| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
5. மாரதீ⁴துஸுத்தவண்ணனா
5. Māradhītusuttavaṇṇanā
161. பஞ்சமே அபா⁴ஸித்வாதி எத்த² அ-காரோ நிபாதமத்தங், பா⁴ஸித்வாதி அத்தோ². அபா⁴ஸயித்வாதிபி பாடோ². உபஸங்கமிங்ஸூதி ‘‘கோ³பாலகதா³ரகங் விய த³ண்ட³கேன பூ⁴மிங் லேக²ங் த³த்வா அதிவிய து³ம்மனோ ஹுத்வா நிஸின்னோ. ‘கின்னு கோ² காரண’ந்தி? புச்சி²த்வா, ஜானிஸ்ஸாமா’’தி உபஸங்கமிங்ஸு.
161. Pañcame abhāsitvāti ettha a-kāro nipātamattaṃ, bhāsitvāti attho. Abhāsayitvātipi pāṭho. Upasaṅkamiṃsūti ‘‘gopālakadārakaṃ viya daṇḍakena bhūmiṃ lekhaṃ datvā ativiya dummano hutvā nisinno. ‘Kinnu kho kāraṇa’nti? Pucchitvā, jānissāmā’’ti upasaṅkamiṃsu.
ஸோசஸீதி சிந்தேஸி. ஆரஞ்ஞமிவ குஞ்ஜரந்தி யதா² அரஞ்ஞதோ பேஸிதக³ணிகாரஹத்தி²னியோ ஆரஞ்ஞகங் குஞ்ஜரங் இத்தி²குத்தத³ஸ்ஸனேன பலோபெ⁴த்வா ப³ந்தி⁴த்வா ஆனயந்தி, ஏவங் ஆனயிஸ்ஸாம. மாரதெ⁴ய்யந்தி தேபூ⁴மகவட்டங்.
Socasīti cintesi. Āraññamiva kuñjaranti yathā araññato pesitagaṇikārahatthiniyo āraññakaṃ kuñjaraṃ itthikuttadassanena palobhetvā bandhitvā ānayanti, evaṃ ānayissāma. Māradheyyanti tebhūmakavaṭṭaṃ.
உபஸங்கமிங்ஸூதி – ‘‘தும்ஹே தோ²கங் அதி⁴வாஸேத², மயங் தங் ஆனெஸ்ஸாமா’’தி பிதரங் ஸமஸ்ஸாஸெத்வா உபஸங்கமிங்ஸு. உச்சாவசாதி நானாவிதா⁴. ஏகஸதங் ஏகஸதந்தி ஏகேகங் ஸதங் ஸதங் கத்வா. குமாரிவண்ணஸதந்தி இமினா நயேன குமாரிஅத்தபா⁴வானங் ஸதங்.
Upasaṅkamiṃsūti – ‘‘tumhe thokaṃ adhivāsetha, mayaṃ taṃ ānessāmā’’ti pitaraṃ samassāsetvā upasaṅkamiṃsu. Uccāvacāti nānāvidhā. Ekasataṃ ekasatanti ekekaṃ sataṃ sataṃ katvā. Kumārivaṇṇasatanti iminā nayena kumāriattabhāvānaṃ sataṃ.
அத்த²ஸ்ஸ பத்திங் ஹத³யஸ்ஸ ஸந்திந்தி, த்³வீஹிபி பதே³ஹி அரஹத்தமேவ கதே²ஸி. ஸேனந்தி கிலேஸஸேனங். ஸா ஹி பியரூபஸாதரூபா நாம. ஏகாஹங் ஜா²யந்தி ஏகோ அஹங் ஜா²யந்தோ. ஸுக²மனுபோ³தி⁴ந்தி அரஹத்தஸுக²ங் அனுபு³ஜ்ஜி²ங். இத³ங் வுத்தங் ஹோதி – பியரூபங் ஸாதரூபங் ஸேனங் ஜினித்வா அஹங் ஏகோ ஜா²யந்தோ ‘‘அத்த²ஸ்ஸ பத்திங் ஹத³யஸ்ஸ ஸந்தி’’ந்தி ஸங்க²ங் க³தங் அரஹத்தஸுக²ங் அனுபு³ஜ்ஜி²ங். தஸ்மா ஜனேன மித்தஸந்த²வங் ந கரோமி, தேனேவ ச மே காரணேன கேனசி ஸத்³தி⁴ங் ஸக்கீ² ந ஸம்பஜ்ஜதீதி.
Atthassapattiṃ hadayassa santinti, dvīhipi padehi arahattameva kathesi. Senanti kilesasenaṃ. Sā hi piyarūpasātarūpā nāma. Ekāhaṃ jhāyanti eko ahaṃ jhāyanto. Sukhamanubodhinti arahattasukhaṃ anubujjhiṃ. Idaṃ vuttaṃ hoti – piyarūpaṃ sātarūpaṃ senaṃ jinitvā ahaṃ eko jhāyanto ‘‘atthassa pattiṃ hadayassa santi’’nti saṅkhaṃ gataṃ arahattasukhaṃ anubujjhiṃ. Tasmā janena mittasanthavaṃ na karomi, teneva ca me kāraṇena kenaci saddhiṃ sakkhī na sampajjatīti.
கத²ங்விஹாரீப³ஹுலோதி கதமேன விஹாரேன ப³ஹுலங் விஹரந்தோ. அலத்³தா⁴தி அலபி⁴த்வா. யோதி நிபாதமத்தங். இத³ங் வுத்தங் ஹோதி – கதமேன ஜா²னேன ப³ஹுலங் ஜா²யந்தங் தங் புக்³க³லங் காமஸஞ்ஞா அலபி⁴த்வாவ பரிபா³ஹிரா ஹொந்தீதி.
Kathaṃvihārībahuloti katamena vihārena bahulaṃ viharanto. Aladdhāti alabhitvā. Yoti nipātamattaṃ. Idaṃ vuttaṃ hoti – katamena jhānena bahulaṃ jhāyantaṃ taṃ puggalaṃ kāmasaññā alabhitvāva paribāhirā hontīti.
பஸ்ஸத்³த⁴காயோதி சதுத்த²ஜ்ஜா²னேன அஸ்ஸாஸபஸ்ஸாஸகாயஸ்ஸ பஸ்ஸத்³த⁴த்தா பஸ்ஸத்³த⁴காயோ. ஸுவிமுத்தசித்தோதி அரஹத்தப²லவிமுத்தியா ஸுட்டு² விமுத்தசித்தோ. அஸங்க²ரானோதி தயோ கம்மாபி⁴ஸங்கா²ரே அனபி⁴ஸங்க²ரொந்தோ. அனோகோதி அனாலயோ. அஞ்ஞாய த⁴ம்மந்தி சதுஸச்சத⁴ம்மங் ஜானித்வா. அவிதக்கஜா²யீதி அவிதக்கேன சதுத்த²ஜ்ஜா²னேன ஜா²யந்தோ. ந குப்பதீதிஆதீ³ஸு தோ³ஸேன ந குப்பதி, ராகே³ன ந ஸரதி, மோஹேன ந தீ²னோ. இமேஸு தீஸு மூலகிலேஸேஸு க³ஹிதேஸு தி³யட்³ட⁴கிலேஸஸஹஸ்ஸங் க³ஹிதமேவ ஹோதி. பட²மபதே³ன வா ப்³யாபாத³னீவரணங் க³ஹிதங், து³தியேன காமச்ச²ந்த³னீவரணங், ததியேன தி²னங் ஆதி³ங் கத்வா ஸேஸனீவரணானி. இதி இமினா நீவரணப்பஹானேன கீ²ணாஸவங் த³ஸ்ஸேதி.
Passaddhakāyoti catutthajjhānena assāsapassāsakāyassa passaddhattā passaddhakāyo. Suvimuttacittoti arahattaphalavimuttiyā suṭṭhu vimuttacitto. Asaṅkharānoti tayo kammābhisaṅkhāre anabhisaṅkharonto. Anokoti anālayo. Aññāya dhammanti catusaccadhammaṃ jānitvā. Avitakkajhāyīti avitakkena catutthajjhānena jhāyanto. Na kuppatītiādīsu dosena na kuppati, rāgena na sarati, mohena na thīno. Imesu tīsu mūlakilesesu gahitesu diyaḍḍhakilesasahassaṃ gahitameva hoti. Paṭhamapadena vā byāpādanīvaraṇaṃ gahitaṃ, dutiyena kāmacchandanīvaraṇaṃ, tatiyena thinaṃ ādiṃ katvā sesanīvaraṇāni. Iti iminā nīvaraṇappahānena khīṇāsavaṃ dasseti.
பஞ்சோக⁴திண்ணோதி பஞ்சத்³வாரிகங் கிலேஸோக⁴ங் திண்ணோ. ச²ட்ட²ந்தி மனொத்³வாரிகம்பி ச²ட்ட²ங் கிலேஸோக⁴ங் அதரி. பஞ்சோக⁴க்³க³ஹணேன வா பஞ்சோரம்பா⁴கி³யானி ஸங்யோஜனானி , ச²ட்ட²க்³க³ஹணேன பஞ்சுத்³த⁴ம்பா⁴கி³யானி வேதி³தப்³பா³னி. க³ணஸங்க⁴சாரீதி க³ணே ச ஸங்கே⁴ ச சரதீதி ஸத்தா² க³ணஸங்க⁴சாரீ நாம. அத்³தா⁴ சரிஸ்ஸந்தீதி அஞ்ஞேபி ஸத்³தா⁴ ப³ஹுஜனா ஏகங்ஸேன சரிஸ்ஸந்தி. அயந்தி அயங் ஸத்தா². அனோகோதி அனாலயோ.
Pañcoghatiṇṇoti pañcadvārikaṃ kilesoghaṃ tiṇṇo. Chaṭṭhanti manodvārikampi chaṭṭhaṃ kilesoghaṃ atari. Pañcoghaggahaṇena vā pañcorambhāgiyāni saṃyojanāni , chaṭṭhaggahaṇena pañcuddhambhāgiyāni veditabbāni. Gaṇasaṅghacārīti gaṇe ca saṅghe ca caratīti satthā gaṇasaṅghacārī nāma. Addhā carissantīti aññepi saddhā bahujanā ekaṃsena carissanti. Ayanti ayaṃ satthā. Anokoti anālayo.
அச்சே²ஜ்ஜ நெஸ்ஸதீதி அச்சி²ந்தி³த்வா நயிஸ்ஸதி, மச்சுராஜஸ்ஸ ஹத்த²தோ அச்சி²ந்தி³த்வா நிப்³பா³னபாரங் நயிஸ்ஸதீதி வுத்தங் ஹோதி. நயமானானந்தி நயமானேஸு.
Acchejjanessatīti acchinditvā nayissati, maccurājassa hatthato acchinditvā nibbānapāraṃ nayissatīti vuttaṃ hoti. Nayamānānanti nayamānesu.
ஸேலங்வ ஸிரஸூஹச்ச, பாதாலே கா³த⁴மேஸதா²தி மஹந்தங் கூடாகா³ரப்பமாணங் ஸிலங் ஸீஸே ட²பெத்வா பாதாலே பதிட்ட²க³வேஸனங் விய. கா²ணுங்வ உரஸாஸஜ்ஜாதி உரஸி கா²ணுங் பஹரித்வா விய. அபேதா²தி அபக³ச்ச²த². இமஸ்மிங் டா²னே ஸங்கீ³திகாரா ‘‘இத³மவோசா’’தி தே³ஸனங் நிட்ட²பெத்வா த³த்³த³ல்லமானாதி கா³த²ங் ஆஹங்ஸு. தத்த² த³த்³த³ல்லமானாதி அதிவிய ஜலமானா ஸோப⁴மானா. ஆக³ஞ்சு²ந்தி ஆக³தா. பனுதீ³தி நீஹரி. தூலங் ப⁴ட்ட²ங்வ மாலுதோதி யதா² ப²லதோ ப⁴ட்ட²ங் ஸிம்ப³லிதூலங் வா போடகிதூலங் வா வாதோ பனுத³தி நீஹரதி, ஏவங் பனுதீ³தி. பஞ்சமங்.
Selaṃva sirasūhacca, pātāle gādhamesathāti mahantaṃ kūṭāgārappamāṇaṃ silaṃ sīse ṭhapetvā pātāle patiṭṭhagavesanaṃ viya. Khāṇuṃva urasāsajjāti urasi khāṇuṃ paharitvā viya. Apethāti apagacchatha. Imasmiṃ ṭhāne saṅgītikārā ‘‘idamavocā’’ti desanaṃ niṭṭhapetvā daddallamānāti gāthaṃ āhaṃsu. Tattha daddallamānāti ativiya jalamānā sobhamānā. Āgañchunti āgatā. Panudīti nīhari. Tūlaṃ bhaṭṭhaṃva mālutoti yathā phalato bhaṭṭhaṃ simbalitūlaṃ vā poṭakitūlaṃ vā vāto panudati nīharati, evaṃ panudīti. Pañcamaṃ.
ததியோ வக்³கோ³.
Tatiyo vaggo.
இதி ஸாரத்த²ப்பகாஸினியா
Iti sāratthappakāsiniyā
ஸங்யுத்தனிகாய-அட்ட²கதா²ய
Saṃyuttanikāya-aṭṭhakathāya
மாரஸங்யுத்தவண்ணனா நிட்டி²தா.
Mārasaṃyuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. மாரதீ⁴துஸுத்தங் • 5. Māradhītusuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. மாரதீ⁴துஸுத்தவண்ணனா • 5. Māradhītusuttavaṇṇanā
