| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১৮. অট্ঠারসমৰগ্গো
18. Aṭṭhārasamavaggo
(১৭৭) ১. মনুস্সলোককথা
(177) 1. Manussalokakathā
৮০২. ন ৰত্তব্বং – ‘‘বুদ্ধো ভগৰা মনুস্সলোকে অট্ঠাসী’’তি? আমন্তা। ননু অত্থি বুদ্ধৰুত্থানি চেতিযানি আরামৰিহারগামনিগমনগরানি রট্ঠানি জনপদানীতি? আমন্তা। হঞ্চি অত্থি বুদ্ধৰুত্থানি চেতিযানি আরামৰিহারগামনিগমনগরানি রট্ঠানি জনপদানি, তেন ৰত রে ৰত্তব্বে – ‘‘বুদ্ধো ভগৰা মনুস্সলোকে অট্ঠাসী’’তি।
802. Na vattabbaṃ – ‘‘buddho bhagavā manussaloke aṭṭhāsī’’ti? Āmantā. Nanu atthi buddhavutthāni cetiyāni ārāmavihāragāmanigamanagarāni raṭṭhāni janapadānīti? Āmantā. Hañci atthi buddhavutthāni cetiyāni ārāmavihāragāmanigamanagarāni raṭṭhāni janapadāni, tena vata re vattabbe – ‘‘buddho bhagavā manussaloke aṭṭhāsī’’ti.
ন ৰত্তব্বং – ‘‘বুদ্ধো ভগৰা মনুস্সলোকে অট্ঠাসী’’তি? আমন্তা। ননু ভগৰা লুম্বিনিযা জাতো, বোধিযা মূলে অভিসম্বুদ্ধো, বারাণসিযং ভগৰতা ধম্মচক্কং পৰত্তিতং, চাপালে চেতিযে আযুসঙ্খারো ওস্সট্ঠো, কুসিনারাযং ভগৰা পরিনিব্বুতোতি? আমন্তা। হঞ্চি ভগৰা লুম্বিনিযা জাতো…পে॰… কুসিনারাযং ভগৰা পরিনিব্বুতো, তেন ৰত রে ৰত্তব্বে – ‘‘বুদ্ধো ভগৰা মনুস্সলোকে অট্ঠাসী’’তি।
Na vattabbaṃ – ‘‘buddho bhagavā manussaloke aṭṭhāsī’’ti? Āmantā. Nanu bhagavā lumbiniyā jāto, bodhiyā mūle abhisambuddho, bārāṇasiyaṃ bhagavatā dhammacakkaṃ pavattitaṃ, cāpāle cetiye āyusaṅkhāro ossaṭṭho, kusinārāyaṃ bhagavā parinibbutoti? Āmantā. Hañci bhagavā lumbiniyā jāto…pe… kusinārāyaṃ bhagavā parinibbuto, tena vata re vattabbe – ‘‘buddho bhagavā manussaloke aṭṭhāsī’’ti.
ন ৰত্তব্বং – ‘‘বুদ্ধো ভগৰা মনুস্সলোকে অট্ঠাসী’’তি? আমন্তা। ননু ৰুত্তং ভগৰতা – ‘‘একমিদাহং, ভিক্খৰে, সমযং উক্কট্ঠাযং ৰিহরামি সুভগৰনে সালরাজমূলে’’তি 1; ‘‘একমিদাহং, ভিক্খৰে, সমযং উরুৰেলাযং ৰিহরামি অজপালনিগ্রোধে পঠমাভিসম্বুদ্ধো’’তি 2; ‘‘একমিদাহং, ভিক্খৰে, সমযং রাজগহে ৰিহরামি ৰেল়ুৰনে কল়ন্দকনিৰাপে’’তি 3; ‘‘একমিদাহং, ভিক্খৰে, সমযং সাৰত্থিযং ৰিহরামি জেতৰনে অনাথপিণ্ডিকস্স আরামে’’তি ; ‘‘একমিদাহং, ভিক্খৰে, সমযং ৰেসালিযং ৰিহরামি মহাৰনে কূটাগারসালায’’ন্তি 4! অত্থেৰ সুত্তন্তোতি? আমন্তা। তেন হি বুদ্ধো ভগৰা মনুস্সলোকে অট্ঠাসীতি।
Na vattabbaṃ – ‘‘buddho bhagavā manussaloke aṭṭhāsī’’ti? Āmantā. Nanu vuttaṃ bhagavatā – ‘‘ekamidāhaṃ, bhikkhave, samayaṃ ukkaṭṭhāyaṃ viharāmi subhagavane sālarājamūle’’ti 5; ‘‘ekamidāhaṃ, bhikkhave, samayaṃ uruvelāyaṃ viharāmi ajapālanigrodhe paṭhamābhisambuddho’’ti 6; ‘‘ekamidāhaṃ, bhikkhave, samayaṃ rājagahe viharāmi veḷuvane kaḷandakanivāpe’’ti 7; ‘‘ekamidāhaṃ, bhikkhave, samayaṃ sāvatthiyaṃ viharāmi jetavane anāthapiṇḍikassa ārāme’’ti ; ‘‘ekamidāhaṃ, bhikkhave, samayaṃ vesāliyaṃ viharāmi mahāvane kūṭāgārasālāya’’nti 8! Attheva suttantoti? Āmantā. Tena hi buddho bhagavā manussaloke aṭṭhāsīti.
৮০৩. বুদ্ধো ভগৰা মনুস্সলোকে অট্ঠাসীতি? আমন্তা। ননু ভগৰা লোকে জাতো, লোকে সংৰড্ঢো, লোকং অভিভুয্য ৰিহরতি অনুপলিত্তো লোকেনাতি 9? আমন্তা। হঞ্চি ভগৰা লোকে জাতো, লোকে সংৰড্ঢো, লোকং অভিভুয্য ৰিহরতি অনুপলিত্তো লোকেন, নো চ ৰত রে ৰত্তব্বে – ‘‘বুদ্ধো ভগৰা মনুস্সলোকে অট্ঠাসী’’তি।
803. Buddho bhagavā manussaloke aṭṭhāsīti? Āmantā. Nanu bhagavā loke jāto, loke saṃvaḍḍho, lokaṃ abhibhuyya viharati anupalitto lokenāti 10? Āmantā. Hañci bhagavā loke jāto, loke saṃvaḍḍho, lokaṃ abhibhuyya viharati anupalitto lokena, no ca vata re vattabbe – ‘‘buddho bhagavā manussaloke aṭṭhāsī’’ti.
মনুস্সলোককথা নিট্ঠিতা।
Manussalokakathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ১. মনুস্সলোককথাৰণ্ণনা • 1. Manussalokakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১. মনুস্সলোককথাৰণ্ণনা • 1. Manussalokakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১. মনুস্সলোককথাৰণ্ণনা • 1. Manussalokakathāvaṇṇanā
