; ‘‘ekamidāhaṃ, bhikkhave, samayaṃ vesāliyaṃ viharāmi mahāvane kūṭāgārasālāya’’nti 8! Attheva suttantoti? Āmantā. Tena hi buddho bhagavā manussaloke aṭṭhāsīti.
803. பு³த்³தோ⁴ ப⁴க³வா மனுஸ்ஸலோகே அட்டா²ஸீதி? ஆமந்தா. நனு ப⁴க³வா லோகே ஜாதோ, லோகே ஸங்வட்³டோ⁴, லோகங் அபி⁴பு⁴ய்ய விஹரதி அனுபலித்தோ லோகேனாதி 9? ஆமந்தா. ஹஞ்சி ப⁴க³வா லோகே ஜாதோ, லோகே ஸங்வட்³டோ⁴, லோகங் அபி⁴பு⁴ய்ய விஹரதி அனுபலித்தோ லோகேன, நோ ச வத ரே வத்தப்³பே³ – ‘‘பு³த்³தோ⁴ ப⁴க³வா மனுஸ்ஸலோகே அட்டா²ஸீ’’தி.
803. Buddho bhagavā manussaloke aṭṭhāsīti? Āmantā. Nanu bhagavā loke jāto, loke saṃvaḍḍho, lokaṃ abhibhuyya viharati anupalitto lokenāti 10? Āmantā. Hañci bhagavā loke jāto, loke saṃvaḍḍho, lokaṃ abhibhuyya viharati anupalitto lokena, no ca vata re vattabbe – ‘‘buddho bhagavā manussaloke aṭṭhāsī’’ti.
மனுஸ்ஸலோககதா² நிட்டி²தா.
Manussalokakathā niṭṭhitā.
Footnotes:
Related texts:
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 1. மனுஸ்ஸலோககதா²வண்ணனா • 1. Manussalokakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 1. மனுஸ்ஸலோககதா²வண்ணனா • 1. Manussalokakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 1. மனுஸ்ஸலோககதா²வண்ணனா • 1. Manussalokakathāvaṇṇanā
