| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৫. মারধীতুসুত্তৰণ্ণনা
5. Māradhītusuttavaṇṇanā
১৬১. চিন্তেসীতি সোকৰসিকো হুত্ৰা চিন্তযি। গণিকারহত্থিনিযোতি দীপককরেণুযো। একসতং একসতন্তি একসতং একসতং পচ্চেকং সতং সতন্তি অত্থো। তেনাহ ‘‘একেকং সতং সতং কত্ৰা’’তি। কুমারিৰণ্ণসতন্তি কুমারিত্থীনং অত্তভাৰানং সতং। তা কির পঠমং কঞ্ঞারূপেন অত্তানং দস্সেসুং। অনুপগতপুপ্ফানঞ্হি সমঞ্ঞা কঞ্ঞাতি। পুন যথাৰুত্তকুমারিরূপেন উপগতপুপ্ফা হি কুমারী। পুন ৰধুকারূপেন। তং সন্ধায ৰুত্তং ‘‘অৰিজাতৰণ্ণসত’’ন্তি । ততিযৰারে যুৰতিরূপেন। ৰিজাতা হি ইত্থী অনতিক্কন্তমজ্ঝিমৰযা যুৰতী। এত্তাৰতা বালা তরুণী পোরীতি তিৰিধাসু ইত্থীসু পুরিমা দ্ৰে দস্সিতা, পরিযোসানৰারেসু মনুস্সজাতিকানং মনুস্সিত্থিযোৰ রুচ্চন্তীতি তেন মনুস্সরূপেন তা অত্তানং দস্সেসুং।
161.Cintesīti sokavasiko hutvā cintayi. Gaṇikārahatthiniyoti dīpakakareṇuyo. Ekasataṃ ekasatanti ekasataṃ ekasataṃ paccekaṃ sataṃ satanti attho. Tenāha ‘‘ekekaṃ sataṃ sataṃ katvā’’ti. Kumārivaṇṇasatanti kumāritthīnaṃ attabhāvānaṃ sataṃ. Tā kira paṭhamaṃ kaññārūpena attānaṃ dassesuṃ. Anupagatapupphānañhi samaññā kaññāti. Puna yathāvuttakumārirūpena upagatapupphā hi kumārī. Puna vadhukārūpena. Taṃ sandhāya vuttaṃ ‘‘avijātavaṇṇasata’’nti . Tatiyavāre yuvatirūpena. Vijātā hi itthī anatikkantamajjhimavayā yuvatī. Ettāvatā bālā taruṇī porīti tividhāsu itthīsu purimā dve dassitā, pariyosānavāresu manussajātikānaṃ manussitthiyova ruccantīti tena manussarūpena tā attānaṃ dassesuṃ.
অত্থস্স পত্তিন্তি একন্ততো হিতানুপ্পত্তিং। হদযস্স সন্তিন্তি পরমচিত্তুপসমং। কিলেসসেনন্তি কামগুণসঙ্খাতং পঠমং কিলেসসেনং। সা হি কিলেসসেনা অচ্ছরাসঙ্ঘাতসভাৰাপি পটিপত্থযমানা পিযাযিতব্বইচ্ছিতব্বরূপভাৰতো পিযরূপসাতরূপা নাম অত্তনো কিচ্চৰসেন। একো অহং ঝাযন্তোতি গণসঙ্গণিকায কিলেসসঙ্গণিকায চ অভাৰতো একো অসহাযো অহং লক্খণূপনিজ্ঝানেন নিজ্ঝাযন্তো। অনুবুজ্ঝিন্তি অনুক্কমেন মগ্গপটিপাটিযা বুজ্ঝিং পটিবুজ্ঝিং। তস্মাতি যথাৰুত্তৰিৰেকসুখসমধিগমনিমিত্তং। অকরণেনাতি মিত্তসন্থৰস্স অকরণেন। সক্খীতি সক্খিভাৰো।
Atthassa pattinti ekantato hitānuppattiṃ. Hadayassa santinti paramacittupasamaṃ. Kilesasenanti kāmaguṇasaṅkhātaṃ paṭhamaṃ kilesasenaṃ. Sā hi kilesasenā accharāsaṅghātasabhāvāpi paṭipatthayamānā piyāyitabbaicchitabbarūpabhāvato piyarūpasātarūpā nāma attano kiccavasena. Eko ahaṃ jhāyantoti gaṇasaṅgaṇikāya kilesasaṅgaṇikāya ca abhāvato eko asahāyo ahaṃ lakkhaṇūpanijjhānena nijjhāyanto. Anubujjhinti anukkamena maggapaṭipāṭiyā bujjhiṃ paṭibujjhiṃ. Tasmāti yathāvuttavivekasukhasamadhigamanimittaṃ. Akaraṇenāti mittasanthavassa akaraṇena. Sakkhīti sakkhibhāvo.
কতমেন ৰিহারেনাতি ঝানসমাপত্তীনং কতমেন ৰিহারেন। ইধ দুতিযপদস্স অত্থো ৰিস্সজ্জনগাথাৰণ্ণনাযমেৰ আৰি ভৰিস্সতি। অনামন্তেন ‘‘তং পুগ্গল’’ন্তি সম্মুখা ঠিতম্পি ভগৰন্তং অসম্মুখা ৰিয কত্ৰা ৰদতি, কথং ত্ৰন্তি অত্থো।
Katamenavihārenāti jhānasamāpattīnaṃ katamena vihārena. Idha dutiyapadassa attho vissajjanagāthāvaṇṇanāyameva āvi bhavissati. Anāmantena ‘‘taṃ puggala’’nti sammukhā ṭhitampi bhagavantaṃ asammukhā viya katvā vadati, kathaṃ tvanti attho.
‘‘অৰিতক্কঝাযী’’তি ৰক্খমানত্তা অযমেৰেত্থ কাযপস্সদ্ধি ৰেদিতব্বাতি আহ ‘‘চতুত্থজ্ঝানেন অস্সাসপস্সাসকাযস্স পস্সদ্ধত্তা পস্সদ্ধকাযো’’তি। পুঞ্ঞাভিসঙ্খারাদিকে কম্মাভিসঙ্খারে। কামালযাদীনং অভাৰতো অনালযো। ন সরতীতি ন সৰতি। রাগৰসেন হি সত্তা সংসারমনুসৰন্তি। ন থিনোতি ন থিনমিদ্ধচিত্তো। মোহৰসেন হি সত্তা থিনমিদ্ধং আপজ্জন্তীতি। দিযড্ঢকিলেসসহস্সন্তি খুদ্দকৰত্থুৰিভঙ্গে (ৰিভ॰ ৮৪২, ৯৭৬) আগতেসু অট্ঠসু কিলেসসতেসু অট্ঠসতং তণ্হাৰিচরিতানি অপনেত্ৰা সেসা পঞ্ঞাসাধিকং সতং কিলেসা, তে ব্রহ্মজালে (দী॰ নি॰ ১.৩১) আগতাহি দ্ৰাসট্ঠিযা দিট্ঠীহি সহ পঞ্চপঞ্ঞাসাধিকং সত্তসতং হোতি; তা চ উপ্পন্নানুপ্পন্নভাৰেন দিগুণিতা দিযড্ঢকিলেসসহস্সং দসাধিকং হোতি; তং অপ্পকং পন ঊনমধিকং ৰা গণনুপগং ন হোতীতি ‘‘দিযড্ঢকিলেসসহস্স’’ন্তি ৰুত্তং। ইতরেসং অতীতাদিভাৰামসনতো অগ্গহণং পহানস্স অধিপ্পেতত্তা। অযমেত্থ সঙ্খেপো, ৰিত্থারো পন অভিধম্মটীকাযং (ধ॰ স॰ অনুটী॰ নিদানকথাৰণ্ণনা) ৰুত্তনযেন ৰেদিতব্বো। পঠমপদেনাতি ‘‘ন কুপ্পতী’’তি ইমিনা পদেন। দুতিযেনাতি ‘‘ন সরতী’’তি পদেন। ততিযেনাতি ‘‘ন থিনো’’তি পদেন। নীৰরণপ্পহানেন খীণাসৰতং দস্সেতি, অনৰসেসতো নীৰরণানং অচ্চন্তপ্পহানং অধিপ্পেতং।
‘‘Avitakkajhāyī’’ti vakkhamānattā ayamevettha kāyapassaddhi veditabbāti āha ‘‘catutthajjhānena assāsapassāsakāyassa passaddhattā passaddhakāyo’’ti. Puññābhisaṅkhārādike kammābhisaṅkhāre. Kāmālayādīnaṃ abhāvato anālayo. Na saratīti na savati. Rāgavasena hi sattā saṃsāramanusavanti. Na thinoti na thinamiddhacitto. Mohavasena hi sattā thinamiddhaṃ āpajjantīti. Diyaḍḍhakilesasahassanti khuddakavatthuvibhaṅge (vibha. 842, 976) āgatesu aṭṭhasu kilesasatesu aṭṭhasataṃ taṇhāvicaritāni apanetvā sesā paññāsādhikaṃ sataṃ kilesā, te brahmajāle (dī. ni. 1.31) āgatāhi dvāsaṭṭhiyā diṭṭhīhi saha pañcapaññāsādhikaṃ sattasataṃ hoti; tā ca uppannānuppannabhāvena diguṇitā diyaḍḍhakilesasahassaṃ dasādhikaṃ hoti; taṃ appakaṃ pana ūnamadhikaṃ vā gaṇanupagaṃ na hotīti ‘‘diyaḍḍhakilesasahassa’’nti vuttaṃ. Itaresaṃ atītādibhāvāmasanato aggahaṇaṃ pahānassa adhippetattā. Ayamettha saṅkhepo, vitthāro pana abhidhammaṭīkāyaṃ (dha. sa. anuṭī. nidānakathāvaṇṇanā) vuttanayena veditabbo. Paṭhamapadenāti ‘‘na kuppatī’’ti iminā padena. Dutiyenāti ‘‘na saratī’’ti padena. Tatiyenāti ‘‘na thino’’ti padena. Nīvaraṇappahānena khīṇāsavataṃ dasseti, anavasesato nīvaraṇānaṃ accantappahānaṃ adhippetaṃ.
পঞ্চদ্ৰারিককিলেসোঘং তিণ্ণোতি ছন্নং দ্ৰারানং ৰসেন পৰত্তনকিলেসোঘং তরিত্ৰা ঠিতো। কামোঘদিট্ঠোঘভৰোঘট্ঠকিলেসভাৰতো ‘‘পঞ্চোঘগ্গহণেন ৰা পঞ্চোরম্ভাগিযানি সংযোজনানি ৰেদিতব্বানী’’তি আহ। রূপরাগাদযো ৰিসেসতো ন পঞ্চদ্ৰারিকাতি ৰুত্তং ‘‘ছট্ঠগ্গহণেন পঞ্চুদ্ধম্ভাগিযানি ৰেদিতব্বানী’’তি।
Pañcadvārikakilesoghaṃ tiṇṇoti channaṃ dvārānaṃ vasena pavattanakilesoghaṃ taritvā ṭhito. Kāmoghadiṭṭhoghabhavoghaṭṭhakilesabhāvato ‘‘pañcoghaggahaṇena vā pañcorambhāgiyāni saṃyojanāni veditabbānī’’ti āha. Rūparāgādayo visesato na pañcadvārikāti vuttaṃ ‘‘chaṭṭhaggahaṇena pañcuddhambhāgiyāni veditabbānī’’ti.
মচ্চুরাজস্সাতি সম্বন্ধে সামিৰচনন্তি দস্সেন্তো ‘‘মচ্চুরাজস্স হত্থতো’’তি আহ। নযমানানন্তি অনাদরে সামিৰচনন্তি কত্ৰা ৰুত্তং ‘‘নযমানেসূ’’তি।
Maccurājassāti sambandhe sāmivacananti dassento ‘‘maccurājassa hatthato’’ti āha. Nayamānānanti anādare sāmivacananti katvā vuttaṃ ‘‘nayamānesū’’ti.
ঊহচ্চাতি বুদ্ধং নিস্সায। ‘‘ইদমৰোচা’’তি দেসনং নিট্ঠাপেত্ৰাতি এতেন সংযুত্তেসু অযং নিগমনপাল়ি, হেট্ঠা অনাগতনযত্তা পন কেসুচি পোত্থকেসু ন লিখীযতীতি দস্সেতি। দদ্দল্লমানাতি জজ্জকারস্স হি দদ্দকারং কত্ৰা নিদ্দেসো। তেনাহ ‘‘অতিৰিয জলমানা’’তি। নীহরীতি তাসং কাযৰচীৰিকারং ন মনসিকরোন্তো তিণাযপি অমঞ্ঞমানোৰ অনপেক্খেনেৰ নীহরি। ফলতো ভট্ঠন্তি ফলসিপাটিকতো ভট্ঠং। কুণ্ডতিণাদিগচ্ছতূলং পোটকিতূলং।
Ūhaccāti buddhaṃ nissāya. ‘‘Idamavocā’’ti desanaṃ niṭṭhāpetvāti etena saṃyuttesu ayaṃ nigamanapāḷi, heṭṭhā anāgatanayattā pana kesuci potthakesu na likhīyatīti dasseti. Daddallamānāti jajjakārassa hi daddakāraṃ katvā niddeso. Tenāha ‘‘ativiya jalamānā’’ti. Nīharīti tāsaṃ kāyavacīvikāraṃ na manasikaronto tiṇāyapi amaññamānova anapekkheneva nīhari. Phalato bhaṭṭhanti phalasipāṭikato bhaṭṭhaṃ. Kuṇḍatiṇādigacchatūlaṃ poṭakitūlaṃ.
মারধীতুসুত্তৰণ্ণনা নিট্ঠিতা।
Māradhītusuttavaṇṇanā niṭṭhitā.
ততিযৰগ্গৰণ্ণনা নিট্ঠিতা।
Tatiyavaggavaṇṇanā niṭṭhitā.
সারত্থপ্পকাসিনিযা সংযুত্তনিকায-অট্ঠকথায
Sāratthappakāsiniyā saṃyuttanikāya-aṭṭhakathāya
মারসংযুত্তৰণ্ণনায লীনত্থপ্পকাসনা সমত্তা।
Mārasaṃyuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৫. মারধীতুসুত্তং • 5. Māradhītusuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. মারধীতুসুত্তৰণ্ণনা • 5. Māradhītusuttavaṇṇanā
