| Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi |
༡༨. ཨཊྛཱརསམཝགྒོ
18. Aṭṭhārasamavaggo
(༡༧༧) ༡. མནུསྶལོཀཀཐཱ
(177) 1. Manussalokakathā
༨༠༢. ན ཝཏྟབྦཾ – ‘‘བུདྡྷོ བྷགཝཱ མནུསྶལོཀེ ཨཊྛཱསཱི’’ཏི? ཨཱམནྟཱ། ནནུ ཨཏྠི བུདྡྷཝུཏྠཱནི ཙེཏིཡཱནི ཨཱརཱམཝིཧཱརགཱམནིགམནགརཱནི རཊྛཱནི ཛནཔདཱནཱིཏི? ཨཱམནྟཱ། ཧཉྩི ཨཏྠི བུདྡྷཝུཏྠཱནི ཙེཏིཡཱནི ཨཱརཱམཝིཧཱརགཱམནིགམནགརཱནི རཊྛཱནི ཛནཔདཱནི, ཏེན ཝཏ རེ ཝཏྟབྦེ – ‘‘བུདྡྷོ བྷགཝཱ མནུསྶལོཀེ ཨཊྛཱསཱི’’ཏི།
802. Na vattabbaṃ – ‘‘buddho bhagavā manussaloke aṭṭhāsī’’ti? Āmantā. Nanu atthi buddhavutthāni cetiyāni ārāmavihāragāmanigamanagarāni raṭṭhāni janapadānīti? Āmantā. Hañci atthi buddhavutthāni cetiyāni ārāmavihāragāmanigamanagarāni raṭṭhāni janapadāni, tena vata re vattabbe – ‘‘buddho bhagavā manussaloke aṭṭhāsī’’ti.
ན ཝཏྟབྦཾ – ‘‘བུདྡྷོ བྷགཝཱ མནུསྶལོཀེ ཨཊྛཱསཱི’’ཏི? ཨཱམནྟཱ། ནནུ བྷགཝཱ ལུམྦིནིཡཱ ཛཱཏོ, བོདྷིཡཱ མཱུལེ ཨབྷིསམྦུདྡྷོ, བཱརཱཎསིཡཾ བྷགཝཏཱ དྷམྨཙཀྐཾ པཝཏྟིཏཾ, ཙཱཔཱལེ ཙེཏིཡེ ཨཱཡུསངྑཱརོ ཨོསྶཊྛོ, ཀུསིནཱརཱཡཾ བྷགཝཱ པརིནིབྦུཏོཏི? ཨཱམནྟཱ། ཧཉྩི བྷགཝཱ ལུམྦིནིཡཱ ཛཱཏོ…པེ॰… ཀུསིནཱརཱཡཾ བྷགཝཱ པརིནིབྦུཏོ, ཏེན ཝཏ རེ ཝཏྟབྦེ – ‘‘བུདྡྷོ བྷགཝཱ མནུསྶལོཀེ ཨཊྛཱསཱི’’ཏི།
Na vattabbaṃ – ‘‘buddho bhagavā manussaloke aṭṭhāsī’’ti? Āmantā. Nanu bhagavā lumbiniyā jāto, bodhiyā mūle abhisambuddho, bārāṇasiyaṃ bhagavatā dhammacakkaṃ pavattitaṃ, cāpāle cetiye āyusaṅkhāro ossaṭṭho, kusinārāyaṃ bhagavā parinibbutoti? Āmantā. Hañci bhagavā lumbiniyā jāto…pe… kusinārāyaṃ bhagavā parinibbuto, tena vata re vattabbe – ‘‘buddho bhagavā manussaloke aṭṭhāsī’’ti.
ན ཝཏྟབྦཾ – ‘‘བུདྡྷོ བྷགཝཱ མནུསྶལོཀེ ཨཊྛཱསཱི’’ཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘ཨེཀམིདཱཧཾ, བྷིཀྑཝེ, སམཡཾ ཨུཀྐཊྛཱཡཾ ཝིཧརཱམི སུབྷགཝནེ སཱལརཱཛམཱུལེ’’ཏི 1; ‘‘ཨེཀམིདཱཧཾ, བྷིཀྑཝེ, སམཡཾ ཨུརུཝེལཱཡཾ ཝིཧརཱམི ཨཛཔཱལནིགྲོདྷེ པཋམཱབྷིསམྦུདྡྷོ’’ཏི 2; ‘‘ཨེཀམིདཱཧཾ, བྷིཀྑཝེ, སམཡཾ རཱཛགཧེ ཝིཧརཱམི ཝེལུ༹ཝནེ ཀལ༹ནྡཀནིཝཱཔེ’’ཏི 3; ‘‘ཨེཀམིདཱཧཾ, བྷིཀྑཝེ, སམཡཾ སཱཝཏྠིཡཾ ཝིཧརཱམི ཛེཏཝནེ ཨནཱཐཔིཎྜིཀསྶ ཨཱརཱམེ’’ཏི ; ‘‘ཨེཀམིདཱཧཾ, བྷིཀྑཝེ, སམཡཾ ཝེསཱལིཡཾ ཝིཧརཱམི མཧཱཝནེ ཀཱུཊཱགཱརསཱལཱཡ’’ནྟི 4! ཨཏྠེཝ སུཏྟནྟོཏི? ཨཱམནྟཱ། ཏེན ཧི བུདྡྷོ བྷགཝཱ མནུསྶལོཀེ ཨཊྛཱསཱིཏི།
Na vattabbaṃ – ‘‘buddho bhagavā manussaloke aṭṭhāsī’’ti? Āmantā. Nanu vuttaṃ bhagavatā – ‘‘ekamidāhaṃ, bhikkhave, samayaṃ ukkaṭṭhāyaṃ viharāmi subhagavane sālarājamūle’’ti 5; ‘‘ekamidāhaṃ, bhikkhave, samayaṃ uruvelāyaṃ viharāmi ajapālanigrodhe paṭhamābhisambuddho’’ti 6; ‘‘ekamidāhaṃ, bhikkhave, samayaṃ rājagahe viharāmi veḷuvane kaḷandakanivāpe’’ti 7; ‘‘ekamidāhaṃ, bhikkhave, samayaṃ sāvatthiyaṃ viharāmi jetavane anāthapiṇḍikassa ārāme’’ti ; ‘‘ekamidāhaṃ, bhikkhave, samayaṃ vesāliyaṃ viharāmi mahāvane kūṭāgārasālāya’’nti 8! Attheva suttantoti? Āmantā. Tena hi buddho bhagavā manussaloke aṭṭhāsīti.
༨༠༣. བུདྡྷོ བྷགཝཱ མནུསྶལོཀེ ཨཊྛཱསཱིཏི? ཨཱམནྟཱ། ནནུ བྷགཝཱ ལོཀེ ཛཱཏོ, ལོཀེ སཾཝཌྜྷོ, ལོཀཾ ཨབྷིབྷུཡྻ ཝིཧརཏི ཨནུཔལིཏྟོ ལོཀེནཱཏི 9? ཨཱམནྟཱ། ཧཉྩི བྷགཝཱ ལོཀེ ཛཱཏོ, ལོཀེ སཾཝཌྜྷོ, ལོཀཾ ཨབྷིབྷུཡྻ ཝིཧརཏི ཨནུཔལིཏྟོ ལོཀེན, ནོ ཙ ཝཏ རེ ཝཏྟབྦེ – ‘‘བུདྡྷོ བྷགཝཱ མནུསྶལོཀེ ཨཊྛཱསཱི’’ཏི།
803. Buddho bhagavā manussaloke aṭṭhāsīti? Āmantā. Nanu bhagavā loke jāto, loke saṃvaḍḍho, lokaṃ abhibhuyya viharati anupalitto lokenāti 10? Āmantā. Hañci bhagavā loke jāto, loke saṃvaḍḍho, lokaṃ abhibhuyya viharati anupalitto lokena, no ca vata re vattabbe – ‘‘buddho bhagavā manussaloke aṭṭhāsī’’ti.
མནུསྶལོཀཀཐཱ ནིཊྛིཏཱ།
Manussalokakathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༡. མནུསྶལོཀཀཐཱཝཎྞནཱ • 1. Manussalokakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༡. མནུསྶལོཀཀཐཱཝཎྞནཱ • 1. Manussalokakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༡. མནུསྶལོཀཀཐཱཝཎྞནཱ • 1. Manussalokakathāvaṇṇanā
