| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৫. মারধীতুসুত্তৰণ্ণনা
5. Māradhītusuttavaṇṇanā
১৬১. পঞ্চমে অভাসিত্ৰাতি এত্থ অ-কারো নিপাতমত্তং, ভাসিত্ৰাতি অত্থো। অভাসযিত্ৰাতিপি পাঠো। উপসঙ্কমিংসূতি ‘‘গোপালকদারকং ৰিয দণ্ডকেন ভূমিং লেখং দত্ৰা অতিৰিয দুম্মনো হুত্ৰা নিসিন্নো। ‘কিন্নু খো কারণ’ন্তি? পুচ্ছিত্ৰা, জানিস্সামা’’তি উপসঙ্কমিংসু।
161. Pañcame abhāsitvāti ettha a-kāro nipātamattaṃ, bhāsitvāti attho. Abhāsayitvātipi pāṭho. Upasaṅkamiṃsūti ‘‘gopālakadārakaṃ viya daṇḍakena bhūmiṃ lekhaṃ datvā ativiya dummano hutvā nisinno. ‘Kinnu kho kāraṇa’nti? Pucchitvā, jānissāmā’’ti upasaṅkamiṃsu.
সোচসীতি চিন্তেসি। আরঞ্ঞমিৰ কুঞ্জরন্তি যথা অরঞ্ঞতো পেসিতগণিকারহত্থিনিযো আরঞ্ঞকং কুঞ্জরং ইত্থিকুত্তদস্সনেন পলোভেত্ৰা বন্ধিত্ৰা আনযন্তি, এৰং আনযিস্সাম। মারধেয্যন্তি তেভূমকৰট্টং।
Socasīti cintesi. Āraññamiva kuñjaranti yathā araññato pesitagaṇikārahatthiniyo āraññakaṃ kuñjaraṃ itthikuttadassanena palobhetvā bandhitvā ānayanti, evaṃ ānayissāma. Māradheyyanti tebhūmakavaṭṭaṃ.
উপসঙ্কমিংসূতি – ‘‘তুম্হে থোকং অধিৰাসেথ, মযং তং আনেস্সামা’’তি পিতরং সমস্সাসেত্ৰা উপসঙ্কমিংসু। উচ্চাৰচাতি নানাৰিধা। একসতং একসতন্তি একেকং সতং সতং কত্ৰা। কুমারিৰণ্ণসতন্তি ইমিনা নযেন কুমারিঅত্তভাৰানং সতং।
Upasaṅkamiṃsūti – ‘‘tumhe thokaṃ adhivāsetha, mayaṃ taṃ ānessāmā’’ti pitaraṃ samassāsetvā upasaṅkamiṃsu. Uccāvacāti nānāvidhā. Ekasataṃ ekasatanti ekekaṃ sataṃ sataṃ katvā. Kumārivaṇṇasatanti iminā nayena kumāriattabhāvānaṃ sataṃ.
অত্থস্স পত্তিং হদযস্স সন্তিন্তি, দ্ৰীহিপি পদেহি অরহত্তমেৰ কথেসি। সেনন্তি কিলেসসেনং। সা হি পিযরূপসাতরূপা নাম। একাহং ঝাযন্তি একো অহং ঝাযন্তো। সুখমনুবোধিন্তি অরহত্তসুখং অনুবুজ্ঝিং। ইদং ৰুত্তং হোতি – পিযরূপং সাতরূপং সেনং জিনিত্ৰা অহং একো ঝাযন্তো ‘‘অত্থস্স পত্তিং হদযস্স সন্তি’’ন্তি সঙ্খং গতং অরহত্তসুখং অনুবুজ্ঝিং। তস্মা জনেন মিত্তসন্থৰং ন করোমি, তেনেৰ চ মে কারণেন কেনচি সদ্ধিং সক্খী ন সম্পজ্জতীতি।
Atthassapattiṃ hadayassa santinti, dvīhipi padehi arahattameva kathesi. Senanti kilesasenaṃ. Sā hi piyarūpasātarūpā nāma. Ekāhaṃ jhāyanti eko ahaṃ jhāyanto. Sukhamanubodhinti arahattasukhaṃ anubujjhiṃ. Idaṃ vuttaṃ hoti – piyarūpaṃ sātarūpaṃ senaṃ jinitvā ahaṃ eko jhāyanto ‘‘atthassa pattiṃ hadayassa santi’’nti saṅkhaṃ gataṃ arahattasukhaṃ anubujjhiṃ. Tasmā janena mittasanthavaṃ na karomi, teneva ca me kāraṇena kenaci saddhiṃ sakkhī na sampajjatīti.
কথংৰিহারীবহুলোতি কতমেন ৰিহারেন বহুলং ৰিহরন্তো। অলদ্ধাতি অলভিত্ৰা। যোতি নিপাতমত্তং। ইদং ৰুত্তং হোতি – কতমেন ঝানেন বহুলং ঝাযন্তং তং পুগ্গলং কামসঞ্ঞা অলভিত্ৰাৰ পরিবাহিরা হোন্তীতি।
Kathaṃvihārībahuloti katamena vihārena bahulaṃ viharanto. Aladdhāti alabhitvā. Yoti nipātamattaṃ. Idaṃ vuttaṃ hoti – katamena jhānena bahulaṃ jhāyantaṃ taṃ puggalaṃ kāmasaññā alabhitvāva paribāhirā hontīti.
পস্সদ্ধকাযোতি চতুত্থজ্ঝানেন অস্সাসপস্সাসকাযস্স পস্সদ্ধত্তা পস্সদ্ধকাযো। সুৰিমুত্তচিত্তোতি অরহত্তফলৰিমুত্তিযা সুট্ঠু ৰিমুত্তচিত্তো। অসঙ্খরানোতি তযো কম্মাভিসঙ্খারে অনভিসঙ্খরোন্তো। অনোকোতি অনালযো। অঞ্ঞায ধম্মন্তি চতুসচ্চধম্মং জানিত্ৰা। অৰিতক্কঝাযীতি অৰিতক্কেন চতুত্থজ্ঝানেন ঝাযন্তো। ন কুপ্পতীতিআদীসু দোসেন ন কুপ্পতি, রাগেন ন সরতি, মোহেন ন থীনো। ইমেসু তীসু মূলকিলেসেসু গহিতেসু দিযড্ঢকিলেসসহস্সং গহিতমেৰ হোতি। পঠমপদেন ৰা ব্যাপাদনীৰরণং গহিতং, দুতিযেন কামচ্ছন্দনীৰরণং, ততিযেন থিনং আদিং কত্ৰা সেসনীৰরণানি। ইতি ইমিনা নীৰরণপ্পহানেন খীণাসৰং দস্সেতি।
Passaddhakāyoti catutthajjhānena assāsapassāsakāyassa passaddhattā passaddhakāyo. Suvimuttacittoti arahattaphalavimuttiyā suṭṭhu vimuttacitto. Asaṅkharānoti tayo kammābhisaṅkhāre anabhisaṅkharonto. Anokoti anālayo. Aññāya dhammanti catusaccadhammaṃ jānitvā. Avitakkajhāyīti avitakkena catutthajjhānena jhāyanto. Na kuppatītiādīsu dosena na kuppati, rāgena na sarati, mohena na thīno. Imesu tīsu mūlakilesesu gahitesu diyaḍḍhakilesasahassaṃ gahitameva hoti. Paṭhamapadena vā byāpādanīvaraṇaṃ gahitaṃ, dutiyena kāmacchandanīvaraṇaṃ, tatiyena thinaṃ ādiṃ katvā sesanīvaraṇāni. Iti iminā nīvaraṇappahānena khīṇāsavaṃ dasseti.
পঞ্চোঘতিণ্ণোতি পঞ্চদ্ৰারিকং কিলেসোঘং তিণ্ণো। ছট্ঠন্তি মনোদ্ৰারিকম্পি ছট্ঠং কিলেসোঘং অতরি। পঞ্চোঘগ্গহণেন ৰা পঞ্চোরম্ভাগিযানি সংযোজনানি , ছট্ঠগ্গহণেন পঞ্চুদ্ধম্ভাগিযানি ৰেদিতব্বানি। গণসঙ্ঘচারীতি গণে চ সঙ্ঘে চ চরতীতি সত্থা গণসঙ্ঘচারী নাম। অদ্ধা চরিস্সন্তীতি অঞ্ঞেপি সদ্ধা বহুজনা একংসেন চরিস্সন্তি। অযন্তি অযং সত্থা। অনোকোতি অনালযো।
Pañcoghatiṇṇoti pañcadvārikaṃ kilesoghaṃ tiṇṇo. Chaṭṭhanti manodvārikampi chaṭṭhaṃ kilesoghaṃ atari. Pañcoghaggahaṇena vā pañcorambhāgiyāni saṃyojanāni , chaṭṭhaggahaṇena pañcuddhambhāgiyāni veditabbāni. Gaṇasaṅghacārīti gaṇe ca saṅghe ca caratīti satthā gaṇasaṅghacārī nāma. Addhā carissantīti aññepi saddhā bahujanā ekaṃsena carissanti. Ayanti ayaṃ satthā. Anokoti anālayo.
অচ্ছেজ্জ নেস্সতীতি অচ্ছিন্দিত্ৰা নযিস্সতি, মচ্চুরাজস্স হত্থতো অচ্ছিন্দিত্ৰা নিব্বানপারং নযিস্সতীতি ৰুত্তং হোতি। নযমানানন্তি নযমানেসু।
Acchejjanessatīti acchinditvā nayissati, maccurājassa hatthato acchinditvā nibbānapāraṃ nayissatīti vuttaṃ hoti. Nayamānānanti nayamānesu.
সেলংৰ সিরসূহচ্চ, পাতালে গাধমেসথাতি মহন্তং কূটাগারপ্পমাণং সিলং সীসে ঠপেত্ৰা পাতালে পতিট্ঠগৰেসনং ৰিয। খাণুংৰ উরসাসজ্জাতি উরসি খাণুং পহরিত্ৰা ৰিয। অপেথাতি অপগচ্ছথ। ইমস্মিং ঠানে সঙ্গীতিকারা ‘‘ইদমৰোচা’’তি দেসনং নিট্ঠপেত্ৰা দদ্দল্লমানাতি গাথং আহংসু। তত্থ দদ্দল্লমানাতি অতিৰিয জলমানা সোভমানা। আগঞ্ছুন্তি আগতা। পনুদীতি নীহরি। তূলং ভট্ঠংৰ মালুতোতি যথা ফলতো ভট্ঠং সিম্বলিতূলং ৰা পোটকিতূলং ৰা ৰাতো পনুদতি নীহরতি, এৰং পনুদীতি। পঞ্চমং।
Selaṃva sirasūhacca, pātāle gādhamesathāti mahantaṃ kūṭāgārappamāṇaṃ silaṃ sīse ṭhapetvā pātāle patiṭṭhagavesanaṃ viya. Khāṇuṃva urasāsajjāti urasi khāṇuṃ paharitvā viya. Apethāti apagacchatha. Imasmiṃ ṭhāne saṅgītikārā ‘‘idamavocā’’ti desanaṃ niṭṭhapetvā daddallamānāti gāthaṃ āhaṃsu. Tattha daddallamānāti ativiya jalamānā sobhamānā. Āgañchunti āgatā. Panudīti nīhari. Tūlaṃ bhaṭṭhaṃva mālutoti yathā phalato bhaṭṭhaṃ simbalitūlaṃ vā poṭakitūlaṃ vā vāto panudati nīharati, evaṃ panudīti. Pañcamaṃ.
ততিযো ৰগ্গো।
Tatiyo vaggo.
ইতি সারত্থপ্পকাসিনিযা
Iti sāratthappakāsiniyā
সংযুত্তনিকায-অট্ঠকথায
Saṃyuttanikāya-aṭṭhakathāya
মারসংযুত্তৰণ্ণনা নিট্ঠিতা।
Mārasaṃyuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৫. মারধীতুসুত্তং • 5. Māradhītusuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. মারধীতুসুত্তৰণ্ণনা • 5. Māradhītusuttavaṇṇanā
